Paneknekan Mon Akaparaan Ka!

“Paneknekan yo . . . ya akaparaan kayo, lapud diad oras ya agyo iisipen et onsabi so Anak na too.”​—MAT. 24:44.

1, 2. (a) Antoran propesiya ed Biblia so mipara ed panangataki na tigre? (b) Antoy nepeg tayon gawaen pian niliktar itayo sano ipaakseb la nen Kristo so panangukom ed mundo nen Satanas?

DAKEL a taon a nanliketan na totoo a bantayan so palabas na sakey a trainer na ayayep kaiba iray apaamo ton Bengal tiger. Oniay imbaga to: “No apaamom so sakey ya ayep tan nanmatalek ed sika, singa mo la naawat so sankaabigan a regalo ed mundo.” Balet nen Oktubre 3, 2003, anguman so situasyon. Diad ag-amtan rason, sakey ed saray apaamo ton 172 kilo ya white tiger so angetket ed sikato. Ag-akaparaan so trainer ta agto inilaloan ya onataki iyan ayep.

² Ipapasakbay na Biblia so biglan iyataki na sakey ya “atap ya ayep.” (Basaen so Apocalipsis 17:15-18.) Siopa iyan “atap ya ayep”? Siopay atakien to? Say atap ya ayep et say United Nations tan amin a gobierno ed mundo. Busolen tan bingbingkasen na sayan ayep so aliling toy balangkantis a Makapanyarin Babilonia, say empiryo na palson relihyon. Parad dakel a totoo et makapabigla iya, ta say atap ya ayep tan say Makapanyarin Babilonia et aliling day sankaaro. Kabiangan iraya ed mundo nen Satanas. Balet, kapigan nagawa iyan panangataki? Agtayo amta so agew tan oras. (Mat. 24:36) Say amta tayo et nagawa itan diad oras ya agtayo iilaloan tan say nakekeraan ya panaon antis na satan et apatikeyan la. (Mat. 24:44; 1 Cor. 7:29) Importante sirin a paneknekan tayon akaparaan tayo’d espiritual pian sano nagawa itan ya panangataki tan ipaakseb la nen Kristo so panangukom et iliktar to itayo! (Luc. 21:28) Pian nagawaan tayo iya, aralen tayo so ehemplo na saray matoor a lingkor na Dios a pinaneknekan dan akaparaan ira kanian atasian day kasumpalan na saray sipan na Dios. Komon ta ipapuso tayo irayan maabig ya ehemplo.

Paneknekan Mon Akaparaan Ka​—Singa si Noe

3. Akin et aliwan mainomay parad si Noe so panlingkor a matoor ed Dios?

³ Anggano mauge-uges iray totoo nen panaon nen Noe, pinaneknekan ton akaparaan kanian anengneng toy kasumpalan na sipan na Dios. Imadyin mo pa no antoray subok ya sinagmak nen Noe sanen walaray rebelden anghel a pinagmaliw day inkasikara a too tan akirelasyon ed magagangganan bibii! Say nagmaliw ya ananak da et angkakabaleg tan ‘mabisbiskeg,’ ya inusar day pakayari da pian lamesen so arum. (Gen. 6:4) Nonot mo pay inloor na karawalan lapud impanggulo na sarayan alan. Kinmayat la laingen so karelmengan tan inmuge-uges so panagnonot tan awawey na totoo. Lapud satan et imbalikas nen Jehova so desisyon to a deralen so amin a mauges a totoo.​—Basaen so Genesis 6:3, 5, 11, 12. *

4, 5. Panon a say kipapasen na panaon tayo et singa ed panaon nen Noe?

⁴ Impropesiya nen Jesus a say kipapasen na panaon tayo et magmaliw a singa ed samay panaon nen Noe. (Mat. 24:37) Alimbawa, nanenengneng tayo so impluensya na saray mauges ya espiritu. (Apo. 12:7-9, 12) Sarayan demonyo et pinagmaliw day inkasikara ya too ed panaon  nen Noe. Anggaman natan et anggapo lay pakayari ran magmaliw a too, gagawaen day anggaay nayarian da pian impluensyaan so totoo, ugaw man o matatken. Agnaam-amtaan na totoo ya manlikliket irayan demonyo sano nanenengneng day mauges tan imoral ya kagagawa na saramay naiimpluensyaan da.​—Efe. 6:11, 12.

