“Imano Yoy Inkatoo Yo!”

“Lapud natunaw irayan amin a bengatla, imano yoy inkatoo yo, a nepeg a masanto kayo ed saray ugali yo tan gagawaen yo iray bengatlan nipaakar ed maridios a debosyon!”​—2 PED. 3:11.

1. Akin a say komaduan sulat nen Pedro et nipanpanaon a bilin ed saray Kristiano nen panaon to?

SANEN insulat nen apostol Pedro so komaduan pinuyanan a sulat to, dakel lan panamasegsegang so sinungdoan na kongregasyon. Balet, siansia nin masetseseg ira tan dinmakel ni ra ingen. Kanian, angusar so Diablo na sananey nin taktika, ya aminpigapiga to lan asubok ya epektibo. Imparungtal nen Pedro a sasalien nen Satanas ya impluensyaan iray totoo na Dios panamegley na saray palson managbangat a “saray mata ra et napno na pikakalugoran” tan “say puso ra et nipasal ed panag-agum.” (2 Ped. 2:1-3, 14, paimano’d leksab; Jud. 4) Lapud satan, diad komaduan sulat nen Pedro et sikatoy seryoson amilin pian mansiansian matoor ed Dios iray Kristiano.

2. Nipaakar ed anto so 2 Pedro kapitulo 3, tan antoray nepeg tayon itepet ed inkasikatayo?

² Insulat nen Pedro: “Ipasen kon manepeg a liingen kayo diad panamegley na panonot, ta legan a gagawaen ko itan et amtak a magano ak lan naandi ed sayan laman . . . Kanian gawaen ko met so anggaay nayarian ko diad amin a panaon pian anggano anggapo ak la et napanonotan yoy inkasikayo nipaakar ed sarayan bengatla.” (2 Ped. 1:13-15) On, amta nen Pedro a magano lay ipatey to, balet labay ton agkomon nalingwanan iray nipanpanaon a panonot to. Tan ontan so agawa ta nagmaliw itan a kabiangan na Biblia, tan nabasa na amin itan natan. Seguradon interesado itayo ed 2 Pedro kapitulo 3 lapud nipaakar itan ed “kaunoran iran agew” na kaplesan a sistema na bengabengatla  tan ed kaderal na simbolikon katawenan tan dalin. (2 Ped. 3:3, 7, 10) Antoy simbawa nen Pedro ed sikatayo? Panon a makatulong ed sikatayo so pangiyaplika ed simbawa to pian abobonan itayo nen Jehova?

3, 4. (a) Anto so mapuersan imbaga nen Pedro, tan antoy impasakbay to? (b) Anton taloran punto so aralen tayo?

³ Kayarin sinalambit nen Pedro so kaderal na mundo nen Satanas, oniay mapuersan imbaga to: “Imano yoy inkatoo yo, a nepeg a masanto kayo ed saray ugali yo tan gagawaen yo iray bengatlan nipaakar ed maridios a debosyon!” (2 Ped. 3:11, 12) Amta nen Pedro a say makaliktar ed onsasabin “agew na kababales” et saraman labat so manggagawa ed linawa nen Jehova tan walaay maridios iran kualidad. (Isa. 61:2) Kanian, oniay inyarum to: “Inad-arok ira, lapud amta yo la iya, manalwar kayo sirin pian agkayo nibalang a kaiba ra diad panamegley na katilaan na saray totoon mananumlang na ganggan tan agkayo natumba diad itatalindeg yo.”​—2 Ped. 3:17.

