Ipulisay so Makapuy a Kanonotan!

SANEN naeksperiensya na patriarkan Job iray graben trahedya, sikatoy binisita na taloran kakaaro to a di Elifaz, Bildad, tan Zofar. Sikaray linma pian miambegya tan manligliwa ed sikato. (Job 2:11) Say sankamaimpluensyaan tan nayarin say sankapanguloanan ed talora et si Elifaz. Sikatoy sankaunaan a nansalita tan sankarakelay imbaga. Anton klase na kanonotan so impatnag nen Elifaz ed taloran talumpati to?

Oniay inkuan nen Elifaz sanen nonodnonoten to so aminsan ya ekstraordinaryon eksperiensya to: “Sakey ya espiritu so linmabas ed arap na lupak; say bago na laman ko binmegas. Inmalagey a mareen, balet agko ayarian ya imbiig so ereng to; sakey a nengneng so wala nensaman ed arap na saray matak: wala nensaman so deen, tan nadngel ko so boses.” (Job 4:15, 16) Anton klase na espiritu so angimpluensya ed kanonotan nen Elifaz? Saray sinmaginonor a makritikon salita so mangipapanengneng a saman ya espiritu et seguradon aliwan sakey ed saray matunong ya anghel na Dios. (Job 4:17, 18) Sakey iman a marelmeng ya espiritun pinalsa. Ta no andi, akin et binaat nen Jehova si Elifaz tan saray duaran kaiba to diad impangibaga na tilatila? (Job 42:7) On, si Elifaz so inimpluensyaan na demonyo. Saray komento to so mangipaparungtal na agmaridios a kanonotan.

Antoran ideya so natebek tayo ed saray salita nen Elifaz? Akin ya importante ya ag-itayo paiimpluensyaan ed makapuy a kanonotan? Tan antoray nagawaan tayo pian nipulisay itan?

‘Agmanmamatalek ed Saray Ariripen To’

Diad taloran talumpati nen Elifaz, ipapasabi to so ideya a say Dios et maanap kanian anggapoy antokaman a nagawaan na ariripen to a makapaliket ed sikato. “Nia, sikato agmanmatalek ed saray ariripen to;” kuanen Elifaz ed si Job, “et indalem to so saray angheles to ed kaatiwan.” (Job 4:18) Diad saginonor et oniay inkuan nen Elifaz nipaakar ed Dios: “Agmanmatalek ed saray sasanto to; on, saray tawen ag-ira malinis dia ed pakanengneng to.” (Job 15:15) Insan to intepet: “Sikato ta so makapaliket ed Makapanyarin-amin, a sika so matunong?” (Job 22:3) Pinasegundaan nen Bildad iyan panmoria, diad impangikuan: “Anggan say bulan andian na sinag, tan saray bitewen sikara so agmalinis ed pakanengneng [na Dios].”​—Job 25:5.

Nepeg ya ag-itayo paiimpluensyaan ed ontan a kanonotan. Satan so nayarin mangitonton ed pangipasen tayo a sobsobray kakaukolanen na Dios ed sikatayo. Aatakien na sayan panmoria so mismon relasyon tayo ed si Jehova. Niarum ni, no abuloyan tayon magmaliw lan ontan so panagkatunongan tayo, panon kasi ikiwas tayo no sikatayoy ikdan na nakaukolan a disiplina? Imbes a mapaabeban paipetek, nayarin ‘onsanok so puso tayo sumpad si Jehova,’ tan onsakit so linawa tayo ed sikato. (Uliran 19:3) Peteg a satan so makaderal ed espiritualidad tayo!

 “Wala Kasi Kana na Mabiskeg a Laki ed Dios?”

Say ideya a say Dios kuno et masyadon maanap et misiglaotan a maong ed panmoria ya ipapasen ton andiay kana iray totoo. Lugan na komatlon talumpati nen Elifaz so tepet a: “Wala kasi kana na mabiskeg a laki ed Dios, a say siopaman a walaay pakatalos et walay kana ed sikato?” (Job 22:2, NW) Ipapasagilig nen Elifaz ya anggapoy kakanaan na too ed Dios. Mipadpara ed satan et oniay insangsang nen Bildad: “Panon sirin so pakayari na too a mitunong ed Dios, odino panon so pakayari to a malinis so nianak ed bii?” (Job 25:4) Unong ed satan a panagkatunongan, panon a nibaga nen Job a sikatoy matunong ed imaton na Dios, anta sikatoy sakey lambengat a mortal a too?

