Saray Maliket a Lingkor nen Jehova

“Mapalar [“maliket,” NW] iray duruka ed espiritu.”​—MATEO 5:3.

1. Anto so tuan liket, tan anto so ipapatnag na satan?

 SAY liket so papablien a tuloy na totoo nen Jehova. Oniay inkelyaw nen salmistan David: “Mainawa [odino maliket] so totoo a say Dios da et si Jehova.” (Salmo 144:15) Say liket et liknaan a masayaksak. Nalilikna tayo so sankaaraleman a liket​—ya angga ed akindalem ya inkatoo tayo​—lapud amta tayon aabobonan itayo nen Jehova. (Uliran 10:22) Ipapatnag na ontan a liket so maapit a relasyon ed mangatatawen ya Ama tayo tan say pikakabat a gagawaen tayo so linawa to. (Salmo 112:1; 119:1, 2) Makapainteres, imbinsabinsa nen Jesus so siameran rason pian magmaliw itayon maliket. Diad pangusisa tayo ed saratan a rason pian magmaliw a maliket a siningbat diad sayan duaran mantumbokan ya artikulo, namoria tayo ya alay liket tayo no matoor itayon manlingkor ed “maliket a Dios,” si Jehova.​—1 Timoteo 1:11, NW.

Sinononot Itayo ed Espiritual a Pankaukolan Tayo

2. Anto so kipapasen sanen nansalita si Jesus nipaakar ed liket, tan anto so manangilukas a balikas to?

² Nen 31 K.P., impaliwawa nen Jesus so sakey ed saray sankabantogan a paliwawa ed awaran. Tinawag itan a Sermon ed Palandey lapud sinalita itan nen Jesus diad gilig na palandey a pakabantagan ed Dayat na Galilea. Oniay insalaysay na Ebanghelyo nen Mateo: “Sanen anengneng [nen Jesus] iray amayamay a totoo, tinmatdang ed palandey: et nen akayurong la, saray babangatan to sinmingger ira’d sikato. Et bineswa’toy sangi to tan imbanga’to ra, a kuan to, Mapalar iray duruka ed espiritu [“sinononot ed  espiritual a pankaukolan da,” NW] ta sikaray makankien na panaria’y tawen.” Diad literal ya impangipatalos, oniay nabasa ed manangilukas iran salita nen Jesus: “Maliket iray pobri (nipaakar) ed espiritu,” odino “Maliket iramay mipapayabol parad espiritu.” (Mateo 5:1-3; Kingdom Interlinear; paimano’d-leksab) Onia so nabasa ed Today’s English Version: “Maliket iramay mikabat a duka ira ed espiritual.”

3. Panon a say mapaabeban awawey so makatulong ed pakagamor tayo na liket?

³ Diad sermon to ed gilig na palandey, impabitar nen Jesus a mas maliket so sakey a too no sikatoy sinononot ed espiritual a pankaukolan to. Saray mapaabeban Kristiano, a sikakabat ed makasalanan a kipapasen da, so mikakasi ed si Jehova a perdonaen to ira base ed dondon bagat nen Kristo. (1 Juan 1:9) Diad ontan et naromog da so kareenan na nonot tan tuan liket. “Mapalar so naperdona [ed] saray insusumlang to, say asakbongan so kasalanan to.”​—Salmo 32:1; 119:165.

4. (a) Diad antoran dalan a nipatnag tayo so pagmaliw a sinononot ed espiritual a pankaukolan tayo tan ed arum? (b) Anto so mangarum na liket tayo sano sinononot itayo ed espiritual a pankaukolan tayo?

