Kasin Iyaaninag Moy Gloria nen Jehova?

“Iyaaninag tayon singa saray espiho so gloria nen Jehova.”​—2 COR. 3:18.

ANTOY EBAT MO?

Panon tayon nigloriay Jehova anggano makasalanan itayo?

Panon ya makatulong so pikakasi tan iyatendid aral pian niyaninag tayoy gloria na Dios?

Antoy ontulong ed sikatayo pian nitultuloy tayon nigloria si Jehova?

1, 2. Akin et sarag tayon aligen iray kualidad nen Jehova?

WALAN walay atawir tayod atateng tayo. Kanian agla pankelawan no walay mangibagad sikatayo na ‘Kaparparam lanti tatay mo’ odino ‘Singa ka si nanay mo.’ Tan aaligen met na saray ananak no antoy nanenengneng dad atateng da. Sikatayo ey? Sarag tayo met kasin aligen so Ama tayo ed tawen, si Jehova? Anggano agtayo anengneng si Jehova, natebek tayo ray alay abig ya kualidad to sano aralen tayoy Salita to, obserbaan tayo ray pinalsa to, tan dalepdepen tayo ray walad Biblia, lalo lad saramay imbaga tan ginawa na Anak to, si Jesu-Kristo. (Juan 1:18; Roma 1:20) On, sarag tayon iyaninag so gloria nen Jehova.

² Antis ya pinalsa na Dios si Adan tan Eva, sikatoy matalek ya sarag na totoo ya gawaen so linawa to, aligen iray kualidad to, tan iyaninag so gloria to. (Basaen so Genesis 1:26, 27.) Pian nipanengneng tayoy debosyon ed Dios, kaukolan tayon ipatnag iray kualidad to diad bilay tayo. Baleg ya kagalangan so pangiyaninag ed gloria na Dios tan sarag tayon gawaen itan antokaman so kultura, aral, odino poli tayo. Akin? Lapud “say Dios et agmanangidumaduma, noagta diad balang nasyon et makapaliket ed sikato so toon ontatakot ed sikato tan manggagawa na inkatunong.”​—Gawa 10:34, 35.

3. Antoy nalilikna na saray Kristiano diad panlilingkor dad si Jehova?

³ Iyaaninag na saray alanaan ya Kristiano so gloria nen Jehova. Oniay insulat nen apostol Pablo a sakey ya alanaan: “Amin tayo et ag-asakbongan so kalupaan tayo tan iyaaninag tayon singa saray espiho so gloria nen Jehova. Legan a gagawaen tayo itan, napapasimbalo itayo met pian magmaliw itayon kaulibay to, pian lalon nipatnag tayo so gloria.” (2 Cor. 3:18) Sanen inmepas si Moises manlapud Palandey Sinai ya awi-awit toy duaran  tapyas na baton akasulatay Samploran Ganggan, sinminag so lupa to lapud akitongtong ed sikato si Jehova. (Exo. 34:29, 30) Anggano agni asali na saray Kristiano a literal ya sinminag so lupa ra, onliliwaway lupa da lapud liket sano ipapaamta rad arum so nipaakar ed si Jehova, saray kualidad to, tan say marakdakep ya gagala to parad totoo. Kanian, singa saray pinasileng ya espihon metal nensaman, iyaaninag na saray alanaan tan arum a karnero so gloria nen Jehova diad kabibilay tan ministeryo ra. (2 Cor. 4:1) Kasin iyaaninag moy gloria nen Jehova diad maabig a konduktam tan diad aktibon panlilingkor mo bilang manangipalapag na Panarian?

LABAY TAYON IYANINAG SO GLORIA NEN JEHOVA

4, 5. (a) Singa si Pablo, antoy lalabanan tayo? (b) Antoy epekto na kasalanan ed sikatayo?

⁴ Bilang lingkor nen Jehova, labalabay tayon pagalangan tan igloria so Amalsa diad amin a gagawaen tayo. Balet ta mabetbet ya agtayo nagagawaan iray labay tayon gawaen. Diad tua et ontan met so kipapasen nen Pablo. (Basaen so Roma 7:21-25.) Pian nipalinew no akin ya ontay kipapasen tayo, oniay insulat to: “Amin et nankasalanan tan agmakadampot ed gloria na Dios.” (Roma 3:23) On, akatawir tayon amin na kasalanan ed si Adan kanian aliling to et manaari ed laman tayo so kasalanan.​—Roma 5:12; 6:12.