Walaray totoo natan a nagogonigon lapud negatibon panmoria ra ed inkasikara. Nayarin say sengegan na satan et say impamabaleg ed sikara, saray nasasagmak dan desdes ed bilay, odino biktima ira na irangan na rasa odino etniko. Ingen ta panliliketan met nen Satanas tan saray dedemonyo to a detdetan so sakey a too. No naimpluensyaan day sakey ya indibidual a mangipasen ya agton balot napaliket so Makapanyarin-amin a Dios, sikatoy magmainomay lan naandian na ilalo. Nasabi panaon, sikato lay onkasipa, ya anggad onarawi la ed mabilay a Dios.​—Hebreos 2:1; 3:12.

Lapud itatakken tan problema ed bunigas et nalilimitaan itayo. Singano dagdaiset lay nagagawaan tayo ed serbisyo ed Panarian no ikompara ed datin nagagawaan tayo sanen kaugawan tayo ni, maabig ni so bunigas tayo, tan kaksilan tayo ni. Agaylan makana a naamtaan a kaliktan nen Satanas tan saray demonyo to a nalikna tayon aliwan magenap ed Dios so nagagawaan tayo! Nepeg tayon ipulisay so ontan a kanonotan.

No Panon a Nipulisay so Negatibon Kanonotan

Anggaman pinairap nen Satanas si Job, siansian oniay inkuan nen Job: “Angga ed ompatey ak agko ekalen so inkaskey ko a manlapu ed siak.” (Job 27:5) Lapud inaro nen Job so Dios, sikatoy determinadon mamasiansia ed inkaskey odino integridad to antokaman so nagawa, tan anggapoy makapanguman ed satan. Saya so importantin aspekto pian nipulisay so negatibon kanonotan. Nepeg tayon palaknabey pakatalos tayo ed panangaro na Dios tan bayuboan so masimoon a panangapresya ed satan. Kaukolan tayo met a paaralemen so panangaro tayo ed sikato. Nagawaan iya panamegley na regular a panagaral na Salita na Dios tan mapikasin pandalepdep ed saray naaralan tayo.

Alimbawa, inkuan na Juan 3:16: “Ontan lay impangaro na Dios ed mundo, ya inter to so bogbogtong ya Anak to.” Inadaro nen Jehova so katooan, tan papaneknekan na impideneng to ed dakel lan panaon itan a panangaro. Nepeg a say pandalepdep ed saray alimbawa ed apalabas so mamaaralem ed panangapresya tayo ed si Jehova tan mamabaleg na panangaro tayo ed sikato, diad ontan et natulongan itayon nipulisay so makapuy odino negatibon kanonotan.

Imanoen pa so impantrato nen Jehova ed si Abraham sanen magano To lan deralen so Sodoma tan Gomorra. Aminwalon akitawalan si Abraham ed si Jehova nipaakar ed pangukom To. Balet, anggan kapigan et agnaalipanesan odino asyodotan si Jehova. Imbes, say kakaebat to et makapaseguro tan makaligliwa ed si Abraham. (Genesis 18:22-33) Sanen diad saginonor et inliktar na Dios si Lot tan say pamilya to ed Sodoma, kinerew nen Lot a dia la’d asingger a syudad so batikan da imbes a diad kapalandeyan. Et oniay ebat nen Jehova: “Nengneng mo, inabobonan ta ka nisengeg ed saya met lanlamang so kuan mo, agko la deralen so sayan syudad a sikatoy impisalitam.” (Genesis 19:18-22) Kasin ililitrato na sarayan salaysay si Jehova bilang maanap, agmaaro, diktador a manuley? Andi. Ipapanengneng na saraya no siopan talaga si Jehova​—sakey a maaro, mao-maong, mapangasi, tan makatalos a Soberano.

