Algun pareha casa ta enfrenta nan retonan di mas grandi despues cu nan yiunan a crece y a bay biba riba nan mes. Ora e yiunan bay, e mayornan ta sinti un bashi. Esaki por pone nan sinti cu nan ta dos hende straño den cas. M. Gary Neuman, un consehero di famia, a skirbi: “Mi ta duna conseho na hopi hende cu no sa con pa mehora nan relacion cu otro. Na momento cu nan yiunan no ta biba na cas mas, e mayornan tin menos en comun y no sa kico pa papia cu otro.” *

Abo cu bo casa ta pasando den un situacion asina? Si esey ta e caso, boso por mehora boso relacion cu otro. Pero prome, ban wak kico por ta algun factor cu a distancia boso for di otro.

Pa hopi aña, e yiunan tabata tur cos pa e mayornan. Hopi mayor ta pone necesidad di nan yiunan prome cu nan matrimonio. Claro cu nan ta haci esaki cu tur bon intencion. Como resultado, nan ta enfoca asina hopi riba nan rol como mama of tata cu nan ta neglisha nan casa. Y ora cu e yiunan no ta biba na cas mas, e pareha lo ripara esey. Un esposa di 59 aña di edad a bisa: “Ora e muchanan tabata na cas, sikiera nos tabata haci cos hunto.” Pero el a admiti cu despues cu nan yiunan a bay, “nos cada un tabata pa nos cuenta.” Dado momento, el a hasta bisa su esposo: “Ta parce cu nos no por soporta otro.”

Algun pareha no ta prepara pa e etapa nobo aki di nan bida. E buki Empty Nesting ta bisa: “Hopi pareha ta sinti cu ta comosifuera cu nan ta recien casa.” Nan ta sinti cu nan no tin hopi en comun mas. Esey ta pone cu hopi esposo y esposa ta cuminsa enfoca riba nan propio interesnan, y maske nan ta casa, nan ta bira manera dos hende cu ta djis biba den e mesun cas.

E bon noticia ta cu boso por evita di cay den e trampa aki y hasta disfruta di e beneficionan di e capitulo nobo aki di boso bida. Laga nos wak con Bijbel por yuda boso logra esey.

Acepta e cambio. Bijbel ta bisa cu ora un yiu bira adulto e “lo bandona su tata y su mama.” (Genesis 2:24) Como mayornan, boso meta tabata pa train boso yiunan desaroya e habilidadnan necesario pa ora e dia ey yega. Si boso mira e asunto aki for di e punto di bista ey, boso lo mester ta orguyoso cu boso yiunan a bay biba riba nan mes pasobra boso a logra boso meta.—Principio di Bijbel: Marco 10:7.

Claro cu semper boso lo keda mayor. Sinembargo, boso relacion cu boso yiunan a cambia. Awor, boso no ta bisa nan mas kico pa haci sino boso ta duna nan conseho. Di e manera aki, boso por mantene un bon relacion cu boso yiunan mientras tur boso atencion ta bay principalmente na boso casa. *—Principio di Bijbel: Mateo 19:6.

Expresa boso preocupacionnan. Conta bo casa con bo ta sinti awor cu e yiunan no ta biba na cas mas, anto scucha ora bo casa ta expresa su sintimentonan. Tene pasenshi y mustra comprension. Probablemente lo tuma tempo pa boso relacion bira fuerte bek, pero esey ta bale la pena.—Principio di Bijbel: 1 Corintionan 13:4.

Pensa kico boso por haci hunto. Papia tocante metanan cu boso lo kier alcansa hunto of riba actividadnan cu boso lo kier haci como pareha. E echo cu boso a lanta yiu a duna boso hopi experencia. Lo no ta algo bunita si boso uza e experencia ey pa yuda otro hende?—Principio di Bijbel: Job 12:12.

Rebiba boso amor pa otro. Pensa riba e cualidadnan cu a pone boso sinti boso mes atrai na otro. Como pareha, recorda tur loke boso a pasa aden hunto y riba e momentonan dificil cu boso a pasa aden. Pues, e capitulo nobo aki den boso bida tambe por resulta di ta un capitulo bunita. De echo, si boso tur dos haci esfuerso, boso lo tin un matrimonio mas feliz y boso lo rebiba e amor cu a trece boso hunto prome cu boso a casa.