ROND mundo, religionnan manera catolico romano, catolico ortodox y budismo ta rekeri di nan lidernan religioso y di miembro di clero pa nan hiba un bida di celibato. Di otro banda, hopi hende ta mira e practica aki como e causa di e ola di escandalonan sexual cu lidernan religioso di varios religion ta meti aden.

Pesey, kisas bo ta puntra bo mes: Bijbel ta bisa cu sirbidornan di Dios mester hiba un bida di celibato? Pa contesta e pregunta ey, laga nos analisa e origen y desaroyo di e practica aki y kico Dios ta pensa di dje.

Segun e Encyclopædia Britannica, celibato kiermen “e estado di no ta casa, pues, di abstene di sex, y esey ta conta generalmente pa un lider religioso of un persona devoto.” Na 2006, den un discurso pa e Curia Romano, Papa Benedicto XVI a conecta celibato obligatorio cu “un tradicion cu a cuminsa den un epoca djis despues di e Apostelnan.”

Sinembargo, e cristiannan di prome siglo no a hiba un bida di celibato. De echo, apostel Pablo, kende a biba den e prome siglo, a spierta e cristiannan berdadero tocante hombernan cu lo bin cu “declaracionnan inspira engañoso” y cu lo “prohibi casamento.”—1 Timoteo 4:1-3.

Ta durante siglo dos e idea di un bida di celibato pa miembronan di clero a haci su entrada den iglesianan “cristian.” E buki Celibacy and Religious Traditions ta splica cu esey “a coincidi cu un periodo di restriccion sexual cu a cuminsa den e Imperio Romano.”

Durante e siguiente siglonan, concilionan di iglesia y e asina yama Tatanan di Iglesia a promove  un bida di celibato pa miembronan di clero. Nan tabata pensa cu relacion sexual ta haci hende impuro y cu pastoornan lo no ta apto e ora ey pa cumpli cu nan debernan. A pesar di esey, e Encyclopædia Britannica ta mustra cu “te cu siglo 10, ainda tabatin hopi pastoor y hasta algun obispo cu tabatin esposa.”

Durante e Concilionan Laterano di 1123 y 1139 cu a tuma luga na Roma, celibato a bira obligatorio pa clero, y esey ta e posicion oficial di Iglesia Catolico Romano te dia di awe. Cu e medida aki, e Iglesia lo no a perde poder ni placa mas ya cu pastoornan casa tabata laga propiedad di Iglesia como herencia pa nan yiunan.

Dios su Palabra, Bijbel, ta mustra bon cla kico Dios ta pensa di celibato. Den Bijbel nos ta lesa loke Hesus a bisa tocante hende cu, mescos cu ne, a keda soltero “pa motibo di e Reino di cielo.” (Mateo 19:12) Apostel Pablo a menciona algo similar ora el a papia di cristiannan cu a scoge pa sigui su ehempel y keda soltero “pa causa di e bon noticia.”—1 Corintionan 7:37, 38; 9:23.

Pero ni Hesus ni Pablo no a manda sirbidornan di Dios hiba un bida di celibato. Hesus a bisa cu hende cu por keda soltero tin un “don”, y no ta tur su siguidornan tin esey. Ora Pablo a skirbi tocante “hende cu no a casa nunca”, el a admiti francamente: “Mi no tin ningun ordo di Señor, pero mi ta duna mi opinion.”—Mateo 19:11; 1 Corintionan 7:25.

Ademas, Bijbel ta mustra cu hopi sirbidor di Dios di prome siglo, entre nan apostel Pedro, tabata hombernan casa. (Mateo 8:14; Marco 1:29-31; 1 Corintionan 9:5) De echo, como cu den e mundo romano di e tempo ey, tabata comun pa hende practica inmoralidad sexual, Pablo a skirbi cu si un superintendente cristian tabata casa, e mester tabata “esposo di un esposa” y cu su “yiunan [mester tabata] sumiso” na dje.—1 Timoteo 3:2, 4.

Eseynan no tabata matrimonionan celibato, pasobra Bijbel ta bisa bon cla cu “esposo [mester] cumpli cu su deber pa cu su esposa” y cu un pareha casa no mester “nenga di cumpli cu e deber” di tene relacion sexual cu otro. (1 Corintionan 7:3-5) Pues, ta bisto cu un bida di celibato no ta un rekisito di Dios ni e no ta obligatorio pa sirbidornan di Dios.

Si celibato no ta obligatorio, dicon Hesus y Pablo a bisa cu ta bon pa keda soltero? Pasobra ora un hende ta soltero, e tin mas oportunidad pa comparti e bon noticia cu otro hende. Un hende soltero por duna mas di su mes como cu e no tin e preocupacionnan cu un hende casa tin.—1 Corintionan 7:32-35.

Wak e ehempel di David. El a dicidi di laga su trabou bon paga na Ciudad di Mexico pa bay biba den un area di cunucu na Costa Rica pa e por siña hende tocante Bijbel. E ta haya cu e echo cu e tabata soltero tabata un bentaha? David a bisa: “Sigur cu si. Tabata un reto pa mi adapta mi na un cultura nobo y siña biba den condicionnan diferente. Pero como cu ta pa mi so mi mester a percura, tabata mas facil pa mi adapta mi mes.”

Claudia, un cristian soltero cu a muda bay sirbi caminda tin mester di mas predicador, a bisa: “Mi ta disfruta di mi sirbishi na Dios. Mi fe y mi relacion cu Dios ta bira mas fuerte ora mi mira con e ta cuida mi.”

No mester ta un carga pa keda soltero. Claudia a sigui bisa: “No ta importa si bo ta casa of soltero, lo bo ta feliz si bo duna Jehova Dios lo mihor di bo mes.”—Salmo 119:1, 2.