Tepetepet na Saray Manbabasa

Lapud ingganggan ed saray Judio ya agmamangan na “alebaduraan” legan na Paskua, akin ya angusar si Jesus na alak, anta produkto itan na panagpaakseng, sanen inletneg to so Memoryal na impatey to?​—Exodo 12:20; Lucas 22:7, 8, 14-20.

Say panagselebra ed Paskua pian nodnonoten so Impaway na ananak na Israel ed Ehipto, so inggapo nen 1513 B.C.E. Sanen angiter si Jehova na saray bilin parad panselebra ed satan, inkuanto: “Anggan anto ya alebaduraan agyo kakanen; dia ed inerman a panayaman yo say andi-lebadura a tinapay so kanen yo.” (Exodo 12:11, 20) Sayan panangisebel na Dios et ontukoy labat ed klase na tinapay a kanen da legan na Paskua. Agsinalambit so alak.

Say manunan rason no akin ya insebel so lebadura et lapud apuraan so intaynan na saray Israelita ed Ehipto. Ibabaga na Exodo 12:34: “Saray totoo inala ra so mamasaen da a tapong ya agni alebaduraan, saray panaggawaan da na tinapay nisipol ira ed balkot na saray kawes da a sinakbat da.” Say ag-impangusar ed lebadura ed tinmutumbok iran panagselebra ed Paskua so mangipanonot ed arapen iran henerasyon na sayan importantin bengatla.

Diad inlabas na panaon, say lebadura so kaslakan ya ipapasen bilang simbolo na kasalanan odino inkauges. Alimbawa, onia so intepet nen apostol Pablo sanen tinukoy toy imoral a too ed loob na Kristianon kongregasyon: “Agyo ta amta a say daiset a lebadura palebagen to so ami tipay?” Insan inkuanto: “Punas yo sirin so daan a lebadura, ta pian ombalo kayo a tipay, a singa kayo andian na lebadura. Ta say pasko tayo nibagat met, salanti si Kristo. Kanian ngilinan tayo so piesta, aliwa a pati daan a lebadura, aliwa met a dia ed lebadura na panangisip na mauges tan say karelmengan, noag dia ed anggapo a lebadura na tinapay na kalinisan tan katuaan.” (1 Corinto 5:6-8) Say ag-alebaduraan a tinapay labat so nayarin usaren bilang simbolo na andiay kasalanan a laman nen Jesus.​—Hebreo 7:26.

Say pangusar na alak diad panagselebra ed Paskua so inyarum na saray Judio ed saginonor. Nayarin inyarum itan kapawil da manlapud inkibantak da ed Babilonia. Anggapoy nabasa ed Biblia ya anuppiat ed sayan impangiyarum, kanian angusar si Jesus na alak diad pangdem ed Paskua. Siempre, say natural a panagpaakseng ed alak nensaman so duma ed panagpalebag ed tinapay. No nipaakar ed minasa, mankaukolan itan na yist, odino lebadura pian onlebag. Say alak a gawa’d ubas so andian na ontan a laok lapud sipor lan onakseng so ubas. Anggapo komon so puron tabol na ubas diad Paskua no ag-itan inmakseng manlapud panagbudbor ed panaon na loglog anggad Paskua ed primabera (spring).

Kanian, say impangusar nen Jesus ed alak bilang emblema ed Memoryal et agbalot onsumlang ed saray bilin ed Paskua nipaakar ed lebadura. Dinanman ya ambalangan alak ya agnilaokan na asukal, agpinabayani na alkohol, odino agnilaokan na antokaman so matukoy bilang simbolo na “mablin dala” nen Kristo.​—1 Pedro 1:19.