⁴ Lapud sakey si Pedro ed saray ‘akaamta la’ ed sarayan katuaan, impaimano to a diad kaunoran iran agew et nagkalalo lan kaukolan na saray Kristiano so manalwar pian napansiansia ray katooran da. Diad saginonor, malinlinew ya impaliwawa nen apostol Juan so rason. Panamegley na pasingawey et anengneng nen Juan so impakabantak nen Satanas diad dalin tan “agaylay pasnok to” ed saray “manguunor ed saray ganggan na Dios tan walaan na kimey a panagtasi nipaakar ed si Jesus.” (Apo. 12:9, 12, 17) Saray matoor ya alanaan a lingkor na Dios tan saray kaiba ran matoor ya ‘arum a karnero’ et ontalona. (Juan 10:16) Komusta balet no balang indibidual la? Napansiansia tayo kasi katooran tayo? Makapanmatoor itayo no panggunaetan tayon (1) bayuboan so maridios iran kualidad, (2) mansiansian “andiay mantsa tan andiay pakabalawan” ed moral tan espiritual, tan (3) nawalaay dugan panmoria ed saray subok. Aralen tayo pa irayan punto.

Bayuboan so Maridios Iran Kualidad

5, 6. Antoran kualidad so nepeg tayon bayuboan, tan akin a mankaukolan iya na pansagpot?

⁵ Diad bandad gapo na komaduan sulat nen Pedro, oniay inkuan to: “Bilang bales ed Sikato et gawa yoy anggaay nayarian [odino, pansagpotan] yo ya iyarum ed pananisia yo so kamaongan, diad kamaongan yo say pikakabat, diad pikakabat yo say panangontrol ed dili, diad panangontrol ed dili yo say panagsungdo, diad panagsungdo yo say maridios a debosyon, diad maridios a debosyon yo say panamabli ed agagi, diad panamabli yo ed agagi say aro. Ta no sarayan bengatla et walad sikayo tan ondaraak iratan, agkayo magmaliw a mangiras odino agmabunga nipaakar ed suston pikakabat ed Katawan tayon Jesu-Kristo.”​—2 Ped. 1:5-8.

⁶ Tua, kaukolan tayoy mansagpot pian nagawaay kimkimey ya ontulong a nabayuboan iray maridios a kualidad. Alimbawa, kaukolay sagpot pian naatendian so amin ya pantitipon, nabasa so Biblia ya inagew-agew, tan napansiansia so maong a personal a panagaral. Ontan met, nayarin kaukolay pansagpot tan maabig a panagplano pian magmaliw a regular, makapalikliket, tan makabkabaliksan so Panagdayew na Pamilya diad labi. Et no nipasal tayo la ed sayan rotina tayo, magmainomay la’d sikatayo iya. Nagkalalo la no natatawayan tayo la ray gunggona.

7, 8. (a) Antoy imbaga na pigaran agagi nipaakar ed Panagdayew na Pamilya diad labi? (b) Antoray maabig a resulta lapud panagdayew na pamilya yo?

⁷ Oniay insulat na sakey ya agin bii nipaakar ed uksoyan a panagdayew na pamilya: “Dakel so naaralan mi lapud sayan uksoyan.” Oniay inkuan na sakey nin agi: “Diad tua, agko labay ya naandi so CBS. Paboritok ’man ya aral. Balet natan ta walay Panagdayew na Pamilya mi diad labi, amoriak ya amta nen Jehova so pankaukolan mi tan no kapigan mi kaukolan itan.” Inkuan na sakey ya ulo na pamilya: “Baleg a tulong ed sikami so panagdayew na pamilya. Marakdakep ta walay sakey ya aral ya ontukoy ed pankaukolan min sanasawa! Alikna mi a lalo  min nipapatnag so bunga na masanton espiritu, tan mas maliket kami ed ministeryo mi natan nen say dati.” Inkuan ni na sananey ya ulo na pamilya: “Manre-research a bukor iray ana’ko tan dakel so nanaaralan da, tan labalabay da ingen itan. Lapud sayan uksoyan, mas matalek kami ya amta nen Jehova iray kapagaan mi tan eebatan to ray pikakasi mi.” Kasin onia met so panmoria yo ed sayan marakdakep ya espiritual a probisyon?

