Aligen so Inkaalerto nen Jesus

“Mantultuloy kayon manbantay tan . . . manpikasi.”​—MAT. 26:41.

ANTOY EBAT MO?

Panon a nipapatnag na pikakasi tayo ya alerto itayo?

Panon tayon nipanengneng ya alerto itayo diad ministeryo?

Akin et importante so pansiansian alerto sano nasusubok, tan panon tayon nagawaan itan?

1, 2. (a) Anto ray nayarin nitepet tayo nipaakar ed inkaalerto nen Jesus? (b) Kasin makagunggona so perpekton alimbawa nen Jesus ed saray makasalanan a totoo? Mangiter na alimbawa.

ASALIM ta lan intepet iya: Talaga kasin sarag tayon aligen so inkaalerto nen Jesus? Ompan isipen mon agtayo sarag ya aligen ta sikatoy perpekto. Sakey ni, no maminsan et natetebek to so arapen anggano nilibon taon ni so pakagawa na satan! Talaga kasin kaukolan toy magmaliw ya alerto? (Mat. 24:37-39; Heb. 4:15) Pantongtongan ti’ pa ni irayan tepet pian nanengneng no akin et importante tan kakkaukolan so pagmaliw ya alerto.

² Makagunggona kasi so perpekton alimbawa nen Jesus ed saray makasalanan a totoo? On, ta makaaral tayo ed maong a managbangat tan ed alimbawa to. Imadyinen pan walay sakey a toon manaaral ya manpana. Diad gapo, agto nakenay target to. Balet ta siansia nin nanaral tan agsinmuko. Pian onaligwas, inobserbaan toy estilo na managbangat to a sakey ya eksperton pumapana. Inimano toy alagey, posisyon na taklay tan gamet na managbangat to. Kalkalnan naaralan na sayan maseet ya estudyante no kaunongan so pampinat ed pana, ikokonsindera to met so siplog na dagem, tan naynay a manpapasal. Lapud aaligen toy managbangat to, kada no manpana et manasingger lan manasingger ed pegley na target. Mipadpara, panggugunaetan tayoy onaligwas bilang Kristiano diad panutumbok ed saray instruksion tan perpekton alimbawa nen Jesus.

3. (a) Panon ya impanengneng nen Jesus a kaukolan toy magmaliw ya alerto? (b) Antoy aralen tayo ed sayan artikulo?

³ Talaga kasin kaukolan nen Jesus so magmaliw ya alerto? On. Singa bilang, diad samay labi antis na impatey to, pinaseseg to ray matoor ya apostol to: “Mantultuloy kayon manbantay a kaibak.” Insan to inyarum: “Mantultuloy kayon manbantay tan agkayo ontutundan  manpikasi, ta pian agkayo napelag ed tukso.” (Mat. 26:38, 41) Anggano sipor lan alerto si Jesus, diad saman a mair-irap ya panaon et lalon labay toy mansiansian akabantay tan onapit ed Ama ton walad tawen. Amta ton kaukolan met a magmaliw ya alerto iray papatumbok to, nensaman tan anggad natan. Kanian aralen tayo no akin a labay nen Jesus ya mansiansia itayon alerto. Insan kayari to, usisaen tayo so taloran paraan no panon tayon naalig ed inagew-agew a kabibilay tayo so inkaalerto nen Jesus.

NO AKIN YA LABAY NEN JESUS A MAGMALIW ITAYON ALERTO

4. Akin et kaukolan tayoy mansiansian akabantay?

⁴ Labay nen Jesus a mansiansia itayon alerto lapud anggaman dakel so amta tayo nipaakar ed arapen, siansian wala ni ray agtayo amta. Sanen wadiad dalin si Jesus, kasin amta to so amin ya nagawa ed arapen? Andi, ta oniay mapaabeba ton binidbir: “Nipaakar ed satan ya agew tan oras et anggapoy siopaman a makaamta, anggan saray anghel ed tawen nisay Anak, noag say Ama lambengat.” (Mat. 24:36) Diad saman et ag-amta nen Jesus, say “Anak,” no kapigan so eksakton panampot na sayan mauges a mundo. Sikatayo balet ey? Kasin limitado labat so amta tayo nipaakar ed arapen? On. Agtayo amta no kapigan ibaki nen Jehova so Anak to pian panampoten iyan mauges a sistema na mundo. Ta no amta ti’ la, kaukolan tayo ni kasi mansiansian akabantay? Impaliwawa nen Jesus ya bigbigla tan ag-iilaloan so isabi na anggaan. Kanian, kaukolan a lawas itayon manalerto.​—Basaen so Mateo 24:43.

