Manag-ebanghelyo so Amin a Tuan Kristianos
Manag-ebanghelyo so Amin a Tuan Kristianos
“Kantaan yo si Jehova, galgalangen yo so ngaran to; ipanengneng yo so panangilaban to ya inagew-agew.”—SALMO 96:2.
1. Anton maong a balita so nakaukolan a narengelan na totoo, tan panon a nagmaliw a napanuliranan iray Tastasi nen Jehova diad panangikayat ed satan a balita?
DIAD mundon inagew-agew a nagagawa iray desyang, talagan makaligliwa so pakaamtan iyaabawag na Biblia so magano lan pangangga na bakal, krimen, eras, tan kapapairap. (Salmo 46:9; 72:3, 7, 8, 12, 16) On, agta saya so maong a balita a nakaukolan a narengel na amin? Ontan so panmoria na saray Tastasi nen Jehova. Kabkabat ira ed nanduruman pasen bilang manangipulong ed “maong a balita nipaakar ed bengatlan mas maabig.” (Isaias 52:7, NW) Tua, dakel a Tastasi so anagmak na panamasegsegang lapud determinasyon dan mangipasabi ed maong a balita. Balet ta nononoten da so pankaabigan na totoo. Tan agaylan inkaseseg tan inkamapeleng so abayuboan la na saray Tastasi!
2. Anto so sakey a rason ed inkaseseg na saray Tastasi nen Jehova?
2 Say inkaseseg na saray Tastasi nen Jehova natan so mipadpara ed saray inmunan-siglon Kristiano. Nipaakar ed sikara, oniay dugan inkuan na L’Osservatore Romano, a peryodiko na Romanon Katoliko: “Saray inmunan Kristiano, no abautismoan la ra, et ipapasen dan obligasyon da so mangikayat ed Ebanghelyo. Panamegley na insangin pitatalosan, saray aripen so angipasabi ed Ebanghelyo.” Akin ya ontanlay inkaseseg na saray Tastasi nen Jehova, a singa ed saramay inmuunan Kristiano? Unona et lapud say maong a balita ya ipupulong da so manlalapu a mismo ed si Jehova a Dios. Wala ni kasi magmaong a rason ed ontan ya inkaseseg da? Say panagpulong a kimey da so kiwas ed saray salita na salmista: “Kantaan yo si Jehova, galgalangen yo so ngaran to; ipanengneng yo so panangilaban to ya inagew-agew.”—Salmo 96:2.
3. (a) Anto so komaduan rason ed inkaseseg na saray Tastasi nen Jehova? (b) Anto so lalanoren na “panangilaban [na Dios]”?
3 Ipapanonot ed sikatayo na saray salita na salmista so komaduan rason na inkaseseg na saray Tastasi nen Jehova. Say mensahe ra et nipaakar ed kilalaban. Mankikimey iray pigaran indibidual ed medikal, sosyal, ekonomiko, odino arum niran lawak pian paaligwasen so kalidad na bilay na kaparan totoo, tan nakomendaan iratan a sagpot. Balet antokaman a nagawaan na sakey a too parad sananey so limitadon tuloy no ikompara ed “panangilaban [na Dios].” Panamegley nen Jesu-Kristo, isalba nen Jehova iray mauyamo manlapud kasalanan, sakit, tan ipapatey. Saramay nagunggonaan so manbilay ya ando lan ando! (Juan 3:16, 36; Apocalipsis 21:3, 4) Natan, say panangilaban so kabiangan ed “makapakelaw a gawagawa” a nanodnonotan na saray Kristiano sano onkiwas ira ed saray salitan: “Ipaamta yo so gloria [na Dios] ed leeleet na nasyon, tan ipaamta yo so makapakelaw a gawagawa to ra ed leeleet na amin a katooan. Ta si Jehova balbaleg, tan balbaleg a tuloy a nepeg to so daydayewen: sikato so tatakotan ya alabas nen amin na saray kinondiosdios.”—Salmo 96:3, 4.
Say Alimbawa na Katawan
4-6. (a) Parad anton komatlon rason a maseseg iray Tastasi nen Jehova? (b) Panon ya impanengneng nen Jesus so inkaseseg ed kimey na panagpulong na maong a balita?