⁵ Dedeskribien na Salitay Dios so Diablo a “managpatey” tan “walaan na pakayarin mamatey.” (Juan 8:44; Heb. 2:14) Balet, sikatoy ag-abuloyan na Dios a pateyen so siopaman a labay to. Anggaman ontan, lapud inkaruksa to, papalikdoen to ray totoo tan sasagyaten to ran manggawa na kaugsan. Iiyan to ed puso tan isip na totoo so pilalek a mamatey. Alimbawa, unong ed estatistika, 1 ed kada 142 ya ugugaw a nianak ed United States so magmaliw a biktima na panagpatey. Talagan kasmak la so karawalan natan. Kasin naiimano iya nen Jehova, singa ed panaon nen Noe? Agkasi onkiwas?

6, 7. Panon ya impanengneng nen Noe tan say pamilya to so pananisia tan takot ed Dios?

⁶ Diad saginonor, impaamta na Dios ed si Noe so desisyon ton mangipasabi na delap ed interon mundo, pian deralen so amin a mabilay. (Gen. 6:13, 17) Ingganggan nen Jehova si Noe a manggaway biong a say itsura to et singa baleg a kahon. Tampol a nankimey si Noe tan say pamilya to. Antoy tinmulong ed sikara pian natulok day Dios tan paneknekan ya akaparaan ira sano onsabi so panangukom to?

⁷ Say mabiskeg a pananisia tan takot ed Dios so amakiwas ed si Noe tan ed pamilya to ya ontulok. (Gen. 6:22; Heb. 11:7) Bilang ulo na pamilya, nansiansian alerto ed espiritual si Noe tan agnampaimpluensya ed kaugsan na totoo. (Gen. 6:9) Amta ton kaukolan a manalwar so pamilya to pian agda naalig so marawal tan rebelyoson awawey na totoo’d kaliberliber da. Importante met ya aliwan say dilin pankaabigan da so iprayuridad da. Walay ipapagawa na Dios ed sikara, tan satan so nepeg dan iyuna.​—Basaen so Genesis 6:14, 18.

Pinaneknekan nen Noe tan say Pamilya To ya Akaparaan Ira

8. Antoy mangipapanengneng a saray membro na pamilya nen Noe et walaan na debosyon ed Dios?

⁸ Say akasentroan na salaysay na Biblia et si Noe ta sikato so ulo na pamilya, ingen ta lingkor met nen Jehova so asawa to tan saray ananak to tan saray kaasawaan da. Pinekderan iya nen propeta Ezequiel. Imbaga ton no si Noe et nambilay nen panaon to, say kiliktar na saray anak nen Noe et ag-akadepende ed inkatunong na ama ra. Wala la ra’d suston edad kanian akauley ira no ontulok ira o andi. Kabaliksan na saya sirin ya impanengneng dan mismo so panangaro ed Dios tan ed saray ganggan to. (Eze. 14:19, 20) Tinumbok na pamilya nen Noe so instruksion to, inalig day pananisia to, tan agda inabuloyan a lapud impluensya na arum et nitunda ray kimey ya inter na Dios ed sikara.

9. Siopara natan so mangaalig ed pananisia nen Noe?

⁹ Makapaseseg ta diad interon mundo, nanenengneng tayo ray kaagian tayon ulo na pamilya a gagawaen day anggaay nayarian dan aligey Noe! Amta ran aliwan magenap so pangitaryay naakan, kawesen, ayaman,  tan edukasyon parad pamilya ra. Kaukolan da met ya asikasoen so espiritual a pankaukolan na pamilya ra. No ontan so gagawaen na saray ulo na pamilya, papaneknekan dan akaparaan ira parad asingger lan gawaen nen Jehova.

10, 11. (a) Anto kasi alikna nen Noe tan say pamilya to legan iran walad loob na biong? (b) Antoy nepeg tayon itepet ed inkasikatayo?

¹⁰ Manga 50 taon a nankimey si Noe tan say pamilya to pian nasumpal da so biong. Dakel so kaukolan dan gawaen. Inuklopan da itan pian agnaloobay danum, nantipon iray naakan, tan inloob da ray ayayep. Imadyin yo pa iyan eksena. Sinmabin siansia so agew ya impasakbay nen Jehova. Diad saman et koma 17 ya agew na komaduan bulan na taon 2370 B.C.E. Linmoob la’d biong si Noe tan say pamilya to. Inkapot nen Jehova so puerta na biong, insan la inmuran. Aliwa labat iyan ordinaryon uran ed sakey a lugar. Alukasan iray “durongawen na tawen,” kanian biewbiew so uran. (Gen. 7:11, 16) Inaatey iray totoo a walad paway na biong, balet niliktar iramay walad loob. Anto kasi alikna di Noe? Siempre, misalsalamat ira’d Dios. Balet, seguradon naisip da met ya, ‘Maong ta inunor tayoy Dios tan akaparaan tayo!’ (Gen. 6:9) Naiimadyin mo met kasi sarilim kayari Armagedon? Seguradon ontan met ya pisasalamat so naliknam!