⁵ Anto so kasalanan? Say kasalanan et antokaman ya kontrad personalidad, paraan, estandarte, tan linawa nen Jehova. Deralen na kasalanan so relasyon tayo ed Dios. Lapud kasalanan et onmimintis itayon mangiyaninag ed gloria na Dios, singa ed sakey ya pumapana ya no maminsan et agto nakenay target to. Makapankakasalanan itayo, ginagala man o andi. (Num. 15:27-31) Nikutekutep itayod kasalanan tan satan so rason no akin ya niyarawi so too ed Amalsad sikato. (Sal. 51:5; Isa. 59:2; Col. 1:21) Dakel ya totoo so agmanggagaway linawa nen Jehova kanian nasasayang day pribilehyon mangiyaninag ed gloria na Dios. On, say kasalanan so sankagrabian ya sakit a mamapairap ed totoo.

6. Panon tayon nigloria so Dios anggano makasalanan itayo?

⁶ Anggaman makasalanan itayo, si Jehova et “mangiiter na ilalo.” (Roma 15:13) Sikatoy nanggawa na paraan pian nibulos itayod kasalanan, salanti, say dondon bagat nen Jesus. No ipanengneng tayoy pananisia ed satan a bagat, aliwa itayo lan ‘aripen na kasalanan’ tan sarag tayo lan iyaninag so gloria nen Jehova. (Roma 5:19; 6:6; Juan 3:16) No mansiansia itayon matoor ed si Jehova, seguradon nagamoran tayo ray panamendisyon to natan. Tan diad arapen et ikdan to itayo na perpekto tan andi-anggaan a bilay. Talagan baleg a kagalangan so pakaamta ya parad si Jehova et sarag tayon iyaninag so gloria to anggano makasalanan itayo!

PANGIYANINAG ED GLORIA NA DIOS

7. Antoy nepeg tayon aminen ed sarili tayo pian niyaninag tayoy gloria na Dios?

⁷ Pian niyaninag tayoy gloria na Dios, nepeg tayon awaten ya makasalanan itayo. (2 Awa. 6:36) Nepeg tayon aminen ed sarili tayo a wala ray kakapuyan tayo tan pansagpotan tayon labanan iratan pian nigloria tayoy Dios. Alimbawa, no apatitan tayo la na kasalanan a singa say panagbantay na pornograpiya, nepeg tayon bidbiren ya kaukolan tayoy tulong na saray elder​—asinggeran tayo ra pian natulongan da itayo. (Sant. 5:14, 15) Saya so unonan nepeg tayon gawaen no talagan labay tayon igloria so Dios. Kaukolan tayon lanang ya usisaey sarili tayo no kasin manbibilay itayo unong ed saray estandarte nen Jehova. (Uli. 28:18; 1 Cor. 10:12) Antokaman so kakapuyan tayo, itultuloy tayon labanan iratan pian niyaninag tayoy gloria na Dios.

8. Antoy nepeg tayon gawaen anggano aliwa itayon perpekto?

 ⁸ Si Jesus labat so too ya anggad impatey to et sigpot ya amaliket tan angiyaninag ed gloria na Dios. Anggano aliwa itayon perpekto ya singa si Jesus, sarag tayon aligen so alimbawa to tan nepeg tayon pampelengan ya gawaen itan. (1 Ped. 2:21) Aliwan say iyaaligwas tayo labat so iimanoen nen Jehova noagta pati saray sagpot tayon mangigloria ed sikato, tan bendisyonan to iratan a sagpot.

9. Antoy nitulong na Biblia pian mas niyaninag na saray Kristiano so gloria na Dios?

⁹ Say Salita nen Jehova so ontulong pian natalosan tayo no panon tayon nagkalalon niyaninag so gloria na Dios. Kaukolan tayon aralen a maong so Biblia tan dalepdepen iray nababasa tayo ditan. (Sal. 1:1-3) No inagew-agew tayon babasaen so Biblia, naamtaan tayo ray pananguman ya nepeg tayon gawaen. (Basaen so Santiago 1:22-25.) Saray naaralan tayod Biblia so pundasyon na pananisia tayo tan mamabiskeg ed determinasyon tayon agmanggawa na seryoson kasalanan tan pian napaliket tayoy Jehova.​—Sal. 119:11, 47, 48.

