Mabulos tan Maliket a Panangiter

NO NIPAAKAR ed panangiter, oniay insulat nen apostol Pablo: “Balang sakey gawaen to komon so ginetma to ed puso to,” tan inyarum to: “Aliwa a dia ed kaermenan odino dia ed pasootan, ta say Dios aroen to so sililiket a mangiter.” (2 Cor. 9:7) Agpapasooten nen Jehova so siopaman a suportaan so tuan panagdayew. Aabuloyan to iray lingkor to ya ipanengneng so debosyon da diad mabulos tan maliket a pangiter da. Ipapanengneng na rekord a mabulos ya angiter iray totoo to. Imanoen tayo pa so taloran alimbawa.

Kayarin imbulos nen Jehova iray Israelita manlapud Ehipto, ingganggan to ran mangipaalagey na tabernakulo. Kaukolan iray materyales, kanian kinerew a mankontribusyon iray Israelita. Antoy resulta? “Balang sakey a [pinakiwas] na puso to” et angawit na balitok tan pilak, alahas, tan arum ni ran materyales. Ontan lay inkamaiter na saray totoo a kaukolan nin iyanunsio a magenap lay atipon tan ontunda la ran mangiter.​—Exo. 35:5, 21; 36:6, 7.

Kayari pigaran siglo, sanen kaukolan ya ipaalagey so templo, pankanawnawa lamet na saray  totoo na Dios ya ipanengneng so suporta ra ed tuan panagdayew. Balbaleg so kontribusyon nen Arin David ed sayan proyekto tan inimbitaan to met so arum a mangiter. Mabulbulos dan ginawa itan. Agayla, say kontribusyon a balitok tan pilak ni labat et manbili lay masulok a 100 bilyon a dolyar ed panaon tayo! Malikeliket iray totoo diad boluntaryon impangiter da ed si Jehova.​—1 Awa. 29:3-9; 2 Awa. 5:1.

Say maliket a panangiter et impanengneng met na saray inmunan papatumbok nen Jesu-Kristo. Sanen agew na Pentecostes 33 C.E., manga 3,000 so abautismoan, a dakel ed sikara et aliwan taga Jerusalem. Pian makapansiansia ni ed Jerusalem iramay mairap so bilay da tan makaaral ni nipaakar ed balon pananisia ra, nankokontribusyon iray Kristiano ed saman a lugar. Inlako na saray agagi so kaykayarian da tan inawit da imay nanlakoan a kuarta ed saray apostoles pian natulongan iramay mankaukolan. Seguradon malikeliket si Jehova ed sayan impangipanengneng da na pananisia tan panangaro!​—Gawa 2:41-47.

Diad sayan panaon, siansia nin mabulos tan maliket ya iiter na saray Kristiano so panaon, biskeg, tan kuarta ra pian suportaan so tuan panagdayew. Nabasa yo ed kahon so pigaran paraan no panon yon nagawaan itan.

[Kahon ed pahina 18, 19]

SARAY PARAAN NA PANANGITER A PINILI NA ARUM

KONTRIBUSYON PARAD SANKAMUNDOAN A KIMEY

Dakel so mangigagana na kantidad ya ipelag da ed saray kahon na kontribusyon ya atatakan na “Worldwide Work.”

Binulan ya ipapawit na saray kongregasyon irayan kantidad diad sangan opisina na saray Tasi nen Jehova ya aka-asain ed bansa ra. Saray boluntaryon donasyon a kuarta et nayari met a direktan ipawit ed Watch Tower Bible and Tract Society of the Philippines, Inc, P.O. Box 2044, 1060 Manila, odino diad sangan opisina na saray Tasi nen Jehova ya aka-asain ed bansan kawalaan yo. Saray tseke ya ipawit ed address ed tagey so kaukolan ya ingaran ed “Watch Tower Society.” Nayari met ya idonasyon iray alahas odino arum ni ran ankablin bengatla. Nepeg ya itekep ed sarayan donasyon so sakey ya antikey a sulat a mangibabagan saratan et direktan inregalo.