⁸ Agyo aabuloyan so antokaman a mangabala ed panagdayew na pamilya yo. Oniay inkuan na sakey a sanasawa: “Diad apalabas ya apat simba, kapagno Huebes na labi et walan walay makaabala, kanian ngalngali agmi nisalet so panagaral na pamilya mi. Balet agmi inabuloyan a nitunda itan.” Siempre, no maminsan, kaukolan yon i-adjust so eskedyul yo. Balet, komon ta pansagpotan yon agnitunda, anggan sakey simba labat, so Panagdayew na Pamilya yo!

9. Panon a tinulongan nen Jehova si Jeremias, tan antoy naaralan tayo ed ehemplo to?

⁹ Maabig ya ehemplo ed sikatayo si propetan Jeremias. Kakkaukolan toy espiritual a tagano a manlalapu ed si Jehova tan inapresya ton maong itan. Satan so tinmulong ed sikato pian maanos a makapanpulong ed saray totoon ag-interesado. Inkuan to: “Say salita nen Jehova . . . singa mandarlang ya apoy ya akapotan ed saray pukel ko.” (Jer. 20:8, 9) Akatulong met itan ed sikato pian nasungdoan so mairap a panaon ya anampot sanen aderal so Jerusalem. Diad panaon tayo, wala la’d sikatayo so kompleton Salita na Dios. Sano makulikuli tayon aralen itan tan miparay panmoria tayo ed panmoria na Dios, singa si Jeremias, et maliket tayon nasungdoan so ministeryo, mansiansian matoor anggano wala ray subok, tan mansiansian malinis ed espiritual tan moral.​—Sant. 5:10.

Mansiansian “Andiay Mantsa tan Andiay Pakabalawan”

10, 11. Akin a nepeg tayon gawaey anggaay nayarian tayo pian mansiansian “andiay mantsa tan andiay pakabalawan,” tan antoy kaukolan tayon gawaen?

¹⁰ Bilang Kristiano, amta tayo a wala itayo la ed kaunoran iran agew. Kanian, agtayo la pankelawan no akin a labalabay na mundo iray bengatlan kagula nen Jehova a singa say agum, imoralidad, tan karawalan. Nibagan say taktika nen Satanas et onia: ‘No agnaala’d taktakot iray lingkor na Dios, ompan naala ra’d pananagyat.’ (Apo. 2:13, 14) No ontan sirin, kaukolan tayon ipapuso so maaron simbawa nen Pedro: “Gawa yoy anggaay nayarian yo pian naromog to [Dios] kayon andiay mantsa tan andiay pakabalawan tan walad kareenan.”​—2 Ped. 3:14.

¹¹ Diad saya et inulit nen Pedro imay bilin to ya “gawa yoy anggaay nayarian yo.” Malinew ya amta nen Jehova (say angipuyan ed si Pedro a mangibaga ed sayan bilin) a kaukolan tayo so mansagpot pian mansiansian “andiay mantsa tan andiay pakabalawan,” ya agnadutakan na mundo nen Satanas. Kaiba ed pansasagpot tayo so panalimbeng ed puso tayo pian agnasagyat na mauges a pilpilalek. (Basaen so Uliran 4:23; Santiago 1:14, 15.) Kaiba met ed satan so makpel ya isumpa ed saray “mankelaw” ed paraan na kabibilay tayo ran Kristiano tan ‘mamapauges ed sikatayo.’​—1 Ped. 4:4.

12. Anton panamaseguro so walad Lucas 11:13?

¹² Lapud aliwa itayon perpekto, kaukolan tayoy mansagpot pian nagawaay duga. (Roma 7:21-25) Ontalona itayo labat no masimoon  tayon kerewen ed si Jehova so masanton espiritu to ta mabulos ton ipapagamor itan. (Luc. 11:13) Satan ya espiritu so mamawala ed sikatayo na saray kualidad ya aabobonan na Dios tan ontulong ed sikatayon aglabat nalabanan iray tukso noagta natalonaan iray subok, a lalon onloloor legan a manasingger so agew nen Jehova.

