1, 2. Antoy panmoria na saray lingkor na Dios ed sayan mundo, tan akin ya nibagan walay ayaman da?

 KASIN komportable kad sayan mundo? No andi, agmo bukbukor ta ontan met so liknaan na saray peteg a mangaaro ed si Jehova. Manlapu la nensaman, ipapasen dan sikaray sangkaili ed sayan mundo. Singa bilang, sanen onaalis-alis ed Canaan iray matoor ya lingkor na Dios, “inyabawag da a sikaray sangkaili tan miaayam labat.”—Heb. 11:13.

² Ontan met so panmoria na saray alanaan a papatumbok nen Kristo ya say “kanepegan [da] bilang mibabaley et walad tawen.” Ipapasen dan sikaray “sangkaili tan miaayam ed sayan mundo.” (Fil. 3:20; 1 Ped. 2:11) Saray ‘arum a karnero’ nen Kristo et ‘agmet kabiangan na mundo, a singa si Jesus ya agkabiangan na mundo.’ (Juan 10:16; 17:16) Balet agto labay ya ibagan anggapoy “ayaman” na saray lingkor na Dios. Diad tua, panliliketan tayoy proteksion ya itatarya na maas-asikaso tan maar-aron ayaman tayo. Aliwa iyan literal ya ayaman. Insulat nen Moises: “O Jehova, nagmaliw kan ayaman mi diad amin a henerasyon.” * (Sal. 90:1, NW) Akin ya nibagan si Jehova so peteg ya “ayaman” na saray matoor a lingkor to nensaman, natan, tan diad arapen?

3. Antoy angikomparaan ed si Jehova diad Salmo 90:1, tan akin?

³ Singa saray dakel ya ilustrasyon ed Biblia, say Salmo 90:1 et walaan na tema, angikomparaan, tan piparaan. Say tema et si Jehova. Say angikomparaan ed sikato et ayaman, odino abung. Dakel so piparaan  nen Jehova ed ayaman. Alimbawa, proprotektaan to ray lingkor to. Mikonektaan iya ed samay ibabaga na Biblia a say Dios et aro. (1 Juan 4:8) Sakey ni, sikatoy Dios na kareenan tan seseguroen ton ‘manayam ya andi kaatapan’ iray matoor ed sikato. (Sal. 4:8) Singa bilang, nengnengen tayo no panon a si Jehova et nagmaliw ya ayaman di Abraham, Isaac, tan Jacob.

4, 5. Panon ya pinaneknekan na Dios a sikatoy peteg ya “ayaman” parad si Abraham?

⁴ Mankelaw angankoy Abraham sanen inkuan nen Jehova: “Paway ka dia ed dalin mo, tan onarawi ka ed saray kakanayon mo, . . . ta onla ka ya angga ed sakey a dalin ya iturok ed sika.” No bilang ta apagaan si Abraham, seguradon aligliwa ed sayay sinmublay ya imbaga nen Jehova: “Dia ed sika so panggawaan ko na sakey a baleg a nasyon, tan papalaren ta ka, tan gawaen so ngaran mo ya abalbaleg . . . Bendisyonan ko naani so saray manpilalek na kapalaran mo, tan isambak so mangisamba ed sika.”—Gen. 12:1-3.

⁵ Insipan nen Jehova ya bendisyonan tan protektaan toy Abraham tan saray ilalak to. (Gen. 26:1-6) Tinoor to itan. Singa bilang, agto inabuloyan so Faraon na Ehipto tan Ari na Gerar ya si Abimelec ya napatey si Abraham tan naasaway Sara. Prinotektaan met nen Jehova si Isaac tan Rebeca sanen agawa itan ed sikara. (Gen. 12:14-20; 20:1-14; 26:6-11) Oniay nabasa tayo: “Anggapo so too ya inabuloyan [nen Jehova] a nanggawa ed sikara na aliwaliwa; on, sikato angekal na arari nisengeg ed sikara, A kuan to, Agyo diwiten so saray pinuyokan ko, tan agkayo manggawa na duksa ed saray propetas ko.”—Sal. 105:14, 15.

