Anggaan na mundo. No maminsan et pantotongtongan itan na totoo. Ompan say iisipen da et sakey iyan trahedya tan ompatey lan amin so totoo diad dalin. Manisia so arum ya asingsingger lan nagawa itan, lalo la no wala ray nababasa dan balita ya singa onia:

•   “Ag-arawi ya walay nagawan nuclear war. Balanglan ginagala itan, aksidente, odino lapu labat ed agpantatalosan.”—Bulletin of the Atomic Scientists.

•   “Diad apalabas ya dekada, amayamay so agawan bagyo, forest fire, anggapoy uran, pinmuti iray korales, sobray petang, tan dinmelap ed nanduruman pasen na mundo.”—National Geographic.

•   “Probleman maong so graben indakel na duron diad Africa komparad imbeneg iran taon.”—The Associated Press.

 Kasin walay nagawan trahedya ya manderal ed interon planetan dalin? Antoy ibabaga na Biblia?

 Andi. Ipapasegurod sikatayo na Salita na Dios, say Biblia, ya say dalin et mansiansia ya anggad angga. (Eclesiastes 1:4) Imbes ya deralen na Dios so pinalsa ton dalin, “deralen [to] iramay manederal ed dalin.”—Apocalipsis 11:18.

 Say tutukoyen na Biblia ya “mundo” ya mangangga et saray totoon agda uunoren so Dios tan gagawaen da labat no antoy labay da. Singa ginawa na Dios ed panaon nen Noe, deralen to ray “mauges a totoo.”—2 Pedro 2:5; 3:7.

 Ibabaga na 1 Juan 2:17: “Say mundo tan say pilalek na satan et naandi.” Ipapanengneng na satan ya bersikulo ya aliwan say literal ya planetan dalin so deralen na Dios, noagta saray totoon tuloytuloy ya manggagawa na mauges.

 Anggapoy nabasa ed Biblia no kapigan eksakton onsabi so anggaan. (Mateo 24:36) Balet ibabaga na satan ya asingger lay anggaan. Impasakbay na Biblia:

•   Wala ray nagawan guerra, eras, salot, tan maksil a yegyeg “ed nanduruman pasen.”—Mateo 24:3, 7, 14; Lucas 21:10, 11; Apocalipsis 6:1-8.

•   Magmaliw ya makasarili so dakel ya totoo. Singa bilang, magmaliw iran “maaro ed kuarta,” “agda amtay misalamat,” tan “anggapoy kontrol da ed sarili ra.”—2 Timoteo 3:1-5.

 Dakel so manisia ya manlapu la nen 1914, saray nagagawa ed mundo et mipara ed saray impasakbay na Biblia tan asingsingger la so anggaan. Parad kaaruman ya impormasyon, nengnengen iray artikulon “Ano ang Ipinakikita ng Kronolohiya ng Bibliya Tungkol sa Taóng 1914?” tan “Anto so Tanda na ‘Kaunoran Iran Agew,’ odino ‘Panaon na Anggaan’?”

 Say sampot ya libro na Biblia et nipaakar ed panaon ya “omparungtal so Katawan a Jesus.” (2 Tesalonica 1:6, 7) Nagawa iya no onsabi lay Jesus ya mangekal ed amin ya mauges diad dalin tan bendisyonan to iray mandadayew ed Dios.—1 Pedro 1:7, 13.

 Ipapaamta sirin na sampot ya libro na Biblia iray nagawad arapen. (Apocalipsis 1:1) Nabasa ditan iray maong a balita tan ilalo. (Apocalipsis 1:3) Ipapaamta na satan ya ekalen na Dios so amin ya nagagawan ag-inkahustisya tan gawaen ton paraiso so interon mundo. Diad satan ya panaon et anggapo lay mansakit, manirap, tan ompatey.—Apocalipsis 21:3, 4.

 Kasin labay mo nin naaruman so amtam ed saratan ya balibalin promisa na Biblia? Mangiyoopresi iray Tasi nen Jehova na libren panag-aral na Biblia. Sarag mo ran kontaken natan.