¹¹ Anggapoy makaamper ed Makapanyarin-amin ed panumpal to ed sipan to a panganggaen iyan sistema nen Satanas. Tepetan mo pay inkasika, ‘Kasin sigpot ak a manmamatalek ya amin ya insipan na Dios et nasumpal ed panaon ya inggeter to, anggan saramay sankamelagan a detalye?’ No on so ebat mo, nepeg a lawas mon sankanonot so manasingger lan “agew nen Jehova” pian napaneknekan mon akaparaan ka.​—2 Ped. 3:12.

Nansiansian Alerto si Moises

12. Antoray nayarin inyuna komon nen Moises ed bilay to?

¹² Nengnengen tayo met so alimbawa nen Moises. Diad panmoria na too, marakdakep so bilay to diad Ehipto. Lapud tagibi na anak a bii nen Faraon, sikatoy rerespetoen, mananam iray kakanen to, balibali iray kawes to, tan marakep so panaayaman to. Sikatoy “nibangat ed amin a karunongan na saray Ehipsio.” (Basaen so Gawa 7:20-22.) Nayarin sikatoy sakey ed saray makatawir na baleg a kayamanan.

13. Panon a nansiansian akasentro so imano nen Moises ed saray sipan na Dios?

¹³ Saray Ehipsio et mandadayew ed idolo. Balet, amta nen Moises ya anggapoy kakanaan na panagtalintao ra. Ta sanen ugaw ni, sikatoy imbangat na atateng to a si Jehova so tuan Dios. (Exo. 32:8) Say edukasyon na Ehipto tan say kayamanan na pamilya na ari et ag-akasagyat ed si Moises a taynan so tuan panagdayew. Nayarin dinalepdep ton maong iray sipan na Dios ed saray laki to tan labay ton paneknekan a sikatoy akaparaan a gawaen so linawa na Dios. Napatnagan iya ed samay imbaga nen Moises  ed saray Israelita: “Si Jehova . . . a Dios nen Abraham, Dios nen Isaac, tan Dios nen Jacob, imbaki to ak ed sikayo.”​—Basaen so Exodo 3:15-17.

14. Panon ya asubok so pananisia tan pakpel nen Moises?

¹⁴ Aliwan singa saray talintao na andiay bilay a dios na Ehipto, parad si Moises et peteg a persona so tuan Dios a Jehova. Sikatoy nambilay a singa to sankanengneng “imay Sakey ya agnanengneng.” Walaan na pananisia si Moises a nibulos iray totoo na Dios, balet agto amta no kapigan. (Heb. 11:24, 25, 27) Napatnagan a talagan labay ton nibulos iray Hebreo sanen inyagel toy sakey ya Israelitan aripen a sasakitan na sakey ya Ehipsio. (Exo. 2:11, 12) Balet, aliwa ni itan a panaon pian ibulos nen Jehova iray totoo to, tan diad saman et nambilay si Moises bilang sakey a takas. Seguradon nairapan ed impangumay situasyon to, manlapud mainawan bilay ed Ehipto et sikatoy nanayam ed kalawakan. Balet siansia nin pinaneknekan ton sikatoy alerto ed saray instruksion nen Jehova. Lapud satan, kayari 40 taon ya impanayam to’d Midian, sikatoy inusar na Dios pian ibulos iray agagi ton Israelita. Inunor toy ganggan na Dios a sikatoy ompawil ed Ehipto. Asabi lay panaon pian iliktar nen Jehova so totoo to, tan kaukolan nen Moises ya unoren iray instruksion to. (Exo. 3:2, 7, 8, 10) Si Moises ‘so sankauyamoan ya too’ kanian kasabi to’d Ehipto, kaukolan toy pananisia tan pakpel diad piarap to’d si Faraon. (Num. 12:3) Aliwa labat lan aminsan ya inmarap ed Faraon, noagta aminpigapiga legan ya mantutumbokan so salot na Dios ed Ehipto, a diad kada salot et agto amta no maminpiga ni kasin miarap.