6. Antoy imbilin nen Isaac ed si Jacob, tan antoy nayarin naisip nen Jacob?

⁶ Kaibad saraman ya propeta so apo nen Abraham ya si Jacob. Nen asabi panaon ya mangasaway Jacob, oniay bilin nen ama ton Isaac: “Agka mangaasawa naani manlapu ed saray bibii ya anak na Canaan. Alagey ka ta onla ka ed Padan-aram ed abung nen Betuel, ya ama nen inam; et mangasawa ka’d man na manlapu ed saray bibii ya anak nen Laban.” (Gen. 28:1, 2) Tinulok nen Jacob si Isaac. Tinaynan toy pamilya tod Canaan tan nambiahen bukor na nilasus ya kilometro paonlad Haran. (Gen. 28:10) Nayarin naisip to: ‘Anggad kapigan ak kasi diman? Patuloyen ak kasi nen pangamaen ko tan ikdan to ak na matakot ed Dios ya asawa?’ No bilang ta apagaan si Jacob, seguradon naandi itan kasabi tod Luz, manga 100 kilometro manlapud Beer-sheba. Akin kasi?

7. Diad sakey ya kugip, panon ya pinabiskeg na Dios si Jacob?

 ⁷ Diad Luz, nampanengneng si Jehova ed si Jacob diad kugip, ya kuan to: “Agmo lilingwanan a wala ak ed sika tan iyagel ta kad inerman a laen mo, tan ipawil ta kad sayan dalin. Agta ka taynan, anggad pakasumpal kon gawaen ya amin iray insipan kod sika.” (Gen. 28:15, MB) Seguradon apabiskeg tan aligliwa si Jacob ed saraman ya balikas! Kasin naimadyin mon pinmeles so akar to lapud eksayted lan makanengneng no panon ya sumpalen na Dios so imbaga To? No asalim lay inmarawi, nayarin pian manlingkor ed arum ya bansa, natatalosan moy alikna nen Jacob. Balet, seguradon apaneknekan mon agka pinaulyan nen Jehova.

8, 9. Panon ya pinaneknekan nen Jehova a sikatoy peteg ya “ayaman” parad si Jacob, tan antoy naaralan tayod saya?

⁸ Sanen akasabid Haran si Jacob, sikatoy malikeliket ya pinatuloy nen pangamaen ton Laban. Ag-abayag, inter toy Leah tan Raquel pian magmaliw ya asawa nen Jacob. Balet niloko nen Laban si Jacob ta aminsamplo ton inumay upa to! (Gen. 31:41, 42) Balet inanosan nen Jacob iratan ya amin lapud matalek ya sikatoy agpaulyan nen Jehova. On, sikatoy benendisyonan nen Jehova. Sanen pinapawil na Dios si Jacob ed Canaan, sikatoy “inmaligwas a maong . . . tan sikatoy awalaan na dakerakel a pulok tan lingkor iran lalaki tan bibii tan saray kamelyo tan saray asno.” (Gen. 30:43, NW) Lapud pisasalamat nen Jacob, oniay impikasi to: “Aliwa ak a makana ed kamelagan ed saray amin a maaro ya abig na linawa, tan amin a katuaan, ya impatnag mo ed saya so aripen mo; lapu ed say tayukor ko labat la so ibak a binmaliw ed sayan Jordan; tan natan nagmaliw ak a duara ya ulop.”—Gen. 32:10.

⁹ On, pinaneknekan na sarayan alimbawa imay pikakasi nen Moises: “O Jehova, nagmaliw kan ayaman mi diad amin a henerasyon”! (Sal. 90:1, NW) Si Jehova et onman ni anggad natan, “sikatoy agmanguuman-uman, ya aliwan singa say anino ya onggagalaw.” Aaroen, proprotektaan, tan aasikasoen to ray matoor ya lingkor to. (Sant. 1:17) Nengnengen tayo no panon.

