Jesus—Say Impanbilay To
Jesus—Say Impanbilay To
“Say kanen ko et say panggaway linawa na samay angibaki ed siak tan say panumpal ed kimey to.”—JUAN 4:34.
NO IMANOEN tayoy situasyon sanen imbaga nen Jesus itan, napatnagan tayo no iner akasentroy bilay to. Sampegtaw lan nanakar si Jesus tan saray disipulo to ed saman diad mapalandey a bansa na Samaria. (Juan 4:6, footnote) Lapud inisip na saray disipulo ya narasan lay Jesus, iikdan day naakan. (Juan 4:31-33) Diad ebat nen Jesus, impaamta to no antoy gagala to’d bilay. Parad sikato et mas importante ni panggaway kimey na Dios nen say pangan. Diad salita tan gawa, nambilay si Jesus pian sumpalen so ipapagawa na Dios ed sikato. Anto iratan?
▪ Pangipulong tan pangibangat ed Panarian na Dios Impaliwawa na Biblia so kimey nen Jesus: “Niliber to so interon Galilea, a nambabangat . . . tan impupulong to so maong a balita na panarian.” (Mateo 4:23) Aglabat impulong odino impakabat nen Jesus so Panarian na Dios. Imbangat to met iray totoo, sikatoy angipaliwawa tan angombinse panamegley na maabig a panagkatunongan. Say manunan mensahe to et say Panarian.
Legay ministeryo nen Jesus, imbangat to no anto so Panarian na Dios tan no anto so gawaen na satan. Imanoen pa iray imbaga nen Jesus a katuaan nipaakar ed Panarian ya nabasa’d Biblia.
▪ Say Panarian na Dios et gobierno ed tawen, tan si Jesus so pinili nen Jehova ya Ari.—MATEO 4:17; JUAN 18:36.
▪ Pasantosen na Panarian so ngaran na Dios tan panamegley na satan et nagawa so linawa to ed dalin, a singa met ed tawen.—MATEO 6:9, 10.
▪ No manuley lay Panarian na Dios, magmaliw lan paraiso so interon dalin.—LUCAS 23:42, 43.
▪ Magano lan onsabi so Panarian na Dios tan sumpalen na satan so linawa na Dios ed dalin. *—MATEO 24:3, 7-12.
▪ Panggawa na saray milagro Kabkabat si Jesus a “Managbangat.” (Juan 13:13) Balet legan na talora tan kapalduan taon na ministeryo to, nanggawa met na dakel a milagro. Walay duaran rason no akin et ginawa to iratan. Unona, prueba iratan a talagan sikato so imbaki na Dios. (Mateo 11:2-6) Komadua, ipapanengneng na saratan so malaklaknab ya gawaen to ed arapen bilang Ari ed Panarian na Dios. Nia ray pigaran milagron ginawa to.
▪ Pinatunda toy angkabaleg a daluyon ed dayat tan maksil a dagem.—MARCOS 4:39-41.
▪ Pinaabig to ray mansasakit, pati saray bulag, telek, tan piley.—LUCAS 7:21, 22.
▪ Pinarakel toy naakan pian napakan so amayamay ya narasan.—MATEO 14:17-21; 15:34-38.
▪ Amitlon amilay na inatey.—LUCAS 7:11-15; 8:41-55; JUAN 11:38-44.
Imadyin yo pay bilay ed dalin no manuley la iyan makapanyarin Ari!
▪ Pangipaamta ed personalidad nen Jehova a Dios No say pantongtongan et panangibangat nipaakar ed si Jehova, anggapo lay mas kualipikado nen say Anak to, si Jesu-Kristo. Lapud si Jesus so “panguloan na amin a pinalsa,” mas andukey so impaniba ra nen Jehova ed tawen nen say anggan siopan anghel. (Colosas 1:15) Isip mo pay pankanawnawa ton naalig so panagnonot tan naaral so linawa, prinsipyo, tan saray paraan nen Ama to!
Wala sirin so kanepegan nen Jesus a mangibagan: “Anggapoy makapikabat no siopa so Anak noag say Ama, tan anggapo met so makaamta no siopa so Ama noag say Anak tan samay labay a pangipaamtaan na Anak.” (Lucas 10:22) Sanen wadia’d dalin si Jesus, maliket ton impaamta so personalidad nen Ama to. Nikadkaduma so impanbangat to ta asali ton mismo so nanayam ed tawen tan akalimog toy Sankatagyan a Dios.—Juan 8:28.
Say impangibangat nen Jesus nipaakar ed Ama to so nayarin iyalimbawa ed sakey ya transformer. Sarag na satan ya paabebaey atagey a boltahe pian nausar na karaklan. Sanen wadiad dalin si Jesus, saray naaralan to’d Ama to ed tawen et pinasimpli to pian mainomay a talosan tan nikana na ordinaryon totoo.
Nia so duaran importantin paraan no panon ya impakabat nen Jesus so Ama to.
▪ Diad impanbabangat to, impaamta toy katuaan nipaakar ed ngaran, gagala, tan saray paraan nen Jehova.—JUAN 3:16; 17:6, 26.
▪ Diad kiwas nen Jesus, impatnag toy alay dakep a personalidad nen Jehova. Talagan naalig nen Jesus so personalidad nen Ama to kanian singa to ibabagan: ‘No labay yon nakabat so Amak, imano yo ak.’—JUAN 5:19; 14:9.
Makapadinayew so impanbilay nen Jesus. Balet, talagan minabang itayo met no aralen tayoy rason na impatey to tan onkiwas base ed naaralan tayo.
[Paimano ed leksab]
^ par. 9 Parad kaaruman ya impormasyon nipaakar ed Panarian na Dios tan saray ebidensya ya magano la itan ya onsabi, nengnengen so kapitulo 8, “Anto so Panarian na Dios?,” tan kapitulo 9, “Kasin Manbibilay Itayo la ed ‘Saray Kaunoran ya Agew’?,” diad libron Anto so Peteg ya Ibabangat na Biblia? ya in-publish na saray Tasi nen Jehova.
