1, 2. Anton tudtuan guerra so onsasabi, tan antoy aggawaen na saray lingkor na Dios?

NEN Oktubre 30, 1938, ondedengel ed sakey a popular a drama ed radyo so minilyon a totoo ed Estados Unidos. Say drama ed saman ya labi et inalad nobelan science fiction ya The War of the Worlds. Say eksena et ibabalita na saray reporter ya onlulusob iray mabisbiskeg ya alien a nanlapud Mars tan deralen day planetan Dalin. Anggano niyanunsio la ya drama labat itan, say abaloan na totoo et tudtua so pangaataki, kanian ataktakot ira. Wala ni ra ingey nanggawa na paraan pian naprotektaan ira kunod saray alien.

² Diad panaon tayo, walay onsasabin tudtuan guerra. Balet, ibabaliwala itan na totoo. Sayan guerra et aliwan science fiction, noagta nipropesiya ed pinuyanan a Salita na Dios, say Biblia. Tatawagen itan ya Armagedon, say pilaban na Dios ed mauges a sistema na mundo. (Apo. 16:14-16) Ditan et agmilaban ed alien iray lingkor nen Jehova diad dalin. Balet, siansia nin nakebbiew irad makapataktakot tan makapadinayew ya pangusar nen Jehova ed pakapanyari to.

3. Anton propesiya so aralen tayo, tan akin ya importante itan ed sikatayo?

³ Say propesiya ed Biblia ya walad kapitulo 14 na Zacarias et ontutukoy ed Armagedon. Anggaman nisulat itan 2,500 taon lay apalabas, importante itan ed sikatayo natan. (Roma 15:4) Dakel ed saray abitla ditan so nipaakar ed saray agawad totoo na Dios manlapu nen nanuley si Kristo nen 1914 tan ed saray  makapakelkelaw ya ebenton asingsingger lan nagawa. Kaibad saray importantin propesiya so nipaakar ed “maawang a lawak” tan say iyagus na ‘mabilay a danum.’ (Zac. 14:4, 8) Diad sayan artikulo, naaralan tayo no anto iyan lawak tan no panon a naprotektaan iray mandadayew ed si Jehova. Naaralan tayo met no anto so mabilay a danum tan no antoy nagunggona tayod satan. Diad ontan, agti labat nakombinsin inumen itan noagta pampilalekan tayo met ya inumen itan. Kanian, imanoen tayon maong iyan propesiya.—2 Ped. 1:19, 20.

4. (a) Kapigan ginmapo so “agew nen Jehova”? (b) Antoy inyabawag na saray lingkor nen Jehova antis na 1914, tan antoy reaksion na saray lider ed mundo?

⁴ Oniay gapo na kapitulo 14 na Zacarias: “Sakey ya agew nen Jehova so onsabi.” (Basaen so Zacarias 14:1, 2.) Anto itan ya agew? Say “agew na Katawan” ya ginmapo sanen “say panarian na mundo” et nagmaliw a “panarian na Katawan tayo tan say Kristo to.” (Apo. 1:10; 11:15) Ginmapo itan nen 1914 sanen niletneg ed tawen so Mesianikon Panarian. Pigaran taon antis na 1914, inyabawag na saray lingkor nen Jehova ed saray nasyon ya say anggaan na “aturon panaon na saray nasyon” et onsabid satan ya taon tan nagulo so interon mundo. (Luc. 21:24) Antoy reaksion na saray nasyon? Imbes ya imanoen da itan ya pasakbay, binalaw tan pinairap na saray lider na relihyon tan politika iray alanaan ya maseseg a manpupulong. Singa da minudmora so mismon Makapanyarin-amin a Dios lapud irerepresenta na saray alanaan so Mesianikon Panarian, say “mangatatawen a Jerusalem.”—Heb. 12:22, 28.

5, 6. (a) Antoy nipropesiya ya gawaen na saray nasyon ed “syudad” tan ed saray “mibabaley” to? (b) Siopa ray “kera ed saray totoo”?

⁵ Impasakbay nen Zacarias no antoy gawaen na saray nasyon: “Say syudad [Jerusalem] naala.” Satan ya “syudad” et say Mesianikon Panarian na Dios. Tan diad dalin et irerepresenta itan na saray “mibabaley” to, saray nakekeraan ya alanaan. (Fil. 3:20) Nen Sankamundoan a Guerra I, saray mangidadaulo ed organisasyon nen Jehova diad dalin et ‘inala’ odino inaresto tan impriso ed Atlanta, Georgia, U.S.A. Nibagan ‘tinakewan so kaabungan’ da lapud agmakatunongan ya impamairap ed sikara tan ed arum ni ran matoor ya agagi. Insebel iray literatura tayo tan pinatunday panagpulong.