4 Maseseg iray Tastasi nen Jehova lapud komatlon rason. Tutumboken da so alimbawa nen Jesu-Kristo. (1 Pedro 2:21) Sayan ayadyarin too so interon-puson angawat ed asainmin a “mangipulong na saray maong a balita ed saray mauyamo.” (Isaias 61:1; Lucas 4:17-21) Kanian, sikato so nagmaliw ya ebanghelisador, sakey a manangiyabawag na maong a balita. Binaroy to so interon Galilea tan Judea, ya “impupulong to so ebanghelyo na panarian.” (Mateo 4:23) Tan lapud amta to a dakel so onkiwas ed satan a maong a balita, inkuanto ed saray babangatan to: “Dakel a tua so aaniyen, daiset ira balet so manani. Pikasi yo sirin ed Katawan na aaniyen, pian mangibaki na saray manani ed aaniyen to.”—Mateo 9:37, 38.
5 Mitunosan ed mismon pikakasi to, impasal nen Jesus so arum a magmaliw ya ebanghelisador. Sinmabi panaon, imbaki to laray apostol tan inkuanto ed sikara: “No onla kayo, manpulong kayo, a kuan yo, Say panarian na tawen asingger la.” Kasin mas praktikal no angiletneg ira na saray programa a mamakepa ed saray peles a problema ed sosyedad? Odino kaukolan da kasi so mibiang ed saray politika pian naamper so kasmak ya inkakurakot ed saman a panaon? Andi. Imbes, angiletneg si Jesus na estandarte parad amin a Kristianon ebanghelisador sanen inkuanto ed saray patumbok to: “No onla kayo, manpulong kayo.”—Mateo 10:5-7.
6 Saginonor, imbaki nen Jesus so sananey nin grupo na saray babangatan pian mangiyabawag: ‘Inmasingger la so panariay Dios.’ Sanen pinmawil ira pian ireport so aligwas na impan-ebanghelyo ra, aliketan a maong si Jesus. Oniay impikasi to: “Misalamat ak ed sika, O Ama, Katawan na tawen tan dalin, ta inyamot mo so sarayan bengatla ed saray makabat tan makatalos, et sikara so impasingawey mo ed saray ugugaw.” (Lucas 10:1, 8, 9, 21) Saray babangatan, a datin makulin managsigay, dumaralos, tan arum ni, et singa ugugaw ni no ikompara ed de-aral iran relihyoson lider na bansa. Balet nipasal iray babangatan pian iyabawag so sankaabigan ed amin a maong a balita.
7. Kayari na intokotok nen Jesus ed tawen, siopa so unonan angipulongan na saray patumbok ed maong a balita?
7 Kayari na intokotok nen Jesus ed tawen, saray patumbok to so nantultuloy ya angikayat ed maong a balita na kilalaban. (Gawa 2:21, 38-40) Siopa so pinulongan da nin unona? Kasin linma ra ed saray nasyon ya agmikabat ed Dios? Andi, say inmunan teritorya ra et say Israel, totoon mikabat ed si Jehova ed loob na masulok lan 1,500 a taon ed saman. Kasin walaan ira na kanepegan a manpulong ed bansa a dadayewen la ed saman si Jehova? On. Inkuan nen Jesus ed sikara: “Sikayo so tasik ed Jerusalem, tan ed amin a Judea tan Samaria, tan angga ed kasampotan na dalin.” (Gawa 1:8) Nakaukolan a dengelen na Israel so maong a balita a singa met ed dinanman nin nasyon.
8. Panon so pangaalig na saray Tastasi nen Jehova natan ed saray inmunan-siglon patumbok nen Jesus?
8 Diad mipadparan dalan, saray Tastasi nen Jehova natan so manpupulong ed interon dalin. Mikokoopera ira ed anghel ya anengneng nen Juan “a wala ed sikato so andi angga a maabig a balita pian sikato so ipulong to ed saray manaayam dia ed dalin, tan diad balang nasyon tan poli tan salita tan baley.” (Apocalipsis 14:6) Diad taon 2001, aktibo ira ed 235 a daldalin tan teritorya, pati arum a kaslakan a momoriaen a Kristianon daldalin. Kasin makapuy so pampulong na saray Tastasi nen Jehova ed lugar ya akaletnegan la na saray iglesia na Kakristianoan? Ibabaga na arum a makapuy itan tan nayarin ipasen ni ingen a satan a panag-ebanghelyo et “panagtakew na karnero.” Balet, nonodnonoten na saray Tastasi nen Jehova so liknaan nen Jesus parad saray mapaabeban Judio ed panaon to. Anggaman walaan la ra na inka-saserdote, agmasuyat si Jesus ya inabang ed sikara so maong a balita. “Inabagey to ra, lapud maermen tan abuybuyak ira, a singa saray karnero ya anggapoy pastol da.” (Mateo 9:36) Sano naromog na saray Tastasi nen Jehova so mapaabeban totoo ya agmikabat ed si Jehova tan ed Panarian to, nepeg da kasin ikibot so maong a balita ed saratan ya indibidual lapud dodominaen ira na sakey a relihyon? Bilang panumbok ed alimbawa na saray apostol nen Jesus, andi so ebat tayo. Say maong a balita so nepeg ya ipulong ed “amin a nasyones,” ya anggapoy ipupuera.—Marcos 13:10.
