1, 2. Anto ran problema so naeeksperiensya na totoo, balet antoy labay a gawaen na saray lingkor na Dios?

MANBIBILAY itayod panaon a dakel so problema. Dakel lan kalamidad so agawad mundo. Wadtan so yegyeg, tsunami, pool, delap, isabog na bolkan, alimbusabos, tan bagyo a sengegay kairapan na totoo. Ontan met ed saray problema ed pamilya tan personal a kapagaan ya mamapaermen tan mangogonigon ed sikatayo. Tan amin tayo et apektado na “panaon tan ag-iilaloan a nagawa.”​—Ecl. 9:11, NW.

² Saray totoo na Dios et tuloytuloy a manlilingkor ed sikato anggan diad mairap iran situasyon. Anggaman ontan, labay tayon naynay ya akaparaan ed antokaman a kairapan a naeksperiensya tayod arapen legan a manasingger so anggaan na sayan sistema. Panon tayon natalonaan irayan problema? Antoy ontulong ed sikatayon natalonaan iray kairapan tekep na inkakpel?

3. Unong ed Roma 15:4, antoy ontulong ed sikatayo no walaan itayo na seryoson problema?

³ Anggaman mas dakel a totoo natan so naapektoan na saray kairapan, agtayo la itan a pankelawan. Pantongtongan tayo no antoy naaralan tayod saray lingkor na Dios nensaman ya akatalonad saratan a kairapan tekep na inkakpel.​—Roma 15:4.

4. Anto ran mairap a situasyon so tinalonaan nen David, tan siopay tinmulong ed sikato?

⁴ Pantongtongan tayoy nipaakar ed si David. Dakel a situasyon so kaukolan ton talonaan, singa say planon pamatey ed sikato na sakey ya ari, inyataki na saray kalaban, impangalad saray asawa to, say impantraidor na kakaaro tan mismon pamilya to, tan say graben ermen. (1 Sam. 18:8, 9; 30:1-5; 2 Sam. 17:1-3; 24:15, 17; Sal.  38:4-8) Ipapatnag na saray rekord na Biblia nipaakar ed impanbilay nen David no panon kasakit itan ed sikato. Balet ag-iratan amakapuy na espiritualidad to. Oniay imbaga nen David: “Si Jehova sikato so biskeg na bilay ko. Siopa ni antakot ko?”​—Sal. 27:1; basaen so Salmo 27:5, 10.

5. Antoy akatulong ed si Abraham tan Sara a nasarag so kairapay bilay?

⁵ Inusar nen Abraham tan Sara so intero lawarin bilay da bilang sangkaili ed sananey a bansa. Aliwan mainomay so impanbilay da. Ingen, makpel dan inarap so eras tan peligro diad kakaabay dan bansa. (Gen. 12:10; 14:14-16) Panon dan agawaan iya? Ibabagad sikatayo na Biblia a si Abraham et “aalagaren to so syudad a walaan na saray tuan pundasyon, a say mangipaalagey tan manggawa ed satan et say Dios.” (Heb. 11:8-10) Pinansiansia dan akasentroy imano dad arapen, tan agda inabuloyan so kairapan a mamaermen ed sikara.

6. Panon tayon naalig si Job?

⁶ Naeksperiensya nen Job iray graben panamasegsegang. Imadyin mo pay alikna to sanen puro mauges so nagagawad bilay to. (Job 3:3, 11) Lalo la ta agto amtay rason no akin a nagagawa iraman ed sikato. Ingen, agton balot sinmuko. Pinansiansia toy katooran tan pananisia tod Dios. (Basaen so Job 27:5.) Talagan sikatoy maabig ya ehemplo ed sikatayo!

7. Anto ray naeksperiensya nen Pablo legan a manlilingkor ed Dios, balet antoy akatulong ed sikaton makpel a makapantultuloy?

