Nen imbebeneg iran taon, dinmalan so Venezuela ed sankagrabian ya problema ed ekonomiya tan maguloguloy situasyon diman. Oniay imbaga na sakey ya Tasi ya si Edgar: “Diad loob labat na pigaran taon et inmabeban maong so balor na kuarta tan saray kaykayarian na totoo, kanian singa kami inmalis ed arum ya bansa anta wadia kami labat ed abung mi!”

 Antoy akatulong ed si Edgar ed satan ya situasyon? Oniay imbaga to: “Inisip mi nen asawak ya si Carmen so alimbawa na saray misionero ya inmalis ed saray lugar ya mair-irap so bilay tan inaral da no panon so mankontento ed no antoy wala anggano aliwan komportable. Apakiwas kami ed satan ya pasimplien so bilay mi tan salien so agmi apasalan, singa say pantanem na sarili min naakan.”

 Balet aliwan satan labat so ginawa nen Edgar tan Carmen. Tinulongan da met iray kapananisiaan da, pati saray nadi-depress. (1 Tesalonica 5:11) Kuan nen Edgar, “Agmi labat ira niligliwa noagta pinaseseg mi met ira ya ontulong ed arum pian nalikna day liket.”—Gawa 20:35.

 Kagapoy COVID-19 pandemic, pinulongan nen Argenis iray kakanayon to. Pinmayag so arum ed sikara ya manaral na Biblia diad telepono.

 Anggapoy Internet na kakanayon nen Argenis pero labay to met ya nabantayan da so 2020 ya regional a kombension. Walay sakey ya Tasi ya asingger ed baley na saray kakanayon nen Argenis ya angiter ed sikara na rekording na programa. Insan ira binmayes na baleg ya TV tan speaker. Antis na programa, tinawagan ira nen Argenis tan indauloan to ray pikakasi. Lapud saman ya impanseet nen Argenis, apatira ed saray kakanayon to tan 15 ya arum nin totoo so inmatendi.

 Say sanasawan Jairo tan Johana labat so walaan na luluganan ed kongregasyon da, kanian mabulbulos dan inusar itan pian ontulong ed arum. Say sakey ya problema da et datdaiset so suplay na gasolina. Oniay kuan nen Jairo: “Pigay oras kamin ompipila pian manpagasolina, no maminsan sanlabi kami ni ingen ya akapila.”

 Sankalikna nen Jairo ya sulit so panguusar day luganan da pian ontulong ed arum. Kuan to: “No walay iyaakar mi ed saray agagi, malikeliket kami no ibabalikas day pisasalamat da ed si Jehova, aliwan diad sikami, ta Sikato so talagan mangiiter ed saray totoo to na saray pankaukolan da.”​—2 Corinto 9:11, 14.

 Anggano asingger lan man-30 so sakey ya sister ya si Norianni, nababaingan ta ompan isipen na arum ya uga-ugaw ni pian talagan makatulong ed arum. Balet binasa toy 1 Timoteo 4:12: “Anggapo komon so manleglemew ed inkaugaw mo. Imbes, magmaliw kan ehemplo ed saray matoor.”

 Apakiwas si Norianni ed satan ya teksto ya tulongan iray maedad la ed kongregasyon da. Tutulongan to ran makapanggaway sulat pian makapanpulong ira tan itatagar to ni ra ingen ya mangiyaral na Biblia. Tatawagan to met ira tan ipapawitan to ray makapaseseg ya mensahe. Kuan nen Norianni, “Impanengneng ed siak nen Jehova ya dakel so sarag kon gawaen.”

 Legan na sarayan mair-irap ya panaon, dakel ya subok so inarap na saray agagi tayo diad Venezuela. Anggaman ontan, nansiansia ran maseseg ed ministeryo da tan “makapaligliwa iran maong” ed sakey tan sakey.​—Colosas 4:11; 2 Timoteo 4:2.