Say aro et impapuson panamabli ed arum. Ipapatnag na maaron too ed salita tan kiwas to so nalilikna tod saray inad-aro to, anggan kaukolan toy mansakripisyo.

Impanengneng nen Moises so panangaro ed Dios. Panon? Nonoten pa imay walad 1 Juan 5:3: “Saya so kabaliksan na panangaro ed Dios, ya unoren tayo iray ganggan to.” Inaro nen Moises so Dios, kanian inunor toy amin ya ganggan to, mairap man itan a singa say iyarap ed Faraon odino mainomay labat a singa say pangitagey na baston diad Ambalangan Dayat. Amin ya inganggan ed si Moises, “sikato so ginawa to.”—Exodo 40:16.

Impanengneng met nen Moises so panangaro ed saray kapara ton Israelita. Amta dan sikatoy uusaren nen Jehova pian igiya iray totoo to, kanian inmasingger irad si Moises pian patulongan ed saray problema ra. Oniay nabasa tayo: “Saray katooan nanalagey ira ed abay nen Moises a nanlapu ed kabuasan ya angga ed [labi].” (Exodo 18:13-16) Seguradon makapakesaw ed si Moises so oras-oras ya idengel ed saray problema na saray Israelita! Balet ta sikatoy maliket ya ontulong ed saray totoon inaro to.

Aglabat dinmengel si Moises ed saray inad-aro to, impikasi to met ira. Anggan saramay aliwliway ginawa rad sikato! Singa bilang, nen nanreklamoy Miriam kontrad si Moises, sikatoy dinusa nen Jehova na ketong. Imbes ya manliket si Moises, akikasin tampol parad si Miriam a kuan to: “Kerewen ko ed sika, O Dios, a tambalen mo.” (Numeros 12:13) Ag-itan gawaen nen Moises no anggapoy panangaro to.

Naalig tayoy Moises diad pakawalaan na aralem a panangaro ed Dios. Pakiwasen itayo na ontan a panangaro ya tuloken iray ganggan to ya “impapuso.” (Roma 6:17) No gawaen tayo itan, napaliket tayoy puso nen Jehova. (Uliran 27:11) Nabendisyonan itayo met. No manlilingkor tayod Dios lapud tuan panangaro, agtayo labat gawaen so duga, panliketan tayo met ya gawaen itan!—Salmo 100:2.

Say sakey nin paraan ya naalig tayoy Moises et diad pakawalaan na masakripisyon aro parad arum. No onasingger ed sikatayo iray kakaaro odino kapamilya, pakiwasen itayo na panangaro ya (1) dengelen ira; (2) talosan so nalilikna da; tan (3) ipaliknan napapagaan tayod kipapasen da.

Singa si Moises, nayari tayon ipikasi iray inad-aro tayo. Balet, no maminsan et nalikna tayon anggapoy nagawaan tayo no ibaga ray problema da. Kuan tayo ni ingen ya, “Pasensia ka la, pikakasi labat so nagawaan ko parad sika.” Balet tandaan: “No manpikasi so matunong a too, say pikakasi to et mabisbiskeg.” (Santiago 5:16, The Kingdom New Testament) Saray pikakasi tayo et nayarin mamakiwas ed si Jehova ya gawaen parad sakey a too so agto komon gawaen. Anggapo la sirin so mas maabig ya nagawaan tayo parad inad-aro tayo noag say pangipikasid sikara. *

Kasin manisia kan dakel so naaralan tayod si Moises? Sikatoy ordinaryo labat ya too, balet ta angipanengneng na agaylay abig a pangaligan na pananisia, inkamapaabeba, tan aro. No mas pansasagpotan tayon aligen so alimbawa to, mas nagunggonaan tayo, ontan met ed arum.—Roma 15:4.