UN BON nomber, of reputacion, ta asina importante den algun pais cu ley ta proteha un hende su reputacion. Esey por inclui proteccion contra calumnia of acusacion falso sea por escrito of verbal. Esaki ta haci nos corda un dicho antiguo: “Bon fama i bon reputashon ta bal mas ku abundansia di oro i plata.” (Proverbionan 22:1, BPK) Con nos ta logra haya un bon nomber y gana respet di otro hende? Bijbel ta duna nos algun sugerencia excelente con pa logra esey.

Por ehempel, ban wak loke Bijbel ta bisa na Salmo 15. Con e salmista a contesta e pregunta: Ken por biba den e tabernakel of tent di Dios? Wel, el a bisa: “Esun cu ... ta haci husticia, y ta papia berdad den su curason. E no ta calumnia ... ni ta haci malo na su prohimo, ni ta lansa reproche contra su amigo; den kende su bista e malbado ta desprecia ... Maske e hura den su desbentaha, e no ta cambia esey ... ni e no ta acepta placa pasa bou di mesa.” (Salmo 15:1-5) Abo lo no respeta un hende cu ta biba segun e bunita principionan ey?

Un otro cualidad cu por yuda bo gana respet di hende ta humildad. Proverbionan 15:33 ta bisa: “Prome cu honor ta bin humildad.” Pensa un rato riba lo siguiente: Un hende humilde ta mira den ki aspectonan e por mehora y e ta traha duro pa logra esey. Tambe, un hende humilde ta dispuesto pa pidi despensa si e ofende un hende. (Santiago 3:2) Pero di otro banda, un hende orguyoso ta sinti su mes ofendi lihe. Proverbionan 16:18 ta bisa: “Orguyo ta bin prome cu destruccion, y un spirito arogante prome cu caida.”

Pero, kico lo bo haci si un hende daña bo nomber? Bo mester reacciona mesora y saca bo rabia? Puntra bo mes: Si mi purba defende mi mes, mas hende lo haya sa di e calumnia? Maske tin bes ta apropia pa bay corte, Bijbel ta duna nos un bon conseho: “No sea pura pa pleita bo caso.” Mas bien, “regla un asuntu ku e persona envolví [BPK].” (Proverbionan 25:8, 9) * Ora nos deal cu e situacion na un manera trankil y cauteloso, nos por scapa tur e placa cu mester paga na corte y abogado.

Bijbel no ta solamente un buki di religion. E ta tambe un buki confiabel cu por guia nos den nos bida diario. Ora nos aplica e bon consehonan di Bijbel, nos ta cultiva excelente cualidadnan cu por yuda nos gana respet di hende y un bon nomber.