Pepekderan na saray alimbawa di Aaron, David, tan Manases, a lingo so ideya a say Dios et piimano to so kalilingoan tan agnapaliket na anggan siopa. Amitlon akagawa si Aaron na ambelat a kasalanan. Sikatoy nanggawa na balitok a baka, akinonong ed atsi ton Miriam a nanmudmora ed si Moises, tan agto apasanto tan apagalangan so Dios diad Meriba. Anggaman ontan, anengneng  nen Jehova iray maabig a kalidad to tan sikatoy inabuloyan Ton mantultuloy a manlingkor bilang atagey a saserdote anggad ipatey to.​—Exodo 32:3, 4; Numeros 12:1, 2; 20:9-13.

Akagawa si Arin David na ambelat iran kasalanan legan na impanuley to. Kabiangan ed saraya so pikakalugoran, implanon pamatey ed inosentin laki, tan ilegal ya impamilang ed totoo. Balet, inimano nen Jehova so impagbabawi nen David kanian sitotoor Ton sinumpal so sipanan ed Panarian diad impangiyabuloy ed si David a manlingkor bilang ari anggad ipatey to.​—2 Samuel 12:9; 1 Awaran 21:1-7.

Say Ari ed Judea a si Manases so nampaalagey na saray altar nen Baal, angipadalan ed saray ilalak to ed apoy, angipaseseg ed espiritistikon ag-agamil, tan angipaalagey na saray altar na palson relihyon diad saray saban na templo. Balet, sanen sikatoy masimoon a nagbabawi, si Jehova so amerdona ed sikato, angibulos ed impakakautibo to, tan angipawil ed inkaari to. (2 Awaran 33:1-13) Onia ta so ikiwas na sakey a Dios ya agbalot napaliket na siopaman? Seguradon andi!

Say Matilan Manangakusa so Natetel

Nepeg ya agtayo pankelawan a si Satanas so manunan makan-ugali ed saray mismon ug-ugali ya iyaakusa to ed si Jehova. Si Satanas so maruksa tan maanap. Sankaimano iya ed agamil a panangibagat ed saray anak a misiglaotan ed palson panagdayew nensaman a panaon. Pinopoolan na saray apostatan Israelita iray anak dan lalaki tan bibii​—sakey a bengatlan ag-anggan sinmebang ed nonot nen Jehova.​—Jeremias 7:31.

Si Satanas so maanap na kalilingoan, aliwan si Jehova. Si Satanas so tinukoy na Apocalipsis 12:10 bilang “say manangidalem na saray agagi tayo . . . , a sikato so manangidalem ed sikara ed arap na Dios tayo ed agew tan labi.” Diad biek a dapag, oniay inkanta na salmista nipaakar ed si Jehova: “No sika, Jehova, et uninengen mo so saray kasulitan, O Katawan, siopa kasi naani makaalagey? Bangbalet wala so panamerdona ed sika.”​—Salmo 130:3, 4.

Sano Naandi la so Makapuy a Kanonotan

Seguradon nainawaan a maong iray espiritun pinalsa ya angheles sanen si Satanas tan saray demonyo to so apagit manlapud katawenan! (Apocalipsis 12:7-9) Kayari na saman et agla napibabalian na sarayan marelmeng ya espiritu so kimkimey na saray anghelikon pamilya nen Jehova diad tawen.​—Daniel 10:13.

Saray manaayam ed dalin so magano lan manggayaga. Agmanbayag, say anghel ya onepas manlapud tawen a bemben toy tombok na kaaralman, so mamalor ed si Satanas tan saray demonyo to tan sikaray ipukok to ed kaaralman na inka-inaktibo. (Apocalipsis 20:1-3) Agaylay pakainawaan tayo sano nasabi itan!

Kaleganan ni, nepeg a manalwar itayo pian agnabayuboan so makapuy a kanonotan. Bektaman ya onsesebang ed kanonotan tayo itan a makapuy odino negatibon kanonotan, kaukolan tayon ipulisay iratan diad pangisentro’d kanonotan tayo ed panangaro nen Jehova. Diad ontan et ‘say deen na Dios, a talonaan ton amin a pakatalos, bantayan to so kapusoan tayo tan saray nonot tayo.’​—Filipos 4:6, 7.

[Litrato ed pahina 26]

Impulisay nen Job so negatibon kanonotan

[Litrato ed pahina 28]

Naamtaan nen Lot a si Jehova et sakey a makatalos a Soberano