“Bini Serca Mi, . . . y Lo Mi Refresca Boso”

Hobennan Cu Ta Manera Gota di Serena Refrescante

SIN duda Hesucristo a referi tambe na su siguidonan mas jong ora el a bisa: “Bini serca mi, . . . y lo mi refresca boso.” (Mateo 11:28, NW) Ora hende a cuminsa trece nan chikitinnan serca Hesus, su disipelnan a purba di stop nan. Pero el a bisa nan: “Laga e muchanan bin serca mi; no stroba nan.” Hesus asta “a tuma [e muchanan] den su brasa y a bendiciona nan.” (Marco 10:14-16) Hesus a mustra bon cla cu e tawata gusta mucha.

Bijbel ta conta di homber- y mohenan jong, y tambe di hobennan y mucha chikito cu tawata fiel y cu a pone bon ehempel den sirbi Dios. E buki di Salmo ta profetisa di “hobennan” cu ta manera gota di serena. Tambe e ta papia di “yoncuman” y “birgen” cu ta alaba e nomber di Yehova.—Salmo 110:3; 148:12, 13.

Un Luga pa Hobennan Briya y Bai Dilanti

E comparacion cu gota di serena ta na su luga, pasobra serena ta liga cu abundancia y bendicion. (Genesis 27:28) Gota di serena ta suave y refrescante. Den e tempo aki di e presencia di Cristo, gran cantidad di hoben cristian ta ofrece nan mes boluntariamente y ansiosamente. Manera gota di serena refrescante, hopi mucha homber y mucha mohe ta sirbi Dios cu alegria y ta yuda nan compañeronan di adoracion.—Salmo 71:17.

No ta otro hende so hobennan cristian ta refresca; nan mes tambe ta haya refrescamento den nan sirbishi. E organisacion di Dios ta percura un ambiente den cua nan por briya y bai dilanti. Door di pega na normanan moral halto, hobennan tin un relacion intimo cu Dios. (Salmo 119:9) Den e congregacion tambe nan ta participa den actividadnan saludabel y ta haya bon amigo. Eseinan ta factornan cu ta contribui na un bida yen di satisfaccion y proposito.

‘Un Curacion y un Refrescamento’

Hobennan cristian mes ta sinti cu nan ta manera gota di “serena”? Sera conoci cu Tania, un mucha mohe hopi activo den e congregacion y cu ta dedica gososamente mas cu 70 ora pa luna den sirbishi. Con e ta sinti su mes? “Mi ta sinti mi refresca y anima”, e ta bisa. “E echo cu mi por tin Yehova y su organisacion aki riba tera den mi bida ta ‘un curacion y un refrescamento’ pa mi.”—Proverbionan 3:8, NW.

Ariel, un otro sirbido hoben cu ta traha tempo completo den sirbishi, ta  aprecia e nutricion spiritual cu e ta ricibi den e congregacion. “Asisti na reunion di congregacion, congreso y asamblea y alimenta mi mes na Yehova su mesa spiritual, realmente ta refresca mi spiritualmente”, e ta remarca. “Loke ta anima mi ta e echo cu mi sa cu na tur parti di mundo tin hende ta traha mescos cu mi.” E ta describi e fuente principal di refrescamento bisando: “Ta masha refrescante pa por tin Yehova como amigo, specialmente ora mi tende of mira e efectonan teribel cu e sistema aki tin riba hende.”—Santiago 2:23.

Cu su 20 aña, Abishai ta sirbi como evangelisado di tempo completo y sirbido ministerial den e congregacion. E ta describi su experencia cu e palabranan aki: “Mi ta sinti mi refresca pasobra mi sa con pa trata cu e hopi problemanan cu hobennan ta enfrenta awe. E berdad di Bijbel a yuda mi keda enfoca riba loke mi mester haci pa por sirbi Yehova cu henter mi alma.”

Durante su prome añanan como teenager, Antoine tawata gusta rabia. Un biaha el a dal un colega di scol cu stul, y el a hinca un otro cu potlot. Antoine sigur no tawata un persona refrescante! Pero siñansa di Bijbel a cambia su comportacion. Awor e tin 19 aña y ta sirbido ministerial y sirbido di tempo completo den congregacion. E ta bisa: “Mi ta gradici Yehova cu El a permiti mi conoc’e y yuda mi mira e necesidad pa eherce dominio propio y cambia mi bida. Di e manera aki, mi a evita hopi problema.”

Otronan ta tuma nota di e actitud refrescante di hobennan cristian. Matteo ta un Testigo hoben na Italia. Su juffrouw di scol a dicidi cu ken cu papia palabra malo den klas lo tin cu paga un but chikito. Algun tempo despues, e muchanan a pidi e juffrouw pa e kita e regla, pasobra nan a bisa cu “ta imposibel pa stop di papia palabra malo.” Matteo ta splica: “Pero juffrouw a bisa cu esei no ta berdad, y el a uza ami, un Testigo di Yehova, como ehempel, gabando mi dilanti henter e klas pasobra mi ‘lenga’ si no ta sushi.”

Den un klas yen di mucha desobediente na Tailandia, e meneer di scol a yama Racha di 11 aña pa bin para dilanti klas y a gab’e pa su comportacion, bisando: “Pakico boso tur no ta sigui su ehempel? E ta haci su best na scol y ta comporta su mes bon.” Anto el a bisa e studiantenan: “Mi kier sa cu boso tin cu bira Testigo di Yehova manera Racha pa boso drecha boso comportacion.”

Ta dushi pa mira miles di hoben cristian siña conoce Yehova miho y haci su boluntad. Hobennan excelente asina ta mustra hopi sabi pa nan edad. Dios por yuda nan haya exito den nan bida actual y tambe duna nan un futuro glorioso den e benidero mundo nobo. (1 Timoteo 4:8) Den e desierto spiritual di e mundo actual yen di hobennan desgusta y frustra, nan ta forma un contraste refrescante!