Mas nos siña conoce e cualidadnan di un persona, mas pega nos amistad cu ne por bira. Asina tambe, mas nos siña conoce Jehova su cualidadnan, mas pega nos amistad cu ne por bira. Di tur Dios su cualidadnan maraviyoso, cuater ta sobresali: su poder, su sabiduria, su husticia y su amor.

“Ay Señor DIOS! Mira, ta abo a traha e cielonan y Tera pa medio di bo gran poder.”​—JEREMIAS 32:17.

Nos por mira Dios su poder den creacion. Por ehempel, ora bo ta para pafo den solo, kico bo por sinti riba bo cuero? E calor di solo, no ta berdad? Eigenlijk loke bo ta sinti ta e resultado di e poder cu Jehova tin pa crea. Con potente solo ta? Den su nucleo, e temperatura ta mas o menos 15.000.000 grado Celsius. Cada seconde, solo ta saca mes tanto energia cu e explosion di cientos di miyones di bom nuclear.

Pero toch, nos solo ta chikito na comparacion cu e miles di miyones di streanan incontabel den universo. Cientificonan ta calcula cu un di e streanan mas grandi, cu yama UY Scuti, su diameter ta alrededor di 1.700 biaha mas grandi cu esun di solo. Si bo pone UY Scuti na luga di solo, lo e pasa nos planeta bay y yega te na e orbita di Jupiter. Esaki kisas lo yuda bo compronde mas mihor kico Jeremias tabata kiermen ora el a bisa cu Jehova  Dios a traha cielo y Tera, esta, e universo, cu su gran poder.

Con nos por beneficia di Dios su poder? Nos bida ta depende di Dios su creacion, manera entre otro di solo y tur su otro obranan maraviyoso den creacion. Ademas, Dios ta uza su poder pa beneficia nos personalmente. Con asina? Den prome siglo, Dios a duna Hesus poder pa haci milager. Bijbel ta bisa: “Ciego ta mira atrobe, coho ta cana bon, leproso ta cura, sordo ta tende, morto ta lanta.” (Mateo 11:5) Kico di nos tempo? Wel, Bijbel ta bisa cu “e ta duna forsa na esun cansa” y cu “esnan cu spera riba SEÑOR lo haya forsa renoba.” (Isaias 40:29, 31) Dios por duna “poder cu ta surpasa esun di hende” pa yuda nos enfrenta prueba y problema di bida of pa sigui persevera. (2 Corintionan 4:7) Bo no ta sinti bo conmovi pa bira amigo di un Dios cu stima nos asina hopi cu e ta cla pa yuda nos cu su poder?

“O SEÑOR, ki numeroso bo obranan ta! Cu sabiduria bo a traha tur.”​—SALMO 104:24.

Mas nos siña tocante e cosnan cu Dios a crea, mas su sabiduria lo impresiona nos. Tin un ramo di ciencia cu yama biomimetica cu ta studia Jehova su creacion pa nan copia algun diseño den naturaleza pa mehora loke nan a diseña. Nan a diseña for di cos chikito manera klittenband of velcro te na cosnan grandi manera avion.

E curpa humano ta e ehempel mas impresionante di Dios su sabiduria. Laga nos papia un rato riba e manera cu un baby ta desaroya. E proceso ta cuminsa cu un cel fertilisa, cu tin tur e instruccionnan genetico necesario. E cel ey ta dividi den hopi cel cu ta parce otro. Pero na e debido tempo, e celnan ta cuminsa dividi den cientos di diferente tipo di cel, manera entre otro, cel di sanger, cel di nervio y cel di weso. No ta dura hopi cu diferente sistema di organo ta aparece y ta cuminsa funciona. Den solamente nuebe luna, un solo cel ta desaroya den un baby cu ta consisti di miles di miyones di cel. E sabiduria cu tin den e diseño ey ta pone hopi hende yega na e mesun conclusion cu e escritor di Bijbel, kende a bisa: “Mi ta alaba bo, pasobra mi ta traha na un manera temerosamente maraviyoso.”​—Salmo 139:14.

Con nos por beneficia di Dios su sabiduria? Nos Creador sa kico nos tin mester pa nos por ta feliz. Y como cu e tin hopi conocemento y comprondemento, e por duna nos bon conseho mediante Bijbel. Por ehempel, Bijbel ta urgi nos: “Sigui ... pordona otro libremente.” (Colosensenan 3:13) Esey ta un bon conseho? Sigur cu si. Investigadornan a ripara cu hende cu ta pordona ta drumi mas mihor. Ademas, esey ta baha nan presion. Y tambe nan tin menos chens di haya depresion of otro problema di salud. Dios ta mescos cu un amigo sabi cu ta interesa den nos y cu nunca ta stop di duna nos yudansa y bon conseho. (2 Timoteo 3:16, 17) Abo lo kier tin un amigo asina?