⁴ No sinononot itayo ed espiritual a pankaukolan tayo, napakiwas itayon manbasa na Biblia ed inagew-agew, a pinabangan a maong so espiritual a tagano ya itatarya na “matoor tan makabat ya aripen” diad “panaon a kinepeg to” tan regular ya onatendi ed saray Makristianon pantitipon. (Mateo 24:45; Salmo 1:1, 2; 119:111; Hebreos 10:25) Say aro ed kaparan too so mamakiwas ed sikatayo a magmaliw a sinononot ed espiritual a pankaukolan na arum tan mamakiwas ed sikatayon magmaliw a maseseg ed panagpulong tan panangibangat ed maong a balita na Panarian. (Marcos 13:10; Roma 1:14-16) Say panginabang na saray katuaan na Biblia ed arum so pakagamoran tayo na liket. (Gawa 20:20, 35) Say liket tayo so lalon onaralem sano dalepdepen tayo so alay abig ya ilalo ed Panarian tan saray bendisyon ya itarok na satan. Parad say “melag a pulok” na saray alanaan a Kristiano, say ilalo ed Panarian so mankabaliksan na imortal a bilay ed tawen bilang kabiangan na gobierno na Panarian nen Kristo. (Lucas 12:32; 1 Corinto 15:50, 54) Parad ‘arum a karnero,’ mankabaliksan itan na andi-anggaan a bilay diad paraison dalin ed silong na satan a gobierno na Panarian.​—Juan 10:16; Salmo 37:11; Mateo 25:34, 46.

No Panon a Makapanliket Iray Maneermen

5. (a) Anto so kabaliksan na balikas a “mapalar iray mannangis”? (b) Panon so pakaligliwa na saratan a maneermen?

⁵ Saray salita ed ontumbok a rason na panliket ya imbaga nen Jesus et singano mansumlangan. Inkuan to: “Mapalar iray mannangis: ta sikaray naligliwa.” (Mateo 5:4) Panon a say sakey a too et maneermen balet ta magmaliw met a mapalar odino maliket? Pian natalosan tayo so kabaliksan na satan ya imbaga nen Jesus, nakaukolan tayon konsideraen no anton nengneng na paneermen odino pannangis so sasaglawien to. Insalaysay nen babangatan a Santiago a say dilin makasalanan a kipapasen tayo so pansesengegan na paneermen tayo. Oniay insulat to: “Linisan yo so limalima yo, sikayo a managkasalanan; tan gogolan yo so puspuso yo, sikayo a nankadua so linawa. Manermen kayo, tan maningel kayo, tan mannangis kayo: say elek yo magmaliw komon a nangis, et say liket yo magmaliw komon ya ermen. Manpaabeba kayo ed mata na Katawan, et itandoro to kayo.” (Santiago 4:8-10) Saramay peteg a maneermen ed makasalanan a kipapasen da so naligliwa sano naamtaan dan saray kasalanan da so naperdona no agamilen da so pananisia ed dondon bagat nen Kristo tan ipatnag da so tuan panagbabawi diad panggawa ra ed linawa nen Jehova. (Juan 3:16; 2 Corinto 7:9, 10) Diad ontan et nawalaan ira na mablin relasyon ed si Jehova tan makapanilalo ira a manbilay ya andi-anggaan  pian manlingkor tan mandayew ed sikato. Satan so mangitarok ed sikara na nagkalalon akindalem a liket.​—Roma 4:7, 8.

6. Diad anton pantalos a maneermen so arum, tan panon iran naliligliwa?

⁶ Say balikas met nen Jesus so mangilaktip ed saramay maneermen ed makapagula iran kipapasen diad dalin. Inyaplika nen Jesus ed inkasikato so propesiya ed Isaias 61:1, 2, ya oniay nibaga ditan: “Say espiritu nen Katawan a Jehova wala ed siak; ta si Jehova nilanaan to ak a mangipulong na saray maong a balita ed saray mauyamo imbaki to ak a mamedber ed puso a maermen, . . . a manligliwa ed amin a managogol” odino maneermen. Satan a ganggan so inyaplika met ed saray alanaan a Kristiano a wala ni’d dalin, a manusumpal ed satan diad tulong na saray kakaiba ra, say ‘arum a karnero.’ Amin da so mibibiang ed kimey diad simbolikon panagmarka ed kamolingan na “saray lalaki a mansibek tan manakis lapu ed amin a kadimlaan a nagagawa ed kapegleyan to [apostatan Jerusalem, a mangililitrato ed Kakristianoan].” (Ezequiel 9:4) Saratan a maneermen so naliligliwa ed “ebanghelyo na panarian.” (Mateo 24:14) Sikara so manliket sano naaralan da a say marelmeng a sistema na bengabengatla nen Satanas so magano lan salatan na matunong a balon mundo nen Jehova.