Nan-ebanghelyo so Amin ya Inmuunan Kristianos
9. Nen inmunan siglo, siopa ed Kristianon kongregasyon so akibiang ed panagpulong a kimey?
9 Siopa nen inmunan siglo so akibiang ed panagpulong a kimey? Ipapanengneng na saray katuaan ya amin a Kristiano et ebanghelisador. Oniay kuan nen autor a si W. S. Williams: “Say inkalapagan a testimonya et say amin a Kristiano ed orihinal ya Iglesia . . . so angipulong ed ebanghelyo.” Nipaakar ed saray agawa nen agew na Pentecostes 33 K.P., inkuan na Biblia: “Sikaray [lalaki tan bibii] napno ya amin na espiritu santo, et ginmapo ra a nansalita na salitan nagsikasikmat unong na impangiter ed sikara na espiritu a pakapansalita.” Saray ebanghelisador so angilaktip ed lalaki tan bibii, malangwer tan matakken, aripen tan bulos. (Gawa 1:14; 2:1, 4, 17, 18; Joel 2:28, 29; Galacia 3:28) Sanen apaskar so dakel a Kristiano ya ontaynan ed Jerusalem lapud panamasegsegang, “saray abuybuyak, nanakarakar ira ed amin a kadalinan ya angipulong na Salita.” (Gawa 8:4) Nan-ebanghelyo so amin na ‘saramay abuybuyak,’ ya aliwan dagdaiset labat iran aturo.
10. Anton nankaduan ganggan so asumpal sakbay na inkaderal na Judion sistema?
10 Saya so apaneknekan a tua diad amin na saraman ya inmuunan taon. Impropesiya nen Jesus: “Saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones; et saman la onsabi anggaan.” (Mateo 24:14) Diad inmunan-siglon kasumpalan na saraman a salita, say maong a balita so malaknab ya impulong sakbay a dineral na saray Romanon armada so relihyoso tan mapolitikan sistema na Judio. (Colosas 1:23) Niarum ni, amin a patumbok nen Jesus so tinmulok ed ganggan to: “Onla kayo sirin, tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo. Ya ibangat yo ran mangunor na amin a bengabengatla ya ingganggan ko ed sikayo.” (Mateo 28:19, 20) Saray inmuunan Kristiano so ag-amaseseg ed saray mauyamo a manisia ed si Jesus insan pinaulyan da laran manlingkor unong ed labay da, a singa gagawaen na arum iran managkalar natan. Imbes, sikara so imbangat dan magmaliw a babangatan nen Jesus, a naorganisa ira ed saray kongregasyon, tan impasal da ira ta pian nipulong da met so maong a balita tan makapanggawa ira na babangatan. (Gawa 14:21-23) Satan a padron so tutumboken na saray Tastasi nen Jehova natan.
11. Siopa natan so mibibiang ed panangiyabawag na sankaabigan a maong a balita ed katooan?
11 Walaray Tastasi nen Jehova, a tinmumbok ed saray inmunan-siglon alimbawa nen Pablo, Bernabe, tan arum nira, a nanmisionaryo ira ed arum a daldalin. Say kimey da so peteg a makagunggona, lapud ag-ira akibabali ed politika odino ed arum a dalan a mangisuawi manlapud ganggan ya ipulong so maong a balita. Tinumbok da so ganggan nen Jesus: “No onla kayo, manpulong kayo.” Balet, maslak ed saray Tastasi nen Jehova et aliwan misionaryo ed arum a daldalin. Dakel ed sikara so manaanap na pambilay panamegley na sekular a trabaho, tan say arum so maneeskuela ni. Arum so mamapabaleg ed ananak. Balet amin a Tastasi so manginanabang ed arum na maong a balita a naaralan da. Kalangweran tan matakken la, laki tan bii, sikara so magayagan kinmiwas unong ed panamaseseg na Biblia: “Ipulong mo so salita; manseet ka no panaon to; tan agto panaon.” (2 Timoteo 4:2) Singa ed saray tutumboken da nen inmunan-siglo, nantultuloy ya “ag-ira tinmunda a nambabangat tan nampupulong a si Jesus et Kristo.” (Gawa 5:42) Iyaabawag da so sankaabigan a maong a balita ed sankatooan.