Napabiskeg Kayo Komon na Subsubok

13. Sano nasagmak tayo ray subok, anto so makatulong pian makapansungdo itayo?

¹³ Anggad manbibilay tayo ni ed sayan daan a sistema na bengabengatla, walan wala ray nanduruman subok a nasagmak tayo. Balet imbes a pakadismayaan tayo itan, agta maabig no ipasen tayo ray subok bilang pankanawnawan paneknekay panangaro tayo ed Dios tan napabiskeg so pananisia tayo ed sikato tan ed Salita to? Oniay insulat na babangatan a si Santiago: “Agagik, manliket kayo sano nipapaarap kayo ed nanduruman subok, lapud amta yo a no gawaen yo itan, sayan asubok a kualidad na pananisia yo et mamawala na panagsungdo.” (Sant. 1:2-4) Tandaan met ya “amta nen Jehova no panon ton iliktar ed subok iray maridios a totoo.”​—2 Ped. 2:9.

14. Panon kan apaseseg na ehemplo nen Jose?

¹⁴ Imanoen tayo pa so agawa’d anak nen Jacob a si Jose, ya inlako bilang aripen na saray mismon kuya to. (Gen. 37:23-28; 42:21) Kasin kinmapuy so pananisia nen Jose lapud mauge-uges ya naeksperiensya to? Nanimbel kasi ed Dios lapud inabuloyan Ton nagawa itan ed sikato? Malinlinew ya inkuan na Salita na Dios ya andi! Ingen, ag-angangga’d satan so subsubok ed si Jose. Diad saginonor, sikatoy inakusaan a papasooten to kunon akdolan so asawa nen Potifar tan sikatoy impriso. Balet ta siansian agnaandi debosyon to ed Dios. (Gen. 39:9-21) Imbes, lapud sarayan subok, sikatoy apabiskeg laingen tan daakan ya abendisyonan.

15. Antoy naaralan tayo ed alimbawa nen Noemi?

¹⁵ Tua, nayarin naermenan odino na-depress itayo lapud subsubok. Ompan walaray panaon ya alikna met itan nen Jose. Anggan saray arum a matoor a lingkor na Dios et akalikna met na ontan. Alaen tayo pan alimbawa si Noemi, ya inateyan na asawa tan duaran anak. Oniay inkuan to: “Agyo ak tatawagen na Noemi, tawagen yo ak na Maria [mankabaliksay “Ampait”]; ta say Makapanyarin-amin nanagamil na ampaipait ed siak.” (Rut 1:20, 21) Natural labat ya ontan so alikna nen Noemi, tan natatalosan tayo itan. Balet singa met si Jose, agkinmapuy so espiritualidad to tan say katooran to ed Dios. Kanian, benendisyonan nen Jehova iyan pinablin bii. (Rut 4:13-17, 22) Tan diad onsabin Paraison dalin, ekalen la na Dios so amin a kaugsan a ginawa  nen Satanas tan say marelmeng a mundo to. “Saray inmuna a bengatla ag-ira la nanonotan, ag-ira la onla ed nonot.”​—Isa. 65:17.

16. Antoy nepeg a pangipasen tayo ed pikakasi, tan akin?

¹⁶ Antokaman nin subok so ondalan, makapansungdo itayo lapud amta tayo a lawas itayon inaro na Dios. (Basaen so Roma 8:35-39.) Anggano ag-ontunda si Satanas a manismaya ed sikatayo, sikatoy agbalot manalo no mansiansian ‘maabig so panagnonot tayo’ tan ‘manimano itayon naynay nipaakar ed panagpikasi.’ (1 Ped. 4:7) Inkuan nen Jesus: “Sirin, mansiansia kayon aliing, a manpikasi kayon masimoon ed amin a panaon pian makaliktar kayo ed sarayan amin a bengatla a nepeg a nagawa, tan makatalindeg kayo ed arap na Anak na too.” (Luc. 21:36) Diad impanimbawa nen Jesus ed sikatayo a ‘manpikasin masimoon,’ idadanet to ya aliwan saya so panaon pian ibaliwala so talindeg tayo ed sikato tan ed Ama to. Saraman labat so aabobonan nen Jehova so walaan na ilalon makaliktar ed agew To.