10. Akin ya segurado tayon si Jehova so peteg ya “ayaman” tayo anggad natan?

¹⁰ Isipen iyan situasyon: Nan-witness kad korte sumpad maimpluensyan sindikato. Say lider na satan et mautek, makapanyari, matila, tan managpatey. Antoy liknaan mo kapaway mod korte? Relaks? Siempre andi! Seguradon onkerew kay proteksion. Oniay situasyon na saray lingkor nen Jehova ya makmakpel a mantatasi sumpad maruksan kalaban to, si Satanas! (Basaen so Apocalipsis 12:17.) Balet, kasin apatunda nen Satanas iray lingkor na Dios? Andi! Diad tua, tuloytuloy itayon makakapanpulong. Nagagawaan tayo iya lapud sayan rason: Siansia nin si Jehova so salimbengan odino peteg ya “ayaman” tayo, lalo lad sayan kaunoran iran agew. (Basaen so Isaias 54:14, 17.) Balet, magmaliw labat a peteg ya ayaman tayo si Jehova no agtayo iyabuloy ya palikdoen itayo nen Satanas.

11. Antoy naaralan tayod si Abraham, Isaac, tan Jacob?

¹¹ Makaaral tayo met ed alimbawa di Abraham, Isaac, tan Jacob. Anggano nanayam irad Canaan, ag-ira akiulop ed saray mauges tan imoral ya taga diman. (Gen. 27:46) Agda kaukolay listaan na saray  ganggan ya nepeg dan tumboken. Amta ra no antoy labay tan aglabay nen Jehova. Lapud sikato so ayaman da, agda labay so magmaliw a kabiangan na mundo. Nansiansia ran arawi ed satan anggad posible. Talagan maabig iran alimbawa parad sikatayo! Kasin gagawaen moy anggaay nayarian mon aligen so alimbawa ra diad panagpilim na kaulop tan panagligliwaan? Makapaermen ta wala ray agagin komportable ed mundo nen Satanas diad pigaran aspekto na bilay da. No walay ontan ya naliliknam, anggan daiset, ipikasim itan. Agmo lilingwanan ya si Satanas so manuuley ed sayan mundo. Sikatoy makasarili tan anggapoy panangaro to.—2 Cor. 4:4; Efe. 2:1, 2.

12. (a) Panon ya tutulongan nen Jehova iray lingkor to? (b) Antoy nibagam ed saray tulong ya iiter nen Jehova?

¹² Pian ag-itayo napalikdo nen Satanas, kaukolan tayon pablien iray espiritual a tulong ya iiter nen Jehova ed saray lingkor to. Kaibad saratan so Kristianon pantitipon, panagdayew na pamilya, tan “langkap a lalaki”—saray pastol a tinuro na Dios ya mangasikaso tan ontulong ed sikatayo no wala ray subok. (Efe. 4:8-12) Oniay insulat nen Brother George Gangas ya datin membro na Mananguley ya Ulop: “Sano kaibak iray [totoo na Dios] singak kaibay pamilyak, diad espiritual a paraiso.” Kasin naliliknam met itan?

13. Antoy naaralan tayod Hebreos 11:13?

¹³ Say sakey nin maabig ya naaralan tayod si Abraham, Isaac, tan Jacob et say impansiansia ran dumad saray kakaabay da. Singa asalambit la ed  parapo 1, “inyabawag da a sikaray sangkaili tan miaayam labat.” (Heb. 11:13) Kasin desidido kan mansiansian duma? Tua, aliwa itan ya mainomay. Balet diad tulong na Dios tan suporta na saray agagi, nasarag mo itan. Tandaan ya agmo bukbukor. Amin ya malabay a manlingkor ed si Jehova et nepeg a mipuligesgesan! (Efe. 6:12) Balet, seguradon manalo itayo no manmatalek tan manpasalimbeng tayod si Jehova.

14. Anton “syudad” so inalagar na saray lingkor nen Jehova?

¹⁴ Importante met ya aligen tayoy Abraham diad pangiteen na kamataan tayod premyo. (2 Cor. 4:18) Insulat nen apostol Pablo ya “aalagaren [nen Abraham] so syudad a walaan na saray tuan pundasyon, a say mangipaalagey tan manggawa ed satan et say Dios.” (Heb. 11:10) Satan a “syudad” et say Mesianikon Panarian. Inalagar itan nen Abraham. Diad sikatayo balet, agti la kaukolay manalagar ta manuuley  lay Panarian dimad tawen, tan papaneknekan na saray propesiya ed Biblia ya asingsingger la itan a manuley diad dalin. Kasin panisiaan mo itan? Kasin iyuunam so Panarian ed bilay mo tan mansiasiansia kan biig ed sayan mundo?—Basaen so 2 Pedro 3:11, 12.