⁷ Nengnengen tayo met so ehemplo nen apostol Pablo. Naeksperiensya toy ‘kapeligroan ed syudad, kalawakan, tan diad dayat.’ Abitla to met so nipaakar ed ‘pakakaerasan tan pakakapgaan, betel tan inkalakseban.’ Ontan met ed ‘sanlabi tan sanagew ed pegley na dayat,’ nayarin lapud aminpigan nakneb iray barkon niluganan to. (2 Cor. 11:23-27) Anggaman walad peligroy bilay to, pinansiansia toy maabig ya ugali. Anggan sanen sikatoy inatey la lawari, oniay inkuan to: “Pian makapanmatalek kami ed Dios a mamapaoli ed saray inaatey, aliwan diad sikamin dili. Diad ontan kabaleg a bengatla a singa say ipapatey et inliktar to kami tan iliktar to kami.” (2 Cor. 1:8-10) Pigpigara labat iray totoon akaeksperiensya ed asagmak nen Pablo. Balet, natatalosan na dakel ed sikatayo so liknaan to tan napapaseseg tayod inkakpel to.

8. Panon itayon naaapektoan na saray problema? Iyilustra.

⁸ Diad sayan mundon napnoy kalamidad, problema, tan desdes, dakel iray totoon onsusuko la. Nalilikna iya na anggan saray Kristiano. Si Lani * et malikeliket a manlilingkor bilang payunir ed Australia a kaibay asawa to. Balet, naamtaan ton walay breast cancer to. Talagan makapabigla itan a balita. Imbaga ton, “Kinmapuy ak a maong legan na pampapatambal ko, tan aliknak ya anggapo lay kakanaan ko.” Likud nid satan, kaukolan to nin asikasoen so asawa ton nanpa-spinal surgery. No ontan so situasyon mo, anto kasi gawaen mo?

9, 10. (a) Antoy agtayo aabuloyan a gawaen nen Satanas? (b) Panon a makatulong ed sikatayo so Gawa 14:22 pian nasarag iray kairapan?

⁹ Nepeg tayon tandaan a labay nen Satanas a pakapuyey pananisia tayo panamegley na saray kairapan. Balet agtayo aabuloyan ya ontan so gawaen to. Oniay inkuan na Proverbio 24:10, NW: “Kasin onkakapuy so liknaan mo diad panaon na gonigon? Say pakayarim et onkulang.” Say pandalepdep ed saray ehemplo ed Biblia a singa apantongtongan tayo la so ontulong ed sikatayon nawalaay inkakpel diad pangarap ed saray problema.

¹⁰ Makatulong met no nonoten tayon agtayo  naekal so amin a problema. Ilaloan tayon naeksperiensya tayo iratan. (2 Tim. 3:12) Oniay ibabagad sikatayo na Gawa 14:22: “Nepeg itayon ondalan ed dakel ya irap pian makaloob itayo ed panarian na Dios.” Imbes a nadismaya, ipasen irayan oportunidad pian nipanengneng moy panagmatalek ed pakayari na Dios ya ontulong ed sika.

11. Antoy ontulong ed sikatayon ag-onsuko ed saray problema?

¹¹ Kaukolan tayon isentroy imano tayod saray positibon bengatla. Ibabaga na Salita na Dios: “Say magayaga a puso paligsaen to so lupa; balet lapu ed ermen na puso say espiritu nabuyak.” (Uli. 15:13) Abayag lan bibidbiren na saray medical researcher so maabig ya epektod bunigas na pannonot na saray positibon bengatla. Singa bilang, dakel a pasyente a papainumen na sugar pills (placebos) et onaabig lapud manisia ran natatambal ira. Balet, no nonoten na pasyentin say iinumen ton tambal et mangiiter na kaaruman a problema (nocebo effect) mas ongrabe situasyon to. Say mabetbet a pannonot ed saray bengatlan agtayo nauman et mamakapuy labat ed sikatayo. Balet, misalsalamat tayo ta si Jehova et agmangiiter na “sugar pills.” Imbes, no wala ray problema tayo, iikdan to itayo na peteg a panamaseseg panamegley na Biblia, suporta na saray agagi, tan biskeg panamegley na masanton espiritu. Say pannonot ed sarayan bengatla so mamabiskeg ed sikatayo. Imbes ya nonoten iray negatibon bengatla, manggawa kay praktikal a solusyon pian natalonaan moy kada problema tan manpokus kad positibon aspekto na bilay mo.​—Uli. 17:22.

12, 13. (a) Antoy akatulong ed saray lingkor na Dios a nasungdoan iray epekto na kalamidad? Iyilustra. (b) Panon a saray kalamidad et ontulong ed sikatayon namoria no antoy sankaimportantian ed bilay?

