BIJBEL NO TA UN BUKI DI CIENCIA, PERO E TA CONTENE INFORMACION CU TA MUCHO MAS AVANSA PA E TEMPO CU NAN A SKIRBIE. BAN WAK ALGUN EHEMPEL.

Nos universo tabatin un principio?

Un tempo cientificonan destaca tabata kere firmemente cu no. Awendia mayoria di nan ta acepta cu nos universo tabatin un principio. Bijbel a bisa esey bon cla hopi tempo pasa.—Genesis 1:1.

Ki forma nos planeta tin?

Den tempo di antiguedad, hopi hende tabata kere cu Tera ta plat. Den siglo 5 prome cu Cristo, cientificonan Griego a bisa cu Tera ta rondo. Pero hopi tempo prome cu esey, den siglo 8 prome cu Cristo, e escritor di Bijbel Isaias a referi na “e circulo di Tera.”—Isaias 40:22.

Cielo lo por caba na nada un dia?

Segun Aristoteles, un cientifico Griego di siglo 4 prome cu Cristo, solamente cosnan riba Tera por caba na nada, mientras cu e cielo yen di strea no por cambia ni caba na nada. E filosofia ey a prevalece pa hopi siglo. Pero den siglo 19 cientificonan a formula e concepto cu tur materia, sea den cielo of riba Tera, tin tendencia di bay atras. Lord Kelvin, un di e cientificonan cu a yuda formula e concepto aki, a ripara loke Bijbel ta bisa tocante cielo y Tera: “Nan tur lo gasta manera un bisti.” (Salmo 102:25, 26) Kelvin a yega na e conclusion cu, manera Bijbel ta bisa, Dios por scoge pa evita cu esey lo sosode cu Su creacion.—Eclesiastes 1:4.

Kico ta tene e planetanan, manera Tera, na nan luga?

Segun Aristoteles, tur strea, planeta y otro cos den cielo ta cera den bolanan transparente, cada un den e otro mas grandi cu ne, mientras cu planeta Tera ta e centro di nan tur. Den siglo 18 di nos era, cientificonan a cuminsa acepta e idea cu kisas strea- y planetanan ta colga den un espacio bashi. Pero den e buki di Job, di siglo 15 prome cu Cristo, nos ta lesa cu e Creador “ta colga Tera riba nada.”—Job 26:7.

MASKE BIJBEL NO TA UN BUKI MEDICO, ALGUN DI SU PRINCIPIONAN TA REFLEHA CONOCEMENTO TOCANTE SALUD CU TA HOPI AVANSA PA SU TEMPO.

Isola hende cu ta malo.

E Ley di Moises a bisa cu mester tene hende cu lepra separa for di otro hende. Ta te ora epidemia a presenta den Edad Medio, dokternan a siña aplica e principio aki cu te awe hende ta haya un bon medida.—Levitico, capitulo 13 y 14.

Laba man despues di mishi cu un curpa morto.

Te cu final di siglo 19, ainda dokternan hopi bes tabata mishi cu hende morto y despues bay atende hende bibo sin laba nan man prome. Esey tabata causa morto di hopi hende. Sinembargo, e Ley di Moises a bisa cu ken cu mishi cu un curpa morto lo bira ceremonialmente impuro. E Ley a hasta prescribi cu nan mester a uza awa pa haci nan mes limpi ceremonialmente den casonan asina. E practicanan religioso ey sigur tabatin beneficio pa salud di hende tambe.—Numbernan 19:11, 19.

Deshaci di sushi di hende.

Tur aña, mas cu mey miyon mucha ta muri di diarea, principalmente debi cu nan no ta deshaci di sushi di hende debidamente. E Ley di Moises a bisa cu mester a dera sushi di hende pafo di campamento.—Deuteronomio 23:13.

Ki dia por circuncida yiu homber?.

E Ley di Dios a stipula cu mester circuncida un yiu homber ocho dia despues cu el a nace. (Levitico 12:3) Sanger di yiu recien naci ta cuaha na un nivel normal despues di e prome siman. Den tempo biblico, prome cu tabatin tratamento medico avansa, e cos sabi cu mayornan por a haci pa proteha nan yiu ta di warda un siman prome cu sircuncid’e.

E relacion entre salud emocional y salud fisico.

Investigadornan medico y cientificonan ta bisa cu emocionnan positivo manera goso, speransa, gratitud y ser dispuesto pa pordona tin un bon efecto riba nos salud. Bijbel ta bisa: “Un curason contento ta un bon remedi, ma un spirito abati ta seca weso.”—Proverbionan 17:22.