1, 2. Riba ki proyecto Noe cu su famia tabata traha, y cua tabata algun dificultad cu nan a enfrenta?

NOE a stret su lomba y rek su musculonan. Henter su curpa tabata haci dolor. Sinta riba un balki hancho, el a sosega un rato di su trabou y a wak e structura inmenso di e arca. Den aire tabatin un holo fuerte di breu cayente, y bo por a tende e zonido di herment di carpinte resona. For di caminda Noe tabata sinta, e por a mira su yiu hombernan traha duro riba varios parti di e inmenso structura di palo. Su yiunan, nan casa y su mes casa stima tabatin varios decada ta traha riba e proyecto aki hunto cu ne. Nan a yega basta leu cu e arca, pero ainda tabatin hopi cos mas di haci!

² E hendenan rond di nan tabata pensa cu ta loco nan ta. Mas e arca a haya forma, mas bofon nan tabata haci di e spiertamento cu Noe tabata duna nan, esta, cu lo bin un diluvio cu lo cubri henter mundo. Un desaster di tal magnitud a parce nan increibel y absurdo! Nan no por a compronde con e por a desperdicia su bida—y bida di su famia—riba un proyecto asina ridiculo. Pero Jehova, e Dios di Noe, tabata pensa completamente otro.

3. Den ki sentido Noe a cana cu Dios?

³ E Palabra di Dios ta bisa: “Noe tabata cana cu Dios.” (Lesa Genesis 6:9.) Esaki no a nifica cu Dios a baha riba Tera ni tampoco cu Noe a subi bay cielo. Kico el a nifica anto? Wel, Noe a obedece Jehova ‘al pie de la letra’ y a stim’e asina tanto cu, na moda di bisa, e cu Jehova a cana hunto como amigo. Miles di aña despues, Bijbel a bisa di Noe cu ‘pa medio di su fe, el a condena mundo.’ (Heb. 11:7) Con el a haci esey? Kico nos por siña for di e fe cu Noe a demostra?

4, 5. Dicon mundo a bay di malo pa pio den tempo di Noe?

⁴ Noe a lanta den un mundo cu dia pa dia tabata bay di malo pa pio. E situacion tabata malo caba den tempo di su bisawelo Enok, un homber husto cu tambe a cana cu Dios. Enok a profetisa cu un dia di huicio lo a bin riba tur hende malbado. Wel, den tempo di Noe maldad a yega na un nivel hamas bisto. De echo,  tabatin asina tanto violencia cu Jehova a haya cu e mundo di e tempo ey no tabata sirbi mas. (Gen. 5:22; 6:11; Judas 14, 15) Dicon e situacion a bira asina malo?

⁵ Pasobra algo hopi teribel a tuma luga entre e angelnan. Hopi tempo prome, un di e yiunan spiritual ey di Jehova a rebela contra dje. El a bira Satanas e Diabel ora el a calumnia Dios y pone Adam cu Eva cay den tentacion pa comete pica. Den tempo di Noe, otro angelnan tambe a rebela contra Jehova su gobernacion husto y a bandona e trabou cu el a duna nan den cielo. Nan a bin na Tera, tuma curpa di hende y casa cu muher bunita. E angelnan rebelde ey tabata orguyoso y egoista, y nan tabatin hopi mal influencia riba hende.—Gen. 6:1, 2; Judas 6, 7.

6. Ki efecto e gigantenan tabatin riba mundo, y kico Jehova a dicidi di haci?

⁶ Ademas, for di e union innatural entre angel y hende muher a nace yiu hombernan gigante cu forsa extraordinario. Como cu e gigantenan aki tabata asina cruel y malbado, mundo a bira mas perverso ainda. Ta pesey den bista di e Creador ‘maldad di hende tabata grandi riba Tera, y tur intencion di e pensamentonan di hende su curason tabata continuamente maldad so.’ Jehova a dicidi e ora ey cu denter di 120 aña lo e caba cu e sociedad malbado ey.—Lesa Genesis 6:3-5.

