“DAKEL lay agko nagawaan lapud ikakapuy na laman ko,” so kuan nen Ernst, ya masulok lan 70 años to. * Ontan met la kasi nalilikna yo? No onkakapuy lay laman yo tan ondarakel lay liliknaen yo lapud itatatken, seguradon onabobon kayod ibabaga na Eclesiastes kapitulo 12. Diad bersikulo 1, say itatatken et tinawag ya saray “makapagonigon ya agew.” (NW) Anggaman ontan, agto labay ya ibagan pakaskasi lay bilay yo. Sarag yo nin siansiay makapanlingkor ed si Jehova tan magmaliw ya maliket.

Sikayo ran pinabli min agagi ya maedad la, aliwan sikayo labat so makakaeksperiensya na ontan. Wala ray lingkor nen Jehova nensaman ya ontan met so situasyon da. Singa bilang, si Isaac, Jacob, tan Ahias et kinmapuy so pakanengneng da. (Gen. 27:1; 48:10; 1 Ara. 14:4) Si Arin David et ‘siansia nin nabebetelan anggano nanlalatop lay iyuules dad sikato.’ (1 Ara. 1:1, NW) Say mayaman ya si Barzillai et agto la nananam so kakanen to tan agto la tanton naapresya so musika. (2 Sam. 19:32-35) Si Abraham tan Noemi et parehon nanermen lapud impatey na asawa ra.—Gen. 23:1, 2; Rut 1:3, 12.

Antoy akatulong ed sikara pian makapanmatoor irad si Jehova tan mansiansia ran maliket? Anggano masiken lay Abraham, manisia ed sipan na Dios kanian “nagmaliw a mabisbiskeg ed pananisia.” (Roma 4:19, 20) Kaukolan ya mabiskeg met so pananisia tayo. Balet ag-itan akadepende ed edad, abilidad, odino situasyon tayo. Singa bilang, anggano say patriarkan si Jacob et makapkapuy la, agla makanengneng, tan agla makabangon, siansia nin mabisbiskeg so pananisia tod saray sipan na Dios. (Gen. 48:1-4, 10; Heb. 11:21) Ontan met so situasyon na 93 años ya si Ines. Anggano makapkapuy lan maong so laman to, siansia nin oniay imbaga to: “Bebendisyonan ak nen Jehova kada agew. Sankanonot kon naynay so Paraiso. Atan so mangiiter ed siak na ilalo.” Talagan makapaseseg itan ya positibon panagnonot!

Ombibiskeg so pananisia tayo diad pampikasi, panaral na Salita na Dios, tan iyatendid saray Kristianon pantitipon. Say masiken lan propeta ya si Daniel et mamitlod sanagew ya manpikasi tan makulin manaral na Salita na Dios. (Dan. 6:10; 9:2) Say maedad lan biyuda ya si Ana et “agbalot onsasaew ed templo.” (Luc. 2:36, 37) No gagawaen yoy anggaay nayarian yon onatendi tan mankomento ed saray aral, aliwan sikayo labat so minabang noagta amin ya inmatendi. Tan labalabay ya dengelen nen Jehova so pikakasi yo, anggano limitado lay nagagawaan yo.—Uli. 15:8.

Seguradon labalabay na dakel ed sikayo ran matoor ya lingkor na Dios so makanengneng, makabasa, tan nawalaan na kasil pian makaatendid saray aral, balet mair-irap odino imposible ni ingen ya gawaen itan. Balet, wala ni kasi nagawaan yo? On, wala. Say arum ya agmakakaatendi ed aral et ondedengel panamegley na telepono. Si Inge et 79 años to la tan makapuy lay pakanengneng to, balet manpaparaan nin siansia ed saray aral panamegley na saray publikasyon ya angkabaleg so letra ya im-print na kakongregasyon to ed computer.

Nayarin mas dakel so libren panaon yo nen say arum. Maabig no usaren yo itan pian dengelen iray rekording na panagbasa na Biblia, publikasyon, paliwawa, odino saray audio drama. Sarag yo met ya tawagan iray agagi pian manginabang na espiritual a bendisyon tan “makapanpapasesegan.”—Roma 1:11, 12.

“Aliwliway liknaan no agmo la nagawaan iramay datin gagawaen mo,” so imbaga nen Christa, ya 85 años to. Panon sirin ya mansiansian maliket iray maedad la? “Diad pagmaliw ya positibo” so kuan na  75 años ya si Peter. “Agmo la masyadon pampapagaan iray agmo la nagawaan, imbes, manpokus kad saray sarag mo nin gawaen.”

Wala tay nanonotan yon arum a paraan pian makapanpulong kayo? Agla sarag nen Heidi so manpulong ed kaabungan. Balet, anggano masulok lan 80 años to, inaral toy manggaway sulat panamegley na computer. Wala ray maedad lan agagi ya manpupulong legan iran walad park odino diad panag-alagaray luluganan. Odino no manaayam kayo lad nursing home, sarag yon pulongan iray doktor, nars o arum nin mangaasikasod sikayo tan saray kaiba yon manaayam ditan.

Anggano maedad lan maong si Arin David, nansiansian aktibo pian nasuportaan toy dugan panagdayew. Angiter na pundo tan imparaan ton maong so pangipaalagey ed templo. (1 Awa. 28:11–29:5) Singa si Arin David, sarag yo met ya amtaen so nagagawad sankamundoan ya kimey tayo tan gawa yoy anggaay nayarian yo pian nasuportaan itan. Sarag yo met ya tulongan iray payunir odino arum nin agagi ed kongregasyon yo diad pamaseseg ed sikara, pangiter na simplin regalo, odino merienda. Nayarin ipikasi yo iray kalangweran tan saray pamilya, saray walad sigpot-panaon, saray mansasakit, tan saramay walaan na ambelat ya responsabilidad.

Sikayo tan say panaglingkor yo et papablien ya maong. Agkayon balot ipulisay nen Aman Jehova. (Sal. 71:9) Inar-aro tan papablien to kayo. Asingsingger lan naekal iray makapagonigon tan makapaermen ya epekto na itatatken. Diad satan et makmaksil tan perpekto lay laman tayo, tan makapanlingkor tayo lad maaron Dios tayon si Jehova diad andi-angga!