Labay Mo Ta so Manbilay ya Andi-angga?

“AGAK antakot ya ompatey,” so inkuan na sakey ya akulaw diad Hapon. “Balet naeermenan ak ta nataynan ko irayan rosas.” Atalosan na sakey a Kristianon ministro a dinmalaw ed abung to no akin ya ontan so imbaga to, lapud say akulaw et walaan na marakdakep a hardin. Dakel a totoo a mangibabagan ag-ira natatakot ya ompatey so mangaapresyan maong ed saray pakelaw na palsa tan diad tua et pipirawaten da so manbilay ya andi-angga.

Manbilay ya andi-angga? Dakel so mangipupulisay ed satan ya ideya. Walaray mangibabaga ni ingen ya agda labay so manbilay ya andi-angga. Akin kasi et walaray ontan so panmoria ra?

 Bilay ya Andi-anggaan​—Kasin Makapasawa?

Iisipen na arum a magmaliw a makapasawa so pambilay ya andi-angga. Nayarin nononoten da so makapasawan bilay na dakel a retiradon totoo ya anggapo lay nagagawaan da noag say manyurong tan manbantay na telebisyon. No ontan so panmoriam, imanom so imbaga na astronomon si Robert Jastrow sanen tinepetan no kasin magmaliw a bendisyon odino ayew so bilay ya andi-anggaan. Oniay inyebat nen Jastrow: “Magmaliw itan a bendisyon ed saramay walaan na maupapet a kanonotan tan agmanganggan pilalek a makaaral. Makaligliwan tuloy ed sikara so ideya a magnayon iran makagamor na pikakabat. Balet parad arum ya agmalabay a makaaral na balo iran bengatla tan sarado lay kanonotan da, satan so makapataktakot ya ayew. Agda amta no panoy pangusar da ed panaon da.”

Mandependin tuloy ed awawey mo no kasin moriaen mon makapasawa odino andi so bilay ya andi-anggaan. No walaan ka na ‘maupapet a nonot tan agmanganggan pilalek a makaaral,’ isipen pa labat so nagawaan mo diad lawak na arte, musika, arkitektura, panagtanaman, odino antokaman niran makanan gegemtan a paniinteresan mo. Lapu ed maandon bilay diad dalin, wala so alay abig iran pankanawnawa a napaaligwas so potensyal mo ed nanduruman lawak na kimey.

Say agmanganggan pakapangipatnag tan pakalikna na panangaro so manggawa ed maandon bilay a talagan makapenek. Pinalsa itayo a walaan na kapasidad a mangipanengneng na aro, tan ombiskeg itayo sano nalikna tayon aaroen itayo. Makapenek a tuloy so peteg a panaaroan ya agnaumas diad ilalabas na panaon. Say pambilay ya andi-angga so mangiter na magnayon a pankanawnawa pian nabayuboan so panangaro ya aliwa labat a parad kaparan totoo noagta nagkalalo la parad Dios. “No siopaman a too kaba’to [“aroen to,” NW] so Dios,” kuan nen apostol Pablo, “ontan met a sikatoy kabat na Dios.” (1 Corinto 8:3) Agaylan abig ya ilalo a sikatayoy makapikabat tan nakabat na Soberano ed uniberso! Nagkalalo ni, anggapo so anggaan na pakaaral nipaakar ed maaron Manamalsa tayo. Sirin, panon a makapasawa tan agmakapaliket so bilay ya andi-anggaan?

Bilay​—Antiktikey Kanian Mabmabli

Momoriaen na arum a mabmablin tuloy so bilay lapud kinatikey na satan. Nayarin ikokompara ra so bilay ed balitok, a satan so mataltalag. Ikakatunongan da a no say balitok et naromog la ed anggan iner, onabeba la so balor na satan. Anggaman kuan, say balitok et siansia nin marakep. Seguradon ontan met so bilay.

 Nikompara tayo so panggayaga ed maandon bilay ed pakawalaan na daakan a suplay na dagem. Ipapasen na saray managlayag ya akalugan ed aderalan a submarino a makanakanan tuloy so dagem. Sano nisalba la ira, isipen mo kasi a manreklamo ra sano nawalaan ira lamet na daakan a suplay na dagem? Siempre andi!

Singa saratan a managlayag, nayari itayon nisalba, ingen ta aliwa labat a walaan na ilalon manbilay ed loob na antikey a panaon noagta andi-anggaan. “Say bayar na kasalanan say patey,” so insulat nen apostol Pablo, “bangbalet say langkap ya andi-bayar na Dios say bilay ya andi-angga ed Kristo Jesus a Katawan tayo.” (Roma 6:23) Diad panamegley na dondon bagat nen Jesus, panampoten na Dios so ag-inkayadyari na too tan say ipapatey tan ipagamor to ed matulok a katooan so langkap a bilay ya andi-anggaan. Agaylan misalsalamat itayo lapud satan a maaron uksoyan!

Komusta Balet Iray Inad-arom?

