Ebat ed Saray Tepet ed Biblia
Talaga kasin Salita na Dios so Biblia?
Seguradon iilaloan mon say Salita na Dios et nikadkaduma, tan ontan so Biblia. Binilyon ya kopya na satan so niimprinta ed nilasus iran lenguahe. Say karunongan ya walad Biblia et walaan na pakayarin umanen so too.—Basaen so 1 Tesalonica 2:13; 2 Timoteo 3:16.
Amta tayon nanlapud Dios so Biblia lapud susto iray ibabaga na satan nipaakar ed arapen. Anggapoy toon makagawad satan. Singa bilang, say libron Isaias. Sakey a kopya na saya ya nisulat ed masulok a sakey siglo antis na inkianak nen Jesus so aromog ed sakey a kuweba ya asingger ed Dead Sea. Nabasad saya ya say syudad na Babilonia et agla napanayaman. Asumpal iya pigaran taon kayari ministeryo nen Jesus diad dalin.—Basaen so Isaias 13:19, 20; 2 Pedro 1:20, 21.
Panon ya nisulat so Biblia?
Say Biblia et nisulat diad loob na manga 1,600 taon. Walay manga 40 ya nansulat na Biblia, saksakey so tema ra tan ag-ira mankokontraan. Panon iyan agawa? Inggiya ira na Dios.—Basaen so 2 Samuel 23:2.
No maminsan, mitotongtong so Dios ed sarayan nansulat na Biblia panamegley na saray anghel, pasingawey, odino kugip. Mabetbet lan ipapaamta na Dios so ideya to diad pangiiyan tod satan ed kanonotan na saray nansulat, tan aabuloyan to ran manpili na salitan usaren da pian nipasabi so mensahe to.—Basaen so Apocalipsis 1:1; 21:3-5.
Ompan Nagustoan Mo Met
ESSENTIAL BIBLE TEACHINGS
Siopa so Autor na Biblia?
No totoo so angisulat, duga kasi ya ibagan Salita na Dios itan? Siopay nanlapuan na mensahe ya nabasa ed Biblia?