Maliket Iray Mauyamo

7. Anto so agkabaliksan na terminon “mauyamo”?

⁷ Intultuloy nen Jesus so Sermon to ed Palandey diad impangibaga toy: “Mapalar iray mauyamo:  ta tawiren day dalin.” (Mateo 5:5) Say inkauyamo so ipapasen no maminsan a maletey ya ugali. Balet, aliwan ontan so kipapasen. Diad impangipaliwawa to ed kabaliksan na salitan “mauyamo,” oniay inkuan na sakey ya iskolar na Biblia: “Say matalonggaring ya ugali na sakey a [mauyamon] too et sikato so walaan na naspot a panagdangka. Aliwa itan a kakulangay biskeg na linawa, maemosyon a panamabli, odino mabinbintan inkaulimek. Satan so biskeg a nakontrol.” Oniay inkuan a mismo nen Jesus nipaakar ed inkasikato: “Mauyamo ak tan mapaabeba ak a puso.” (Mateo 11:29) Ingen makpel ya indepensa nen Jesus iray matunong a prinsipyo.​—Mateo 21:12, 13; 23:13-33.

8. Diad anto a maapit a nisiglaot so inkauyamo, tan akin a nakaukolan tayo iyan kalidad diad pidedeneng tayo ed arum?

⁸ Say inkauyamo sirin so maapit a nisiglaot ed panagdangka. On, say inkauyamo tan panagdangka so indatak a dua nen apostol Pablo sanen indalatdat to so “bunga na espiritu.” (Galacia 5:22, 23) Say inkauyamo so nepeg a bayuboan diad tulong na masanton espiritu. Satan so Makristianon kalidad a mamapawala na pikakareenan ed saray taga-paway tan ed saramay walad loob na kongregasyon. Insulat nen Pablo: “Mampales kayo la sirin, a singa saray pinili Dios, sasanto tan inararo, sakey a puso a maabagey, maong a linawa, kauyamoan, kareenan, kasungdoan; mantetepelan so sakey tan sakey, tan manpeperdonaan so balang sakey.”​—Colosas 3:12, 13.

9. (a) Akin a say inkauyamo so aglambengat ipapatnag diad relasyon tayo ed arum a totoo? (b) Panon a saray mauyamo so ‘manawir ed dalin’?

⁹ Balet, say inkauyamo so aglambengat ipapatnag diad relasyon tayo ed arum a totoo. Diad mabulos a pampasakop ed inkasoberano nen Jehova, nipatnag tayo so inkauyamo. Say manunan ehemplo ed saya et si Jesu-Kristo, ya impatnag to so inkauyamo tan sigpot a panagpasakop ed linawa nen Ama to sanen wadiad dalin. (Juan 5:19, 30) Si Jesus so sankaunaan a manawir ed dalin, lapud sikato so aturon Manuley ed satan. (Salmo 2:6-8; Daniel 7:13, 14) Inabang to itan a tawir ed 144,000 a ‘mitatawir,’ a pinili manlapud ‘limog na katooan’ pian ‘manari ed interon dalin.’ (Roma 8:17; Apocalipsis 5:9, 10; 14:1, 3, 4; Daniel 7:27) Si Kristo tan saray nakaiba to so manuley ed minilyon a kinmarneron totoo a diad sikara so maliket a kasumpalan na mapropetikon salmo: “Saray mauyamo tawiren da naani dalin: tan manliket ira a dili ed inkadaakan na kareenan.”​—Salmo 37:11; Mateo 25:33, 34, 46.

Maliket Iramay Naeerasan Nisesengeg ed Inkatunong

10. Anto so sakey a paraan a napesel iramay ‘naeerasan tan napepegaan ed inkatunong’?

¹⁰ Say ontumbok a rason na panliket et sinaglawi nen Jesus sanen sikatoy nampaliwawa diad gilig na pukdol na Galilea: “Mapalar iray narasan tan napgaan unong ed katunongan; ta sikaray peselen.” (Mateo 5:6) Parad saray Kristiano, inletneg nen Jehova so estandarte na inkatunong. Kanian, saramay naeerasan tan napepegaan ed inkatunong so diad tua et naeerasan tan napepegaan ed panangigiya na Dios. Sinononot ira a tuloy ed kasalanan da tan ed agda-inkayadyari tan pipilaleken da so nawalaay naabobonan a talindeg ed imaton nen Jehova. Malikeliket ira sano naaralan da so Salitay Dios a no magbabawi ira tan onkerew ira na panamerdona base ed dondon bagat nen Kristo et nagamoran da so matunong a talindeg ed arap na Dios!​—Gawa 2:38; 10:43; 13:38, 39; Roma 5:19.