Mangomberte Odino Man-ebanghelyo?
12. Anto so panagproselita, tan panon a minoria itan?
12 Say Griegon lenguahe so walaan na salitan pro·se’ly·tos, a mankabaliksan na “komberte.” Nanlapud saya so Ingles a salitan “proselytism” (o panagproselita) a walaan na manunan kabaliksan a “panangomberte.” Natan, arum so mangibabaga a say panagproselita so mapeligro. Sakey a dokumenton impalapag na World Council of Churches so nansalita ni ingen nipaakar ed “say kasalanan ed panagproselita.” Akin? Ibabaga na Catholic World Report: “Diad tuloytuloy a panrereklamo na Orthodox Church, say ‘panagproselita’ so impasen lan paskaran a panangomberte.”
13. Anto so pigaran alimbawa na mapeligron panagproselita?
13 Kasin mapeligro so panagproselita? Nayarin ontan. Inkuan nen Jesus a say panagproselita na saray eskriba tan Fariseo so mapeligro ed saray akomberte ra. (Mateo 23:15) Maseguro, say “paskaran a panangomberte” so makapuy. Alimbawa, unong ed manag-awaran a si Josephus, sanen tinalo nen Maccabeon si John Hyrcanus iray Idumaean, sikato so “angiyabuloy ed sikara a mansiansia ed bansa ra daput no nanpagalsim ira tan mabulos iran mangunor ed saray ganggan na saray Judio.” No labay na saray Idumaean so manbilay ed silong na Judion pananguley, nepeg ya agamilen da so Judion relihyon. Ibabaga ed sikatayo na saray manag-awaran a nen koma-walon siglo K.P., tinalo nen Carlomagno iray paganon Saxon na mamaamianen a Europa tan maruksan amaskar ed sikara a manpakomberte. * Balet, panon kasimoon so inkakomberte na saray Saxon odino Idumaean? Singa bilang, panon kapuro so panamabli nen Arin Herodes na Idumaea—a sinali ton ipapatey so kapangiyanak nin Jesus—ed pinuyanan na Dios a Ganggan nen Moises?—Mateo 2:1-18.
14. Panon so pamapaskar na arum a misionaryo na Kakristianoan ed totoo pian manpakomberte?
14 Kasin puersaan natan iray panangomberte? Diad sakey a pantalos et ontan so gagawaen na arum. Pigaran misionaryo na Kakristianoan so kabkabat a mangiyoopresi ed saray posiblin nakomberte a magmaliw iran iskolar ed biek-taew. Odino nayarin pandengelen da ni so sakey a nanaerasan a refugee sakbay ya ikdan na rasyon. Unong ed sakey a balikas ya impaway nen 1992 diad kombension na saray Obispon Orthodox, say “panagproselita so nagagawa no maminsan diad pananagyat parad materyal tan no maminsan et diad nanduruman nengneng na karawalan.”
15. Kasin manproproselita iray Tastasi nen Jehova unong ed modernon kabaliksan na satan a salita? Ipaliwawa.
15 Makapuy so pamaskar ed totoo pian umanen so relihyon da. Maseguro, aliwan ontan so ikikiwas na saray Tastasi nen Jehova. * Kanian ag-ira manproproselita unong ed modernon kabaliksan na salita. Imbes, singa saray inmunan-siglon Kristiano, ipupulong da so maong a balita ed amin. Siopaman a boluntaryon onkiwas so naimbitaan ya onggamor na dakel nin pikakabat panamegley na panagaral na Biblia. Saratan ya interesado so makaaral a mangagamil na pananisia, a putel a nibase ed suston pikakabat ed Biblia, diad Dios tan ed saray gagala to. Bilang resulta, ontatawag ira ed ngaran na Dios, a Jehova, parad kilalaban. (Roma 10:13, 14, 17) Personal a desisyon da no awaten da so maong a balita odino andi. Anggapo so panamilit. No wala man bilang, anggapo so kakanaan na panangomberte. Pian magmaliw a makapaliket ed Dios, say panagdayew so nepeg a manlapu ed puso.—Deuteronomio 6:4, 5; 10:12.
