No Akin ya Importante so Eden ed Sika

MAKAPAKELAW ta ibabaga na pigaran iskolar ya say salaysay nipaakar ed Eden et agsusuportaan na arum a kabiangan na Biblia. Alimbawa, oniay insulat na Propesor na Religious Studies ya si Paul Morris: “Agla tinukoy ed arum ya parte na Biblia so nipaakar ed istorya’d Eden.” Nayarin sayan imbaga to et panisiaan na saray tatawagen ya “eksperto,” balet ta mikontraan itan ed katuaan.

Nalilingo irayan iskolar ta diad tua, aminpigapigan tinukoy ed Biblia so hardin na Eden, si Adan, Eva, tan say uleg. * Balet, sayan lingo ra et melag labat no ikompara’d mas baleg tan grabe nin lingo. Diad pangikuestion na saray lider na relihyon tan kritiko na Biblia ed salaysay na Genesis nipaakar ed hardin na Eden et singa da met la ibabagan agnapanmatalkan so interon Biblia. Akin?

Say rason et lapud kaukolan tayon talosan so agawa’d Eden nensaman pian natalosan so interon Biblia. Singa bilang, tutulongan itayo na Biblia ya naamtaan so ebat ed saray sankaimportantian ya tepet. Mabetbet ya say ebat ed sarayan tepet et mikonektaan ed saramay agawa’d hardin na Eden. Nia ra ay so pigaran alimbawa.

● Akin et ontatatken tan ompapatey itayo? Agkomon angangga so bilay di Adan tan Eva no nansiansia iran matoor ed si Jehova. Inatey ira ta nanrebelde ira. Nanlapud samay agew na impanrebelde ra et aliwa la ran perpekto, tan diad saman met la ra ginmapon tinmakken anggad inatey ira. (Genesis 2:16, 17; 3:19) Kanian say impatawir da ed ananak da et say kasalanan tan ag-inkaperpekto. Onia sirin so eksplinasyon na Biblia: “Linmoob so kasalanan ed mundo lapud sakey a too tan say ipapatey lapud kasalanan, tan ompapatey so amin a totoo lapud nankasalanan iran amin.”​—Roma 5:12.

● Akin et aabuloyan na Dios so kaugsan? Diad samay agawa’d hardin na Eden et pinapaway  nen Satanas ya say Dios et matila, tan sisibletan to ray pinalsa to. (Genesis 3:3-5) Kinuestion to sirin so paraan na pananguley nen Jehova. Lapud inunor nen Adan tan Eva si Satanas, agda met la binidbir so soberanya nen Jehova o say kanepegan ton manuley. Singa da ibabagan, sarag day mandesisyon ya bukor no anto so maong tan mauges. Lapud si Jehova et Dios ya mahustisya tan makabat, amta ton walay alenleneg ya paraan pian napaneknekan a matila si Satanas​—palabasen so panaon pian abuloyan iray totoon uleyan so kapara ran too, diad antokaman ya paraan ya labay da. Nanresulta iya ed kaugsan, tan say sakey a rason et lapud impluensya nen Satanas. Kanian diad inlabas na panaon et apaneknekan iyan katuaan: Agnayarian na toon uleyan so kapara ton too no anggapoy panangigiya na Dios.​—Jeremias 10:23.

● Akin et ginawa na Dios so mundo? Panamegley na hardin na Eden, impanengneng nen Jehova so inkarakep ya labay to parad mundo. Ingganggan to ra di Adan tan Eva ya panoen itan na ananak da tan “patuloken” odino asikasoen da itan pian say inkarakep na interon mundo et singa ed hardin na Eden. (Genesis 1:28) Kanian labay na Dios ya say mundo et magmaliw ya paraiso a panayaman na perpekto tan nankakasakey ya ananak di Adan tan Eva. Amin lawarin nabasa’d Biblia et nipaakar ed no panon ya gawaen na Dios itan ya gagala to parad mundo.

