“Katawan, Ibangat Mo Kami a Mikasi”

“Inkuan ed sikato na sakey ed saray babangatan to, Katawan, ibangat mo kami a mikasi.”​—LUCAS 11:1.

1. Akin ya inkerew na sakey ed saray babangatan nen Jesus a sikaray ibangat ton manpikasi?

 DIAD sakey ya inkagawa nen 32 K.P., si Jesus so naimatonan na sakey a babangatan to a manpipikasi. Agto narengel so ibabalikas nen Jesus dia ed Ama to, lapud nayarin mareen itan a pikakasi. Anggaman kuan, sanen asumpal si Jesus, oniay inkuan ed sikato na babangatan to: “Katawan, ibangat mo kami a mikasi.” (Lucas 11:1) Akin ya ontan so inkerew to? Say pikakasi et regular a kabiangan ed bilay tan panagdayew na Judio. Lugan na Hebreon Kasulatan so dakerakel a pikakasi diad libro na Salmos ontan met ed arum niran parte na Biblia. Kanian sayan babangatan so agpapaibangat na sakey a bengatlan agto ni amta odino agto ni agawaan a balot. Maseguron amta to iray pormalistikon pikakasi na saray relihyoson lider na Judaismo. Balet ta naimatonan to si Jesus a nampikasi, tan nayarin atebek to so baleg a pandumaan na mansimpisimpitan iran pikakasi na saray rabbi tan say paraan na impanpikasi nen Jesus.​—Mateo 6:5-8.

2. (a) Anto so mangipabitar ya agkabaliksan nen Jesus ya uliten tayo so modelon pikakasi a salita por salita? (b) Akin ya interesado itayon mangamta ed no panon so manpikasi?

² Manga 18 a bulan ni sakbay na saya, diad Sermon to ed Palandey et inter nen Jesus ed saray babangatan to so sakey a modelon pikakasi a pangibasiyan da ed saray pikakasi ra. (Mateo 6:9-13) Nayarin anggapo ni ed saman iyan babangatan kanian mapangasin inulit nen Jesus iray importantin punto na satan a modelon pikakasi. Makatantanda so punto ya agto inulit itan a salita por salita, a mangipapabitar ya agto angiter na sakey a ritualistikon pikakasi ya ulit-uliten labat. (Lucas 11:1-4) Singa samay babangatan ya ag-asalambit so ngaran to, labay tayo met so paibangat no panon so manpikasi a lalon mamaapit ed sikatayo ed si Jehova. Usisaen tayo sirin ed mas detalyadon paraan so modelon pikakasi, unong ya inkurit nen apostol Mateo. Tibukelen itan na pitoran kerew, a talora ed saratan so manunan manasaglawi ed saray gagala na Dios tan say apatira et nipaakar ed materyal tan espiritual iran pankaukolan tayo. Diad sayan artikulo et konsideraen tayo so unonan taloran kerew.

Sakey a Maaron Ama

3, 4. Anto so kabaliksan na panawag ed si Jehova bilang ‘Ama mi’?

³ Manlapu la’d gapo, impabitar nen Jesus a nepeg a napatnagan ed saray pikakasi tayo so maapit tan marespeton pisisiglaotan ed si Jehova. Pian nagunggonaan a nagkalalo iray babangatan to a walad dikingan to sanen wala ira ed gilig na palandey, imbaga nen Jesus ed sikara a tawagen da si Jehova bilang “Ama min wala ka ed tawen.” (Mateo 6:9) Unong ed sakey ya iskolar, balanglan nansalita si Jesus ed kaslakan a porma ed Hebreo odino Aramaiko, say terminon inusar to parad “Ama” et mitukoyan ed maapit iran balikas na sakey ya anak ed ama to, ‘sakey a balikas na ugaw.’ Say panawag ed si Jehova bilang ‘Ama mi’ et mankabaliksan na maapit tan napanmatalkan a relasyon.

