Tinalaranan Da so Mesias

“Mantatalaran iray totoo tan oniay nononoten dan amin nipaakar ed si Juan: ‘Sikato la kasi imay Kristo?’”​—LUC. 3:15.

1. Anton makapalikliket a balita so inyabawag na anghel ed saray pastol?

SINMIRUNGET la. Babantayan na saray pastol iray pulok da. Ataktakot ira sanen inmalagey ed arap da so anghel nen Jehova tan sinminag ed kaliberliber so gloria na Dios! Oniay makapalikliket a balitan inyabawag na anghel: “Agkayo natatakot, ta nia! linma ak dia pian ipasabi ed sikayo so maong a balita a mangiter na baleg a liket ed amin a totoo, lapud nianak ed sikayo natan ed syudad nen David so sakey a Manangilaban, say Kristo a Katawan,” say magmaliw a Mesias. Sayan ugaw et naromog na saray pastol ya akarukol ed atotong. Kabebekta, ‘dakerakel ya anghel’ so angidaydayew ed Jehova a kuan da: “Nigloria so Dios ed katawenan, tan diad dalin et niwala so deen ed saray totoon aabobonan to.”​—Luc. 2:8-14.

2. Antoy kabaliksan na “Mesias,” tan panon ya nabidbir no siopa itan?

² Siempre, amta na sarayan Judion managpastol a say “Mesias,” odino “Kristo,” et manutukoy ed “Nilanaan” na Dios. (Exo. 29:5-7) Balet, panon dan napruebaan ya sayan ugaw imay pinili nen Jehova a magmaliw a Mesias, diad ontan et nakombinse da met so arum? Kaukolan dan usisaen iray propesiya diad Hebreon Kasulatan tan nengnengen da no kasin ontua iraya ed bilay na sayan ugaw.

Akin et Manatalaran Iray Totoo?

3, 4. Panon ya tinmua so Daniel 9:24, 25?

³ Kalabas na pigaran taon, ginmapon nampulong si Juan a Bautista. Lapud saray imbaga tan ginawa to, inisip na arum ya ompan sikato so Mesias. (Basaen so Lucas 3:15.) Diad Biblia, walay propesiya nipaakar ed 70 a simba ya makatulong ed saray totoon naamtaan so isabi na Mesias. Oniay ibabaga na satan: “Pitomplo a simba so nigeter ed baley mo . . . Manlapu ed impaway na ganggan a mamasimbalo tan mangipaalagey na Jerusalem angga ed alanaan, say prinsipe, wala naani pitora a  simba to, tan anemaplo tan dua a simba to.” (Dan. 9:24, 25) Ibabaga na saray ekspertod Biblia ya saraya et simba na taotaon. Kanian say kada simba et pitoran taon so karukey to. Oniay impangipatalos na Maung a Balita ed satan: “Maminpiton pitomplo a taon so karukey na panaon ya inggetar na Dios.”

⁴ Diad sayan panaon, amta na saray lingkor nen Jehova a say 69 a simba diad Daniel 9:25 et 483 ya taon so karukey to. Ginmapo itan nen 455 B.C.E. sanen imbaki nen Arin Artaxerxes na Persia si Nehemias pian ipaalagey lamet so Jerusalem. (Neh. 2:1-8) Anampot so 483 ya taon nen 29 C.E. sanen abautismoan si Jesus tan nilanaan nen Jehova na masanton espiritu, sirin et nagmaliw a Mesias.​—Mat. 3:13-17. *

5. Antoran propesiya so aralen tayo natan?

⁵ Aralen tayo natan iray propesiya nipaakar ed Mesias ya asumpal ed inkianak, impanugaw, tan ministeryo nen Jesus. Seguradon napabiskeg na saya so pananisia tayo ed Biblia tan paneknekan na saya a talagan si Jesus so Mesias ya tatalaranan na totoo.

