Seguradon manisia ka ya si Jesus so sankamaongan a Managbangat ya nambilay diad dalin. Anganko sinalim lan aligey arum ya paraan na impanbangat to, singa say pangusar na saray tepet tan ilustrasyon. Balet, naimanom ta la ya si Jesus et lanang ya angusar na saray pandumaan ed panagbangat to?

Dakel so manguusar na saray pandumaan no mansasalita ira. Ompan anggan sika et gagawaen mo itan ya agmo gagagalaen. Singa bilang, ibagam ya, “Say kuan da aluto lan amin yay ponti; maeta ni balet ’ya ay.” Odino, “Nensaman mabapbaing iyan ugaw, natan balet makakkaaro la.”

Singa ed sarayan alimbawa, unona et mangibaga ka na sakey ya ideya; insan mo patumbokan na sananey ya ideya tan mangusar ka na salitan singa say balet, noagta, ingen, o imbes. Odino ipanengneng mo so pandumaan diad pangiyarum moy impormasyon. No ontan, natnatural kanian naala dan tampol so labay mon ibaga.

Tua, wala ray lenguahe o kulturan agtanton manguusar na saray salitan mangipapanengneng na pandumaan, balet amta tayon importante iratan. Akin? Ta dakdakel so ontan ya nabasa tayod Biblia. Naynay ya angusar si Jesus na pandumaan. Singa bilang: “Sano selselan na totoo so lamparaan, agda itan iyan ed dalem na baskit, noagta diad panangipatoonan.” “Nadngelan yo a nikuan, ‘Agka mikakalugoran.’ Balet ibagak ed sikayo a siopaman a naynay ya onlilinggis ed sakey a bii . . .” “Nadngelan yo a nikuan, ‘Mata ed mata, ngipen ed ngipen.’ Ingen, ibagak ed sikayo, Agka ombabawi no sinakitan ka na toon mauges, imbes siopaman a manampal ed kawanan ya aping mo, iyarap mo met ed sikato so kawigi.”—Mat. 5:15, 27, 28, 38, 39.

Wala ni ray ontan ya pandumaan diad arum ya libro na Biblia. Ontulong iratan pian natalosan mo so sakey ya punto odino pian nidanet ya mas maabig imay komaduan ideya nen samay unona. No sakey kan ateng, isipen pa yan pandumaan: “Sikayoran kaamaan, agyo papasyodoten iray anak yo, noagta itultuloy yo ran pabalegen diad panagdisiplina tan panamilin nen Jehova.” (Efe. 6:4) Nayari pan say isulat labat nen apostol Pablo et nepeg ya pabalegen na ama (o ina) so anak to ed disiplina na Dios. Balet, mas linminew so punto sanen imbaga nen Pablo ya ‘agpapasyodoten iray anak, noagta pabalegen ira diad panamilin nen Jehova.’

Diad satan met lanlamang ya kapitulo, insulat nen Pablo: “Sikatayoy mipupuligesgesan, aliwan diad totoo, noagta diad . . . saray armada na mauges ya espiritu ed tawen.” (Efe. 6:12) Lapud saya, atalosan tayon aliwan bastabasta so pilalaban tayo. Aliwan totoo so kalaban; noagta, saray mauges ya espiritu.

Diad libro met lanlamang na Efeso, dakel ni arum ya nabasan pandumaan ya inusar nen Pablo. No aralen tayo iratan, mas natalosan tayoy labay ya ibaga nen Pablo tan no antoy nepeg tayon gawaen.

Seguradon na-enjoy mon aralen so chart ya ditan et nanengneng mo ray pandumaan ya nabasad Efeso kapitulo 4 tan 5. Legan mon babasaen so kada pandumaan, usisam pay sarilim, tan itepet: ‘Anton talagay ugalik? Antoy gawaen ko ed onia ran situasyon? Diad naoobserbaan na arum, dinan ed sayan pandumaan so manideskribe ed siak?’ No walay anengneng mon kaukolan mon umanen, pankimeyan mo. Iyaplikam so naaralan mod sarayan pandumaan.

Odino sarag yo met ya usaren iyan chart ed panagdayew na pamilya yo. Unona, basaen na interon pamilya so walad chart. Kayari to, walay sakey ya manbasa ed unonan parte na chart ya walad bandad kawigi, insan ibaga na arum a membroy pamilya so atandaan dan punto ya idadanet na katuloyan to. Seguradon nagustoan yoy napantongtongan yo no panon yon niyaplika iray walad bandad kawanan na chart. On, no aralen irayan pandumaan, natulongan iray kalangweran tan saray wala lad edad ya ipanengneng so Kristianon ugali diad pamilya tan anggan iner.

Natan ta antam lay kaimportantian na saray pandumaan, mainomay mo lan naimano iratan sano manbabasa kay Biblia tan nayarin nausar mod ministeryom. Alimbawa, nayarin oniay ibagam ed unabung: “Dakel so manisian amin tayo et walaay imortal a kamarerwa, balet nengneng mo pa yay ibabaga na Biblia.” O sano mangiyaaral kay Biblia, nayarin itepet mo: “Maslak ya totood lugar yo et manisian say Dios tan si Jesus et saksakey; anto la man balet so naaralan ta’n ibabaga na Biblia? Antoy panisiaan mo ey?”

On, dakel so nabasa tayon pandumaan diad Kasulatan ya pakaaralan tayo, tan ontulong iratan pian makapanakar tayod dalan na Dios. Tan nausar tayo iratan pian natulongan so arum ya naamtaan so katuaan.