Say Sigpot ya Talek ed si Jehova et Mangiter na Kaligenan

‘Si Jehova ondengel no ontawag ak ed sikato.’​—SAL. 4:3.

1, 2. (a) Anton mapeligron kipapasen so asagmak nen David? (b) Antoran salmo so pantongtongan tayo?

ABAYAG lan manuuley si Arin David diad Israel tan natan et mapeligroy kipapasen to. Indeklara nen anak ton Absalom so inkasikato bilang ari, kanian apilitan si David a taynan so Jerusalem. Trinaidor met na maapit a kaaro to, tan natan et pigpigara lay kaiba ton matoor ed sikato legan ton mannangis tan kasalisali ya ontatatdang ed Palandey na Olibo. Diad saginonor, si Simei a kanayon nen Arin Saul et tinuptupak toy David tan sinabuyagan toy dabok legan ton aayewen.​—2 Sam. 15:30, 31; 16:5-14.

² Kasin ipatey nen David iyan ermen tan kababaingan? Andi, lapud sikatoy manmamatalek ed si Jehova. Napatnagan itan diad komatlon Salmo ya insulat nen David nipaakar ed sayan intakas to. Insulat to met so komapat a Salmo. Parehon ibabalikas na saraya so talek ton dengelen tan ebatan na Dios iray pikakasi to. (Sal. 3:4; 4:3) Ipapaseguro na sarayan salmo a diad agew tan labi et agpaulyanan nen Jehova iray matoor a lingkor to. Susuportaan to ra tan iikdan to ray deen na nonot tan kaligenan. (Sal. 3:5; 4:8) Pantongtongan tayo pa sirin irayan salmo tan nengnengen tayo no panon irayan mangiter na kaligenan tan mamabiskeg na talek tayod Dios.

Sano ‘Amayamay Iray Ontalindeg Sumpad Sikatayo’

3. Unong ed Salmo 3:1, 2, antoy kipapasen nen David?

³ “Say kapusoan na saray lalaki na Israel [et] ontutumbok ed Absalom,” so inkuan na mensahero. (2 Sam. 15:13) Mankelaw si David no panon ya nala nen Absalom so suporta na dakel a totoo, kanian nitepet to: ‘Jehova, panon ya dinmakel iray ombubusol ed siak? Amayamay ira ya ontalindeg ya onsumpad siak. Amayamay iran mankuan ed kamarerwak, Anggapo so tulong ed sikato a manlapud Dios.’ (Sal. 3:1, 2) Inisip na dakel ya Israelita ya ag-iyagel nen Jehova si David ed si Absalom tan saray kaiba to.

4, 5. (a) Segurado si David ed anto? (b) Antoy kabaliksan na samay balikas ya ‘say mangitatangwa na ulok’?

⁴ Balet, maligen so liknaan nen David ta manmamatalek ed Dios. Inkanta to: “Sika, O Jehova, so sakey a kinlong ya onkana ed siak; sika so gloriak tan say manangibangon [odino, mangitatangwa] na ulok.” (Sal. 3:3) Seguradoy David a sikatoy salimbengan nen Jehova no panon a sasalimbengan na kinlong o samper so sakey a sundalo. Tua, ontatakas so maedad lan ari ya akasakbong so ulo to tan akatuek lapud kababaingan. Balet ta sikatoy igloria na Sankatagyan. Si Jehova so mangiter ed sikato na pakayari pian nitangwa to lamet so ulo to. Matalek ya akikasi si David ta amta ton sikatoy dengelen na Dios. Kasin ipapatnag yoy ontan a panagmatalek ed si Jehova?