UKSOYAN PARAD KONDISYONAL IRAN DONASYON

Nayari met ya imatalek so kuarta ed Watch Tower Bible and Tract Society of the Philippines, Inc. pian nausar ed sankamundoan a kimey. Bangbalet, satan so ipawil sano alaen la na angimatalek. Parad kaaruman ya impormasyon, ipangasin mitalosan ed Treasurer’s Office diad address ya asalambit la.

NIPLANON PANANULONG

Likud ni ed saray direktan regalo a kuarta, walaray arum nin paraan na panangiter parad sankamundoan a kimey ed Panarian. Kabiangan ed saratan so:

Insurance: Say Watch Tower Bible and Tract Society of the Philippines, Inc. et nayarin iyan bilang benepisyaryo na life insurance policy odino retirement/pension plan.

Saray Deposito ed Bangko: Saray deposito ed bangko, certificate of deposit, odino indibidual a deposito ed panretiro so nayarin imatalek odino ingaran ed Watch Tower Bible and Tract Society of the Philippines, Inc. diad bektan ompatey so akan-account, unong ed saray kakaukolanen na bangko.

Saray Stock tan Bond: Saray stock tan bond so nayarin idonasyon ed Watch Tower Bible and Tract Society of the Philippines, Inc., bilang direktan regalo.

Lote tan Abung: Say lote tan abung a nayarin ilako so niiter balanglan direktan regalo, odino no abung, makapantultuloy a manayam ditan so angidonar legan a mabilay. Mitalosan ed sangan opisina diad bansan kawalaan yo sakbay ya iyalis so titulo na antokaman a lote tan abung ed Watch Tower Bible and Tract Society of the Philippines, Inc.

Gift Annuity: Say gift annuity et sakey a reglamento a niyalis na sakey so kuarta odino securities diad korporasyon ya uusaren na saray Tasi nen Jehova. Bilang kasalat, say angidonar, odino siopaman a pangipiyaan to, so makaawat na pihon bayar na annuity a tinaon legay bilay. Say angidonar so makaawat na income-tax deduction diad samay taon a niyareglo so gift annuity.

Testamento tan Saray Trust Fund: Saray kayarian odino kuarta so nayarin ipatawir ed Watch Tower Bible and Tract Society of the Philippines, Inc. diad panamegley na sakey a legal a testamento, odino nayarin iyan so Watch Tower Bible and Tract Society of the Philippines, Inc. bilang benepisyaryo na trust agreement. Say trust fund a parad sakey a relihyoson organisasyon so nayarin mamawala na pigaran bentaha ed panag-buis.

Unong ya ipapatnag na terminon “niplanon pananulong,” sarayan nengneng na donasyon so kaslakan a mankakaukolan na panagplano ed biang na mangidonasyon. Pian natulongan iray indibidual a malabay ya ontulong ed sankamundoan a kimey na saray Tasi nen Jehova panamegley na niplanon pananulong, niparaan so sakey a brosyur diad Ingles tan Español ya atituloan na Charitable Planning to Benefit Kingdom Service Worldwide. Sayan brosyur so inimprinta pian mangiter na impormasyon nipaakar ed nanduruman paraan na nayarin pangiter ed saray regalo, balanglan natan odino ipatawir sano ompatey imay akanggawa. Kayari ran abasa so brosyur tan tinmupleg ed saray legal a managkonseho ra ed panag-buis, dakel la so makakatulong pian nasuportaan so sankamundoan a relihyoson kimey tan pananulong ed kaparan too na saray Tasi nen Jehova, tan nagagamoran da met so dakel a benepisyo ed buis legan dan gagawaen itan. Makala kayo na sayan brosyur no onkerew kayoy kopya ed Charitable Planning Office.

Parad kaaruman ya impormasyon, sarag yoy mitalosan diad Charitable Planning Office, balanglan diad pansulat odino itawag ed telepono, diad address a walad leksab, odino nayarin tawagan yo so sangan opisina na Saray Tasi nen Jehova ya aka-asain ed bansan kawalaan yo.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue, San Francisco del Monte

1105 Quezon City

Telepono: (02) 411-6090