Apenas algun decada pasa, mayornan tabatin por lo menos un bon chens pa tabata e promenan pa papia cu nan yiu tocante sex. Ademas, nan tabata por a splica nan yiu e topico aki gradualmente, segun su edad y necesidad.

Pero tur esey a cambia. E buki The Lolita Effect ta bisa: “Awe, hasta mucha chikito ta scucha y mira cos cu tin di haber cu sex, y cada bes tin mas contenido sexual den programa y buki pa mucha.” E realidad nobo aki ta yuda mucha of ta perhudica nan?

Material sexual ta plama tur caminda. Deborah Roffman ta bisa lo siguiente den su buki Talk to Me First: “Den combersacion, propaganda, pelicula, buki, cantica, programa di television, mensahe electronico, video game, borchi di propaganda y pantayanan di computer y telefon tin asina tanto contenido sexual cu hopi [teenager y hasta mucha] ta conclui, a lo menos inconscientemente, cu sex mester ta ... e cos di mas importante.”

Propaganda tambe tin parti di e culpa. E hendenan cu ta promove y bende paña provocativo pa mucha ta siña nan for di un edad jong pa pone hopi enfasis riba nan apariencia. E buki So Sexy So Soon ta bisa: “Comerciantenan sa cu mucha tin e deseo pa nan amigonan acepta nan, y nan ta probecha di esey. Tur e imagen- y productonan cu conotacion sexual no ta pa pone mucha haci sex, sino pa pone nan cumpra cos.”

No ta suficiente pa djis sa tocante sex. Djis sa con un auto ta funciona no ta haci bo un chauffeur responsabel. Di mes manera, djis sa tocante sex no kiermen cu lo bo uza e conocemento ey na un manera sabi.

Conclusion: Awe, ta mas importante cu nunca pa siña bo yiu pa entrena su “capacidad di compronde” pa e por “distingui loke ta bon for di loke ta malo.”—Hebreonan 5:14.

Papia cu bo yiu. Hasta si bo ta sinti bo incomodo pa papia cu bo yiu tocante sex, e ta bo responsabilidad. Cumpli cu ne.—Principio di Bijbel: Proverbionan 22:6.

Papia tocante e asunto tiki tiki. En bes di tin djis un combersacion largo cu bo yiu tocante sex, uza e momentonan cu boso ta hunto pa papia tocante dje. Kisas ora boso dos so ta den auto of ta haciendo trabou di cas hunto. Pa yuda bo yiu expresa su mes, hacie pregunta. Por ehempel, en bes di puntr’e, “abo ta gusta e propagandanan provocativo ey?” bo por puntr’e, “dicon bo ta pensa cu comerciantenan ta uza e tipo di imagennan ey pa promove nan productonan?” Despues cu bo yiu contesta, bo por puntr’e, “con abo ta sinti tocante di esey?”—Principio di Bijbel: Deuteronomio 6:6, 7.

Tene cuenta cu edad di bo yiu. Hasta prome cu mucha cuminsa bay scol, nan por siña e nomber corecto di organonan sexual, y nan por siña con pa proteha nan mes for di hende cu ta abusa sexualmente di mucha. Ora e muchanan bira un tiki mas grandi, e mayornan por splica nan tocante sex na un manera simpel. Pa ora nan yega edad di teenager, nan mester compronde tur aspecto fisico y moral di sex.

Siña bo yiu norma y balor. For di ora cu bo yiu ta chikito, siñ’e tocante integridad, ser honesto y respetuoso. E ora ey lo ta hopi mas facil pa papia cu ne tocante sex. Ademas, yud’e compronde bon cla kico ta bo norma y balor. Por ehempel, si bo ta pensa cu no ta bon pa tene relacion sexual prome cu casa, bisa bo yiu esey. Despues, splic’e dicon ta malo y peligroso pa tene relacion sexual prome cu casa. E buki Beyond the Big Talk ta bisa: “Teenager cu sa cu nan mayornan lo no aproba di sex prome cu casamento, tin menos chens di tene relacion sexual.”

Pone un bon ehempel. Pone na practica loke bo ta siña bo yiu. Por ehempel, bo sa hari ora un hende conta chiste dobel sentido? Bo sa bisti paña provocativo of ta flirt? Si bo ta haci e cosnan ey, chens ta grandi cu bo yiu lo no scucha bo ora bo ta papia cu ne tocante sex.—Principio di Bijbel: Romanonan 2:21.

Keda positivo. Sex ta un regalo di Dios. Ora un pareha tene relacion sexual na e momento apropia, esta, ora nan ta casa, esey por ta algo cu ta duna nan hopi placer. (Proverbionan 5:18, 19) Splica bo yiu cu ora e casa, e tambe lo por disfruta di e regalo aki sin mester trata cu e consecuencianan cu ta bin di tene relacion sexual prome cu casa.—1 Timoteo 1:18, 19.