5, 6. (a) Panon a makatulong so kakabatan tayo nipaakar ed Panarian na Dios pian mansiansian alerto? (b) Akin a say impakaamta tayo nipaakar ed si Satanas so lalon mamakiwas ed sikatayon magmaliw ya alerto?

⁵ Anggaman ontan, dakel so amta nen Jesus a makapakelaw iran bengatla nipaakar ed arapen ya agbalot amta na maslak a totoo nen panaon to. Agtayo naparaan so kakabatan nen Jesus. Balet lapud sikato, dakel so naamtaan tayo nipaakar ed Panarian na Dios tan no antoy asingger lan sumpalen na satan. No wala tayod eskuelaan, trabaho, odino diad teritorya tayo, agta naoobserbaan tayon dakel so totoon agmakaamta ed sarayan katuaan? Kanian sakey lamet iyan rason no akin a kaukolan tayoy mansiansian akabantay. Singa si Jesus, lawas tayon manalerto, maimano ed saray pankanawnawan ninabang so amta tayo nipaakar ed Panarian na Dios. Balang sakey ed saratan a pankanawnawa et mabmabli, tan agtayo labay ya nasayang. Bilay so nalalanor!​—1 Tim. 4:16.

⁶ Wala ni amta nen Jesus ya akatulong ed sikato pian mansiansian akabantay. Amta ton determinado si Satanas a manukso, mamasegsegang, tan maneral ed integridad to. Satan a maruksan kabusol et lanang a manaanap na “arum a maabig a pankanawnawa” pian suboken si Jesus. (Luc. 4:13) Ingen ta lawas alerto si Jesus. Labay ton sikatoy akaparaan ed anggan anton subok​—balanglan tukso, isusumpa, odino panamasegsegang. Agta nepeg labat ya ontan tayo met? Amta tayo ya anggad natan et “singa managlem a leon [si Satanas], a manaanap na buagen to.” Kanian, papasesegen na Salita na Dios so amin a Kristiano: “Mantultuloy kayon manlikas tan manbantay.” (1 Ped. 5:8) Balet, panon tayon nagawaan itan?

NO PANON A MAKATULONG SO PIKAKASI PIAN MANALERTO

7, 8. Antoy imbilin nen Jesus nipaakar ed pikakasi? Tan antoy naaralan tayo ed paraan na panagpikasi to?

⁷ Ibabaga na Biblia ya importantin maong so pikakasi pian mansiansian akabantay odino alerto ed espiritual. (Col. 4:2; 1 Ped. 4:7) Oniay imbaga nen Jesus kayari  ton binilin iray papatumbok to ya mantultuloy a manbantay kaiba to: “Mantultuloy kayon manbantay tan agkayo ontutundan manpikasi, ta pian agkayo napelag ed tukso.” (Mat. 26:41) Kasin say labay ton ibaga et manpikasi ira labat leleg na saman ya mairap a situasyon? Andi, say bilin to et prinsipyon onaplika ed inagew-agew a kabibilay tayo.

⁸ Angipanengneng si Jesus na sankaabigan ya alimbawa ed panagpikasi. Nanonotan mo ni seguro imay sanlabin impanpikasi to ed Ama to. Imadyinen tayo pay eksena. (Basaen so Lucas 6:12, 13.) Nayarin agawa iman diad asingger ed baley na Capernaum. Sanen mansirunget la, linmay Jesus ed sakey ed saray palandey a sankanengneng so Dayat na Galilea. Legan ton babantagen so ombibilunget lan kaliberliber, nayarin anengneng to so mankirlap iran lamparaan diad Capernaum tan arum ni ran baryo. Balet, sanen ginapoan to lay akitongtong ed si Jehova, nanpokus a maong ed pikakasi to. Linmabas so pigaran minuto, insan oras. Agto la naiimano iray silew a sansakey ya naeerep nisay posisyon na bulan odino ungol na ayayep. Nayarin impikasi to so nipaakar ed gawaen ton importantin desisyon, say pamili na 12 apostol to. Naiimadyin tayon akapokus ya maong si Jesus ya onkekerew na panangigiya tan karunongan legan ton ibabalikas ed Ama to so amin ya iisipen tan kapagaan to nipaakar ed kada disipulo to.