Propesiya Nipaakar ed Kianak na Mesias

6. Ipaliwawa no panon ya asumpal so Genesis 49:10.

⁶ Say Mesias et manlapud tribu na Juda. Antis ya ompatey si Jacob, benendisyonan to ray anak to, tan oniay inkuan tod si Juda: “Say setro ag-ontaynan ed Juda naani, nisay tayukor na mananguley agnaekal ed leet na saray salisali to, angga ed isabi nen Siloh; tan dia ed sikato wala naani katutulok na saray katooan.” (Gen. 49:10) Papanisiaan na saray Judion iskolar a sayan imbaga nen Jacob et nipaakar ed Mesias. Manlapu lad uley nen Arin David, say setro (kanepegan a manuley) tan say tayukor na mananguley (pakayarin mangiganggan) et walad tribu na Juda. Say “Siloh” et mankabaliksay “Sikato a Makankayarian ed Satan; Sikato ya Akankien ed Satan.” Say inkaari et manampot ed “Siloh,” say permanentin tomatawir. Imbaga na Dios ed si Zedekias, say unor ya ari na Juda, a say panuley et niiter ed samay makankanepegan. (Eze. 21:26, 27) Kayari nen Zedekias, si Jesus labat so ilalak nen David ya angisipanan nen Jehova na inkaari. Antis ya nianak si Jesus, oniay imbaga nen anghel Gabriel ed si Maria: “Iter nen Jehova a Dios ed sikato so trono nen David ya ama to, tan sikato so manuley ya andi-anggaan bilang ari ed abung nen Jacob, tan anggapo so anggaan na panarian to.” (Luc. 1:32, 33) Si Jesus et nanlapud tribu na Juda tan diad pamilya nen David. Kanian nibaga a si Jesus imay Siloh.​—Mat. 1:1-3, 6; Luc. 3:23, 31-34.

7. Panon ya asumpal so propesiya nipaakar ed lugar a kianakan na Mesias?

⁷ Nianak so Mesias ed Betlehem. Insulat nen propetan Miqueas: “Betlehem Efrata, sakey ka ed saray angkekelag a baley na Juda, balet sika so panlapuan na sakey a manuley ed Israel, a say sengeg na pamilya to et natonton ed saray inmuna-una ran panaon.” (Miq. 5:2, MB) Say Mesias et iyanak ed baley na Juda a Betlehem, a datin tatawagen ya Efrata. Anggaman say ina nen Jesus a si Maria tan say asawa ton si Jose et manaayam ed Nazaret, linma rad Betlehem ta walay ganggan na gobiernoy Roma a manparehistro ra diman, kanian diman nianak si Jesus nen 2 B.C.E. (Mat. 2:1, 5, 6) Makapadinayew so inkasumpal na propesiya!

8, 9. Antoy nipropesiya nipaakar ed kianak na Mesias tan say nagawa kayari na satan?

⁸ Birhen so mangilukon ed Mesias. (Basaen so Isaias 7:14.) Say Hebreon salita (ʽal·mahʹ) ya inusar diad sayan teksto parad “birhen” et nayari met ya ipatalos a “marikit.” Balet, apuyanan si Mateo a mangusar ed Griegon salita parad “birhen” (par·theʹnos) sanen insulat ton say Isaias 7:14 et asumpal ed inkianak nen  Jesus. Diad Ebanghelyo et insulat nen Mateo tan Lucas a si Maria et birhen ingen ta nanlukon panamegley na masanton espiritu na Dios.​—Mat. 1:18-25; Luc. 1:26-35.

⁹ Napapatey iray ugugaw kayari kianak na Mesias. Mipara iya ed samay agawa pigaran siglo ed asasakbay sanen ingganggan nen Faraon ya amin ya kapangiyanak a laki na saray Israelita et ibantak ed Ilog Nilo. (Exo. 1:22) Makapainteres ta diad Jeremias 31:15, 16 et adeskribe si Raquel ya mannangis ta saray anak to et ‘naandi la.’ Say pannangis to et nadngel anggad arawin syudad na Rama, diad teritorya na tribu na Benjamin a walad bandad norte na Jerusalem. Imbaga nen Mateo ya asumpal iyan propesiya sanen ingganggan nen Arin Herodes ya pateyen so amin ya ugaw a laki ed Betlehem tan ed kaliberliber a distrito. (Basaen so Mateo 2:16-18.) Isipen pa labat so pirmin impanermen na totoo diad satan a lugar!

10. Panon a tinmua imay propesiya diad Oseas 11:1?

¹⁰ Singa saray Israelita, say Mesias et tawagen manlapud Ehipto. (Os. 11:1) Antis ya ingganggan nen Herodes imay pamatey ed saray ugugaw, ingganggan na sakey ya anghel si Jose tan Maria ya awiten day Jesus ed Ehipto. Nansiansia ra diman “angga ed impatey nen Herodes pian nasumpal so sinalita nen Jehova diad panamegley na propeta to, a kuan to: ‘Tinawag ko so ana’ko manlapud Ehipto.’” (Mat. 2:13-15) Siempre, imposiblin kinontrol nen Jesus so antokaman ya agawad inkianak tan impanugaw to.