⁵ Sanen imbaga nen David imay balikas ya ‘say mangitatangwa na ulok,’ bibidbiren ton say panlapuan na tulong et si Jehova. Oniay impangipatalos na Maung a Balita ed satan a bersikulo: “Sika KATAWAN, sasalimbengan mo ak lawas, pian niyarawi ak ed kaatapan; panataloen mo ak tan pabibiskegen moy linawak.”  Nipaakar ed samay balikas ya ‘say mangitatangwa na ulok,’ oniay imbaga na sakey a reperensya: “Sano itangwa na Dios . . . so ‘ulo’ na sakey, iikdan toy ilalo tan kaligenan.” Talagan walay rason nen David ya nagonigon ta pinaekal dad trono to. Balet, sano itangwa na Dios so ulo to, napasimbaloy pakpel to, lalo ton naliknay kaligenan tan ombiskeg so talek tod Dios.

‘Dengelen To Ak nen Jehova’

6. Akin et imbaga nen David a say pikakasi to et dengelen nen Jehova manlapud masanton palandey To?

⁶ Lapud manmamatalek si David ed si Jehova tan amta ton eebatan To ray pikakasi, oniay intuloy to: “Mantagleey ak ed Jehova ed boses ko, et sikato dengelen to ak a manlapu ed masanto a [palandey] to.” (Sal. 3:4) Ingganggan nen David ya ipawil diad Palandey Sion imay kaban na sipan, a mangisisimbolo ed presensia na Dios. (Basaen so 2 Samuel 15:23-25.) Duga labat sirin so impangibaga nen David ya say pikakasi to et dengelen nen Jehova manlapud masanton palandey To.

7. Akin et agbalot tinmakot si David?

⁷ Segurado si David ya ebatan na Dios so pikakasi to kanian agbalot tinmakot. Oniay inkanta to: ‘Siak dinmukol ak tan naugip ak; abangon ak met; ta si Jehova inampaya to ak.’ (Sal. 3:5) Agnatatakot si David ya onugip diad labi, anggano satan so panaon ya nayarin biglan onlusob iray kalaban. Walay talek ton sikatoy maligen ya ombangon ed kabuasan, ta apaneknekan to lad saray naeksperiensya to ya talagan nailaloan toy suporta na Dios. Ontan tayo met no tumboken tayoy “dalan nen Jehova” tan agtayon balot onsian ed sikato.​—Basaen so 2 Samuel 22:21, 22.

8. Panon ya ipapanengneng na Salmo 27:1-4 a nanmatalek si David ed Dios?

⁸ Napatnagan so kaligenan nen David tan sigpot a talek tod Dios diad arum nin salmo ya insulat to. Oniay nabasa ed sakey ed saratan: “Si Jehova sikato so silew ko tan kilabanan ko; Siopa so takotan ko naani? Si Jehova sikato so biskeg na bilay ko; Siopa ni antakot ko naani? . . . Anggan sakey ya ehersito so mankampamento naani ya onsumpa ed siak, say pusok  agnaani ontakot. . . . Sakey a pamaakaran so kinerew ko ed Jehova, a sikato so anapen ko, salanti [say] pakapanayam ko komon ed abung nen Jehova, ed amin ya agew a panbilay ko, a mangamayo na karakpan nen Jehova, tan manbalita ed templo to.” (Sal. 27:1-4) No miparad si David so liknaan yo tan iyabuloy na kipapasen yo, regular kayon onatendi ed saray aral kaiba iray kapara yon mandadayew ed si Jehova.​—Heb. 10:23-25.

9, 10. Anggaman insulat nen David iray salita ed Salmo 3:6, 7, akin et nibaga tayon agto labay so ombales?

⁹ Anggano si David et trinaidor nen Absalom tan dakel so agnanmatoor ed sikato, oniay inkanta to: “Agak naani antakot ed samplon libo a totoo, ya impasen da so inkasikara ya onsumpa ed siak ed manliberliber. Alagey ka, O Jehova; ilaban mo ak, O Dios ko; ta sika [kabilen] mo so pukel na lupa na amin a manamusol ed siak; sika pinangpang mo so ngipen na saray agmatunong.”​—Sal. 3:6, 7.

