Tepetepet Manlapud Saray Managbasa

Akin a say apaolin Jesus et nampadiwit ed si Tomas balet ta diad akadkauna et binano to si Maria Magdalena a maniwit ed Sikato?

Ipapabitar na pigaran mas daan a patalos na Biblia ya imbaga nen Jesus ed si Maria Magdalena a sikatoy agto diwiten. Singa bilang, oniay impangipatalos na King James Version ed saray salita nen Jesus: “Agmo ak didiwiten; ta agak ni sinmegep ed Amak.” (Juan 20:17) Balet, say orihinal a Griegon verb, a kaslakan ya ipapatalos a “diwit,” so mankabaliksan met na “ombemben, ompeket, ongemgem, singkaten, onegna.” Makatunongan sirin a say binano nen Jesus et aliwan say basta impaniwit nen Maria ed sikato, lapud agnambayag kayari na satan et inabuloyan to iray arum a bibii a wadman ed ponponan ya ‘egnaan da iray sali to.’​—Mateo 28:9.

Dakel a modernon-lenguahe iran patalos, a singa say New World Translation of the Holy Scriptures, The New Jerusalem Bible, The New English Bible, tan Maung a Balita a Biblia, so ontulong ed sikatayon natalosan so peteg a kabaliksan na saray salita nen Jesus diad onian impangipatalos da ed saratan: “Ag mo ak bebembenan.” (Maung a Balita) Akin ya imbaga nen Jesus so ontan ed si Maria Magdalena anta sakey a maapit a kaaro to?​—Lucas 8:1-3.

Mapatnag ya apagaan si Maria Magdalena ya ompan ontaynan tan ontokotok la si Jesus ed tawen. Lapud pilpilalek to a nakaiba so Katawan to, sikatoy binmemben a malet ed si Jesus, tan agto labay ya ikbanan. Pian napaseguroan si Maria ya agni ontaynan si Jesus, sikatoy binano ton ombemben ed sikato tan binilin ton ipakabat ed saray babangatan to so nipaakar ed inkioli to.​—Juan 20:17.

Duma balet so agawa ed baetan di Jesus tan Tomas. Sanen nampanengneng si Jesus ed saray babangatan to, anggapo diman si Tomas. Diad saginonor, imbesngaw nen Tomas so panduaruwa to ed inkioli nen Jesus, ya inkuan ton agto manisia likud no nanengneng toy tinalos na pasak ed lima nen Jesus tan nilabot toy lima to ed aduyok a diking To. Kayari waloran agew, nampanengneng lamet si Jesus ed saray babangatan to. Diad saman a pankanawnawa et wadman si Tomas, kanian impadiwit nen Jesus ed sikato iray sugat to.​—Juan 20:24-27.

Sirin, diad samay inkagawa ed si Maria Magdalena, si Jesus so kinmiwas ed lingon impamokpok ed sikato; diad samay inkagawa balet ed si Tomas, si Jesus so tinmulong ed sakey a manduaruwa. Diad parehon inkagawa et walaan si Jesus na maabig a rason ed inkiwas to.