7. Dicon lo tabata dificil pa Noe cu su casa proteha nan yiunan contra e mal influencia di e tempo ey?

⁷ Manera bo por imagina, lo mester tabata dificil pa lanta un famia den un ambiente asina! Pero Noe a logra haci esey. El a haya un bon casa, y despues cu e tabatin 500 aña el a bira tata di tres yiu  homber: Sem, Cam cu Jafet. * E cu su casa mester a proteha nan yiunan contra e mal influencia cu tabata rondona nan. E gigantenan tabatin caracteristica cu tur mucha homber chikito ta admira: Nan tabata “hombernan poderoso” y “di fama.” Noe cu su casa no por a evita cu nan chikitinnan lo a tende di algun di e mal echonan di e gigantenan ey. Pero loke si nan por a haci ta siña nan yiunan e berdad fascinante tocante Jehova Dios, kende ta odia tur tipo di maldad. Nan mester a yuda e muchanan compronde cu e violencia y rebelion cu tabata reina riba Tera a haci Jehova hopi tristo.—Gen. 6:6.

8. Con mayornan awe por imita e ehempel di Noe cu su casa?

⁸ Mayornan awe por compronde bon den ki situacion Noe cu su casa tabata. Nos mundo tambe ta pesta cu violencia y rebelion. Hopi biaha, stadnan completo ta den gara di gang di hoben rebelde. Hasta mayoria di programa of wega pa mucha ta draai rond di temanan violento. Mayornan sabi ta haci nan maximo esfuerso pa contraresta e tipo di influencianan ey y ta siña nan yiunan tocante e Dios di paz, Jehova, kende un dia lo caba cu tur violencia. (Sal. 11:5; 37:10, 11) Pues mayornan, no desanima! Boso por siña boso yiunan haci loke ta corecto den un mundo malbado. Noe cu su casa a logra esey. Nan yiunan a crece bira bon hende, y nan tur tres a casa cu mucha muher cu tambe tabata dispuesto pa pone e Dios berdadero, Jehova, na prome luga den nan bida.

9, 10. (a) Ki mandato di Jehova a cambia e bida di Noe? (b) Kico Jehova a bisa Noe tocante e diseño y proposito di e arca?

⁹ Riba un dia, Noe su bida a cambia pa semper. Jehova a bis’e cu el a dicidi di pone un fin na e mundo di e tempo ey. Y Dios a duna su sirbidor stima e siguiente mandamento: “Traha pa bo mes un arca di palo.”—Gen. 6:14.

¹⁰ E arca aki no tabata un barco, manera algun hende ta kere. E no tabatin kiel ni timon ni curva. Basicamente, e tabata un caha hopi grandi mes. Jehova a duna Noe e midinan exacto di e arca, tambe algun detaye tocante su diseño y e instruccion pa fur’e di paden y pafo cu breu. Y el a splica Noe pakico: ‘Mi ta bay trece un diluvio di awa riba Tera, y tur loke tin riba Tera lo perece.’ Pero Jehova a cera un alianza, of acuerdo formal, cu Noe y a bis’e: “Bay den e arca—abo cu bo yiu hombernan y bo esposa, y esposanan di bo yiu hombernan hunto cu bo.” Ademas, Noe mester a hinca por lo menos dos di cada sorto di bestia den e arca. Ta esnan cu  tabata den e arca so lo a sobrevivi Diluvio cu tabata na caminda!—Gen. 6:17-20.

11, 12. Ki tarea enorme Noe tabatin su dilanti, y cu ki actitud el a hacie?

¹¹ Noe tabatin un tarea enorme su dilanti. E arca lo tabata hopi grandi mes: rond di 133 meter largo, 22 meter hancho y 13 meter halto. E tabata mas grandi cu un veld di futbol. Acaso Noe a core pa e asignacion aki? El a keha cu e tarea tabata mucho dificil, of el a cambia algun detaye pa e trabou bira mas facil p’e? No. Segun Bijbel, ‘Noe a haci conforme tur loke Dios a orden’e.’—Gen. 6:22.

¹² Construccion di e arca a tuma varios decada, kisas un 40 pa 50 aña. Nan mester a kap palo, hiba nan na e luga di construccion, traha biga for di nan y despues pega nan na otro. E arca mester tabatin tres piso, varios camber of compartimento y un porta na banda. Aparentemente, e tabatin tambe bentana na e rand parti ariba y un dak cu probablemente tabatin un nok meymey pa asina awa por a basha for di e dak.—Gen. 6:14-16.