 ⁴ Diad pangibaga tayo na ‘Ama mi,’ bibidbiren tayo met a kabiangan itayo na baleg a pamilya na lalaki tan bibii a mamibidbir ed si Jehova bilang Manangiter-Bilay. (Isaias 64:8; Gawa 17:24, 28) Saray Kristianon nailalak ed espiritu so tinagibi bilang ‘ananak na Dios,’ tan diad sikato et ‘iyakis da ya, Abba, Ama.’ (Roma 8:14, 15) Minilyon so nagmaliw a matoor a kakaiba ra. Saraya so angidedika ed bilay da ed si Jehova tan insimbolo ra so dedikasyon da panamegley na bautismo ed danum. Amin na sayan ‘arum a karnero’ so makaasingger met ed si Jehova diad ngaran nen Jesus tan Sikato so natawag da ya ‘Ama mi.’ (Juan 10:16; 14:6) Nayarian tayo so onasingger a maparanay ed mangatatawen ya Ama tayo panamegley na pikakasi pian sikatoy idayew tayo, pisalamatan tayo lapud amin ya ipapatnag ton kaabigan ed sikatayo, tan ibesngaw ed sikato so amin a pakabebelatan tayo, a matalek a sikatoy mangasikaso ed sikatayo.​—Filipos 4:6, 7; 1 Pedro 5:6, 7.

Panangaro ed Ngaran nen Jehova

5. Anto so manangilukas a kerew ed modelon pikakasi, tan akin a matukoy iya?

⁵ Say inmunan kerew so tampol ya angiyuna ed saray importantin bengatla. Oniay ibabalikas na satan: “Nagalang komon so ngaran mo.” (Mateo 6:9) On, say kapasantos na ngaran nen Jehova so nepeg a sankaimportantian ed sikatayo lapud sikato so inaro tayo tan kagula tayon nanengneng so amin a panamabanday ed ngaran to. Say impanrebeldi nen Satanas tan say impanagyat to ed inmunan sankaparis a too pian ontunganga ed si Jehova a Dios so amauges ed ngaran To, a sinuppiat da so pangaagamil na Dios ed sankatalbaan ya inkasoberano to. (Genesis 3:1-6) Niarum ni, diad inlabas la na saray siglo, apabanday so ngaran nen Jehova lapud saray makapabaing a gawa tan bangat na saramay mangibabagan sikara so mangirerepresenta ed sikato.

6. Anto so paliisan tayo no ipipikasi tayo so kapasantos na ngaran nen Jehova?

⁶ Say pangipikasi tayo a napasantos so ngaran nen Jehova so mangipatnag ed no iner so dadapagan tayo ed isyu na sankatalbaan ya inkasoberano​—a nagnap tayon susuportaan so kanepegan nen Jehova a manuley ed uniberso. Labay nen Jehova a say uniberso et panayaman na saray matudion pinalsa a mabulos tan maliket a manpasakop ed matunong ya inkasoberano to lapud sikatoy inaro ra tan papablien da so amin ya irerepresenta na ngaran to. (1 Awaran 29:10-13; Salmo 8:1; 148:13) Say panangaro tayo ed ngaran nen Jehova so ontulong ed sikatayon ompaliis ed antokaman a bengatla a nayarin mamabanday ed satan a masanton ngaran. (Ezequiel 36:20, 21; Roma 2:21-24) Lapud say kareenan na uniberso tan saray manaayam ditan so akadepende ed kapasantos na ngaran nen Jehova tan ed maaron panagpasakop ed inkasoberano to, say pikakasi tayo a “nagalang komon so ngaran mo” so balikas na panagmatalek tayo a nasumpal so gagala nen Jehova diad kirayewan to.​—Ezequiel 38:23.

 Say Panarian ya Ipipikasi Tayo

7, 8. (a) Anto so Panarian ya imbangat nen Jesus ya ipikasi tayo? (b) Anto so naaralan tayo nipaakar ed sayan Panarian diad saray libro na Daniel tan Apocalipsis?

⁷ Say komaduan kerew ed modelon pikakasi et: “Onsabi komon so panarian mo.” (Mateo 6:10) Sayan kerew so maapit a misiglaotan ed akadkaunan kerew. Say usaren nen Jehova pian napasantos so masanton ngaran to et say Mesianikon Panarian, say mangatatawen a gobierno to, a say Anak ton si Jesu-Kristo so manepeg ya aturon Ari. (Salmo 2:1-9) Ililitrato na propesiya nen Daniel so Mesianikon Panarian bilang “sakey a bato” a tinapsing ed sakey a “palandey.” (Daniel 2:34, 35, 44, 45) Satan a palandey so mangirerepresenta ed sankatalbaan ya inkasoberano nen Jehova, kanian say Panarian ya irerepresenta na bato et balon pakapatnagan na sankatalbaan a pananguley nen Jehova. Diad propesiya, say bato so ‘magmaliw a sakey a baleg a palandey, tan panoen to so amin a dalin,’ a mangipapabitar a say Mesianikon Panarian so mangirepresenta ed inkasoberano na Dios a manuley diad dalin.