Nayarin oniay isipen na arum ya indibidual: ‘Komusta balet iray inad-arok? Anggapoy kabaliksan ed siak na maandon bilay diad dalin no agko ra lanlamang nakaiba.’ Nayarin walaan ka la na pikakabat ed Biblia tan naaaralan mo la a posiblin napanggayagaan so bilay ya andi-anggaan diad mangaraldalin a paraiso. (Lucas 23:43; Juan 3:16; 17:3) Natural labat a kaliktan mon nakaiba diman iray kapamilyam, arum niran inad-arom, tan pinablin kakaarom pian napanggayagaan da met so iilaloan mon balon mundo na inkatunong ya insipan na Dios.​—2 Pedro 3:13.

Balet panon to no saray kakaaro tan inad-arom et ag-interesadon manbilay ya andi-angga diad paraison dalin? Agka padidismaya ed satan. Itultuloy moy mangala na suston pikakabat ed Kasulatan, tan onkiwas a mitunosan ed satan. Oniay insulat nen apostol Pablo: “Panon so pakaamtam, O bii, no nilaban mo lagi asawam? Odino panon so pakaamtam, O laki, no nilaban mo lagi so asawam?” (1 Corinto 7:16) Nayarin manguman so totoo. Alimbawa, sakey a laki a datin onsusumpa ed Inkakristiano so anguman tan diad saginonor et nagmaliw a matatken ed Kristianon kongregasyon. Oniay inkuan to: “Siak so misalsalamat lapud matoor a nansiansia ed saray prinsipyo ed Biblia so pinablik a pamilya anggaman ed pirmin isusumpak.”

Say Dios so mapagan tuloy ed bilay mo tan ed bilay na saray inad-arom. Peteg a si Jehova et “agto labay a wala so siopaman a natawtaw noag ingen amin komon nagegemtan da so panagsibkel.” (2 Pedro 3:9) Kaliktan nen Jehova a Dios a sika tan saray inad-arom so manbilay ya andi-angga. Babaleg so panangaro to nen saray ag-ayadyarin totoo. (Isaias 49:15) Kanian akin ya agbayuboan so maabig a relasyon ed Dios? Diad ontan et natulongan mo iray inad-arom a manggawa met na ontan. Anggano andian ira natan na ilalon manbilay a maando, nayarin manguman so awawey da sano nanengneng da kan onkikiwas a mitunosan ed suston pikakabat ed Biblia.

Komusta balet iray inad-arom a naandi la’d bilay? Parad saray minilyon ya inaatey, say Biblia so mangitatarya na alay abig ya ilalon kioli tan manbilay diad Paraison dalin. Oniay insipan nen Jesu-Kristo: “Onsabi oras, ya amin so saray wala ed saray lubok . . . et ompaway ira.” (Juan 5:28, 29) Anggan saramay inatey lan ag-akapikabat ed Dios et napaoli ed bilay, lapud ibabaga na Biblia: “Wala naani kioli ed bilay na saray matunong tan agmatunong.” (Gawa 24:15) Agaylan makapaliket so pangabrasa ed saratan a sinansakey ya onoli ed bilay!

Maandon Bilay​—Sakey a Makapagayagan Ilalo

No naliliknam natan so liket tan inkakontento anggaman ed amin ya inkagulo ed sayan mundo, segurado a napanliketan mo so maandon bilay diad paraison dalin. Balet, sanen impabitar na sakey a Tasi nen Jehova iray bendisyon ya itarok na bilay ya andi-anggaan, onia so inkuan na sakey a bii: “Agko labay so manbilay ya andi-angga. Kontento ak la ed bilay a 70 odino 80 a taon.” Sikatoy tinepetan na sakey a  Kristianon matatken a nibanan wadman: “Naisip mo ta la no anto so nalikna na saray anak mo no ompatey ka?” Inmagus iray lua ed lupa to sanen naisip to so pirmin panermen na saray anak to sano sikatoy naandi la. “Natan ko labat amoria no panon so inkasiblet ko,” so inaksobi to, “tan natatalosan ko la ya aliwan sinisiblet ya ilalo so bilay ya andi-anggaan noagta lalanoren na satan so pambilay parad arum.”

Nayarin moriaen na arum ya ag-importante ed siopaman no manbilay man odino ompatey ira. Balet, importante itan parad say Angiter na Bilay tayo, ya angibagan: “Unong a siak mabilay ak, . . . anggapo so liket ko ed ipapatey na marelmeng; noag ingen say marelmeng ompawil komon a manlapu ed dalan to tan manbilay.” (Ezequiel 33:11) Lapud mapagan tuloy so Dios ed bilay na anggan saray marelmeng, seguradon sikatoy nagkalalon mangiyaansakit ed saraman so mangaaro ed sikato.

Si Arin David na kadaanan ya Israel so makaseseguro ed maaron panangasikaso nen Jehova. Oniay aminsan ya inkuan nen David: “Bangno paulyan ak na amak tan inak, si Jehova ed satan ampopoen to ak.” (Salmo 27:10) Segurado si David a sikatoy inararo na atateng to. Balet anggano sikato so taynanan na atateng to, salanti, saray totoon sankaapitan ed sikato, amta to a say Dios so agmangikaindan ed sikato. Lapud panangaro tan panagpaga nen Jehova ed sikatayo, iyoopresi to so bilay ya andi-anggaan tan magnayon a pikakaaro ed sikato. (Santiago 2:23) Ag-itayo kasi maliket a mangawat ed saratan ya alay abig a langkap?

[Litrato ed pahina 7]

Say panangaro ed Dios tan ed kaparan too et manggawan makanakana so pambilay ya andi-angga