13. Ki otro tarea Noe tabatin cu kisas tabata mas dificil cu construccion di e arca, y con e hendenan a reacciona riba esey?

¹³ Añanan a pasa, y e arca pocopoco a cuminsa haya forma. Noe lo mester tabata hopi contento cu e por a conta cu apoyo di su famia! Pero e tabatin un otro tarea cu kisas lo tabata mas dificil cu construccion di e arca. Bijbel ta bisa cu Noe tabata “un predicador di husticia.” (Lesa 2 Pedro 2:5.) Esaki ta nifica cu Noe tabatin e curashi pa spierta e hendenan di e mundo malbado ey cu tabatin un destruccion na caminda. Con nan a reacciona? Wel, Hesucristo a bisa cu e hendenan di e tempo ey “no a haci caso.” El a splica cu nan tabata asina ocupa cu asuntonan di bida diario—come, bebe y casa—cu nan no a presta atencion na Noe. (Mat. 24:37-39) Sin duda, hopi hende a haci bofon di Noe cu su famia; talbes algun di nan hasta a menas’e y atac’e. Kisas nan a hasta purba di sabotia e proyecto di construccion.

14. Ki les famianan cristian awe por siña for di Noe cu su famia?

¹⁴ A pesar di tur cos, Noe cu su famia no a entrega. Nan a sigui traha e arca, aunke e hendenan rond di nan tabata pensa cu ta loco nan ta y cu nan tabata perdiendo nan tempo. Famianan cristian awe por siña un bon les for di e fe cu Noe y su famia a demostra, ya cu nos ta bibando den e tempo cu Bijbel ta yama “e ultimo dianan” di e mundo aki. (2 Tim. 3:1) Hesus a bisa cu nos tempo lo ta mescos cu e tempo cu Noe a traha e arca. Pues, ora nos ta predica e mensahe di e Reino di Dios y hende reacciona cu un actitud indiferente, of nan haci bofon di nos of hasta  persigui nos, ta bon pa nos corda riba Noe, ya cu e tambe a enfrenta e tipo di dificultadnan ey.

15. Kico a sosode ora Noe tabatin casi 600 aña?

¹⁵ Despues di varios decada, construccion di e arca, pocopoco pero sigur, a yega na su etapa final. Ora Noe tabatin casi 600 aña, el a perde algun ser keri. Su tata, Lamek, a muri. * Cinco aña despues, su welo, Matusalen, a muri na edad di 969 aña; den Bijbel no tin ningun hende registra cu a biba mas largo cu ne. (Gen. 5:27) Tanto Matusalen como Lamek a biba tempo cu e prome hende, Adam, tabata na bida ainda.

16, 17. (a) Ki mensahe nobo Noe a ricibi ora e tabatin 600 aña? (b) Describi loke Noe cu su famia a presencia.

¹⁶ Ora patriarca Noe tabatin 600 aña, el a ricibi un mensahe nobo for di Jehova: “Bay den e arca, abo y tur hende di bo cas.” Tambe Dios a bisa Noe pa hiba tur sorto di bestia den e arca: shete di cada bestia considera limpi—of adecuado pa ofrece como sacrificio—y dos di tur otro bestia.—Gen. 7:1-3.

¹⁷ Esey lo mester tabata un bista impresionante! For di tur skina, cientos di bestia di tur tamaño, forma y caracter a cana, yanga, bula y lastra bin na cantidad. No pensa cu pober Noe mester a core  tras di e bestianan salbahe ey pa gara nan of lok nan pa drenta den e arca. E relato ta bisa cu nan mes “a bay ... cerca Noe den e arca.”—Gen 7:9.

18, 19. (a) Con nos por rasona cu hende cu tin problema pa acepta e sucesonan cu a tuma luga den e relato di Noe? (b) Con e manera cu Jehova a scoge pa salba e bestianan cu el a crea a demostra su sabiduria?