Inggapo na Mesias so Ministeryo To!

11. Panon a niparaan so dalan parad isabi na Mesias?

¹¹ Walay mangiparaan na dalan parad isabi na Mesias. Impropesiya nen Malaquias a “si Elias a propeta” so manggawad saya, ya iparaan to so puso na saray totoo parad isabi na Mesias. (Basaen so Malaquias 4:5, 6.) Imbagan mismo nen Jesus a sayan “Elias” et si Juan a Bautista. (Mat. 11:12-14) Tan impabitar nen Marcos a say ministeryo nen Juan so kasumpalan na samay impropesiya nen Isaias. (Isa. 40:3; Mar. 1:1-4) Ag-ingganggan nen Jesus si Juan ya iparaan toy dalan parad sikato. Say Dios so amilid si Juan a manggawad kimey a miparad samay kimey nen Elias, pian diad ontan et awaten na totoo so Mesias.

12. Anton kimey so mangipabidbir no siopa so Mesias?

¹² Walay kimey ya iter na Dios a mangipabidbir no siopa so Mesias. Diad sinagoga ed Nazaret a binalegan nen Jesus, binasa to so sakey a lukot a pakabasaan na sayan propesiya nen Isaias: “Walad siak so espiritu nen Jehova lapud nilanaan to ak a mangiyabawag na maong a balita ed saray mairap-bilay. Imbaki to ak pian mangipulong na kibulos ed saray akautibo tan kipawil na pakanengneng ed saray bulag, pian mangibulos ed saray napapairap, pian mangipulong na makapaliket a taon nen Jehova.” Imbaga nen Jesus ya sikato so tutukoyen na sayan propesiya. Lapud talagan sikato so Mesias, walay kanepegan ton mangibagan: “Diad sayan agew et asumpal iyan kasulatan a kaykayari yon nadngel.”​—Luc. 4:16-21.

13. Antoy impropesiya nen Isaias nipaakar ed ministeryo na Mesias diad Galilea?

¹³ Nipropesiya so panministeryo na Mesias ed Galilea. Nipaakar ed “dalin nen Zebulon tan say dalin nen Neftali” tan ed “Galilea na saray nasyon,” oniay impropesiya nen Isaias: “Saray kabalbaleyan a nanakar ed kabilungetan anengneng da so baleg a silew; saray nanayam ed dalin na anino na patey, dia ed sikara sinminag so silew.” (Isa. 9:1, 2) Inggapo nen Jesus so ministeryo to diad Galilea, tan nanayam ed Capernaum, sakey ed saray syudad na Galilea. Ditan et imbangat to so katuaan ed saray distrito na Zebulon tan Neftali, ya impagamor tod sikara so espiritual a liwawa.  (Mat. 4:12-16) Diad Galilea so impakagawaan na samay Sermon nen Jesus ed Palandey, ditan amili na saray apostol to, ditan to ginawa so inmunan milagro to, tan nayarin ditan met nampanengneng ed manga 500 a disipulo to kayarin apaoli. (Mat. 5:1–7:27; 28:16-20; Mar. 3:13, 14; Juan 2:8-11; 1 Cor. 15:6) Sinumpal to sirin so propesiya nen Isaias diad impanpulong to ed “dalin nen Zebulon tan say dalin nen Neftali.” Siempre, impulong met nen Jesus so mensahe na Panarian diad arum nin lugar ed Israel.

Arum nin Propesiya Nipaakar ed Mesias

14. Panon a sinumpal nen Jesus so Salmo 78:2?

¹⁴ Mangusar so Mesias na saray alimbawa tan ilustrasyon diad panagbangat to. Oniay inkanta na salmistan si Asaf: “Biswaten ko so sangik ed sakey ya alimbawa.” (Sal. 78:2) Imbaga nen Mateo no panon ya asumpal iyan propesiya. Kayari ton insalaysay iray ilustrasyon a ditan et inkompara nen Jesus so Panarian ed bukel na mustasa tan ed lebadura, oniay imbaga to: “[Si Jesus et] naynay a manguusar na ilustrasyon sano mansasalita ed sikara, ta pian nasumpal imay sinalita ed panamegley na propeta, a kuan to: ‘Mansalita ak diad panamegley na saray ilustrasyon, salitaen ko iray bengatlan niyamot manlapu la ed inkiletneg na mundo.’” (Mat. 13:31-35) Angusar si Jesus na saray alimbawa o ilustrasyon pian epektiboy panagbangat to.