11, 12. (a) Panon a narapat na saray alanaan a Kristiano so inkatunong? (b) Panon a napenek so inkapgaan na kakaiba na saray alanaan nipaakar ed inkatunong?

¹¹ Inkuan nen Jesus a saratan so magmaliw a maliket, lapud sikara so ‘napesel.’ (Mateo 5:6) Saray alanaan a Kristiano ya atawag a ‘manuley bilang arari’ a kaiba nen Kristo ed tawen so niyabawag a ‘matunong parad bilay.’ (Roma 5:1, 9, 16-18) Sikara so inilalak nen Jehova, a tinagibi  to ira bilang espiritual ya ananak to. Sikara so magmaliw a kaiba nen Kristo a mananawir, ya atawag a magmaliw ya arari tan saserdote diad mangatatawen a gobierno na Panarian to.​—Juan 3:3; 1 Pedro 2:9.

¹² Saray kakaiba na saray alanaan et agni niyabawag a matunong parad bilay. Balet, sikara so ipapasen met nen Jehova bilang matunong lapud pananisia ra ed niyibung a dala nen Kristo. (Santiago 2:22-25; Apocalipsis 7:9, 10) Sikara so nipasen a matunong bilang kakaaro nen Jehova a maniilalo a niliktar ed panaon na “baleg a kairapan.” (Apocalipsis 7:14) Say inkapgaan da ed inkatunong so lalon napenek sano, diad silong na ‘balon katawenan’ et sikaray magmaliw a kabiangan na balon dalin a ‘panayaman na inkatunong.’​—2 Pedro 3:13; Salmo 37:29.

Maliket Iray Mapangasi

13, 14. Antoran praktikal a paraan a nepeg tayon ipatnag so inkamapangasi, tan anto so nagunggona tayo?

¹³ Diad pantutultuloy to ed Sermon ed Palandey, inkuan nen Jesus: “Mapalar iray mapangasi; ta makagamor iray panangasi.” (Mateo 5:7) Diad legal a pantalos, say panangasi so natalosan a manutukoy ed panangasi na huis ya ag-angipaakseb na sigpot a dusa ed nanggaway-kasalanan unong ed iyaabuloy na ley. Balet, unong a nausar ed Biblia, saray orihinal a salita a nipatalos a “panangasi” so maslak a manutukoy ed balikas na mapangasin konsiderasyon odino panangabagey a pakainawaan na saramay pakaskasi. Kanian, saramay mapangasi so mangipapatnag ed panangabagey da. Say ilustrasyon nen Jesus nipaakar ed maong a Samaritano so maabig ya alimbawa nipaakar ed toon “nanagamil na panangasi” ed toon mankaukolan.​—Lucas 10:29-37.

¹⁴ Pian naeksperiensya so liket lapud inkamapangasi, nakaukolan tayon ipatnag so positibo iran gawa na kaabigan ed saramay mankaukolan. (Galacia 6:10) Inabagey nen Jesus so totoo ya anengneng to. “Naabagey to ra, lapu ed singa ra saray karnero ya andian na managpastol; et ginapoan to so nambangat ed sikara na amayamay a bengabengatla.” (Marcos 6:34) Amoria nen Jesus a say sankaimportantian a nakaukolan na katooan et espiritual. Nipatnag tayo met so panangabagey tan panangasi diad panginabang ed arum no anto so kakkaukolan da​—say “ebanghelyo na panarian.” (Mateo 24:14) Nayarian tayo met ya iyopresi so praktikal a tulong ed saray maedad lan Kristiano, abalo, tan ulila tan “mansalita a makatambayo ed saray kamarerwan maneermen.” (1 Tesalonica 5:14, NW; Uliran 12:25; Santiago 1:27) Ag-itayo lambengat manliket lapud satan noagta nagamoran tayo met so panangasi nen Jehova.​—Gawa 20:35; Santiago 2:13.