⁶ Anggano pinauges, sinumpa, tan pinairap iray dagdaiset a totoo na Dios, agbalot apatunda na saray sumusumpa so dugan panagdayew. Wala ray “kera ed saray totoo,” salanti, saray matoor ya alanaan ya ag-inmabuloy a “napegpeg a manlapu ed syudad.”

7. Antoy maabig ya alimbawa na saray alanaan?

⁷ Kasin sigpot ya asumpal iyan propesiya kayari Sankamundoan a Guerra I? Andi. Agni tinundaan na saray nasyon ya atakien iray alanaan tan saray matoor a kakaiba ran say ilalo ra et manbilay diad dalin. (Apo. 12:17) Apaneknekan itan nen Sankamundoan a Guerra II. Say impanmatoor na saraman ya alanaan a Tasi so mamapaseseg ed sikatayo ran lingkor na Dios natan pian nasarag tayoy antokaman a subok, kaiba lay isusumpa na saray aliwan Tasin kakanayon, katrabaho, odino  kaeskuela ya mamabalaw ed pananisia tayo. (1 Ped. 1:6, 7) Inerman so kawalaan tayo, determinado itayon ‘ontalindeg ed sakey ya espiritu’ tan ‘agbalot natatakot ed saray kalaban.’ (Fil. 1:27, 28) Balet, iner so pakaromogan tayoy salimbeng diad sayan mundon mamubusol ed sikatayo?—Juan 15:17-19.

8. (a) Diad Biblia, antoy nayarin isisimbolo na saray palandey? (b) Antoy irerepresenta na “palandey na saray Olibo”?

⁸ Singa nibaga la, say “syudad” ya Jerusalem et isisimbolo toy Panarian na Dios. Anto sirin so isisimbolo na “palandey na saray Olibo, a wala ed arap na Jerusalem”? Panon itan ya “napisag naani ed pegley” tan magmaliw ya duaran palandey? Akin et tinukoy itan nen Jehova ya “saray palandey ko”? (Basaen so Zacarias 14:3-5.) Diad Biblia, saray palandey et nayarin ontukoy ed panarian odino gobierno. Ibabaga met na Biblia ya saray bendisyon tan proteksion et manlalapud palandey na Dios. (Sal. 72:3; Isa. 25:6, 7) Kanian say palandey na saray olibo et irerepresenta toy uley nen Jehova ed interon uniberso.

9. Antoy kabaliksan na samay propesiyan “napisag” so palandey na saray olibo?

⁹ Antoy kabaliksan na samay propesiyan “napisag” so palandey na saray olibo? Say palandey ya walad bukig na Jerusalem et napisag lapud mangiletneg si Jehova na sananey ya pananguley. Sayan onkokomaduan pananguley et say Mesianikon Panarian ya uleyan nen Jesu-Kristo. Tinukoy nen Jehova so apisag ya “palandey na saray Olibo” bilang “saray palandey ko” lapud gawa to iratan ya dua.—Zac. 14:4.

10. Antoy irerepresenta na “maawang a lawak” diad baetan na duaran palandey?

¹⁰ Sanen apisag so simbolikon palandey—say kapaldua et diad amianen tan say sakey et diad abalaten—nansiansian akaalagey si Jehova ed saratan ya palandey. Diad baetan na saray sali nen Jehova et niwalay “maawang a lawak.” Sayan lawak et irerepresenta toy proteksion nen Jehova ed saray lingkor to pian nasalimbengan ira panamegley na pananguley to tan na Mesianikon Panarian na Anak to. Seguroen nen Jehova ya agbalot naandi so dugan panagdayew. Kapigan apaldua so palandey olibo? Agawa iya sanen niletneg so Mesianikon Panarian nen 1914 kayari Panaon na Saray Gentil. Kapigan ‘binmatik’ ed simbolikon lawak iray lingkor nen Jehova?

11, 12. (a) Kapigan ginmapo so imbatik ed simbolikon lawak? (b) Antoy paneknek ya proprotektaan nen Jehova iray lingkor to?

¹¹ Oniay impasakbay nen Jesus ed saray patumbok to: “Magmaliw kayon puntirya na panagbusol na amin a nasyon nisengeg ed ngaran ko.” (Mat. 24:9) Satan ya panagbusol et mas linmoor manlapu la nen ginmapo so kaunoran iran agew nen 1914. Anggano pirmi impangataki ed saray alanaan nen Sankamundoan a Guerra I, ag-ira naupot. Nen 1919, akablos irad panangontrol na Makapanyarin Babilonia, say sankamundoan ya empiryo na palson relihyon. (Apo. 11:11, 12) * Diad satan ya taon ira ginmapon binmatik ed lawak na saray palandey nen Jehova.

 ¹² Manlapu la nen 1919, proprotektaan nen Jehova iray mandadayew ed sikato ed interon mundo. Diad inlabas na saray taon, sinali na dakel a gobierno ya patundaen so panagpulong na Saray Tasi nen Jehova tan isebel iray literatura da. Diad arum iran bansa et siansia nin nagagawa itan. Balet anggan antoy gawaen na saray kalaban, agdan balot napugeran so dugan panagdayew! Uusaren nen Jehova so pakapanyari to pian protektaan iray lingkor to.—Deu. 11:2.