⁸ Kaiba nen Kristo ed sayan gobierno na Panarian so 144,000, ya ‘asaliw dia ed saray totoo’ a miuley ed sikato bilang arari tan saserdote. (Apocalipsis 5:9, 10; 14:1-4; 20:6) Sarayan tinukoy nen Daniel bilang “saray sasanto na Sankatageyan,” a kaibay Kristo bilang Ulo ra, so angawat ed “panarian tan panuley, tan say kabaleg na saray panarian ed leksab na amin a tawen . . . Say panarian to sikato so panarian lawas, tan amin a panuley manlingkor tan unonor ira naani ed sikato.” (Daniel 7:13, 14, 18, 27) Satan so matukoy a deskripsion na mangatatawen a gobierno ya imbangat nen Kristo ya ipikasi na saray patumbok to.

Akin a Siansian Ipikasi ni ya Onsabi so Panarian?

9. Akin a matukoy so pangipikasi tayo ya onsabi so Panarian na Dios?

⁹ Diad modelon pikakasi to, imbangat itayo nen Kristo ya ipikasi so isabi na Panarian na Dios. Say kasumpalan na propesiya na Biblia so mangipabitar a say Mesianikon Panarian so niletneg la ed tawen nen 1914. * Sirin, kasin matukoy ni so pangipikasi tayo ya “onsabi” itan a Panarian? On. Lapud diad propesiya nen Daniel, say Mesianikon Panarian, ya insimbolo na bato, so direktan miarap ed saray mapolitikan gobierno na totoo, ya insimbolo na abalbaleg ya imahen. Say bato so onkena ni labat ed satan ya imahen, ya ombasig ed satan pian namekmek. Oniay inkuan na propesiya nen Daniel: “Say panag-uley to agnaani niiter ed sananey a baley: Balet buybuyaken to naani tan upoten to naani so saraya ya amin a panarian, et sikato so mansiansia lawas.”​—Daniel 2:44.

10. Akin a pipirawaten tayo so isabi na Panarian na Dios?

¹⁰ Pampipirawatan tayon nanengneng so isabi na Panarian na Dios sumpad say marelmeng a sistema na bengabengatla nen Satanas lapud saya so mankabaliksan na kapasantos na ngaran nen Jehova tan say kagalpong na amin ya onsusumpa ed inkasoberano na Dios. Oniay masimoon tayon ipikasi: “Onsabi komon so panarian mo,” tan singa si apostol Juan et nibaga tayo ya: “Amen: Gala, Katawan a Jesus.” (Apocalipsis 22:20) On, komon ta onsabi la si Jesus a mamasantos  ed ngaran nen Jehova tan mangiyalangon ed inkasoberano To, ta pian nagawa iray salita na salmista: “Pian saray totoo nakabatan da a sika, a say ngaran mo a bukbukor et Jehova, sankatageyan ka a manuna nen say amin a dalin.”​—Salmo 83:18.

“Nagawa Komon so Linawam”

11, 12. (a) Anto so kekerewen tayo sano ipipikasi tayo a nagawa so linawa na Dios “unong ed tawen, ontan met ed dalin”? (b) Anto ni so kabaliksan na pikakasi tayo a nagawa so linawa nen Jehova?

¹¹ Say ontumbok ya imbangat nen Jesus ed saray babangatan to ya ipikasi ra et say: “Nagawa komon so linawam, unong ed tawen, ontan met ed dalin.” (Mateo 6:10) Apalsa so uniberso lapud linawa nen Jehova. Oniay inkelyaw na makapanyarin mangatatawen iran pinalsa: “Sika so manepeg, Katawan mi tan Dios mi, a mangawat na gloria tan dayew tan pakayari: ta sika pinalsam so lapag a bengatla, tan lapu ed linawam wala ra tan sikara so apalsa.” (Apocalipsis 4:11) Si Jehova so walaan na gagala parad “saray bengatlan wala ed tawen, a singa met saray wala ed tapew na dalin.” (Efeso 1:8-10) Diad tua, say pangipikasi a nagawa la komon so linawa na Dios et ikekerew tayo ed si Jehova a sumpalen to la so gagala to. Niarum ni, diad ontan et nipanengneng tayo a pipirawaten tayo so kagawa na linawa na Dios diad interon uniberso.