Mansiansian Aktibon Manlingkor ed si Jehova

17. No mairap a pulongan so teritorya yo, panon kan natulongan na maabig ya alimbawa na saray propeta nensaman?

¹⁷ Say pibiang ed espiritual a kimkimey et makapabiskeg ed sikatayo. Nipapanonot na saya imay imbaga nen Pedro: “Imano yoy inkatoo yo, a nepeg a masanto kayo ed saray ugali yo tan gagawaen yo iray bengatlan nipaakar ed maridios a debosyon!” (2 Ped. 3:11) Say manuna ed saratan a gawa et say pangiyabawag ed maong a balita. (Mat. 24:14) Tua, walaray teritoryan mairap a pulongan, nayarin lapud panangibaliwala, isusumpa, odino okupado ray totoo ed inagew-agew a kimey da. Naeksperiensya met itan na saray lingkor nen Jehova nensaman. Anggaman ontan, paulit-ulit iran pinmawil, “inagew-agew” ni ingen, pian ipasabi so mensahe na Dios. (2 Awa. 36:15, 16; basaen so Jeremias 7:24-26.) Antoy akatulong ed sikara a mansungdo? Impara ray panmoria ra’d asainmin da ed panmoria nen Jehova, aliwan diad panmoria na mundo. Sakey ni, impasen dan baleg a kagalangan so ‘natawag ed ngaran na Dios.’​—Jer. 15:16.

18. Antoy nagawaan na panangipulong ed Panarian sano pasantosen la na Dios so ngaran to diad arapen?

¹⁸ Pribilehyo tayo met ya iyabawag so ngaran tan gagala nen Jehova. Nonot yo pa iya: Lapud pampupulong tayo, anggapoy nibaraan na kakabusol na Dios sano sikatoy mikuentaan la’d sikara diad agew na panangukom to. On, singa met ed si Faraon nensaman, naamtaan da a si Jehova so milalaban ed sikara. (Exo. 8:1, 20; 14:25) Ontan met, pagalangan nen Jehova iray matoor a lingkor to, ya ipalinew ton maong a talagan sikara so mangirerepresenta ed sikato.​—Basaen so Ezequiel 2:5; 33:33.

19. Panon tayon nipanengneng ya labay tayon usaren diad dugan paraan so panaanos nen Jehova?

¹⁹ Diad bandad sampot na komaduan sulat nen Pedro, oniay inkuan to’d saray kaagian to: “Ipasen yon kilalaban so panaanos na Katawan tayo.” (2 Ped. 3:15) On, komon ta itultuloy tayon usaren diad dugan paraan so panaanos nen Jehova. Panon? Diad pamayubo ed saray kualidad a mamaliket ed sikato, diad pansiansian “andiay mantsa tan andiay pakabalawan,” diad pakawalaay dugan panmoria ed saray subok, tan diad pagmaliw ya okupado’d kimey ed Panarian. No gawaen tayo iraya, makaawat itayo na andi-anggaan iran bendisyon na “balon katawenan tan balon dalin.”​—2 Ped. 3:13.

Kasin Natandaan Mo?

• Panon tayon nabayuboan iray maridios a kualidad?

• Panon itayon makapansiansian “andiay mantsa tan andiay pakabalawan”?

• Antoy naaralan tayo ed si Jose tan Noemi?

• Akin a baleg a pribilehyo so pibiang ed panagpulong?

[Tepetepet Parad Panagaral]

[Litrato ed pahina 9]

Kaasawaan a lalaki, antoray makatulong ed sikayo tan ed pamilya yo pian nabayuboan iray maridios a kualidad?

[Saray litrato ed pahina 10]

Antoy naaralan tayo’d impangarap nen Jose ed subsubok?