13. Panon itayon makapansiansia ed lawak nen Jehova tan akin ya mas importante natan so panggawa ed satan?

¹³ No manmatoor tayod si Jehova, makapansiansia itayo ed lawak to tan nasalimbengan. Agbalot abuloyan nen Jehova tan Jesu-Kristo ya walay siopaman o antokaman ya ‘manamsam ed sikatayo.’ (Juan 10:28, 29) Akaparaan si Jehova ya ontulong pian sikatoy natulok tayo bilang say Soberano ed Uniberso tan makapanmatoor tayo bilang sakop na Mesianikon Panarian. Importantin mansiansia itayo ed lawak nen Jehova, lapud lalon kakkaukolan tayo itan diad asingsingger lan baleg ya irap.

14, 15. Diad ‘agew na pibakal’ na Dios, antoy kipapasen na saray walad paway na lawak?

¹⁴ Legan a manasingger so anggaan na sayan sistema na mundo, lalon pasyaen nen Satanas so pangataki tod saray lingkor nen Jehova. Insan la onsabi so ‘agew na pibakal’ na Dios ed saray kabusol to. Seguroen nen Jehova ya natalo si Satanas tan aglan balot makaataki. Diad satan ya agew, ipanengneng na Soberano ed uniberso so kamaong ton mibakal, ya mas ni nen saray apalabas ya impibakal to.—Zac. 14:3.

¹⁵ Diad agew na pibakal nen Jehova, antoy kipapasen na saray walad paway na “maawang a lawak” a salimbengan? “Anggapo naani liwawa” odino panangabobon to ya onsinag sikara. Diad satan ya agew, ‘saray kabayo, mula, kamelyo, asno, tan saray amin ya ayep’ ya mangisisimbolo ed saray uusaren ed guerra et “onandi.” Anggapo lay kana ra. Usaren met nen Jehova so “bakbak” odino salot. Balanglan simboliko itan odino andi, “saray mata ra . . . tan say dila ra naupot naani” kanian bulag iran onataki tan agla ra makapansalitay mauges sumpad Dios. (Zac. 14:6, 7, 12, 15) Anggan iner so kawalaan da, agda nibatikay kadederal. Dakel so ondapag ed si Satanas diad satan ya guerra. (Apo. 19:19-21) “Saray pinatey nen Jehova sikara naani ed satan ya agew manlapu ed sakey a sampot na dalin angga met lanlamang ed sananey a sampot na dalin.”—Jer. 25:32, 33.

16. Lapud onsasabi lay agew na pibakal na Dios, anto ray nepeg tayon itepet ed sarili tayo, tan antoy gawaen tayo?

¹⁶ Kada no walay guerra, apektado so amin, anggan saramay analo. Nayarin manresulta itan ed eras, pakaderal na kaykayarian, tan onirap so bilay. Posiblin napegetan itayo met. No nagawa iratan, antoy reaksion tayo? Kasin nataktakot tayo? Kasin ibeneg tayo lay pananisia tayo lapud desdes? Kasin naandian tayoy ilalo tan nadepress tayo? Legan na baleg ya irap, kaukolan tayoy manmatalek ed pakayari nen Jehova a mangilaban tan mansiansia ed lawak to pian nasalimbengan!—Basaen so Habacuc 3:17, 18.

17, 18. (a) Anto so ‘mabilay a danum’? (b) Antoy irerepresenta na “dayat ed bukig” tan “dayat ed sagur”? (c) Antoy determinadom a gawaen?

¹⁷ Kayari Armagedon, tuloytuloy ya onagus so ‘mabilay a danum’ ya manlalapud Mesianikon Panarian. Say ‘mabilay a danum’et ontutukoy ed andi-anggaan a bilay ya itatarya nen Jehova. Say “dayat ed bukig” et ontutukoy ed Dead Sea ya mangisisimbolo ed totoon inaatey. Say “dayat ed sagur” et say Mediterranean Sea, tan irerepresenta toy “baleg ya ulop” a makaliktar ya mabilay ed Armagedon. (Basaen so Zacarias 14:8, 9; Apo. 7:9-15) Sikaray oninum na mabilay a danum ed “ilog na danum na bilay,” kanian magmaliw iran perpekto tan manbilay ya andi-angga.—Apo. 22:1, 2.

¹⁸ Sano deralen nen Jehova iyan mauges a sistema nen Satanas, salimbengan To itayo anggad makasabi tayo ed matunong a balon mundo To. Kanian anggano bubusolen itayo na amin a nasyon, determinado itayo komon ya manmatoor ed Panarian nen Jehova tan mansiansia ed lawak to pian nasalimbengan.