Dios a crea curpa di hende cu un capacidad maraviyoso di cura su mes. Ora algo corta, raspa of hinca e curpa saludabel di un hende, e curpa “ta cuminsa un proceso complica pa cura heridanan grandi y chikito.” (Johns Hopkins Medicine) Mesora e curpa ta reacciona pa stop e sangramento door di aumenta circulacion pa e herida cu substancianan cu na mes momento ta repara e herida y fortifica e tehido rond di dje.

ALGO PA PENSA RIBA: Si nos Creador a traha curpa di hende di tal manera cu e por cura herida, nos lo mester duda cu Dios tin e capacidad pa cura nos heridanan emocional? E salmista a bisa: “E ta cura esnan di curason kibra, y ta mara nan heridanan.” (Salmo 147:3) Pero si bo ta sufri di un trauma emocional, con bo por tin sigur cu Jehova lo mara bo heridanan, tanto awor como den futuro?

Dios ta bisa nos: “No tene miedo, pasobra mi ta cu bo; no desmaya, pasobra mi ta bo Dios. Lo mi fortalece bo, si, lo mi yuda bo.” (Isaias 41:10) Un hende cu sa cu Jehova ta stim’e tin e paz mental y e forsa necesario pa enfrenta problema. Apostel Pablo a yama e paz ey “e paz di Dios cu ta surpasa tur comprondemento.” Pablo a bisa tambe: “Pa tur cos mi tin forsa pa medio di esun cu ta duna mi poder.”—Filipensenan 4:4-7, 9, 13.

Bijbel ta fortalece nos fe den loke Jehova a priminti di haci pa humanidad. Por ehempel, Revelacion 21:4 y 5 (wak e cita riba e siguiente pagina) ta bisa nos loke Dios lo haci y dicon nos por confia den dje:

• “Lo e seca tur lagrima” for di nos wowo. Jehova lo elimina tur cos cu ta pone nos sufri y ansha, hasta preocupacionnan cu pa otro hende ta parce insignificante.

• E Rey Todopoderoso di creacion, kende ta “sinta riba e trono” celestial, lo uza su poder y autoridad pa evita cu nos lo bolbe sufri y pa yuda nos ora nos tin mester di yudansa.

• Jehova ta sigura nos cu su promesanan ta “digno di confianza y berdad.” Esey kiermen cu Dios ta uza su reputacion como un garantia cu e lo cumpli cu su promesanan.

“‘Lo e seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas. E cosnan cu tabata pasa antes no t’ey mas.’ Y Esun sinta riba e trono a bisa: ‘Tende! Mi ta traha tur cos nobo.’ Tambe e di: ‘Skirbi, pasobra e palabranan aki ta digno di confianza y berdad.’”—Revelacion 21:4, 5.

Bijbel y creacion ta yuda nos conoce nos Tata celestial. Mientras cu creacion ta duna nos un invitacion indirectamente pa bira bon amigo di Dios, Bijbel ta haci esey directamente: “Hala cerca Dios, y lo e hala cerca boso.” (Santiago 4:8) Echonan 17:27 ta bisa: “E no ta masha leu for di cada un di nos.”

Mas tempo bo dedica na siña conoce Dios, mas convenci lo bo bira cu “e ta interesa den [bo].” (1 Pedro 5:7) Kico ta e beneficionan ora bo ta confia den Jehova?

Laga nos wak e caso di Toru, un meneer di Japon. Aunke su mama a haci esfuerso pa lant’e como un cristian, el a desvia y a drenta e mundo violento di mafia Japones cu yama yakuza. E ta conta: “Mi tabata pensa cu Dios ta odia mi, y cu morto di mi hendenan, specialmente di esnan cu mi tabata stima, tabata Dios su forma di castiga mi.” Toru ta reconoce cu e ambiente violento ey a hacie bira “un persona cruel y sin gevoel.” Papiando di su ambicionnan, e ta corda: “Mi kier a muri jong y bira famoso matando un hende cu tin mas fama cu mi.”

Pero, ora Toru cu su esposa, Hannah, a studia Bijbel, Toru a haci cambionan grandi den su bida  y a cambia su punto di bista. Hannah a bisa: “Mi a mira cu mi propio wowo con mi esposo a cambia.” Awor, Toru no tin duda mas, el a bisa: “Dios ta existi y e ta stima cada un di nos. E no kier pa ningun hende muri y e ta dispuesto pa pordona esnan cu arepenti di curason di nan picanan. Nos por cont’e cosnan cu nos lo no conta ningun hende y cu ningun hende lo no compronde. Pronto Jehova lo caba cu tur problema, sufrimento y dolor. Hasta awor, e ta yuda nos na maneranan inespera. E ta stima nos y ta yuda nos ora nos ta deprimi.”—Deuteronomio 32:36.

Manera nos por a mira den caso di Toru, ora un hende sa cu Dios por y pronto lo caba cu tur loke ta pone nos yora di tristeza, no solamente esey ta duna nos un speransa confiabel pa futuro, sino tambe un mihor bida awor. Asina mes, hasta den un mundo yen di sufrimento, bo por beneficia di e amor di Dios.