¹⁰ Agkabaliksan na saya a labay nen David so ombales. Say Dios so mangabil ed “pukel na lupa” na saramay onsusumpa ed sikato. Kinopya a mismo nen Arin David so Ganggan kanian amta to a ditan et oniay imbaga nen Jehova: “Kien ko so ibabales.” (Deu. 17:14, 15, 18; 32:35) Say Dios met so akauley diad ‘pamangpang ed ngipen na saray agmatunong.’ Kabaliksan na saya ya ekalen toy pakayari dan manggawa na mauges. Amta nen Jehova no siopa ray agmatunong ta ‘sikatoy onnenengneng ed puso.’ (1 Sam. 16:7) Talagan misalsalamat itayo ta iikdan itayo na Dios na pananisia tan biskeg pian nalabanan tayoy Satanas, ya asingger lan nibasileng ed kaaralman. Sikatoy niyaliling ed managlem balet ta andiay ngipen a leon a manepeg labat ed kadederal!​—1 Ped. 5:8, 9; Apo. 20:1, 2, 7-10.

“Say Panangilaban Betang nen Jehova”

11. Akin et nepeg tayon ipikasi iray kaagian tayo?

¹¹ Amta nen David a si Jehova labat so makapangiter na kilalaban a talagan kakkaukolan to. Balet ta aglabat sankanonot nen David so sarili to. Sankanonot to met iray matoor a totoo na Dios. Kanian oniay unor ya insulat nen David ed sayan salmo: “Say panangilaban betang nen Jehova; say bendisyon mo komon so wala ed tapew na saray totoom.” (Sal. 3:8) Tua, ambelat iray problema nen David, balet ta siansian sankanonot to ray totoo nen Jehova tan matalek a bendisyonan ira na Dios. Agta nepeg met ya sankanonot tayo ray kaagian tayo? Kerewen tayod si Jehova ya ikdan to ra na masanton espiritu pian makapanpakpel ira tan matalek dan nipulong so maong a balita.​—Efe. 6:17-20.

12, 13. Antoy agawad si Absalom, tan antoy reaksion nen David?

¹² Mabanbanday so impatey nen Absalom. Sakey iyan pasakbay ed saray manlalames ed arum, nagkalalo la ed saray nilanaan na Dios a singa si David. (Basaen so Uliran 3:31-35.) Wala so agawan bakal, tan atalo so armada nen Absalom. Sanen ontatakas si Absalom ya akalugan ed asno, nisabit so makapal a buek to ed abeban sanga na baleg a kiew. Nibitin ditan, mabilay ni balet ta anggapo lay nagawaan to, ya anggad sikatoy dinuyok nen Joab diad puso panamegley na taloran pana.​—2 Sam. 18:6-17.

¹³ Aliketan kasi David sanen naamtaan toy agawad anak to? Andi. Imbes sikatoy nannangis tan inyeyag ton: ‘O ana’ko! Anak kon Absalom, ana’ko! Siak la komoy inatey, aliwan sika!’ (2 Sam. 18:24-33, MB) Si Joab labat so akapatunda ed si David diad sayan alablabas a paneermen to. Talagan makapasinagem iyan agawad si Absalom. Ontan so nansumpalan to ta masyadon maambisyon tan nilabanan toy mismon ama to, say nilanaan nen Jehova!​—2 Sam. 19:1-8; Uli. 12:21; 24:21, 22.

Imbalikas Lamet nen David so Talek Tod Dios

14. Antoy nibaga tayo nipaakar ed Salmo 4?

¹⁴ Singa ed samay komatlon Salmo, nabasa ed komapat a Salmo so masimoon a pikakasi nen David a pakapatnagan na baleg a talek tod si Jehova. (Sal. 3:4; 4:3) Nayarin insulat nen David iyan salmo pian ibalikas so pisasalamat tod Dios tan say impakainawaay liknaan to sanen agtinmalona so impanrebelde nen Absalom.  Odino insulat to iya pian kansionen na saray Levita. Antokaman so rason, say pandalepdep ed saya et mamabiskeg ed talek tayod si Jehova.