9. Antoy naaralan tayod si Jesus diad samay sanlabin impanpikasi to?

⁹ Kasin ibabangat itayo nen Jesus a kaukolan ya andukerukey so pampikasi tayo? Andi, lapud oniay maaro ton imbaga ed saray papatumbok to: “Magunaet so espiritu, balet maletey so laman.” (Mat. 26:41) Anggaman ontan, sarag tayon aligen si Jesus. Singa bilang, kasin onkokonsulta tayo ed Ama tayon walad tawen antis tayon manggaway desisyon a nayarin mangapekta ed sikatayo, ed pamilya, odino ed saray kaagian tayo? Kasin kaibad pikakasi tayo iray agagi? Kasin manlalapud puso iray pikakasi tayo, odino apasakey iray ibabalikas tayo? Imanoen met ya pinabli nen Jesus so maapit tan pribadon pitotongtong ed Ama to. Diad sayan okupadon mundo, magmainomay tayon nalingwanan no anto so sankaimportantian. No mangigana tayo na magenap a panaon parad impapuson panagpikasi, mas magmaliw tayon alerto. (Mat. 6:6, 7) Sakey ni, lalo tayon onapit ed si Jehova, a panggunaetan ya pabiskegen so relasyon tayod sikato tan agmanggawa na antokaman a maneral ed satan.​—Sal. 25:14.

NO PANON TAYON MAGMALIW YA ALERTO DIAD PANAGPULONG A KIMEY

10. Anton alimbawa so mangipapanengneng ya lawas alerto si Jesus ed saray pankanawnawan makapantasi?

¹⁰ Si Jesus et alerto ed kimey ya inyasain nen Jehova ed sikato. Wala ray arum ya trabaho a nayarin agnaapektoan anggano ag-akasentrod satan so nonot na trabahador. Balet, dakel a trabaho so mankaukolay inkaalerto, tan seguradon kaibad satan so ministeryo tayo. Si Jesus et lawas alerto ed kimey to, iimanoen to ray pankanawnawan ninabang so maong a balita. Alimbawa, sanen sikato tan saray disipulo to et akasabi diad asingger ed syudad na Sicar kayari na kapalduay agew ya impanakar da, linman angaliw iray disipulo to na naakan. Tinmilak si Jesus ed abay na bobon pian manpainawa, balet lapud alerto, anengneng toy pankanawnawan makapantasi. Sinmabi so sakey a Samaritana pian onasol. Anggapo met so problema no ipainawa nen Jesus odino manisip na rason pian agto la katongtongen so bii. Balet kinatongtong to, tan angiter na mapuersan pantasi ya amakiwas ed dakel a totoo diad satan a syudad. (Juan  4:4-26, 39-42) Sarag tayo met kasin aligen so inkaalerto nen Jesus, a lalon alerto ed saray pankanawnawan napulongan iray totoo ya nakakalimog tayo ed inagew-agew?

11, 12. (a) Antoy imbaga nen Jesus ed saramay manasalin mangabala ed kimey to? (b) Panon ya impanengneng nen Jesus so inkabalanse ed ministeryo to?

¹¹ No maminsan, sasalien na arum ya abalaen so kimey nen Jesus anggaman maabig met so intension da. Diad Capernaum, pandinayewan na totoo iray mamilagron impanambal nen Jesus kanian agda paalisen. Natalosan met itan. Balet, say misyon to et pulongan so amin ya “abalang a karnero ed abung na Israel,” aliwa labat lan diad sakey a syudad. (Mat. 15:24) Kanian inkuan tod sikara: “Kaukolan ko met so onla ed arum niran syudad pian iyabawag so maong a balita na panarian na Dios, ta saya so angibakian ed siak.” (Luc. 4:40-44) Malinew ya akasentro so bilay nen Jesus ed ministeryo to. Agto inabuloyan so anggan anto a mangabala ed sikato.

¹² Kasin okupadon maong si Jesus ed kimey to kanian nagmaliw lan panatiko odino is-istrikto ed sarili to? Kasin masyadon okupado ed ministeryo to kanian agto la amtay kaukolan na totoo? Andi, balanse si Jesus. Sikatoy nanliket met tan magayagan akilimog ed kakaaro to. Importante ed sikato iray pamilya, impanengneng toy masimoon ya empatya ed saray pankaukolan tan problema ra, tan impalikna to met so panangaro tod saray ugugaw.​—Basaen so Marcos 10:13-16.

13. Panon tayon naalig so inkaalerto tan inkabalanse nen Jesus diad ministeryo?

¹³ Legan tayon aaligen so inkaalerto nen Jesus, panon tayo met a magmaliw ya balanse a singa sikato? Agtayo aabuloyan iyan mundo a mangabala ed kimey tayo. Nayarin pasesegen itayo na saray kakaaro tan kakanayon a walaan na maabig ya intension pian panliketay ipapasen dan normal a bilay odino agtanto seryosoey ministeryo. Balet, no aligen tayo si Jesus, moriaen tayo so ministeryo tayo a singa panangan. (Juan 4:34) Say kimey tayo et mamapabiskeg ed sikatayo ed espiritual tan mamapaliket met ed sikatayo. Anggaman ontan, agtayo labay so magmaliw a panatiko, mantunongtunongan, odino is-istrikto. Singa si Jesus, labay tayoy magmaliw a maliket tan balansin lingkor na “maliket a Dios.”​—1 Tim. 1:11.

