Kasin Nanonotan Yo?

Nanggayagaan mo ta so impanbasa ed agano ni ran paway na Say Panag-Bantayan tan The Watchtower? Salim pa sirin ya ebatan iray onggendan a tepet:

• Akin a kaukolan ya ompatey so Mesias?

Say impatey nen Jesus et paneknek a sarag na perpekton too so mansiansia ed kasantosan anggaman ed sankagrabian iran subok. Ontan met, say bilay to so kinmanan dondon pian nibulos ed atawir a kasalanan iray ananak nen Adan, tan makagamor ira na andi-anggaan a bilay.​—12/15, pahina 22-23.

• Antoy makatulong ed sakey pian ag-alablabas so kakainum to?

Makatulong so pikakasi tan panagaral na Biblia. Makana met so panaral no panon mon kontroley inkasika, panumpal ed determinasyon mo tan pamili na maabig iran kaulop. No labay na sakey so oninum, kaukolan a walaray niganan limitasyon, tan aralen so pangibagay andi.​—1/1, pahina 7-9.

• Anto so kalaktip na makabaliksan a komunikasyon ed saray ugugaw?

Satan et aliwa labat a basta pitongtong, kalaktip toy pantepet tan maanos ya idengel ed saray ebat da. Nalmoan na dakel a say oras na panangan et maabig a pankanawnawa parad makabaliksan a pantotongtong.​—1/15, pahina 18-19.

• Si Jehova et perpekto, ingen, akin et nalikna toy pagbabawi?

Walaray pankanawnawan anguman so pidedeneng nen Jehova ed saray totoo. Singa bilang, aliwan aminpinsan ya imbeneg na saray Israelita si Jehova tan nandayew ira’d arum a dirios, kanian inekal toy proteksion to ed sikara. Balet, sanen nagbabawian da iray kasalanan da tan kinmerew iray tulong ed Dios, inuman toy pidedeneng to ed sikara, odino ‘alikna toy pagbabawi.’ (Uko. 2:18)​—2/1, pahina 21.

• Diad antoran sirkumstansya a nayarin ikonsidera so pampabautismo lamet?

Nagawa lambengat itan no diad panaon na bautismo na sakey ya indibidual et walay iyaamot to odino mibibiang ed saray kagagawan pakadispiloan to no sikatoy peteg lan abautismoan.​—2/15, pahina 22.

• Anto so taloran rason ya ibabaraan na arum pian makapantakew?

Ibabaga na arum ya ayos labat so mantakew lapud mairap so bilay da. Ibabaraan met na arum ya, “Amin pa et manggagawa met na ontan.” Tan irarason na arum ya akalmo tan angiyamot na mablin bengatla a “ta nalmok, di gawak.” Ag-aabobonan na Biblia so antokaman ed saratan a baraan.​—3/1, pahina 12-14.

• Diad samay ilustrasyon nen Jesus nipaakar ed saray trigo tan sisanyas, antoy irerepresenta na panagsibwag, odino panagtanem ed maong a bini?

Si Jesus, say Anak na too, so angiparaan ed uma legan na impanministeryo to diad dalin. Manlapu la nen Pentecostes 33 C.E. a manpatuloy, nisisibwag so maong a bini sano walaray Kristiano a nalalanaan a magmaliw ya ananak na Dios, salanti, saray anak na Panarian.​—3/15, pahina 20.

• Panon a natitipon ed kamalir nen Jehova iray simbolikon trigo ya asalambit ed parabolo nen Jesus? (Mat. 13:30)

Say kasumpalan na saya et ninatnat ed pigaran panaon legan na anggaan na sistema na bengabengatla. Saray alanaan ya anak na Panarian, salanti, say simbolikon trigo et natitipon ed kamalir nen Jehova sano sikaray nititipon ed nipawil a Kristianon kongregasyon, odino sano naawat da lay tumang da ed tawen.​—3/15, pahina 22.

• Siopay anetermina no antoran libroy magmaliw a kabiangan na Kristianon Griegon Kasulatan?

Aliwan saray manguuley ed simbaan odino relihyoson lider. Imbes, saray tuan Kristiano, panamegley na panangiwanwan na masanton espiritu na Dios, so anetermina no antoran sulsulat so talagan apuyanan. Unong iya ed katuaan a sakey ed saray mamilagron langkap na espiritu a niiter ed Kristianon kongregasyon nen inmunan siglo et say ‘pakatebek ed saray impuyan a salita.’ (1 Cor. 12:4, 10)​—4/1, pahina 28.