Si Brooke et Tasi nen Jehova ya manaayam ed United States. Legan na COVID-19 pandemic, sikatoy manpupulong panamegley na letter writing. Kada simba, dakel so iiter ton sulat. Balet kayari sakey tan kapalduay taon, adismaya si Brooke. Ta diad amin ya sulat to, saksakey so nan-reply​—tan papatundaen toy Brooke ed pangiiter toy sulat ed sikato. Lapud saman, pakalikna to et singa useless labat iray gagawaen to.

 Aminsan, akatongtong nen Brooke si Kim, sakey met ya Tasi ya mantra-trabaho ed bangko. Inistorya to ed si Brooke so impitongtong to ed sakey ya customer da. Imbaga na samay customer ya wala kunoy naawat ton handwritten ya sulat manlapud sakey ya Tasi nen Jehova. Naamtaan nen Kim ya nanlapu manaya iman ed si Brooke! Diad sinmublay ya simba, pinmawil ed bangko imay customer. Nen akatongtong toy Kim, tinepet to no sarag toy makaatendi diad saray aral tayo, ya diad saman et nagagawa panamegley na video conferencing.

 Kayari to man, walay naamtaan nen Brooke ed katasian ton si David. Asalita to ya walay katrabaho ton akaawat na sakey ed saray sulat nen Brooke. Manbilib may katrabaho to ta handwritten may sulat. Say kuan to: “Ondakel ni komon iray totoon walay personal ya interes da ed arum.” Sinambot nen David iman ya pagkakataon pian napulongan imay katrabaho to, insan to imbaga ya iyawitan to na literatura tayo. Makapaliket ta pinmayag may katrabaho to!

 Agtayo amta no kapigan ontubo iray itatanem tayon bukel na katuaan diad ministeryo tayo. (Eclesiastes 11:5, 6) Balet, akatulong iyan eksperiensya nen Brooke pian sikatoy lalon onseseg ed kimey ya panagpulong tan panagbangat.​—1 Corinto 3:6.