15. Akin et matalek itayon manpikasi ed si Jehova panamegley na Anak to?

¹⁵ Impatnag lamet nen David so talek tod Dios tan sikatoy segurado ya dengelen tan ebatan nen Jehova iray pikakasi to. Oniay inkanta to: “Ebatan mo ak no ontawag ak, O Dios na katunongan ko; sika [pinabiskeg] mo ak nen wala ak ed kasegsegangan: kasian mo ak, tan dengel mo so pikakasik.” (Sal. 4:1) Nawalaan itayo met na ontan a talek no manggagawa tayoy inkatunong. Amta tayon bebendisyonan nen Jehova, say “Dios na katunongan,” iray matunong a lingkor to, kanian matalek itayon manpikasi ed sikato panamegley na Anak to, tekep na pananisia ed dondon bagat nen Jesus. (Juan 3:16, 36) Sigpot a deen so ipagamor na satan!

16. Antoy nayarin akadismayaan nen David?

¹⁶ No maminsan, walaray makapadismayan situasyon ya sengegay pakaandi na deen na nonot tayo. Asagmak met itan nen David, ta oniay inkanta to: ‘O sikayo anak na totoo, kaunongan kabayag a say galang ko et magmaliw a kababaingan? Kaunongan kabayag so pangaro yo na kaapaan tan pananap yo na katilaan?’ (Sal. 4:2) Say balikas dia ya “anak na totoo” et mapatnag ya ontutukoy ed saramay ag-aabobonan na Dios. Inaro na saray kalaban nen David so “kaapaan.” Oniay impangipatalos ed satan na New International Version: “Kaunongan kabayag so pangaro yo ed katilaan tan panaanap yoy palson dirios?” Anggano nadidismaya itayo ed gagawaen na arum, itultuloy tayoy masimoon ya pampikasi tan sigpot a panmatalek ed saksakey a tuan Dios.

17. Ipaliwawa no panon itayon onkiwas a mitunosan ed Salmo 4:3.

¹⁷ Say talek nen David ed Dios et napatnagan ed sarayan salita: “Ingen amtaen yo a si Jehova imbiig to so maridios ya onkana ed sikato a dili. Si Jehova ondengel naani no ontawag ak ed sikato.” (Sal. 4:3) Kaukolan so pakpel tan sigpot a talek ed si Jehova pian mansiansian matoor ed sikato. Singa bilang, sarayan kualidad et kaukolan na Kristianon pamilya sano walay agmagbabawin kanayon ya adispelo. Bebendisyonan na Dios iramay matoor ed sikato tan ed saray dalan to. Say katooran tan sigpot a panagmatalek ed si Jehova et manresultad liket diad limog na saray totoo to.​—Sal. 84:11, 12.

18. Unong ed Salmo 4:4, anto so gawaen tayo no asakitan itayo ed ginawa odino imbaga na arum?

¹⁸ Panon to no walay ginawa odino imbaga na sakey ya too ya amasanok ed sikatayo? Mansiansiay liket tayo no gawaen tayo iyan imbaga nen David: ‘Onsanok kayo, ingen ta agkayo manggawa na kasalanan. Mitalosan kayo ed puso yo no wala kayo ed dukolan yo, tan mandeen kayo.’ (Sal. 4:4) No asakitan itayo ed ginawa odino imbaga na arum, agtayo ombabawi pian agtayo mankasalanan. (Roma 12:17-19) Sano wala itayod dukolan, ibesngaw tayoy liknaan tayo diad pikakasi. Tan no nipikasi tayo la itan, nayarin manguman lay panmoria tayo tan napakiwas itayon mamerdona lapud aro. (1 Ped. 4:8) Maabig no imanoen tayo imay simbawa nen apostol Pablo a nayarin imbase to ed Salmo 4:4: “Onsanok kayo, ingen ta agkayo mankakasalanan; agkomon onselek so agew a wala ni pasnok yo, tan agyo met iikdan na pankanawnawa so Diablo.”​—Efe. 4:26, 27.

