Nianak ak ed Santo Domingo, Dominican Republic. Apatira kamin sanaagi tan siak so bolirek. De-aral iray atateng ko tan labay da kamin ombaleg a kaiba iray maong a totoo. Apat taon sakbay na inkianak ko, akabat na saray atateng ko iray misioneron Mormon. Lapud balibali panangawes da tan maomaong ira, nandesisyon iray atateng kon say pamilya mi et magmaliw ya sakey ed saray sankaunaan a membro na Church of Jesus Christ of Latter-day Saints, odino Mormon Church diad lugar mi.

Legan kon ombabaleg, naeenjoy ko iray social activity na church mi, tan rerespetoen ko met so pangiiter day importansia ed bilay na pamilya tan maong iran ugali. Proud ak ya nagmaliw ak ya Mormon tan labay koy magmaliw ya misionero.

Nen manedad ak lay 18, inmalis so pamilya mi ed United States pian makapanaral ak ed marakep a unibersidad. Kayari sakey taon, binisita kami diad Florida na uncle tan auntie mi ya Tasi nen Jehova. Inimbitaan da kamin onlad Bible convention a kaiba ra. Manbilib ak ta saray wadman et isusulat day narerengel da tan manbubukay iray Biblia. Kanian binmayes ak na papel tan bolpen, tan inalig ko ra.

Kayari na kombension, imbaga nen uncle tan auntie a lapud labay koy magmaliw a misionero, natulongan da ak a manaral na Biblia. Inisip kon singa ayos labat ta diad saman a panaon et mas kabisadok ni Book of Mormon nen say Biblia.

Legan na saray pantotongtong mid telepono nipaakar ed Biblia, lanang ya ibabaga nen uncle tan auntie ya ikomparak so papanisiaan ko ed saray bangat na Biblia. Labay dan siak a mismoy makalmo na katuaan.

 Dakel iray doktrina na Mormon a papanisiaan ko, balet agak talaga segurado no kasin mipara iratan ed Biblia. Pinawitan ak nen auntie na Nobyembre 8, 1995 ya isyu na magasin ya Awake! ya im-publish na Saray Tasi nen Jehova. Karga na satan so pigaran artikulo nipaakar ed papanisiaan na saray Mormon. Abigla ak ta dakel ni manayay agko amta ed saray bangat na Mormon. Kanian nanusisa ak ed Web site da pian naamtaan ko no kasin tua iray abasak ed Awake! Tuan amin iratan, tan mas lalon apaneknekan ko nen linma ak ed saray museum na Mormon diad Utah.

Say amtak et agmankontraan so Book of Mormon tan Biblia. Balet nen inaral kon maong so Biblia, wala ray anengneng kon pandumaan na bangat na Mormon tan ibabaga na Biblia. Singa bilang, diad Ezequiel 18:4, ibabaga na Biblia ya say kamarerwa et ompatey. Balet diad Book of Mormon, diad Alma 42:9, nabasan: “Say kamarerwa et agbalot ompatey.”

Likud nid pandumaan na doktrina, say sakey met ya pampapagaan ko et say inka-nasyonalistiko na saray bangat na Mormon. Singa bilang, ibabangat dan say hardin na Eden et datin walad Jackson County, Missouri, U.S.A. Tan ibabaga na saray lider na Mormon ya usaren na Dios so gobierno na United States pian uleyan so mundo.

No talagan tua itan, panon to lay arum a bansa tan pati say bansan nanlapuan ko? Intepet ko iya ed sakey a kalangweran ya Mormon ya ipapasal a magmaliw ya misionero nen tinmawag ed siak ed telepono. Tinepet kod sikato no labay toy milaban ed kapara ton Mormon no man-guerra iray bansa da. Agko inilaloan ya “on” so iyebat to! Inusisak a maong iray papanisiaan ko tan nantetepet ak met ed saray lider na Mormon. Imbaga dan say ebat ed saray tepet ko et misteryoso tan onsabi panaon et natalosan lanlamang legan ya onliliwaway katuaan.

Adismaya ak ed imbaga da kanian tinepetan koy sarilik no akin et labay koy magmaliw ya misionero na Mormon. Naamtaan kon say sakey a rason et labay koy ontulong ed arum. Say sakey nin agustoan ko et no misionero ka, respetoen kay totoo. Balet no nipaakar ed Dios, talagan daiset labat so amtak. Anggaman manbabasa ak met na Biblia nensaman, agkon talaga itan inikdan na importansia. Agko amta so gagala na Dios parad totoo odino parad mundo.

Pigarad saray naamtaan kod panaaral ko na Biblia a kaiba iray Tasi nen Jehova et say ngaran na Dios, antoy nagawa ed ipatey, tan no antoy betang nen Jesus diad panumpal ed gagala na Dios. Magmamaliw ak lan pamilyar ed sayan balibalin libro, tan malikeliket kon ibabagad arum so katuaan a nanaaralan ko. Abayag ko lan amtan walay Dios, balet natan et sarag ko lay mitongtong ed sikato bilang maapit a Kaarok diad pikakasi. Nagmaliw ak ya Tasi nen Jehova nen Hulyo 12, 2004 tan kayari anem bulan, inggapok ya usaren so interon panaon ko parad Kristianon ministeryo.

Diad loob la na limaran taon, mantratrabaho ak ed world headquarters na Saray Tasi nen Jehova ed Brooklyn, New York. Panliliketan koy ontulong ed pangi-publish na Biblia tan saray nibase ed Biblia a literatura ya ontutulong ed minilyon a totoo ed interon mundo, tan itutuloy ko nin siansia so panutulong ed arum ya naamtaan so katuaan nipaakar ed Dios.