¹² Diad agano ni labat iran taon, pigaran bansa so akaeksperiensya na graben kalamidad. Makaaral tayod impansungdo na saray agagi, anggaman aliwan mainomay itan. Nen 2010, maksil a yegyeg tan tsunami so aneral ed dakel ya abung, kaykayarian, tan anapan na saray agagi ed Chile. Anggaman ed ontan iran agawa, nantultuloy iran inmaligwas ed espiritual. Oniay inkuan nen Samuel a naandiay abung: “Anggaman ed sarayan mairap a situasyon, agmin balot pinaulyan nen asawak so pipiaral tan panagpulong. Lapud sayan ginawa mi, agkami nagmaliw a desperado.” Kaiba iray arum nin agagi, agda inabuloyan a pakapuyen ira na saray kalamidad, imbes nantultuloy irad maseseg a panaglingkor dad si Jehova.

¹³ Nen Setyembre 2009, masulok ya 80 porsiento na lugar ed Manila so adelap lapud maksil ya uran. Oniay imbaga na sakey a mayaman a dakel so aderal a kagawaan to: “Impamoria na delap a say too et pare-pareho diad impangiter toy problema tan kairapan ed saray mairap tan mayaman.” Ipapanonot na saya ed sikatayo imay makabat a simbawa nen Jesus: “Mantipon kayo na saray kayamanan ed tawen, ya anggapo iray bokbok tan lati a manderal, tan anggapo iray matakew ya onloob tan mantakew.” (Mat. 6:20) Say pangisentro na imano tayod saray materyal a bengatlan magangganon nabalang et seguradon pakadismayaan tayo. Talagan mas makabat sirin no iyuna tayod bilay tayoy pamaelet na relasyon ed si Jehova ya agbalot mamaulyan ed sikatayo!​—Basaen so Hebreos 13:5, 6.

14. Akin a makapanpakpel tayo?

¹⁴ Imbaga nen Jesus a legan na kiwawala to et wala ray problema, balet inkuan to: “Agkayo nakekebbiew.” (Luc. 21:9) Sigpot tayon makapanmatalek a say Ari  tan Amalsa na uniberso so ontulong ed sikatayon makapanpakpel. Oniay impaseseg nen Pablo ed si Timoteo: “Say espiritu na Dios et agto itayo pagmaliwen a matakot, noagta mamawala itan ed sikatayo na pakayari tan aro tan limpion kanonotan.”​—2 Tim. 1:7.

15. Anto ray imbaga na pigaran lingkor na Dios nipaakar ed panagmatalek dad si Jehova, tan panon tayo ran naalig?

¹⁵ Oniay imbaga na pigarad saray lingkor na Dios a walaan na mabiskeg a panagmatalek ed sikato. Inkuan nen David: “Si Jehova sikato so biskeg ko tan kinlong ko. Say pusok nanmatalek ed sikato et atulongan ak kanian saray pusok manggayaga a tuloy.” (Sal. 28:7) Impatnag nen Pablo so mabiskeg a panagmatalek to diad impangibagan: “Diad amin na sarayan bengatla et sigpot itayon manalo diad panamegley to ya angaro ed sikatayo.” (Roma 8:37) Ontan met, sanen asingger lan erelen tan pateyen si Jesus, pinaneknekan tod saray papatumbok to a walay malet a relasyon tod Dios sanen inkuan ton: “Agak manbukbukor, lapud kaibak so Ama.” (Juan 16:32) Antoy papaneknekan na sarayan balikas? Ipapatnag na saraya so mabiskeg a panagmatalek dad si Jehova. No sigpot itayo met a manmatalek ed si Jehova, nawalaan tayoy pakpel a makatulong ed sikatayo diad mairap iran situasyon.​—Basaen so Salmo 46:1-3.

16. Akin ya importante so panagaral ed Salita na Dios?

¹⁶ Say inkakpel et aliwan panagmatalek ed sarili. Imbes, satan so resulta na impikabat tayod Dios tan panagmatalek tayod sikato. Nagawaan tayo iya diad panaral na Salita to, say Biblia. Oniay imbaga na sakey a sister a walaan na depression: “Uulit-uliten kon babasaen iray makaligliwan teksto.” Kasin walaan tayo lay regular a panagdayew na pamilya? No gagawaen tayo iraya, natulongan itayon nawalaay ugalin singa say salmista ya angikuan: “O agayla so panangarok ed ganggan mo! Sikato so dalepdep ko ed amin ya agew.”​—Sal. 119:97.

