1, 2. (a) Dicon Ana no tabata contento ora cu e tabata prepara pa un biahe? (b) Kico nos por siña for di e relato di Ana?

ANA a cuminsa cu e preparacionnan pa e biahe y a purba di no pensa riba su problemanan. Esaki lo mester tabata un ocasion contento. Su casa, Elcana, tabatin e custumber di bay Silo tur aña cu henter e famia pa rindi adoracion eynan na e tabernakel. Y Jehova tabata kier pa e biahenan ey ta ocasionnan gososo. (Lesa Deuteronomio 16:15.) Sin duda, Ana a disfruta di e fiestanan for di mucha. Pero ultimo añanan, cos a cambia.

² Si, ta berdad cu su casa tabata stim’e, y esey tabata un bendicion. Pero Elcana tabatin un esposa mas, Penina. Parce cu Penina su meta tabata di amarga Ana su bida. El a haya un manera pa haci hasta e biahenan anual aki un tortura pa Ana. Con asina? Pero mas importante ainda, con Ana su fe den Jehova a yud’e enfrenta e situacion ey cu hopi biaha a parce insoportabel? Si abo tambe ta enfrentando problemanan cu ta kita tur bo goso den bida, e relato di Ana lo por anima bo.

3, 4 (a) Cua ta e dos problemanan grandi cu Ana a enfrenta den su bida, y kico a haci cada un di nan asina dificil? (b) E echo cu Ana no por a haya yiu a nifica cu Jehova tabata malcontento cu ne? Splica esey. (Wak e nota.)

³ Bijbel ta revela cu Ana tabatin dos problema grandi den su bida. E tabatin masha tiki control riba e prome problema, y riba e di dos e no tabatin ningun control mes. Di prome, e tabata den un matrimonio poligamo y mester a soporta e odio di e esposa rival. Di dos, e no por a haya yiu. * Esey ta algo cu lo preocupa cualkier hende muher cu ta anhela di haya yiu. Pero den Ana su tempo y cultura, infertilidad a causa un tristeza intenso, pasobra tur famia tabata depende riba yiu pa sigui carga e nomber di e  famia. Tabata un berguensa y deshonor si un muher no por a haya yiu.

⁴ Ana lo por a anda bon cu su dolor si no tabata pa Penina. Poligamia no tabata nunca un situacion ideal. Rivalidad, pleito y dolor di curason tabata cos di tur dia. Y e practica di tin mas cu un casa tabata completamente contrario na e norma cu Dios a establece den Hofi di Eden: monogamia, un casa so. (Gen. 2:24) Bijbel ta pinta un cuadro tristo di poligamia, y e historia amargo di e bida di famia di Elcana tabata un ehempel di esaki.

5. Dicon Penina kier a pone Ana sufri, y con el a haci esey?

⁵ Ana tabata e casa cu Elcana a stima mas. Segun tradicion Hudiu, el a casa cu Ana prome y algun aña despues cu Penina. Sea cu ta asina of no, un cos ta sigur: Penina tabata hopi jaloers mes riba Ana, y el a haya mil y un manera pa pone su rival sufri. E gran bentaha cu Penina tabatin ta su yiunan. El a haya un yiu tras di otro y, cu cada yiu, su arogancia a bira mas grandi. En bes di sinti duele di Ana y consol’e, Penina a coba den su herida. Bijbel ta bisa cu Penina “tabata provoc’e sin misericordia pa hacie sinti su mes fastioso.” (1 Sam. 1:6) Penina tabata haci cos pa malo. E kier a haci Ana dolor, y el a logra haci esey tambe.

6, 7. A pesar cu Elcana a purba di consola Ana, dicon Ana kisas no a cont’e kico tabata pasando?

⁶ Parce cu Penina su momento preferi pa haci esaki tabata e biahe anual pa e tabernakel na Silo, y e aña aki tabata mescos. Elcana tabata duna un porcion di e sacrificio cu el a ofrece na Jehova na cada un di e hopi yiunan cu Penina tabatin, si, na “tur su yiu hombernan y su yiu muhernan.” Pero Ana tabata haya su porcion so. Penina tabata keda recorda Ana cu e no por a haya yiu. E tabata haci esey na un manera asina cruel y arogante, cu Ana tabata yora amargamente y hasta perde su apetit. Naturalmente Elcana a ripara cu su Ana stima tabata hopi tristo y no tabata come, pues el a purba di consol’e. El a puntr’e: “Ana, pakico bo ta yora y pakico bo no ta come y pakico bo curason ta tristo asina? Mi no ta nifica mas pa bo cu dies yiu homber?”—1 Sam. 1:4-8.