15. Antoy pansumpalan na saray manmamatalek ed sayan mundo?

¹⁵ Legan a manasingger so kaderal na mundo nen Satanas, mas onloor so “kairapan.” (Mat. 24:7, 8) Tan seguradon onirap ya maong so bilay sano onggapo lay baleg ya irap. Nageba iray bilding, tan nataktakot ya maong iray totoo. (Hab. 3:16, 17) Lapud takot, ompan sikaray onamot ed “saray ungib tan diad saray leet na angkakabaleg a bato ed kapalandeyan.” (Apo. 6:15-17) Balet anggapoy ungib odino singa palandey ya organisasyon ed politika odino komersyo ya manprotekta ed sikara.

16. Antoy nepeg ya panmoria tayod Kristianon kongregasyon, tan akin?

¹⁶ Balet diad saray lingkor na Dios, seguradon salimbengan ira nen Jehova, say peteg ya “ayaman” da. Singa si propetan Habacuc, “manliket [ira] naani ed si Jehova.” Sikaray ‘manliket ed Dios na kilalaban da.’ (Hab. 3:18) Panon ya magmaliw a peteg ya “ayaman” si Jehova legan na satan ya makapataktakot a panaon? Kaukolan tayon alagaren. Balet saya so segurado: Singa saray Israelita sanen pinmaway irad Ehipto, say “baleg ya ulop” et mansiansian organisado tan alertod panangigiya nen Jehova. (Apo. 7:9; basaen so Exodo 13:18.) Nayarin usaren nen Jehova so kongregasyon pian ipasabi instruksion to. Kanian saray nilibon kongregasyon ed interon mundo so posiblin nausar ya “silir” odino kuarto ya manprotekta ed saray totoo na Dios a singa nipropesiyad Isaias 26:20. (Basaen.) Kasin importante ed sika iray pantitipon ed kongregasyon? Kasin tutuloken mon tampol iray instruksion ya iiter nen Jehova panamegley na kongregasyon?—Heb. 13:17.

17. Akin ya nibagan si Jehova et peteg ya “ayaman” na anggan saramay lingkor ton inatey a matoor?

¹⁷ Si Jehova so peteg ya “ayaman” na anggan saramay lingkor ton inatey a matoor antis na baleg ya irap. Panon? Diad inlabas na panaon kayari impatey di Abraham, Isaac, tan Jacob, oniay imbaga nen Jehova ed si Moises: “Siak so Dios nen . . . Abraham, say Dios nen Isaac, tan say Dios nen Jacob.” (Exo. 3:6) Kayarin inaon nen Jesus irayan salita, oniay inyarum to: “Sikato so Dios na saray mabilay, aliwan saray inaatey, lapud mabilay iran amin ed sikato.” (Luc. 20:38) On, parad si Jehova, singa mabilay la iramay lingkor ton inatey a matoor lapud segurado so kioli ra.—Ecl. 7:1.

18. Diad balon mundo, panon a si Jehova et magmaliw a peteg ya “ayaman” na saray lingkor to diad nikadkaduman paraan?

¹⁸ Diad asingsingger lan balon mundo, si Jehova et magmaliw a peteg ya “ayaman” na saray lingkor to diad nikadkaduman paraan. Oniay ibabaga na Apocalipsis 21:3: “Nia! Say tolda na Dios et walad katooan, tan sikatoy miayam ed sikara.” Diad gapo, miayam si Jehova ed saray totoo panamegley nen Jesu-Kristo. Kayari sanlibon taon, sano nasumpal lay gagala na Dios diad dalin, iyawat la nen Jesus so Panarian ed Ama to. (1 Cor. 15:28) Diad satan, direkta lan uleyan nen Jehova iray perpekton totoo. Talagan marakdakep itan ya arapen tayo! Balet antis na satan, panggunaetan tayon aligey alimbawa na saray matoor tan gawaen tayon peteg ya “ayaman” si Jehova.