Agnalinglingwanan ya Miting

“SEGURADON kayari na sayan miting et ibaga yon, ‘Talagan agnalinglingwanan iyan annual miting!’” Lapud satan ya imbaga nen Stephen Lett a Membro na Mananguley ya Ulop na saray Tasi nen Jehova, eksayted iray dakel ya inmatendi. Nantitipon ira parad koma-126 ya annual miting na Watch Tower Bible and Tract Society of Pennsylvania nen Oktubre 2, 2010 diad Assembly Hall na saray Tasi nen Jehova ed Jersey City, New Jersey, U.S.A. Antoray balibalin parte na sayan agnalinglingwanan ya okasyon?

Mabilabilay ya inter nen Brother Lett so manangilukas a paliwawa nipaakar ed karwahe nen Jehova diad tawen a singa deneskribe na libron Ezequiel. Irerepresenta na sayan balbaleg tan makapadinayew ya karwahe so organisasyon na Dios a sigpot ya kontrolado to. Say mangatatawen a kabiangan na saya et saray espiritun pinalsa ya onkikiwas a singa kapeles na kirmat​—say peles na mismon kanonotan nen Jehova, kuanen Brother Lett. Say mangaraldalin a kabiangan na organisasyon nen Jehova a Dios et onkikiwas met. Impaimano nen Brother Lett iray makapalikliket ya agawa ed nanengneng a kabiangan na organisasyon na Dios diad agano ni ran taon.

Singa bilang, impaniiba odino impankasakey iray pigaran branch office pian nisentro na dakel ya datin manlilingkor ed Bethel diad saratan a bansa so imano rad panagpulong. Pinaseseg nen Brother Lett iray inmatendi ya itultuloy da komon ya ipikasi so Mananguley ya Ulop, say mangirerepresenta ed aripen a klase, ya aglabat mansiansian matoor noagta makabat met.​—Mat. 24:45-47.

Saray Makapaseseg a Report tan Makapaligsay Puson Interbio

Inreport nen Tab Honsberger, ya membro na Branch Committee ed Haiti, so makapaakis ya agawa kayari na yegyeg nen Enero 12, 2010 ya amatey na manga 300,000 ya totoo ed satan a bansa. Inkuan ton ibabaga na saray pari ya dinusa kuno na Dios iramay inatey ta anggapoy pananisia ra, ingen ta sinalimbengan to ray maong a totoo. Balet, nilibon kriminal so akatakas sanen ageray so padir na prisoan lapud yegyeg. Kanian, dakel ed saray taga-Haiti so aligliwa sanen naamtaan da no akin ya onia lay kairap na panaon tayo. Sinalambit nen Brother Honsberger so imbaga na matoor ya agin inateyan na asawa lapud yegyeg: “Manakis ak ed sayan agew. Agko amta no anggad kapigan so panermen ko, balet maliket ak ta naliliknak so panangaro na organisasyon nen Jehova. Walay ilalok, tan determinado ak ya inabang iya.”

 Inreport nen Mark Sanderson ya membro la natan na pamilyan Bethel ed Brooklyn so kimey ed Pilipinas, a datin nanlingkoran to bilang membro na Branch Committee. Maligligsa ton imbalita so 32 a nantutumbokan ya sankatagyan a bilang na saray manangipalapag na Panarian diad Pilipinas tan say bilang na saray iyaaralan na Biblia a mas dakel nen saray manangipalapag. Inistorya toy nipaakar ed agin manngaran na Miguel ya say apo to et pinatey. Ginawa nen Miguel so anggaay nayarian to pian nakasoan tan nipriso so amatey. Ag-abayag, sanen sikatoy nampulong ed prisoan, akatongtong to imay amatey. Anggano mannerbiyos si Miguel, siansia nin sikatoy mauyamo tan marespeton akiarapan. Insan inyaralan to so laki, a dinmengel tan naaral ton aroen si Jehova. Natan, sikatoy bautismado la. Sankaaro la ran dua tan tutulongan nen Miguel iyan kaagian to pian napapeles so ipaway tod prisoan. *

Say sinmublay a programa et interbio ya inkondukta nen Mark Noumair, sakey ya instruktor diad Theocratic Schools Department. Ininterbio toy taloran sanasawa, si Alex tan Sarah Reinmueller, David tan Krista Schafer, tan Robert tan Ketra Ciranko. Insalaysay nen Alex Reinmueller, ya ontutulong ed Publishing Committee, no panon ton impapuso so katuaan legan ton manpapayunir ed Canada nen 15 años to ni labat, ya mabetbet et bukbukor toy manpupulong. Sanen tinepetan no siopay aka-impluensian maong ed sikato diad Bethel, sinalambit toy taloran lalaki, tan imbaga to no panon iran akatulong ed sikato pian ombiskeg ed espiritual. Say asawa ton si Sarah et inkuan ton akaaro toy sakey ya sister, a nansungdo ed pigay dekadan impakapriso ed China lapud pananisia to. Imbaga nen Sarah ya naaralan toy manmatalek ed si Jehova panamegley na pikakasi.

