On. Manisia iray Tasi nen Jehova ya say interon Biblia et “impuyan na Dios tan mausa-usar.” (2 Timoteo 3:16) Kaibad satan so Daan a Sipan tan Balon Sipan, a singa maslak ya tawag ed saratan. Diad Saray Tasi nen Jehova, tutukoyen da iratan ya seksion na Biblia bilang say Hebreon Kasulatan tan say Kristianon Griegon Kasulatan. Lapud saya, napaliisan min panisipen iray totoo ya say arum a parte na Biblia et daan la odino ag-importante.

 Diad tulong na Dios, oniay insulat na Kristianon apostol ya si Pablo: “Amin ya insulat nensaman et insulat pian nibangat itayo.” (Roma 15:4) Kanian, wala ray importantin impormasyon diad Hebreon Kasulatan parad sikatayo. Ontan met, akasulat ditan iray importantin agawad apalabas tan praktikal iran bilin.

•   Importante iran agawa. Akarekord ed Hebreon Kasulatan iray detalye nipaakar ed impamalsa tan say impankasalanan na too. No anggapo iratan ya impormasyon, agtayo naebatan iray tepet ya: Iner so nanlapuan tayo? Akin ya ompapatey so too? (Genesis 2:7, 17) Sakey ni, akarekord ed Hebreon Kasulatan no panon ya tinulongan nen Jehova a Dios iray totoon akaeksperiensyay liket tan irap a singa met ed sikatayo.​—Santiago 5:17.

•   Praktikal iran bilin. Saray libro na Biblia ya Uliran tan Eclesiastes, ya kabiangan na Hebron Kasulatan, et mankarga na karunongan ya naynay a praktikal. Wadtan iray bilin no panon ya magmaliw a maliket so pamilya (Uliran 15:17), nawalaay balansin panmoria ed trabaho (Uliran 10:4; Eclesiastes 4:6), tan no panon ya sankaabigan a nausar na saray kalangweran so bilay da (Eclesiastes 11:9–​12:1).

 Ontan met, nagunggonaan tayod panaral ed Mosaikon Ganggan ya akarekord ed Torah (say unonan limaran libro na Biblia). Anggaman ag-obligado iray Kristiano ed satan ya Ganggan, wadtan iray prinsipyo ya makatulong ed sikatayo pian magmaliw a maliket so bilay tayo.​—Levitico 19:18; Deuteronomio 6:5-7.