Maralus ed Puso tan Managpareen

15. Panon itayon magmaliw a maralus ed puso tan managpareen?

¹⁵ Indatak nen Jesus so komanem tan komapiton rason na panliket diad onggendan: “Mapalar iray maralus ed puso; ta nanengneng da so Dios. Mapalar iray managpareen; ta ingaran iray anak na Dios.” (Mateo 5:8, 9) Say maralus a puso et aliwa lambengat a malinis ed moral noagta ag-atilolan tan niyapasakey met ed espiritual diad debosyon to ed si Jehova. (1 Awaran 28:9; Salmo 86:11) Saray managpareen so mikakareenan ed Kristianon agagi ra tan, no nayarian da, ed saray kapara ran too. (Roma 12:17-21) ‘Aanapen da so kareenan tan tutumboken da itan.’​—1 Pedro 3:11.

16, 17. (a) Akin a saray alanaan et tatawagen ya ‘ananak na Dios,’ tan panon dan ‘nanengneng so Dios’? (b) Panon a say ‘arum a karnero’ et ‘makanengneng ed Dios’? (c) Diad sigpot a pantalos, panon tan kapigan a magmaliw ya ‘ananak na Dios’ so ‘arum a karnero’?

 ¹⁶ Parad saray managpareen a walaan na maralus a puso, nisipan a sikara so ‘ingaran ya anak na Dios’ tan ‘nanengneng da so Dios.’ Saray alanaan a Kristiano et nailalak ed espiritu tan tinagibi nen Jehova bilang ‘ananak’ legan a wadia ni ra ed dalin. (Roma 8:14-17) Sano sikara so napaoli pian nakaiba nen Kristo diad tawen, sikara so manlingkor ed kawalaan nen Jehova tan Sikato so aktual dan nanengneng.​—1 Juan 3:1, 2; Apocalipsis 4:9-11.

¹⁷ Say managpareen ya ‘arum a karnero’ so manlilingkor ed si Jehova diad silong na Maabig a Pastol, si Kristo Jesus, a magmaliw ya ‘Andi-anggaan ya Ama’ ra. (Juan 10:14, 16; Isaias 9:6) Saramay matalonan makaliktar ed unor a subok kayari na Milenyon Uley nen Kristo so natagibi bilang mangaraldalin ya ananak nen Jehova tan “onloob ed kawayangan na gloria na saray anak na Dios.” (Roma 8:21; Apocalipsis 20:7, 9) Legan dan tatalaranan itan, tatawagen da si Jehova bilang Ama ra, lapud indedika ra so bilay da ed sikato, a bibidbiren da bilang Manangiter na Bilay da. (Isaias 64:8) Singa si Job tan si Moises nensaman, ‘nanengneng da so Dios’ panamegley na mata na pananisia. (Job 42:5; Hebreos 11:27) Diad panamegley na ‘mata na puso ra’ tan suston pikakabat da nipaakar ed Dios, natetebek da iray alay abig a kalidad nen Jehova tan sikatoy panggugunaetan dan aligen diad panusumpal ed linawa to.​—Efeso 1:18; Roma 1:19, 20; 3 Juan 11.

18. Mitunosan ed primeron pitoran rason na panliket ya indatak nen Jesus, siopa natan so makakaeksperiensya na tuan liket?

¹⁸ Atalosan tayo a saramay sinononot ed espiritual a pankaukolan da, saramay maneermen, saray mauyamo, saramay naeerasan tan napepegaan ed inkatunong, saray mapangasi, saray maralus ed puso, tan saray managpareen so makaromog na tuan liket diad panlilingkor da ed si Jehova. Ingen, saratan so naynay a makaeksperiensya na isusumpa, pati panamasegsegang. Kasin satan so mamaandi ed liket da? Satan a tepet so konsideraen ed ontumbok ya artikulo?

Bilang Panrepaso

• Anton liket so naeeksperiensya na saramay sinononot ed espiritual a pankaukolan da?

• Diad antoran dalan a naligliwa iramay maneermen?

• Panon tayon nipatnag so inkauyamo?

• Akin a nepeg itayon magmaliw a mapangasi, maralus ed puso, tan managpareen?

[Tepetepet Parad Panagaral]

[Litrato ed pahina 10]

“Mapalar iray duruka ed espiritu”

[Saray litrato ed pahina 10]

“Mapalar iray narasan tan napgaan unong ed katunongan”

[Litrato ed pahina 10]

“Mapalar iray mapangasi”