Den e relato di creacion den e buki biblico di Genesis, nos ta lesa cu Dios a bisa e prome homber, Adam: “Di tur palo di e hofi bo mag come libremente, ma di e palo di conocemento di bon y malo lo bo no come, pasobra e dia cu bo come di dje, lo bo muri sigur.” (Genesis 2:16, 17) E palabranan ey ta mustra claramente cu si Adam a obedece Dios su mandamento, lo e no a muri pero lo el a sigui biba den e Hofi di Eden.

Lamentablemente, en bes di obedece Dios y sigui biba, Adam a scoge pa ignora Dios su mandamento y a come for di e fruta prohibi ora su casa Eva a ofrec’e e fruta. (Genesis 3:1-6) Anto te awe nos ta sufri e consecuencianan di nan desobediencia. Apostel Pablo a splica esey asin’aki: “Pa medio di un hende pica a drenta mundo, y morto pa medio di pica, y asina morto a pasa pa tur hende pasobra nan tur a peca.” (Romanonan 5:12) E “hende” ey tabata Adam. Pero, ta ki pica el a comete, y dicon esey a hiba na morto?

Loke Adam a haci, esta, desobedece Dios su Ley deliberadamente, ta pica. (1 Juan 3:4) Y e castigo pa pica ta morto, manera Dios a bisa Adam. Si Adam y su futuro descendientenan a obedece Dios su mandamento, nan lo no a peca ni no tabatin nodi muri. Dios no a crea hende pa muri sino pa biba, anto pa semper.

 Pues, sin duda, manera Bijbel ta bisa, morto “a pasa pa tur hende.” Pero, un parti di nos ta sigui biba despues cu nos muri? Hopi lo bisa “si”, cu nos tur tin un parti inmortal cu yama alma. Pero si ta asina, ta gaña Dios a gaña Adam anto. Pasobra si un parti di nos ta sigui biba den un otro region despues cu nos muri, e ora ey morto lo no ta castigo pa pica manera Dios a bisa. Pero Bijbel ta bisa: “Ta imposibel pa Dios gaña.” (Hebreonan 6:18) En realidad, ta Satanas a gaña Eva ora el a bis’e: “Siguramente [lo bo] no muri!”—Genesis 3:4.

Esey ta lanta e pregunta: Si e siñansa di inmortalidad di alma ta basa riba un mentira, kico ta sosode anto ora un hende muri?

E relato di creacion den Genesis ta bisa: “SEÑOR Dios a forma hende di e stof di tera y a supla e rosea di bida den su nanishi; y hende a bira un ser bibo.” E expresion “un ser bibo” ta un traduccion di e palabra Hebreo néfesh, * cu ta nifica literalmente un criatura cu ta hala rosea.—Genesis 2:7.

Pues, Bijbel ta mustra bon cla cu hende no a ser crea cu un alma inmortal, sino cu cada hende ta “un ser bibo.” Pesey mes, maske cuanto bo busca, lo bo no haya un texto di Bijbel cu ta uza e palabranan “alma inmortal.”

Ya cu Bijbel no ta bisa cu hende tin un alma inmortal, dicon hopi religion ta siña net lo contrario? Pa haya contesta riba e pregunta aki, nos mester bay bek te den tempo di Egipto di antiguedad.

Herodoto, un historiador Griego di siglo 5 prome cu Cristo, a bisa cu e Egipcionan tabata “e prome nacion cu a promove e idea di inmortalidad di alma.” E Babilonionan, un otro nacion di antiguedad, tambe tabata kere den alma inmortal. Pa e tempo cu Alexander e Grandi a conkista Medio Oriente na aña 332 prome cu Cristo, filosofonan Griego a promove e siñansa aki, y masha lihe el a plama den henter e Imperio Griego.

Den e prome siglo, dos secta hudiu prominente, e esenenan y e fariseonan, a siña hende cu e alma ta sigui biba despues cu e curpa muri. The Jewish Encyclopedia ta bisa: “E hudiunan a cuminsa kere den inmortalidad di alma bou di influencia di ideanan Griego y principalmente via filosofia di Plato.” Di mes manera, Josefo, un historiador hudiu di prome siglo, a bisa cu e siñansa aki a bin, no for di e Scritura Santo, sino for di “e opinion di e Griegonan”, y el a considera esey como un coleccion di leyenda y mito.

Segun cu e influencia di e cultura Griego a sigui plama, hende cu a bisa cu nan ta cristian tambe a acepta e siñansa pagano ey. Segun e historiador Jona Lendering: “Plato su teoria cu un tempo nos alma tabata biba den un luga mihor y cu awor nos alma ta biba den un mundo decai a habri caminda pa e cristiannan adopta e filosofia di Plato.” Di e manera ey, e iglesia “cristian” a acepta e doctrina pagano di alma inmortal, y esey a bira un parti fundamental di su creencianan.

Den e prome siglo, apostel Pablo a duna e spiertamento aki: “E palabra inspira ta bisa bon cla cu mas despues algun hende lo cay for di fe, pasobra nan ta presta atencion na declaracionnan inspira engañoso y na siñansa di demoño.” (1 Timoteo 4:1) Ki cierto e palabranan ey tabata! E doctrina di alma inmortal ta apenas un ehempel di “siñansa di demoño.” E no ta basa riba Bijbel, sino riba religionnan pagano y filosofia di antiguedad.

Afortunadamente, Hesus a bisa: “Boso lo conoce e berdad, y e berdad lo haci boso liber.” (Juan 8:32) Ora nos haya conocemento exacto di e berdad di Bijbel, nos ta ser libra for di e siñansanan y practicanan cu ta deshonra Dios y cu hopi religion di mundo ta promove. Ademas, e berdad den e Palabra di Dios ta libra nos di tur tradicion y supersticion cu tin di haber cu morto.—Wak e cuadro “ Unda e Mortonan Ta?”

No tabata e intencion di nos Creador pa hende biba solamente 70 of 80 aña riba Tera pa despues bay biba pa eternidad den un otro region. Su proposito original tabata pa su creacion humano biba pa semper aki riba Tera como su yiunan obediente. E proposito aki ta demostra e amor cu Dios tin pa humanidad, y esaki lo no fracasa. (Malakias 3:6) E salmista inspira pa Dios a sigura nos di esey ora el a bisa: “E hustonan lo hereda e Tera, y lo biba den dje pa semper.”—Salmo 37:29.