17. (a) Antoy makatulong ed sikatayon napansiansiay positibon panmoria? (b) Mangiter na alimbawa na istoryay bilay ed publikasyon tayo ya akatulong ed sika.

¹⁷ Walaan tayo met na saray base ed Biblia iran publikasyon a mamabiskeg na panagmatalek tayod si Jehova. Akatulong ed dakel ya agagi iray istorya na bilay a walad saray magasin tayo. Apaseseg so sakey a sister diad Asia a walaan na bipolar mood disorder sanen abasa toy istoryay bilay na sakey a datin misioneron brother ya akatalonad satan a sakit. Inkuan to: “Tinmulong iyad siak a natalosay problemak tan angiter iyad siak na ilalo.”

18. Akin et kaukolan tayoy manpikasin naynay?

 ¹⁸ Say pikakasi et makatulong met ed sikatayo. Ontulong iyad sikatayo diad amin a situasyon. Indanet nen apostol Pablo so kaimportantian na sayan tulong sanen imbaga ton: “Agyo pampapagaan so antokaman, noagta diad amin a bengatla et ipaamta yo ed Dios iray kerew yo diad panamegley na pikakasi tan masimoon a pikekerew tekep na pisasalamat; tan say deen na Dios a palumbasan toy amin a kanonotan so manbantay ed saray puso tan nonot yo diad panamegley nen Kristo Jesus.” (Fil. 4:6, 7) Kasin manpipikasi tayon naynay parad tulong pian natalonaan iray mairap a situasyon? Oniay inkuan nen Alex, sakey a brother diad Britain a walaan na depression: “Say pitongtong ed si Jehova diad pikakasi tan idengel ed sikato diad pambasay Salita to et talagan tinmulong ed siak.”

19. Antoy nepeg tayon panmoria ed saray Kristianon pantitipon?

¹⁹ Sakey nin makatulong et say pilimog ed saray agagi diad saray miting. Oniay insulat na salmista: “Makapkapuy ak la ed pampipilalek kon makakar ed templo nen Jehova.” (Sal. 84:2, NW) Kasin ontan met so naliliknam? Si Lani ya abitla nen niman so angibagad panmoria tod saray miting: “Aliwan opsyonal so pipiaral. Kaukolan koy onatendi no labay kon tulongan ak nen Jehova.”

20. Panon a makatulong so pibibiang tayod panagpulong a kimey?

²⁰ Napaseseg tayo met diad pansiansian aktibo ed panagpulong a kimey. (1 Tim. 4:16) Oniay imbaga na sakey a sister ed Australia ya awalaan na dakel a problema: “Agkon talaga labay so manpulong, balet intagar ak na sakey ya elder a milad sikato. Akila ak. Aliknak ya tutulongan ak nen Jehova ta kada manpupulong ak, malikeliket ak.” (Uli. 16:20) Amoria na dakel ya no tulongan day arum a pabiskegey pananisia rad si Jehova, napapabiskeg met so mismon pananisia ra. Kanian, nalilingwanan day problema da tan akasentroy imano rad mas importante iran bengatla.​—Fil. 1:10, 11.

21. Anggaman walaan itayo na saray problema, antoy nasegurado tayo?

²¹ Dakel a tulong so itatarya nen Jehova pian natalonaan tayo iray kairapan tekep na inkakpel. Diad pangawat ed sarayan tulong, pandalepdep tan pangalig ed saray maabig ya alimbawa na saray makpel a lingkor na Dios, seguradon natalonaan tayo iray kairapan. Anggano dakel ni ray probleman nayarin naeksperiensya tayo legan a manasingger so anggaan na sayan sistema, nalikna tayoy alikna nen Pablo ya angibagan: “Natutumba kami, balet agkami nadederal. . . . Kanian ag-itayo ontutunda.” (2 Cor. 4:9, 16) Diad tulong nen Jehova, natalonaan tayoy amin a problema tekep na inkakpel.​—Basaen so 2 Corinto 4:17, 18.