“SEÑOR ta stima husticia.”​—SALMO 37:28.

Dios semper ta haci loke ta corecto. Bijbel ta bisa: “Leu sea di Dios di haci maldad, y di e Todopoderoso di comete inikidad.” (Job 34:10) Semper e ta husga cu husticia, manera e salmista a bisa: “Abo lo husga e pueblonan cu rectitud.” (Salmo 67:4) Como cu Jehova “ta wak curason”, e no ta laga su mes ser engaña pa apariencia; e sa kico ta berdad y ta husga cu husticia. (1 Samuel 16:7) Ademas, Dios sa di tur inhusticia y corupcion cu ta tuma luga aki riba Tera, y el a priminti cu pronto “e malbadonan lo wordo corta kita for di Tera.”​—Proverbionan 2:22.

Pero esey no kiermen cu Dios ta un hues cruel cu ta cla pa castiga hende. E ta mustra misericordia ora ta apropia. Bijbel ta bisa: “SEÑOR ta yen di compasion y gracia”; e ta mustra compasion hasta na e malbadonan cu arepenti di curason. Bo no ta haya cu esey ta berdadero husticia?​—Salmo 103:8; 2 Pedro 3:9.

Con nos por beneficia di Dios su husticia? Apostel Pedro a bisa: “Dios no ta haci distincion di persona, sino cu e ta acepta tur hende di tur nacion cu ta tem’e y cu ta haci loke ta corecto.” (Echonan 10:34, 35) Nos por beneficia di Dios su husticia pasobra e nunca ta mustra faboritismo ni haci distincion di persona. Nos por haya su aprobacion y bira su adoradornan sin importa nos rasa, nacionalidad, educacion of posicion social.

Door cu Jehova kier pa nos compronde y beneficia di su husticia, el a duna nos un consenshi. Bijbel ta describi nos consenshi como un ley “skirbi den [nos] curason” cu ta bisa nos si loke nos ta haci ta bon of malo. (Romanonan 2:15) Con nos ta beneficia di esey? Si nos consenshi ta bon entrena, e por motiva nos pa evita di haci loke ta malo of inhusto. Anto si nos haci un fout, e por  conmove nos pa arepenti y stop di haci loke ta malo. Si, un bon comprondemento di Dios su sentido di husticia ta yuda nos hala cerca dje.

“Dios ta amor.”​—1 JUAN 4:8.

Bijbel no ta bisa cu Dios ta poder, sabiduria of husticia, e ta demostra e cualidadnan ey, pero Bijbel ta bisa si cu Dios ta amor. Dicon? Pasobra pa motibo di su poder e por actua, y su husticia y sabiduria ta guia su accionnan. Pero Jehova su amor ta motiv’e pa actua. Tur loke e ta haci, e ta haci cu amor.

Aunke Jehova no tabata falta nada, su amor a conmov’e pa crea criaturanan inteligente, tanto den cielo como riba Tera. Y nan tur por beneficia di su amor y cuido. Generosamente el a prepara Tera como un hogar ideal pa su creacion humano. Y e ta sigui mustra amor pa tur hende pasobra “e ta laga su solo sali riba mal hende y bon hende y ta laga awa cay riba hende husto y inhusto.”​—Mateo 5:45.

Ademas, “Jehova tin masha cariño, compasion y misericordia.” (Santiago 5:11) E ta mustra cariño na tur esnan cu sinceramente ta haci esfuerso pa siña conoc’e y hala cerca dje. E ta presta atencion na nan. Es mas, Bijbel ta bisa: “E ta interesa den boso.”​—1 Pedro 5:7.

Con nos por beneficia di Dios su amor? Nos ta disfruta di un bunita bahada di solo. Nos ta sinti un alegria ora nos tende un baby hari. Y nos ta aprecia masha hopi e amor cu nos famia tin pa nos. Kisas ningun di e cosnan aki ta indispensabel pa nos biba, pero nan ta enrikece nos bida inmensamente si.

Nos ta beneficia tambe di un otro muestra di Dios su amor: oracion. Bijbel ta conseha nos: “No sea ansha tocante nada; mas bien, den tur cos, pa medio di oracion y suplica hunto cu gradicimento, laga Dios sa kico ta boso peticionnan.” Mescos cu un tata amoroso, Jehova ta desea pa nos cont’e tur nos preocupacionnan. Si nos haci esey, e ta priminti di duna nos generosamente e paz “cu ta surpasa tur comprondemento.”​—Filipensenan 4:6, 7.

Den e articulo aki nos a papia brevemente riba e cualidadnan principal di Dios: su poder, su sabiduria, su husticia y su amor. Bo ta haya cu e cualidadnan aki a yuda bo conoce Dios mas mihor? Si bo kier conoce Dios mas mihor ainda, nos ta anima bo pa sigui lesa pa bo haya sa kico Dios a haci caba pa bo y kico lo e haci pa bo den futuro.