¹⁸ Algun hende tin problema pa acepta cu esaki a tuma luga. Nan no por imagina nan cu tur e bestianan ey por a biba na paz cu otro den un luga cera. Pero pensa un rato: E Creador di universo no tin e poder pa controla e bestianan cu el a crea? E no por haci nan manso si ta necesario? No lubida cu Jehova ta e Dios cu a parti Lama Cora den dos y a pone solo para keto. Lo e no por a cumpli cu tur e sucesonan describi den e relato di Noe? Claro cu si, y esey ta loke el a haci tambe!

¹⁹ Ta berdad cu Dios lo por a salba e bestianan di un otro manera si e tabata kier. Pero den su sabiduria, el a opta pa uza un manera cu ta laga nos corda riba e responsabilidad cu el a duna hende originalmente, esta, di cuida tur loke ta biba riba e Tera aki. (Gen. 1:28) Awe, hopi mayor ta uza e relato di Noe pa siña nan yiunan cu tanto hende como bestia ta importante pa Jehova, pasobra ta e a crea nan.

20. Noe cu su famia lo mester tabata hopi druk cu kico durante e ultimo siman prome cu Diluvio?

²⁰ Jehova a bisa Noe cu den shete dia e Diluvio lo bin. E siman ey lo mester tabata hopi druk pa e famia. Nos por imagina cuanto trabou nan tabatin pa pone tur cos na nan luga den e arca:  e bestianan, cuminda pa e bestianan, cuminda pa nan mes y tambe tur nan pertenencianan. E esposa di Noe y e esposanan di Sem, Cam y Jafet siguramente a haci esfuerso pa prepara paden di e arca di tal manera cu nan por a biba un poco comodo den dje.

21, 22. (a) Dicon e actitud indiferente di e hendenan den tempo di Noe no mester sorprende nos? (b) Ki ora Noe su bisiñanan a stop di haci bofon di dje y di su famia?

²¹ Con e hendenan a reacciona ora nan a mira tur esey? Nan a keda mescos, “nan no a haci caso”, a pesar di tur evidencia cu Jehova tabata bendiciona Noe y su trabou. Nan lo mester a mira con e bestianan a bin for di tur skina pa drenta e arca. Pero nan actitud indiferente no mester sorprende nos, pasobra awe ta mescos. Hende no ta haci caso di e evidencia innegabel cu nos ta bibando den e ultimo dianan di e mundo aki. Y manera apostel Pedro a profetisa, hopi hende ta haci bofon di esnan cu si ta haci caso di e spiertamento di Dios. (Lesa 2 Pedro 3:3-6.) Asina tambe e hendenan a haci bofon di Noe cu su famia.

²² Ki ora nan a stop di haci bofon? Bijbel ta bisa nos cu unabes Noe a hinca su famia y e bestianan den e arca, Jehova “a cera e porta su tras.” E accion divino ey sin duda a tapa boca di cualkier hacido di bofon cu tabata ey banda. Y si esey no a silencia nan, e awasero a hacie! Ora awa a cuminsa yobe, el a sigui y sigui yobe te ora el a cubri henter mundo, precies manera Jehova a bisa.—Gen. 7:16-21.

23. (a) Con nos por sa cu Jehova no tabatin placer den e morto di e hendenan malbado di tempo di Noe? (b) Dicon ta sabi pa imita e fe di Noe awe?

²³ Acaso Jehova a keda contento cu tur e hendenan malbado ey a muri? No! (Eze. 33:11) Al contrario, el a duna nan tur oportunidad di mundo pa cambia y haci loke ta corecto. Nan lo por a haci esey? Si, pasobra e manera cu Noe a hiba su bida a demostra cu nan por a obedece Dios y sobrevivi Diluvio. Noe a cana cu Jehova, es decir, el a obedece Dios den tur cos; el a mustra cu hende por hiba un bida cu ta agrada Dios. Den e sentido ey su fe a ‘condena e mundo’ di su tempo, ya cu su fe a saca na cla e gran maldad cu tabata caracterisa e hendenan di su tempo. Y no esey so, su fe a resulta tambe den salbacion di dje y di su famia. Si bo imita e fe di Noe, bo tambe lo por salba bo mes y bo sernan keri. Mescos cu Noe, bo tambe por cana cu Jehova Dios como bo Amigo. Y bo por disfruta di e amistad ey pa semper!