Tepet na Saray Manbabasa . . .

Kasin Walay Papaboran na Dios a Poli?

▪ Anggapo. Malinew so ibabaga na Biblia: “Say Dios et agmanangidumaduma, noagta diad balang nasyon et makapaliket ed sikato so toon ontatakot ed sikato tan manggagawa na inkatunong.”​—Gawa 10:34, 35.

Mas atagtagey so panmoria na Dios nipaakar ed saya nen say panmoria na imperpekton totoo. Panisiaan na dakel ya mas superyor so sakey a poli (say poli da) nen say arum. Say ontan ya kanonotan et miparad samay insulat nen Charles Darwin ya: “Diad arapen, . . . seguradon naandi tan salatan na saray sibilisadon poli iray aliwan sibilisado.” Makapaermen, dakel so abiktima na saramay mangipapasen ed inkasikara a superyor.

Wala tay kakanaan na pangipasen ed polim a superyor? Alimbawa, kasin apaneknekan na siensia ya say arum a poli et nisipor lan atagtagey, tan say arum et abebbeba? Oniay inkuan balet na sakey a geneticist tan propesor na Oxford a si Bryan Sykes: “Anggapoy basiyan ya atawir so antokaman a klase na poli. . . . Lanang ak ya natetepetan no wala kasi Greek DNA odino Italian gene, balet, siempre anggapo. . . . Agtayo manarawian.”

Sayan impormasyon et mitunosan ed nabasa tayod Kasulatan. Ibabangat na Biblia ya amalsa labat so Dios na sakey a laki tan sakey a bii, say nanlapuan na amin ya totoo. (Genesis 3:20; Gawa 17:26) Sirin, diad pakanengneng na Dios et saksakey labat so poli​—say poli na katooan.

Aliwan say kolor na baog odino itsura na sakey a too so nenengnengen nen Jehova. Imbes, say importante ed sikato et say puso tayo, odino say inkatoo tayo. Inkuan to: “Say nenengnengen na totoo et say itsura na sakey, balet say nenengnengen ko et say walad puso na sakey a too.” (1 Samuel 16:7, Contemporary English Version) Satan ya katuaan so mamaseseg ed sikatayo. Panon?

Antokaman so poli tayo, dakel ed sikatayo so agkontentod itsura tayo, ingen ta melmelag so pakayari tayon umanen iratan. Balet, sarag tayon paaligwasen imay sankaimportantian​—samay walad puso tayo. (Colosas 3:9-11) No usisaen tayoy sarili tayo, ompan ipapasen ti’ met ya medyo superyor tayo, odino nayarin abebbeba nen say arum a poli. Lapud aliwan ontan so panmoria na Dios, labanan tayo itan a liknaan.​—Salmo 139:23, 24.

No panggunaetan tayon aligen so panmoria nen Jehova ed totoo, makaseguro tayod tulong to. Ipapanonot ed sikatayo na Salita To: “Saray mata nen Jehova ombatik dia tan diman ed amin a dalin, pian ompatnag a mabiskeg ya ontulong ed saray ayadyari puso ra a dapit ed sikato.” (2 Awaran 16:9) Tua itan antokaman so poli tayo.