● Akin et linma’d mundo si Jesu-Kristo? Sanen nanrebelde si Adan tan Eva ed hardin na Eden, sikara tan amin ya ananak da et asentensiaan na ipapatey, balet ta nanggaway paraan so Dios pian nawalaan na ilalo iray totoo. Imbaki toy Anak to diad mundo pian itarya so tatawagen na Biblia ya dondon. (Mateo 20:28) Antoy labay ya ibaga na saya? Si Jesus et “say unor ya Adan”; samay ag-agawaan nen Adan et agawaan to. Apansiansia nen Jesus so perpekton bilay to bilang too diad impantultuloy ton impangunor ed si Jehova. Insan inter toy bilay to bilang dondon, pian amin ya matoor et naperdonay kasalanan da tan nawalaan na bilay ya singa ed samay bilay ya nanliketan di Adan tan Eva ed Eden sanen agni ra nankasalanan. (1 Corinto 15:22, 45; Juan 3:16) Kanian ginarantiyaan nen Jesus ya talagan gawaen na Dios imay gagala to parad mundo, a magmaliw iyan paraiso, singa samay Eden. *

Malinew no anto so gagala na Dios, aliwa itan ya ideya o doktrina labat. Tudtua itan. No panon ya tuan wala so hardin na Eden nensaman diad sayan mundo, a ditan et walaray tuan ayayep tan tuan totoo, tuan nagawa met so sipan na Dios, tan asingger la itan. Wadman ka kasi sano nagawa la itan? Say ebat ed satan et akadependin maong ed sika. No nayari, labay na Dios ya amin a totoo et wadman, anggan saramay akagaway kasalanan.​—1 Timoteo 2:3, 4.

Sanen asingger lan ompatey si Jesus, sikatoy akitongtong ed sakey a lakin akapankasalanan. Amta na sayan laki a kanepegan toy ompatey. Balet ta kinmerew na tulong ed si Jesus pian naligliwa tan nawalaay ilalo. Antoy kuan nen Jesus ey? “Nakaiba ta ka ed Paraiso.” (Lucas 23:43) No labay nen Jesus ya saman a datin kriminal et nabilay lamet tan nabendisyonan na agmanganggan bilay diad paraiso ya singa samay Eden nensaman​—agta labay ton ontan met a bendisyon so naawat mo? Labalabay nen Jesus! Labalabay met nen Ama to! No labay mon naawat itan a bendisyon, gawam so anggaay nayarian mon kabaten so Dios ya nanggawa ed hardin na Eden.

[Saray paimano ed leksab]

 [Kahon/Saray litrato ed pahina 10]

PROPESIYA A PANKOKONEKTAEN TOY INTERON BIBLIA

“Mangiyan ak na gulaan [odino busolan] ed sika [say uleg] tan say bii, tan gulaan ed saray ilalak mo tan ilalak to; sikato sugaten to so ulom, et sika sugaten mo so mukor to.”​—Genesis 3:15.

Saya so sankaunaan a propesiya ed Biblia, ya imbagan mismo na Dios diad Eden. Siopa irayay apatiran karakter: say bii, say ilalak to, say uleg, tan say ilalak to? Tan akin et nibagan manbusolan ira?

SAY ULEG

Satanas ya Diablo.​—Apocalipsis 12:9.

SAY BII

Say kabiangan na organisasyon nen Jehova a walad tawen. (Galacia 4:26, 27) Impropesiya nen Isaias a sayan “bii” et nawalaan na dakel ya anak, a diad arapen et magmaliw a sakey ya espiritual ya bansa.​—Isaias 54:1; 66:8.

SAY ILALAK NA ULEG

Saramay gagawaen day panlabayan nen Satanas.​—Juan 8:44.

SAY ILALAK NA BII

Si Jesu-Kristo, a nanlapud kabiangan na organisasyon nen Jehova a walad tawen. Kaiba met ed “ilalak” na bii iray espiritual ya agagi nen Kristo a manuley met ed tawen. Sarayan Kristianon nilanaan na espiritu et manugyop ed espiritual a bansa, say “Israel na Dios.”​—Galacia 3:16, 29; 6:16; Genesis 22:18.

SAY SUGAT ED MUKOR

Say irap ya sagmaken na Mesias balet ta temporaryo labat. Agawa so labay nen Satanas ya ompatey si Jesus sanen wadiad dalin. Binilay lamet na Dios si Jesus.

SAY SUGAT ED ULO

Say ipatey nen Satanas. Sikatoy permanente lan deralen nen Jesus. Antis ni na satan, ekalen nen Jesus so kaugsan ya inggapo nen Satanas ed Eden.​—1 Juan 3:8; Apocalipsis 20:10.

Say antikey ya eksplinasyon nipaakar ed tema na interon Biblia et nabasa ed brosyur ya Say Biblia​—Anto So Mensahe To? ya im-publish na saray Tasi nen Jehova.

[Litrato ed pahina 11]

Nanirap a maong si Adan tan Eva lapud impankasalanan da