⁷ E bon di Elcana tabata cu el a ripara cu Ana su tristeza tabatin di haber cu e echo cu e no por a haya yiu. Y Ana lo mester a aprecia e manera cu Elcana a sigur’e cu e tabata stim’e. Pero Elcana no a bisa nada di e malicia di Penina; ni Bijbel no ta indica  cu Ana a cont’e. Kisas Ana a pensa cu si e cont’e mes, ta pio so su situacion lo a bira. Elcana lo por a haci algo pa drecha e situacion? Esey lo no a pone Penina haya mas rabia riba dje? Y su cria- y yiunan lo no a bay imita su ehempel? Tur esey sin duda lo a laga Ana sinti mas y mas manera un hende straño den su propio cas.

8. Ora nos ta enfrenta malicia of inhusticia, dicon ta un consuelo pa corda cu Jehova ta e Dios di husticia?

⁸ Sea cu Elcana tabata sa of no con malicioso Penina tabata, Jehova Dios si a mira tur cos. Su Palabra ta duna nos e cuadro completo, y asina e ta duna un advertencia serio na tur hende cu pa motibo di jaloersheid y odio ta gusta haci cos malicioso cu ta parce inofensivo. Di otro banda, hende inocente cu stima paz, manera Ana, por haya un consuelo den e echo cu e Dios di husticia ta rectifica tur cos na Su debido tempo y na Su manera. (Lesa Deuteronomio 32:4.) Kisas Ana tabata sa esaki, pasobra ta cerca Jehova el a acudi pa yudansa.

9. Ki les nos por siña for di e echo cu Ana tabata dispuesto pa haci e biahe pa Silo a pesar cu e tabata sa kico su rival lo haci?

⁹ Mainta trempan cas tabata yen di actividad. Tur hende tabata preparando, hasta e muchanan. Pa e famia grandi aki bay Silo, nan lo mester a subi y baha e seronan di Efraim, un distancia di mas cu 30 kilometer. * Na pia, nan lo a tuma dos dia. Ana tabata sa kico su rival lo haci, pero toch e no a keda cas. Den esey tambe e ta un bon ehempel pa sirbidornan di Dios awe: No laga e mal comportacion di otro hende stroba nos di rindi adoracion na Dios. Si nos permiti esaki, ta net e ora ey nos lo perde e bendicionnan cu ta duna nos e forsa pa persevera.

10, 11. (a) Dicon Ana a bay e tabernakel asina cu el a haya un chens? (b) Con Ana a desahoga su curason cerca su Tata celestial?

¹⁰ Despues di a cana henter un dia riba e camindanan den sero cu tabata yen di bocht, e famia grandi porfin a yega den bisindario di Silo. Nan por a mira e stad riba un sero, rondona pa seronan mas halto ainda. Na caminda, Ana probablemente a pensa specialmente riba loke e kier bisa Jehova den oracion. Unabes cu nan a yega, e famia a sinta come hunto. Asina cu Ana a haya un chens, el a kita for di nan y a bay na e tabernakel di Jehova. Sumo Sacerdote Eli tabata sinta eynan banda di e porta, pero Ana no a ripar’e mes, pasobra su atencion tabata riba su  oracion na Dios. Aki na e tabernakel, e tabatin e pleno confianza cu su oracion lo ser scucha. Kisas ningun hende no por a compronde su dolor, pero su Tata den cielo si tabata por. Ana su curason tabata asina carga cu e no por a contene su lagrimanan mas.

¹¹ Ana a yora te snik y henter su curpa tabata tembla segun cu e tabata papia cu Jehova den su mes. Su lipnan tabata move mientras cu den su mente e tabata expresa su dolor. El a tuma su tempo pa haci oracion y a desahoga su curason cerca su Tata. Pero el a haci mas cu djis pidi Dios cumpli cu su deseo di haya un yiu. Ana tabata interesa no solamente den ricibi bendicion cerca Dios, sino tambe den duna Dios tur loke e tabata por. Pesey el a haci un promesa solem y a bisa cu si e haya un yiu homber, e lo duna e mucha na Jehova pa e sirbie pa resto di su bida.—1 Sam. 1:9-11.