¹² Diad panamegley na sayan pikakasi et nipatnag tayo met so inkamabulos tayon mangitunos ed kabibilay tayo dia ed linawa nen Jehova. Oniay inkuan nen Jesus: “Say kanen ko sikato so panggawak na linawa na saman so angibaki ed siak, tan manumpal na kimey to.” (Juan 4:34) Singa si Jesus, panliketan tayo so panggawa ed linawa na Dios bilang dedikadon Kristianos. Say panangaro tayo ed si Jehova tan ed Anak to so mamakiwas ed sikatayon manbilay ya “aleg ed gawa na lawan na katooan, noag dia ed linaway Dios.” (1 Pedro 4:1, 2; 2 Corinto 5:14, 15) Panggunaetan tayon paliisan iray bengatla ya amta tayon misumlangan ed linawa nen Jehova. (1 Tesalonica 4:3-5) Diad panganamot tayo ed panaon na panagbasa tan panagaral ed Biblia, ‘natalosan tayo no anto so linawa na Katawan,’ a mangilaktip ed pakawalaan tayo na aktibon pibibiang ed panangipulong ed “sayan maong ya ebanghelyo na panarian.”​—Efeso 5:15-17; Mateo 24:14.

Say Linawa nen Jehova ed Tawen

13. Panon ya agawa so linawa na Dios sakbay ni na impanrebeldi nen Satanas?

¹³ Nagagawa la so linawa nen Jehova ed katawenan sakbay ni na impanrebeldi na sakey ed saray espiritun ananak to, a nagmaliw a Satanas. Ililitrato na libro na Uliran so panguloan ya Anak na Dios bilang mangirerepresenta ed kakabatan. Ipapabitar na satan a diad ag-amtan kabayag na panaon, say bogbogtong ya Anak na Dios so “malikeliket lawas ed arap to,” a maliket a manggagawa ed linawa nen Ama to. Diad saginonor, sikato so nagmaliw ya “uloen a komikimey” nen Jehova diad impamalsa to ed amin a bengatla “ed katawenan tan tapew na dalin, saray bengatla a nanengneng tan bengabengatlan agnanengneng.” (Uliran 8:22-31; Colosas 1:15-17) Si Jesus so inusar nen Jehova bilang say Salita to, odino Pinagkasangiyan to.​—Juan 1:1-3.

14. Anto so naaralan tayo ed Salmo 103 nipaakar ed no panon so panusumpal na saray anghel ed linawa nen Jehova diad katawenan?

¹⁴ Ipapabitar na salmista a sankatageyan ed amin so inkasoberano nen Jehova tan tinmalineng so dakerakel ya anghel ed saray bilin tan ganggan to. Oniay nabasa tayo: “Si Jehova impaletneg to so trono to ed saray katawenan; tan say panarian to uleyan to ya amin. Galangen yo si Jehova, sikayo angheles to, a mabiskeg, a manguunor na salita to; ondengel na boses na salita to. Galangen yo si Jehova, amin ya ehersito to; sikayo a ministros to, a manggawa na kaliktan to. Galangen yo si Jehova amin yo a gawa to, ed amin a paspasen na panuleyan [inkasoberano] to.”​—Salmo 103:19-22.

15. Panon a say impakaawat nen Jesus ed pakayari na Panarian so angapekta ed impakasumpal na linawa na Dios ed tawen?

¹⁵ Kayari na impanrebeldi to, si Satanas so makakaloob ni ed tawen, unong ya impabitar na libro na Job. (Job 1:6-12; 2:1-7) Balet, impropesiya na libro na Apocalipsis ya onsabi so panaon sano napagit la ed tawen si Satanas tan saray demonyo  to. Satan a panaon so mapatnag ya agawa kayarin tuloy na impakaawat nen Jesu-Kristo ed pakayari na Panarian nen 1914. Manlapu la’d saman, saramay nanrebelde so agla makaloob ed tawen. Sikara so nipukok ed kaliberliber na dalin. (Apocalipsis 12:7-12) Diad tawen et anggapo lay narengel a manusuppiat ed inkasoberano nen Jehova, saray boses lambengat a nankakasakey a mangitandoro ed ‘Kordero,’ si Kristo Jesus, tan ed mapasakop a panangidayew ed si Jehova. (Apocalipsis 4:9-11) Say linawa nen Jehova so petepeteg ya asumpal ed tawen.

