Say Pinasimplin Panaralan ya Edisyon ed English

MALIKET kamin mangipaamta ya manlapud Hulyo 15, 2011 ya isyu na panaralan ya edisyon na The Watchtower, mangi-publish kami na pinasimplin edisyon ed English kada bulan. Salien iya ed loob na sakey taon. Karga na satan iray aaralen ya artikulo, tan no wala ni espasyo, saray kaaruman ya artikulo. Matalek kamin baleg so nitulong na saya ed espiritualidad na dakel ed saray Tasi nen Jehova. Panon?

English so lenguahen maslak ya uusaren na saray agagi diad Fiji, Ghana, Kenya, Liberia, Nigeria, Papua New Guinea, tan Solomon Islands. Anggaman walay dilin lenguahe odino dialekto ra diad sarayan bansa, English balet so kaslakan ya uusaren dad saray aral tan panagpulong. Balet ta mas simplin English so uusaren da no ikomparad saray publikasyon tayo. Ontan met, walaray agagi tayon inmalis ed sananey a bansa, tan pian makapitalosan ira et kaukolan day man-English anggan ag-ira masyadon marunong ed satan. Niarum ni, ompan anggapoy kongregasyon a naatendian dan manguusar ed dilin lenguahe ra.

Saray artikulon aaralen tayon kada simba diad Panagaral na Panag-Bantayan so manunan uusaren pian regular itayon nataryaan na nipanpanaon ya espiritual a naakan. Sirin, pian sigpot a minabang so amin, saray inusar ya salita tan grammar ed pinasimplin panaralan ya edisyon ed English et mas mainomay a natalosan. Duma so apis na sayan edisyon. Saray subtitulo, parapo, panrepason tepet, tan litrato ed panaralan ya artikulo et miparad standard ya edisyon. Kanian, makatumbok tan makapankomento so amin legan na panagaral anggan anton edisyon so uusaren da. Pian nibiig yoy pandumaan na duaran edisyon, nengnengen so alimbawad leksab ya inala ed parapo 2 na unonan aaralen ya artikulo diad Hulyo 15, 2011 ya isyu na The Watchtower.

Mailalo kami a sayan balon probisyon et ebat ed pikakasi na dakel a mangibabaga ed si Jehova: “Ikdan mo ak na pakatalos, pian naaralan ko so ganggan mo.” (Sal. 119:73) Matalek kami a lalon minabang ed sinimban Watchtower Study iramay limitadoy amta rad English, ontan met ed saray ugugaw ya satan so lenguahe ra. Pisalamatan tayoy Jehova ta lapud ‘aro tod amin ya agagi’ et uusaren toy “matoor tan makabat ya aripen” a mangitarya na daakan ya espiritual a naakan.​—1 Ped. 2:17; Mat. 24:45.

Mananguley ya Ulop na Saray Tasi nen Jehova