10. Panon a makatulong so pikakasi pian napaaligwas tayoy panaglingkor tayod si Jehova?

¹⁰ Pian niyaninag tayoy gloria na Dios, kaukolan tayo met so ‘mantultuloy a manpikasi.’ (Roma 12:12) Nepeg tayon ipikasid si Jehova ya tulongan to itayon manlingkor ed sikato diad paraan a makapaliket ed sikato. Mikasi itayo parad masanton espiritu to, parad mas mabiskeg ya pananisia, parad pakpel ya labanay tukso, tan parad karunongan pian ‘dugay pangusar tayod salita na katuaan.’ (2 Tim. 2:15; Mat. 6:13; Luc. 11:13; 17:5) Singa sakey ya ugaw ya matalek ed ama to, kaukolan tayoy manmatalek ed Ama tayod tawen, si Jehova. No ipikasi tayon mas napaaligwas tayoy panaglingkor tayo, nailaloan tayoy tulong to. Agtayo komon iisipen ya disturbo labat ed si Jehova iray pikakasi tayo! Imbes, anamoten tayoy manpikasi pian idayew si Jehova, misalamat, paigiya lalo la no nasusubok, tan kerewey tulong to pian nigloria tayoy masanton ngaran to diad panaglingkor tayo.​—Sal. 86:12; Sant. 1:5-7.

11. Panon itayon natutulongan na saray aral ya niyaninag so gloria na Dios?

¹¹ Impia na Dios iray pinabpabli ton karnero ed “matoor tan makabat ya aripen.” (Mat. 24:45-47; Sal. 100:3) Labay da tayon tulongan pian niyaninag tayoy gloria nen Jehova. Panamegley na saray aral et lalon napaparakep so Kristianon inkatoo tayo, singa sano manpa-repair tayoy kawes ed dumarait pian mas marakep ya nengnengey itsura tayo. (Heb. 10:24, 25) Kanian, masakbay itayo komon ya onsabid Kingdom Hall ta no naynay tayon atrasado, napalagpas tayo ray pigaran espiritual ya ‘panag-repair’ a kaukolan tayo pian lalon ondakep so inkatoo tayo bilang lingkor nen Jehova.

ALIGEN TAYOY DIOS

12. Panon tayon naalig so Dios?

¹² Niyaninag tayoy gloria nen Jehova no sikatoy ‘aligen tayo.’ (Efe. 5:1) Say sakey a paraan a nagawaan tayo iya et no aligen tayoy panmoria to. No ipilit tayoy manbilay ya sumlang ed estandarte to, sikatoy agtayo napagalangan tan aliway pansumpalan tayo. Sayan mundo et uuleyan nen Satanas a Diablo kanian nepeg tayon panggunaetan ya busolen iray kabusol nen Jehova tan ar-aroen iray aaroen to. (Sal. 97:10; 1 Juan 5:19) Komon ta agtayon balot manduaruwa a say alenleneg tan dugan paraan na panaglingkor ed Dios et diad panggawad amin a bengatla parad kigloriaan to.​—Basaen so 1 Corinto 10:31.

13. Akin et nepeg tayon busolen so kasalanan, tan antoy kaukolan tayon gawaen no kabusol tayoy kasalanan?

¹³ Kabusol nen Jehova so kasalanan,  kanian nepeg tayon busolen met itan. On, gawaen tayoy anggaay nayarian tayon ompaliis ed panggaway aliwa tan agtayo iyan so sarili tayod alanganin a situasyon pian labat suboken no kasin agtayo napelag ed tukso. Singa bilang, kaukolan tayoy manalwar pian ag-itayo napatitan na apostasya ta siopaman a man-apostata et agla nayarin mangigloria ed Dios. (Deu. 13:6-9) Sigpot tayo sirin ya arawian iray apostata odino siopaman ya mankuan ya agi balet ta agmamapagalang ed Dios, anggano kapamilyaan tayo ni. (1 Cor. 5:11) Anggapoy nagunggona tayo no salien tayon rasonan so katunongan na saray apostata odino saramay mangikritiko ed organisasyon nen Jehova. Diad tua, napeligroy espiritualidad tayo no basaen tayo ray insulat da, balanglan diad saray artikulo da odino diad Internet.​—Basaen so Isaias 5:20; Mateo 7:6.

14. No labay tayon iyaninag so gloria na Dios, anton kualidad so nepeg tayon ipanengneng, tan akin?

¹⁴ Say sakey nin maabig ya paraan a naalig tayoy Ama tayod tawen et diad pangipanengneng tayoy aro. Nepeg ya maaro tayo singa sikato. (1 Juan 4:16-19) Diad tua, say panaaroan tayo so mamapaneknek ya papatumbok itayo nen Jesus tan lingkor itayo nen Jehova. (Juan 13:34, 35) Lapud imperpekto tayo, no maminsan et aliwan mainomay so mangipanengneng na aro, balet siansian panggunaetan tayon ipatnag itan ed amin a panaon. No bayuboan tayoy aro tan arum ni ran maridios ya kualidad, napaliisan tayoy mankasalanan tan agtayo nasakitay liknaan na arum.​—2 Ped. 1:5-7.