Say Linawa nen Jehova ed Dalin

16. Panon a napatnagan ya agmipakna so modelon pikakasi ed bangat na Kakristianoan nipaakar ed ilalo na katooan?

¹⁶ Ipuepuera na saray iglesia na Kakristianoan so dalin manlapud saray gagala na Dios, ya ibabaga ra ya onla ed tawen so amin a maong a totoo. Balet imbangat itayo nen Jesus a mangipikasi ya: “Onsabi komon so panarian mo. Nagawa komon so linawam, unong ed tawen, ontan met ed dalin.” (Mateo 6:10) Nibaga kasi a nasusumpal natan ed dalin so amin a linawa nen Jehova anta napno iya na karawalan, ag-inkahustisya, sakit, tan patey? Andin balot! Nepeg sirin a masimoon tayon ipikasi a nagawa la so linawa na Dios diad dalin, a mitunosan ed sipan ya inkurit nen apostol Pedro: “Unong ed sipan to alagden tayo so saray tawen a balo [say Mesianikon Panarian ya uleyan nen Kristo] tan dalin a balo [sakey a matunong a sosyedad na too], a sikara so panayaman na katunongan.”​—2 Pedro 3:13.

17. Anto so gagala nen Jehova ed dalin?

¹⁷ Diad gapo et inggagala la nen Jehova a palsaen so dalin. Pinuyanan to si propeta Isaias a mangisulat: “Onia so kuan nen Jehova ya amalsa ed saray tawen, say Dios ya anibukel tan nanggawa na dalin, sikato ya angiletneg ed sikato tan sikato so pinalsa to ya aliwa a kibalatar, a tinibukel to ta pian sikato so panayaman: Siak si Jehova; et anggapo la so sananey.” (Isaias 45:18) Impasen na Dios so inmunan sankaparis a too diad paraison hardin tan ingganggan to ira: “Manbunga kayo, tan ondakel kayo, tan makmakan yo so dalin, tan sikato so patuloken yo.” (Genesis 1:27, 28; 2:15) Mapatpatnag a say gagala na Manamalsa et say dalin so panayaman na ayadyarin rasa na matunong a totoo a maliket a manpasakop ed inkasoberano nen Jehova tan manbilay ya andi-anggaan diad Paraiso ya insipan nen Kristo.​—Salmo 37:11, 29; Lucas 23:43.

18, 19. (a) Anto so nepeg a nagawa sakbay a sigpot a nasumpal so linawa na Dios diad dalin? (b) Antoran aspekto na modelon pikakasi nen Jesus so usisaen ed ontumbok ya artikulo?

¹⁸ Say linawa nen Jehova ed dalin et agbalot nagawa a sigpot no say dalin et panaayaman ni na totoo a manusuppiat ed inkasoberano to. Diad panamegley na saray makapanyarin espiritun puersa ya idauloan nen Kristo, say Dios so ‘mamagbag ed saramay mamabagbag ed dalin.’ Say interon marelmeng a sistema nen Satanas, kalaktip lay palson relihyon, kurakot a politika, maagum tan agmatuan komersyo, tan makadesyang a militar, so naandi la ed andi-anggaan. (Apocalipsis 11:18; 18:21; 19:1, 2, 11-18) Niyalangon so inkasoberano nen Jehova tan napasantos so ngaran to. Amin iratan so ipipikasi tayo sano ibaga tayon: “Ama min wala ka ed tawen, nagalang komon so ngaran mo. Onsabi komon so panarian mo. Nagawa komon so linawam, unong ed tawen, ontan met ed dalin.”​—Mateo 6:9, 10.

¹⁹ Balet, diad modelon pikakasi to, impatnag nen Jesus a nayarian tayo met ya ipikasi iray personal a pamaakaran. Sarayan aspekto na bilin to nipaakar ed pikakasi so usisaen ed ontumbok ya artikulo.

[Paimano ed leksab]

Bilang Panrepaso

• Akin a matukoy so panawag tayo ed si Jehova bilang ‘Ama mi’?

• Akin ya importantin tuloy ed sikatayo ya ipikasi so kapasantos na ngaran nen Jehova?

• Akin ya ipikasi tayo ya onsabi la so Panarian na Dios?

• Anto so ipapatnag tayo sano ipikasi tayon nagawa la so linawa na Dios diad dalin a singa ed tawen?

[Tepetepet Parad Panagaral]

[Litrato ed pahina 9]

Midumaan a tuloy iray pikakasi nen Jesus ed mansimpisimpitan iran pikakasi na saray Fariseo

[Litrato ed pahina 10]

Ipipikasi na saray Kristiano ya onsabi la so Panarian na Dios, napasantos so ngaran to, tan nagawa so linawa to