Say Panag-ebanghelyo ed Modernon Panaon
16. Panon a dinmaak so panag-ebanghelyon kimey na Tastasi nen Jehova ed modernon panaon?
16 Diad interon modernon panaon, saray Tastasi nen Jehova so mangipupulong ed maong a balita na Panarian diad babaleg a kasumpalan na Mateo 24:14. Say bantog ya uusaren ed panag-ebanghelyon kimey da et say magasin a Panag-Bantayan. * Nen 1879, sanen nipalapag so primero iran paway na Say Panag-Bantayan, say magasin so walaan na sirkulasyon a ngalngali 6,000 ed sakey a lenguahe. Diad taon 2001, kalabas na masulok a 122 a taon, say sirkulasyon so amantok ed 23,042,000 a kopya diad 141 a lenguahe. Kabansag na satan ya indaak so imbulaslas ed panag-ebanghelyon kimey na saray Tastasi nen Jehova. Ikompara so pigan libon oras ya inusar ed kada taon diad panag-ebanghelyon kimey nen koma-19 a siglo ed say 1,169,082,225 ya oras ya indeboto ed panagpulong a kimey nen taon 2001. Nodnonoten pa so 4,921,702 a libren panangiyaral na Biblia ya inkondukta ed promedyo a kada bulan. Agaylan kalaknab na maabig a kimey so agawaan! Tan ginawa itan na 6,117,666 ya aktibon manangipulong na Panarian.
17. (a) Anton klase na palson dirios so dadayewen natan? (b) Antokaman so lenguahe, nasyonalidad, odino kipapasen na sakey ed sosyedad, anto so kaukolan a naamtaan na amin?
17 Inkuan na salmista: “Amin so kinondiosdios na saray balbaley taltalintao ira; ingen si Jehova ginawa to so katawenan.” (Salmo 96:5) Diad sekular a mundo natan, dadayewen la so nasyonalismo, simbolo na bansa, prominentin totoo, materyal iran bengatla, tan anggan say kayamanan a mismo. (Mateo 6:24; Efeso 5:5; Colosas 3:5) Aminsan et inkuan nen Mohandas K. Gandhi: “Mapekder iyan opinyon ko a . . . say Europa so mankuan lambengat a Kristiano. Say talagan dadayewen na satan et say Mammon [kaykayamanan].” Say katuaan et nakaukolan a narengel ed nanduruman pasen so maong a balita. Amin, antokaman so lenguahe, nasyonalidad, odino kipapasen to ed sosyedad, so nakaukolan a makapikabat ed si Jehova tan ed saray gagala to. Kaliktan tayo ya amin so onkiwas ed saray salita na salmista: “Ipabtang yo ed Jehova so gloria tan kabiskegan. Ipabtang yo ed Jehova so gloria a makana ed ngaran to.” (Salmo 96:7, 8) Tutulongan na saray Tastasi nen Jehova a makaaral so arum nipaakar ed si Jehova ta pian sikato so manepeg dan nigloria. Tan agunggonaan a tuloy iray kinmiwas. Antoran gunggona so panggagayagaan da? Saraya so singbaten ed ontumbok ya artikulo.
[Saray paimano ed leksab]
^ par. 13 Unong ed The Catholic Encyclopedia, legan na Repormasyon et say puersaan a panangipaakseb na sakey a relihyon ed totoo so nibalikas ed sakey a diparan: Cuius regio, illius et religio (Bilang segek, mankabaliksan iya na: “Siopaman a manuuley ed bansa so mandesidi met no anto so relihyon na bansa.”)
^ par. 15 Diad sakey a miting na United States International Religious Freedom Commission nen Nobyembre 16, 2000, pinandumaan na sakey ya akibiang iraman so manasalin mangiyimpuersa na saray panangomberte tan say kimey na Tastasi nen Jehova. Nikomento a sano manpulong ed arum iray Tastasi nen Jehova, gagawaen da itan diad paraan a nayarian na too ya ibaga ya “Agak interesado” tan ikapot da la so puerta.
^ par. 16 Say kompleton titulo na magasin et Say Panag-Bantayan Mangipapalapag na Panarian nen Jehova.
Kasin Nipaliwawa Yo?
• Akin a saray Tastasi nen Jehova et maseseg ya ebanghelisador?
• Akin a manpupulong iray Tastasi nen Jehova anggaman ed lugar ya akaletnegan laray iglesia na Kakristianoan?
• Akin a saray Tastasi nen Jehova et aliwan managproselita unong ed modernon kabaliksan na satan a salita?
• Panon a binmulaslas so panag-ebanghelyon kimey na saray Tastasi nen Jehova ed modernon panaon?
[Tepetepet Parad Panagaral]
[Litrato ed pahina 9]
Si Jesus so maseseg ya ebanghelisador tan impasal to so arum pian gawaen da so miparan kimey
[Litrato ed pahina 10]
Amin ed inmunan-siglon kongregasyon so akibiang ed panag-ebanghelyo
[Litrato ed pahina 11]
Makapuy so pamaskar ed totoo pian umanen so relihyon da