15. Antoy epekto na aro ed pidedeneng tayod arum?

¹⁵ Lapud aro, labay tayoy manggawa na kamaongan ed arum. (Roma 13:8-10) Alimbawa, no inaro na sanasawa so sakey tan sakey, manmatoor irad balang sakey. No inaro tayo ray elder tan igagalang tayoy responsabilidad da, ontulok tan manpasakop tayod panangiwanwan da. Saray ananak ya inaro da ray atateng da et matulok tan magalang ira, tan agda itotongtong so kakapuyan na atateng da. No inaro tayo ray kapara tayon too, aliwan abebbebay pakanengneng tayod sikara odino agmarespetoy pitotongtong tayo. (Sant. 3:9) Tan nipanengneng na saray elder ya inaro day pulok na Dios no mapangasi pidedeneng da.​—Gawa 20:28, 29.

16. Antoy nitulong na aro diad ministeryo tayo?

¹⁶ Kaukolan ya sankaimano met so kualidad ya aro diad ministeryo tayo. Lapud inar-aro tayoy Jehova, agtayo manpapaapektod panangibaliwala odino negatibon reaksion na saray pupulongan tayo. Agtayo ontutundan manpulong. Say aro met so mamakiwas ed sikatayon manparaan ya maong parad ministeryo tan panggunaetay magmaliw ya epektibon managbangat na Salitay Dios. No talagan inaro tayoy Dios tan saray kapara tayon too, agtayo isipen ya obligasyon odino pabelat so panagpulong. Imbes, ipasen tayon baleg ya pribilehyo itan tan malikeliket tayon sumpalen.​—Mat. 10:7.

ITULTULOY YA IGLORIA SI JEHOVA

17. Akin ya maabig no bidbiren tayon makasalanan itayo?

¹⁷ Ag-amta na dakel ya totoo natan ya talagan seryosoy pankasalanan ed Dios. Sikatayo balet et amta tayo, kanian kaukolan tayon labanan so tendensian mankasalanan. No bidbiren tayon makasalanan itayo, nipasal tayoy konsiensia tayo pian dugay idikta ton gawaen tayo no walay onggagapon mauges ya pilalek ed puso tan isip tayo. (Roma 7:22, 23) Tua, wala ray kakapuyan tayo balet ta pabiskegen itayo na Dios pian duga so ikiwas tayo ed antokaman a situasyon.​—2 Cor. 12:10.

18, 19. (a) Antoy ontutulong ed sikatayon nalabanan iray mauges ya espiritu? (b) Antoy determinado tayon gawaen?

¹⁸ Pian nigloria tayoy Jehova, nepeg tayo  met a labanan iray mauges ya espiritu. Manalo itayod sayan laban no isulong tayoy kompleton armas ya inter na Dios. (Efe. 6:11-13) Gagawaen nen Satanas so anggaay nayarian to pian samsamen so glorian para labat ed si Jehova. Papasyaen met na Diablo ya deralen so relasyon tayod si Jehova. Balet nabai-baingay Satanas no sikatayo ran minilyon ya lingkor na Dios​—lalaki, bibii, tan ugugaw—​et mansiansian matoor tan mangigloriad sikato anggano imperpekto tayo! On, itultuloy tayo sirin ya idayew si Jehova singa saramay pinalsa tod tawen ya angikelyaw: “Sika so makanepegan, Jehova a Dios mi, a mangawat na gloria tan galang tan pakayari, lapud sika so amalsa ed amin a bengatla, tan lapud linawam et niwala tan apalsa iratan.”​—Apo. 4:11.

¹⁹ Komon ta determinado tayon itultuloy ya igloriay Jehova, anggan antoy nagawa. Seguradon sikatoy malikeliket lapud nanenengneng ton panggugunaetan na dakerakel ya matoor a lingkor to ya aligey kualidad to tan iyaninag so gloria to. (Uli. 27:11) Komon ta say liknaan tayo et singa si David ya angikanta: “Idadayew ta ka, O Jehova a Dios, ed interon pusok, tan igalang koy ngaran mo ya anggad angga.” (Sal. 86:12, NW) Pitalaran tayoy panaon sano sigpot tayo lan niyaninag so gloria nen Jehova tan sikatoy nidayew tayod andi-angga! Satan so malikeliket ya naeksperiensya na saray matulok ed sikato. Kasin iyaaninag yo la natan so gloria nen Jehova a Dios, tan iilaloan yon gawaen itan anggad angga?

[Tepetepet Parad Panagaral]

[Saray litrato ed pahina 27]

Kasin iyaaninag moy gloria nen Jehova diad sarayan paraan?