Si David Schafer, ya ontutulong ed Teaching Committee, et indayew toy mabiskeg a pananisia na ina to tan sinalambit to ray agagin say trabaho ra et managbatang na kiew. Imbaga ton sikaray akatulong pian makapan-auxiliary payunir sanen wala nid kalangweran. Say asawa ton si Krista et maligsan angisalaysay ed impluensyad sikato na saray mas abayag lan membro na pamilyan Bethel a “napanmatalkan ed daiset,” ya singa inkuan nen Jesus.​—Luc. 16:10.

Si Robert Ciranko, ya ontutulong ed Writing Committee, et inistorya to ray duaran bai tan duaran laki to ya imigrante nanlapud Hungary tan alanaan iran Kristiano. Sanen ugaw ni, pandinayewan to ray angkakabaleg a kombension ya naatendian to nen dekaday  1950 tan diman to naamtaan ya malaknab manayay organisasyon nen Jehova. Insalaysay met na asawa ton si Ketra, no panon ton naaralay manmatoor sanen manpapayunir ed kongregasyon ya naapektoan na apostasya tan arum ni ran problema. Sikatoy nansungdo tan ag-abayag et niasain ya espisyal payunir ed mauksoy a kongregasyon, tan satan so akatenyegay puso to.

Angiter na report si Manfred Tonak nipaakar ed Ethiopia. Satan a bansa et asalambit ed Biblia, tan natan et masulok ya 9,000 so manangipalapag na maong a balita ditan. Maslak ed sikara et manaayam odino asingger ed Addis Ababa, say kabiseran syudad. Kanian, kaukolan so manangipulong ed nisulinek iran pasen. Pian nasolusyonan iya, inimbitaan iray Tasin Ethiopian a walad arum a bansa ya ombisita pian napulongan iray ararawin parte na satan a bansa. Dakel so linma. Pinaseseg da ray agagi tan akalmo ra na interesado.

Say sakey nin agnalinglingwanan a parte na programa et say simposium nipaakar ed saray Tasi nen Jehova ed Russia tan saray pangilalaban dad akusasyon ed sikara. Insalaysay nen Aulis Bergdahl, a membro na Branch Committee na Russia iray agawan panamasegsegang ed saray Tasi ed Russia, lalo lad Moscow. Impaimano nen Philip Brumley, a membro na Legal Department diad United States branch, so makapaliket a balita ed agano ni ran bulan sanen dinengel na European Court of Human Rights (ECHR) so siameran akusasyon ed saray Tasi. Kombinsido so korte ya anggapoy katuaan na anggan dinan ed sarayan akusasyon tan arum ed sarayan kaso et detalyadon impaliwawa na korte no akin ya lingo iray argumento. Anggaman tatalaranan ni so nagawa, positibo si Brother Brumley ya sayan desisyon na korte et marakep so epekto to ed saray kaso ed arum a bansa.

Kayari na sayan makapalikliket a balita, inyanunsio nen Brother Lett ya inawat na ECHR so abayag lan tax case na gobiernoy France sumpad saray Tasi nen Jehova. Dagdaiset ya kaso so aawaten na sayan respetadon Korte. Diad ami-amin, 39 lan kaso na saray Tasi nen Jehova so inaral na ECHR tan 37 ed saratan et pabor ed sikara. Pinaseseg nen Brother Lett so amin ya agagi ya itultuloy dan ipikasi iya ed si Jehova a Dios.

Say unor a nanreport et si Richard Morlan, ya instruktor na School for Congregation Elders. Mabilabilay ton insalaysay so nipaakar ed sayan eskuelaan tan say pisasalamat na saray elder ya inmatendi.