15. Ipaliwawa no panon ya asumpal so Isaias 53:4.

¹⁵ Awiten na Mesias iray beblay tayo. Impropesiya nen Isaias: “Intepel to so saray sakit tayo tan inawit to so saray ermen tayo.” (Isa. 53:4) Kayarin pinaabig nen Jesus so katulangan a bii nen Pedro, pinaabig to met so arum ni ya linma diman ed abung nen Pedro. Imbaga nen Mateo a ginawa iya nen Jesus “pian nasumpal imay sinalita diad panamegley nen propetan Isaias, a kuan to: ‘Inekal ton mismo iray sakit tayo tan inawit to iray beblay tayo.’” (Mat. 8:14-17) Sakey labat iya ed dakerakel a pankanawnawan pinaabig nen Jesus iray mansasakit.

16. Panon ya impanengneng nen apostol Juan ya asumpal ed si Jesus imay Isaias 53:1?

¹⁶ Diad amin a kaabigan a ginawa na Mesias, dakel nin siansiay agmanisiad sikato. (Basaen so Isaias 53:1.) Oniay insulat nen apostol Juan pian ipanengneng no panon ya asumpal iyan propesiya: “Anggano dakdakel lay ginawa [nen Jesus a] tanda ed arapan da, ag-ira anisia ed sikato, kanian asumpal so salita nen propetan Isaias, ya inkuan to: ‘Jehova, siopa so anisia ed bengatlan nadngel mi? Tan no nipaakar ed pakapanyari nen Jehova, siopa so angiparungtalan ed saya?’” (Juan 12:37, 38) Kalabas na pigaran taon, sanen impulong nen apostol Pablo so maong a balita, siansia nin daiset so anisian si Jesus so Mesias.​—Roma 10:16, 17.

17. Panon ya asumpal so propesiyan walad Salmo 69:4?

¹⁷ Say Mesias et busolen ya anggapoy makasengeg. (Sal. 69:4) Imbaga nen Jesus: “No agko ginawa ed sikara iray kimey ya agni agawaan na anggan siopa, anggapo komon so kasalanan da; balet natan et anengneng da ak tan binusol da ak pati say Amak. Ingen, agawa itan pian nasumpal so salitan nisulat ed Ganggan da, ‘Binusol da ak ya anggapoy sengegan.’” (Juan 15:24, 25) Say “Ganggan” ya asalambit dia et ontutukoy ed amin a Kasulatan ya wala lad saman ya panaon. (Juan 10:34; 12:34) Papaneknekan na salaysay na Ebanghelyo ya si Jesus et binusol, lalo la na saray lider na Judion relihyon. Tan oniay imbaga nen Jesus: “Anggapoy rason na mundo pian busolen to kayo, balet bubusolen to ak, lapud tatasian ko a mauges iray kimey na mundo.”​—Juan 7:7.

18. Antoy aralen tayo ed onsublay ya artikulo?

¹⁸ Segurado iray papatumbok nen Jesus nen inmunan siglo ya sikato so Mesias, ta amta ran asumpal ed sikato so amin a  Mesianikon propesiya diad Hebreon Kasulatan. (Mat. 16:16) Diad sayan artikulo, naaralan tayoy arum ed saray propesiya ya asumpal ed inkianak, impanugaw, tan ministeryo nen Jesus. Aralen tayod onsublay ya artikulo so arum nin propesiya nipaakar ed Mesias. No dalepdepen tayo iratan, ombiskeg so talek tayo a talagan si Jesus so Mesias ya tinuro na Ama tayod tawen, si Jehova.

[Paimano ed leksab]

Antoy Ebat Mo?

• Antoran propesiya so asumpal sanen nianak si Jesus?

• Panon ya niparaan so dalan parad isabi na Mesias?

• Panon ya asumpal ed si Jesus iray propesiya diad Isaias kapitulo 53?

[Tepetepet Parad Panagaral]