NO PANON TAYON MAGMALIW YA ALERTO SANO NASUSUBOK

14. Sano ondadalan ed mairap a situasyon, anton tendensia so kaukolan tayon paliisan, tan akin?

¹⁴ Singa naimano tayo, nagkalalo lan angiter si Jesus na bilin a mansiansian alerto sanen sikatoy nasusubok. (Basaen so Marcos 14:37.) Sano ondadalan ed mairap a situasyon, lalon kaukolan ya aligen tayo si Jesus. No maminsan, nalilingwanan na arum so importantin katuaan ya amiduan sinalambit ed Uliran: “Wala so dalan a singa maptek ed too; balet say sampot to saray dalan  na patey.” (Uli. 14:12; 16:25) No manmatalek itayo ed sarili tayo, lalo la no wala ray seryoson problema, nipepeligro tayoy inkasikatayo tan saray inad-aro tayo.

15. Diad panaon na kairapan, anto so nayarin pakatuksoan na sakey ya ulo na pamilya?

¹⁵ Alimbawa, nayarin naiirapan so sakey ya ulo na pamilya a mangitarya na materyal a pankaukolan na saramay “walad pudir to.” (1 Tim. 5:8) Kanian ompan natukson onloob ed trabaho a sengegay agti la pakapiaral, nidauloy panagdayew na pamilya, odino pakapampulong. No manmatalek ed dilin kakabatan to labat, nayarin isipen ton makatunongan odino duga itan. Balet, ompan manresulta itan ed ikapuy odino ipatey to ed espiritual. Talagan maabig a tumboken so simbawa na Uliran 3:5, 6! Inkuan nen Solomon: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo. Dia ed saray amin a dalan mo sikato so bidbiren mo, et sikato itonton to so saray basbas mo.”

16. (a) Antoy naaralan tayod impanmatalek nen Jesus ed si Jehova imbes a diad sarili to? (b) Panon ya aaligen na dakel ya ulo na pamilya so panagmatalek nen Jesus ed si Jehova sano sikaray nasusubok?

¹⁶ Sanen nasusubok si Jesus, agton balot nanmatalek ed sarili to. Isipen pa labat itan! Say sankarunongan a toon nambilay ed dalin et agbalot nanilalod sarili ton kakabatan. Singa bilang, sanen sikatoy tinukso nen Satanas, aminpigan ton inyebat so onia: “Walan nisulat.” (Mat. 4:4, 7, 10) Pian nalabanay tukso, nanmatalek si Jesus ed karunongan na Ama to. Diad ontan et impanengneng toy kapaabebaan, sakey a kualidad ya anggapod si Satanas. Kasin aligen tayo met si Jesus? Saray ulo na pamilya ya mangaalig ed inkaalerto nen Jesus et paigigiya ed Salita na Dios, nagkalalo la diad panaon na saray subok. Diad interon mundo, nilibon ulo na pamilya so manggagawa na ontan. Matoor dan iyuuna so Panarian na Dios tan say dalisay a panagdayew nen say materyal iran bengatla. Kanian, naaasikaso dan maong so pamilya ra. Tan bebendisyonan nen Jehova so pansasagpot dan mangitarya na materyal iran pankaukolan, a singa insipan na Salita to.​—Mat. 6:33.

17. Akin et aaligen mo so inkaalerto nen Jesus?

¹⁷ Andi-duaruwan si Jesus so sankaabigan ya alimbawa na inkaalerto. Say ehemplo to et makatulong, makagunggona, tan makapangiliktar ni ingen na bilay. Tandaan, mamapasya si Satanas a pakapuyen so espiritualidad mo, paleteyey seseg mo, tan deraley integridad mod si Jehova. (1 Tes. 5:6) Agmo papanaloen! Mansiansia kan alerto a singa si Jesus​—alerto ed panagpikasi, diad ministeryo, tan sano nasusubok. No gawaen mo iya, natan ni labat et magmaliw lan maliket tan makapnek so bilay mo legan a manasingger so pangangga na sayan mauges a mundo. Ontan met, sano onsabi so Katawan pian deralen iyan sistema, nasabian to kan alerto tan aktibon manggagawad linawa na Ama to. Seguradon maliket a tumangan nen Jehova so katooran mo!​—Apo. 16:15.

[Tepetepet Parad Panagaral]

[Litrato ed pahina 6]

Pinulongan nen Jesus so sakey a Samaritana. Kasin maimano kad kada pankanawnawan makapanpulong?

[Litrato ed pahina 7]

Ipapanengneng na pangaasikasom ed espiritual a pankaukolan na pamilyam ya alerto ka