 Arum ni ran Paliwawa na Mananguley ya Ulop

Si Guy Pierce, a membro na Mananguley ya Ulop et maar-aron angipaliwawad tinaon a teksto ed 2011 ya “Pasalimbengan ed ngaran nen Jehova.” (Sof. 3:12, NW) Inkuan to ya anggaman maliket iyan panaon parad saray totoo nen Jehova, seryoso met iyan panaon. Asingger lay baleg ya agew nen Jehova. Balet, siansia nin pasasalimbengan iray totoo ed palson relihyon, politika, kayamanan, pilosopiya, tan arum ni ra. Pian naromog tayo so tuan salimbeng, kaukolan tayoy ontawag ed ngaran nen Jehova, a say labay ton ibaga et kabaten, respetoen a maong, tan panmatalkan so Personan irerepresenta na satan a ngaran, ya aroen tayo panamegley na amin a walad sikatayo.

Insan, impaliwawa nen David Splane, a membro na Mananguley ya Ulop, so makapainteres ya teman “Kasin Akaloob Ka La ed Pampapainawaan na Dios?” Indanet ton sayan pampapainawa et agmankabaliksan ya anggapoy gagawaen na Dios, ta siansian “mankikimey ni” si Jehova tan say Anak to legan na simbolikon agew na painawa pian nasumpal so gagala To parad amin a pinalsa diad dalin. (Juan 5:17) Panon tayo sirin a makaloob ed pampapainawaan na Dios? Kaibad saya so agpanggawa na kasalanan tan pantunongtunongan. Kaukolan so pananisia tan pannodnonot ed gagala na Dios, a gawaen so anggaay nayarian tayon mitulongan pian nasumpal itan a gagala. No maminsan, aliwan mainomay itan a gawaen, balet kaukolan tayon awatey simbawa tan tulokey panangigiya na organisasyon nen Jehova. Pinaseseg nen Brother Splane iray inmatendi ya panggunaetan day onloob ed pampapainawaan na Dios.

Say unor a paliwawa ya atemaan na “Anto ni Aalagaren Tayo?” et inter nen Anthony Morris a membro na Mananguley ya Ulop. Maranet tan maar-aron impaimano nen Brother Morris so pakasumpal na saray propesiya a tatalaranan na amin ya matoor a totoo. Kaibad saya so pangikelyaw na “Kareenan tan kaligenan!” tan say kaderal na palson relihyon. (1 Tes. 5:2, 3; Apo. 17:15-17) Impasakbay nen Brother Morris ya no wala ray nagawgawa tan balbalita balet agmet kabiangan na propesiya, agtayo ibabagan “Armagedon la amo.” Impaseseg to so maliket tan maanos a panalagar a singa inkuan na Miqueas 7:7. Balet imbaga to met ya kaukolan tayon amin so onapit ed Mananguley ya Ulop, a singa saray sundalon mamapaarap ed graben labanan. “Pabiskeg yoy linawa yo, amin yo a manaalagar ed si Jehova,” so kuan to.​—Sal. 31:24, NW.

Diad konklusyon, walaray makapalikliket tan agnalinglingwanan ya anunsio. Inyanunsio nen Geoffrey Jackson so plano na Mananguley ya Ulop a salien so pinasimplin panaralan ya edisyon na The Watchtower parad saramay medyo naiirapan ed Ingles. Insan, inyanunsio nen Stephen Lett a say Mananguley ya Ulop et manggawa na uksoyan pian napastolan iray manangasikaso na distrito tan saray kaasawaan da ed Estados Unidos. Impakabat to met a say Ministerial Training School et tawagen la natan ya Bible School for Single Brothers. Tan magano met lan onggapo so Bible School for Christian Couples. Diad sayan eskuelaan et nagkalalon ipasal iray sanasawa pian mas mausar ira ed organisasyon nen Jehova. Ontan met, inyanunsio nen Brother Lett ya say School for Traveling Overseers and Their Wives tan say School for Branch Committee Members and Their Wives et mamidua lad sakey taon a gawaen diad Patterson, tan saramay akaatendi la et napribilehyoan lamet a makaatendi ed komaduan pankanawnawa.

Say makapatenyeg a konklusyon na programa et samay mapaabeba tan masimoon ya pikakasi nen John E. Barr a 97 años to la tan abayag lan membro na Mananguley ya Ulop. * Kayari na miting, say pakalikna na amin et talagan agnalinglingwanan iman ya agew.

[Saray paimano ed leksab]

[Blurb ed pahina 19]

Apaseseg so amin ed sarayan interbio

[Blurb ed pahina 20]

Benendisyonan nen Jehova so panagpulong ed Ethiopia