15. Anggaman walaray akadismayaan nen Moises, akin et sankanonot to nin siansiay pangigalang ed Ama to’d tawen?

¹⁵ Diad tinmumbok ya 40 taon, manlapud 1513 B.C.E. anggad 1473 B.C.E., walaray akadismayaan nen Moises. Balet, say sankanonot to nin siansia et say pangigalang ed si Jehova tan pinaseseg to ray kapara ton Israelita ya ontan met so gawaen da. (Deu. 31:1-8) Akin? Lapud mas importante’d si Moises so reputasyon tan soberanya nen Jehova nen say pankaabigan ton dili. (Exo. 32:10-13; Num. 14:11-16) Anggaman walaray pakadidismayaan tayo, nepeg met sirin ya itultuloy tayon suportaan so pananguley na Dios, lapud matalek tayon saray dalan to et mas atagey, mas maptek, tan mas magmaong nen say anggan siopa. (Isa. 55:8-11; Jer. 10:23) Kasin ontan so panmoriam?

Mansiansian Aliing!

16, 17. Akin et makabkabaliksan parad sika so Marcos 13:35-37?

¹⁶ “Mantultuloy kayon manlikas, mansiansia kayon aliing, ta agyo amta no kapigan so aturon panaon.” (Mar. 13:33) Impasakbay itan nen Jesus sanen imbaga to so tanda na kasampotan na sayan mauges a sistema na mundo. Imanoen iray unor ya imbaga nen Jesus nipaakar ed sayan propesiya unong ed impangisalaysay nen Marcos: “Mantultuloy kayon manbantay, ta agyo amta no kapigan so isabi na akan-abung, no kasin diad masakbay nin labi odino diad pegley-labi odino diad panagkukukaok na lalong odino diad kabkabuasan; ta pian no biglan onsabi et agto kayo nasabian a nanaugip. Balet say ibabagak ed sikayo et ibabagak ed amin, Mantultuloy kayon manbantay.”​—Mar. 13:35-37.

¹⁷ Makapainteres itan a panamaseseg nen Jesus. Tinukoy to so nanduruman oras na panagbantay. Sankairapan so mansiansian aliing  diad unor iran oras na panagbantay, ta onggapo itan ed manga alas tres ed palbangon anggad ibutay na agew. Ipapasen na saray sundalo a sankaabigan itan ya oras pian atakien so kalaban, lapud diad satan et posiblin nasabian da ran “nanaugip.” Ontan met natan, mair-irap so mansiansian aliing ta sayan mundo et aliling toy maitlep ya nanaugip ed espiritual. Kakkaukolan tayo sirin so “mansiansian aliing” tan “mansiansian manlikas” parad isabi na anggaan tan kililiktar tayo!

18. Bilang Tasi nen Jehova, anton agnaparaan a pribilehyo so walad sikatayo?

¹⁸ Samay trainer ya abitla ed gapo ya inataki na Bengal tiger et ag-inatey. Balet, ipapaseguro na propesiya na Biblia ya agmakaliktar so palson relihyon tan arum nin kabiangan na sayan mauges a sistema ed onsasabin anggaan. (Apo. 18:4-8) Singa si Noe tan say pamilya to, komon ta amin a lingkor nen Jehova, ugaw man o matatken, et mamidbir a nepeg tayon gawaen so anggaay nayarian tayo pian paneknekan ya akaparaan tayo’d isabi na agew nen Jehova. Manbibilay itayo ed mundon agmamapagalang ed Dios, a saray managbangat na palson relihyon, ontan met ed saray agnostiko tan ateista et memelmelagen day Amalsa. Balet agtayo labay a naimpluensyaan da itayo. Aligen tayo sirin iray maabig ya ehemplon apantongtongan tayo. Tan mansiansia itayon alerto ed saray pankanawnawan nidepensa tan nigalang tayoy Jehova bilang say “Dios na saray dirios,” on, say ‘abalbaleg a Dios, a makapanyarin-amin tan tatakotan.’​—Deu. 10:17.

[Paimano ed Leksab]

Nanonotan Mo Ni?

• Akin et kaukolan ya iprayuridad nen Noe so espiritual a pankaukolan na pamilya to?

• Antoray piparaan na panaon tayo ed panaon nen Noe?

• Anggaman walaray akadismayaan nen Moises, akin et nansiansian akasentroy imano to ed saray sipan nen Jehova?

• Antoran propesiya ed Biblia so mamapakiwas ed sikan mansiansian aliing ed espiritual?

[Tepetepet Parad Panagaral]

[Litrato ed pahina 25]

Inyuna nen Noe tan say pamilya to so kimey ya inter nen Jehova

[Litrato ed pahina 26]

Tinmulong iray napanmatalkan a sipan na Dios pian mansiansian alerto si Moises