19. Panon itayon natulongan na Salmo 4:5 no nipaakar ed espiritual iran bagat tayo?

¹⁹ Indanet nen David so panagmatalek ed Dios sanen inkanta ton: ‘Isaklang yo so saray bagbagat na kasimpitan, et iyan yo so talek yo ed si Jehova.’ (Sal. 4:5) Saray bagat na saray Israelita et walaan labat na balor no dugay  motibo ra. (Isa. 1:11-17) Pian awaten na Dios so espiritual a bagat tayo, nepeg met ya duga so motibo tayo tan kaukolan ya sigpot so talek tayod sikato.​—Basaen so Uliran 3:5, 6; Hebreos 13:15, 16.

20. Antoy ipapabitar na balikas ya ‘liwawa na lupa nen Jehova’?

²⁰ Intuloy nen David: “Amayamay a mankuan, Siopa so mangiparungtal naani ed sikatayo na bengatla a maong? Jehova, itangwam so liwawa na lupam ed sikami.” (Sal. 4:6) Say balikas ya ‘liwawa na lupa nen Jehova’ et mangipapabitar ed panangabobon na Dios. (Sal. 89:15) Kanian sanen impikasi nen David ya: “Itangwam so liwawa na lupam ed sikami,” say labay ton ibaga et ‘abobonan mo kami.’ Lapud manmamatalek tayod Jehova, aabobonan to itayo tan nalilikna tayoy gayaga legan tayon gagawaen so linawa to.

21. Antoy nipapaseguro ed sikatayo no sigpot itayon mibibiang ed espiritual a panagani?

²¹ Lapud iilaloan nen David so liket a manlapud Dios ya palumbasan toy liket ed panaoy panagani, oniay inkanta to ed si Jehova: “Sika angiyan ka na liket ed pusok, a dakdakel nen say dia ed panaon ya indakel na bukel tan alak.” (Sal. 4:7) Seguradon nalikna tayo met so liket ed puso no sigpot tayon mibiang ed espiritual a panagani. (Luc. 10:2) Diad panangidaulo na saray alanaan, panggagayagaan tayo natan so idarakel na saray komikimey. (Isa. 9:3) Peteg kasin panggagayagaan mo so pibibiang ed sayan maliket a panagani?

Itultuloy so Sigpot a Panagmatalek ed Dios

22. Mitunosan ed Salmo 4:8, antoy resulta na intulok na saray Israelita ed Ganggan na Dios?

²² Oniay unor ya imbalikas nen David ed sayan salmo: “Siak ondukol ak naani ed kareenan tan naugip ak; ta sika labat, Jehova, so mamaayam ed siak ed andi kaatapan.” (Sal. 4:8) Sanen tinulok na saray Israelita so Ganggan nen Jehova, maabig so relasyon dad sikato tan alikna ray kaligenan. Singa bilang, “arawid kaatapan iray totood Juda tan Israel” legay uley nen Solomon. (1 Ara. 4:25, MB) Walay kareenan na saramay manmamatalek ed Dios, anggaman walay kaguloan diad saray kakaabay dan nasyon. Singa si David, mareen so ugip tayo ta nalilikna tayoy kaligenan ya iiter nen Jehova.

23. Antoy nalikna tayo no walaan tayoy sigpot a talek ed si Jehova?

²³ Mantultuloy tayo sirin ed panaglingkor ed si Jehova. Manpikasi tayo met tekep na pananisia pian nalikna tayo so “deen na Dios a palumbasan toy amin a kanonotan.” (Fil. 4:6, 7) Satan so mangiter ed sikatayo na sigpot a gayaga! Antokaman so nagawad arapen, agtayon balot ontakot no pansiansiaen tayoy sigpot a talek ed si Jehova.

Antoy Ebat Mo?

• Antoray asagmak nen David lapud si Absalom?

• Panon a makapangiter na kaligenan so komatlon Salmo?

• Panon a napabiskeg na komapat a Salmo so talek tayod si Jehova?

• Panon itayon nagunggonaan na sigpot a talek ed Dios?

[Tepetepet Parad Panagaral]

[Litrato ed pahina 29]

Nanmatalek si David ed si Jehova anggan sanen tinmakas lapud si Absalom

[Saray litrato ed pahina 32]

Kasin sigpot so talek mod si Jehova?