12. Manera e ehempel di Ana a mustra, kico nos mester corda relaciona cu oracion?

¹² Pues, Ana a duna tur sirbidor di Dios un bon ehempel den loke ta hacimento di oracion. Jehova ta invita su pueblo pa papia cu ne cu frankesa, sin vacila, y pa desahoga nan preocupacionnan cerca dje mescos cu un mucha lo haci cerca un mayor cariñoso. (Lesa Salmo 62:8; 1 Tesalonicensenan 5:17.) Bou di inspiracion, apostel Pedro a skirbi e palabranan di consuelo aki relaciona cu oracion: “Tira tur boso inkietud riba [Dios], pasobra e ta interesa den boso.”—1 Ped. 5:7.

13, 14. (a) Ki conclusion robes Eli a core saca tocante Ana, y dicon? (b) Con e manera cu Ana a reacciona ta un ehempel sobresaliente di fe?

¹³ Lamentablemente, hende no ta mustra tanto comprension y compasion manera Jehova. Segun cu Ana tabata yora y haci oracion, un stem a spant’e. Tabata Eli, e sumo sacerdote, cu a para observ’e. Eli di cu ne: “Cuanto tempo mas lo bo sigui bebe burachi? Stop di bebe biña.” Eli a bis’e esey pasobra el a mira Ana su comportacion emocional, su lipnan cu tabata tembla y su yoramento. Pero en bes di puntra Ana kico a pas’e, el a core saca su mes conclusion: e muher tabata burachi.—1 Sam. 1:12-14.

¹⁴ Na e momento di angustia ey, lo tabata hopi doloroso pa Ana para scucha e acusacion sin base ey, y pio ainda, for di un homber cu tabatin un posicion asina respeta! En todo caso, Ana a bolbe pone un excelente ehempel di fe. E no a laga e imperfeccionnan di un hende strob’e den su adoracion na Jehova. El a contesta Eli cu respet y a splic’e su situacion. Anto Eli, kisas cu un tiki berguensa y cu un tono mas suave, a contest’e: “Bay na paz; y cu e Dios di Israel duna bo bo peticion cu bo a haci na dje.”—1 Sam. 1:15-17.

15, 16. (a) Ki beneficio Ana a ricibi ora el a desahoga su curason cerca Jehova y rindi adoracion na dje na e tabernakel? (b) Con nos por imita Ana su ehempel ora nos ta lucha cu sintimento negativo?

 ¹⁵ Pues, Ana a desahoga su curason cerca Jehova y a rindi adoracion na dje na e tabernakel. Ki efecto esey tabatin riba dje? E relato ta bisa: “E muher a coge su caminda bay y a come, y su cara no tabata tristo mas.” (1 Sam. 1:18) Ana a sintie alivia. Den un sentido, el a pone tur e peso di su carga emocional riba un lomba infinitamente mas hancho y fuerte cu di dje: esun di su Tata celestial. (Lesa Salmo 55:22.) Acaso tin problema cu ta mucho pisa pa Jehova? Hamas! Ni e tempo ey, ni awor, ni nunca!

¹⁶ Ora nos ta sinti nos desanima, demasiado carga of tristo, lo ta bon pa nos sigui e ehempel di Ana y papia cu frankesa cu Esun cu “ta scucha oracion.” (Sal. 65:2) Si nos haci esey cu fe, nos tambe lo ripara cu “e paz di Dios cu ta surpasa tur comprondemento” lo reemplasa nos tristeza.—Flp. 4:6, 7.

17, 18. (a) Con Elcana a apoya Ana su promesa? (b) Penina a perde ki gara riba Ana?

¹⁷ Su manece, Ana a bolbe bishita e tabernakel hunto cu Elcana. Probablemente Ana a cont’e di su peticion y su promesa, ya cu e Ley di Moises a bisa cu un esposo tabatin derecho di anula un promesa cu su esposa haci sin su consentimento. (Num. 30:10-15) Pero e homber fiel ey no a anula Ana su promesa. Mas bien, el a rindi adoracion na Jehova na e tabernakel hunto cu Ana prome cu nan a bay cas bek.

¹⁸ Ki ora Penina a realisa cu e no tabatin gara mas riba Ana? Bijbel no ta bisa esey, pero e expresion “no tabata tristo mas” ta indica cu di e dia ey padilanti Ana su animo a drecha. En todo caso, Penina a ripara cu su crueldad no tabatin ningun efecto mas riba Ana. Y Bijbel no ta menciona su nomber mas.

19. Ki bendicion Ana a ricibi, y con el a demostra cu el a compronde for di unda e bendicion ey a bin?

¹⁹ Segun cu lunanan a pasa, Ana su paz mental a bira un felicidad inmenso. E tabata na estado! Pero den su alegria, e no a lubida for di unda e bendicion aki a bin. Ora su yiu a nace, el a yam’e Samuel, cu a nifica “Nomber di Dios.” Esey evidentemente a referi na invoca e nomber di Dios, manera Ana a haci. Ana no a bay Silo e aña ey hunto cu Elcana y e famia. El a keda cas tres aña cu su yiu, te ora cu e yiu a kita for di pecho. Mientrastanto, el a prepara su mes mentalmente pa e dia cu lo e mester a despedi di su yiu stima.

20. Con Ana y Elcana a cumpli cu e promesa cu nan a haci na Jehova?

 ²⁰ E momento pa nan separa a yega, y tabata hopi duro pa Ana bay laga su yiu. Claro cu Ana tabata sa cu Samuel lo ta den bon man na Silo. Probablemente algun di e hende muhernan cu tabata sirbi na e tabernakel lo a cuid’e. Pero Samuel tabata hopi chikito ainda, y pa cualkier mama lo tabata dificil pa bay laga su yiu. A pesar di esey, Ana cu Elcana a trece e mucha, no di mala gana, sino yen di gratitud. Despues cu nan a ofrece sacrificio na e cas di Dios, nan a hiba Samuel cerca Eli y a cont’e tocante e promesa cu Ana a haci algun aña prome.

21. Con Ana su oracion a refleha con solido su fe tabata? (Wak tambe e cuadro “ Dos Oracion Remarcabel.”)

²¹ Anto Ana a haci un oracion cu Dios a considera digno di ser inclui den su Palabra inspira. Ora bo lesa su palabranan cu ta para skirbi na 1 Samuel 2:1-10, lo bo ripara con cada frase a refleha su fe profundo. El a alaba Jehova pa e manera maraviyoso cu el a uza su poder: su capacidad sin igual pa humilia hende arogante, pa bendiciona esnan oprimi, pa pone fin na un bida of hasta pa salba un hende for di morto. El a alaba su Tata pa su santidad unico, su husticia y su fieldad. Cu rason Ana por a bisa: “No tin ningun baranca manera nos Dios.” Jehova no a cambia. E ta completamente confiabel, un refugio pa tur hende oprimi y maltrata cu ta acudi na dje pa yudansa.

22, 23. (a) Dicon nos por ta sigur cu Samuel a crece sabiendo cu su mayornan tabata stim’e? (b) Ki bendicion mas Ana a haya cerca Jehova?

²² Un cos ta sigur: Samuel tabata privilegia di tin un mama cu asina hopi fe den Jehova. Aunke sin duda Samuel a sinti su falta masha hopi ora e tabata crece, nunca el a sintie bandona. Tur aña Ana tabata bishita Silo y trece un mantel sin  manga p’e uza den su sirbishi na e tabernakel. Cada pida di e paña cu Ana a cose na man tabata prueba di e amor y interes cu e tabatin pa su yiu. (Lesa 1 Samuel 2:19.) Nos por imagina con e tabata bisti su yiu e mantel nobo, drecha e paña na su curpa y mir’e cu amor segun cu cariñosamente e tabata papia palabranan di animacion cu ne. Esta un bendicion pa Samuel cu e tabatin un mama asina! Y ora el a crece, el a bira un bendicion pa su mayornan y pa henter Israel.

²³ Pero Jehova no a lubida riba Ana. El a bendicion’e cu cinco yiu mas. (1 Sam. 2:21) Pero kisas e bendicion di mas grandi pa Ana tabata su relacion cu su Tata, Jehova; un amistad cu segun añanan tabata pasa a bira mas fuerte. Nos ta spera cu, segun cu bo ta imita e fe di Ana, esey lo ta e caso cu bo tambe.