Confia Yehova Completamente den Tempo di Angustia

“Dios ta nos refugio y fortalesa, un pronto ausilio den tempo di angustia.”—Salmo 46:1.

1, 2. (a) Ki ehempel ta mustra cu djis bisa cu nos ta confia den Dios no ta basta? (b) Dicon nos tin cu haci mas cu simplemente bisa cu nos ta confia den Yehova?

TA FACIL pa bisa cu nos ta confia den Dios. Pero mustra cu nos accionnan cu nos ta hacie, ta completamente un otro cos. Por ehempel, ya pa hopi tempo e frase In God We Trust (Den Dios Nos Ta Confia) ta aparece riba cen di papel y moneda Mericano. * Na 1956, Congreso Mericano a pasa un lei cu a declara e expresion ei como e lema nacional di Merca. Pero ta un ironia cu hopi hende—no solamente den e pais ei sino rond mundo—ta pone mas confiansa den placa y rikesa material cu den Dios.—Lucas 12:16-21.

2 Como cristiannan berdadero nos tin cu haci mas cu simplemente bisa cu nos ta confia den Yehova. Mescos cu ‘fe sin obra ta morto’, asina tambe cualkier declaracion cu nos haci cu nos ta confia den Dios, no ta nifica nada a menos cu nos echonan ta apoya esei. (Santiago 2:26) Den e articulo anterior nos a siña cu nos ta manifesta nos confiansa den Yehova ora nos ta acudi na dje den oracion, ora nos ta busca guia y instruccion for di su Palabra y su organisacion. Laga nos ban considera awor con nos por sigui e tres pasonan aki den tempo di angustia.

Ora Nos Perde Trabou of Nos Entrada Ta Hopi Abou

3. Ki presionnan economico sirbidonan di Yehova ta confronta den e “temponan trabahoso” aki, y con nos por sa cu Dios ta dispuesto pa yuda nos?

3 Como cristiannan, den e “temponan trabahoso” aki nos ta confronta e mesun presionnan economico cu otro hende. (2 Timoteo 3:1)  Pesei, nos por lanta un dia perde trabou. Of kisas nos no tin otro opcion sino di traha hopi ora pa tiki placa. Den tal circunstancia kisas ta dificil pa nos ‘provee pa nos hendenan di cas.’ (1 Timoteo 5:8) E Dios Haltisimo ta dispuesto pa yuda nos na momentonan asina? Definitivamente cu si! Claro cu Yehova no ta proteha nos contra tur dificultad di bida den e mundo djawe. Sinembargo, si nos ta confia den dje, e palabranan di Salmo 46:1 lo resulta cierto den nos caso: “Dios ta nos refugio y fortalesa, un pronto ausilio den tempo di angustia.” Pero con nos por demostra cu nos ta confia Yehova completamente den tempo di angustia economico?

4. Kico nos por pidi den oracion ora nos ta confronta problemanan financiero, y con Yehova ta reacciona riba e tipo di oracionnan ei?

4 Un manera pa demostra nos confiansa den Yehova ta door di acudi na dje den oracion. Pero kico nos por pidi den oracion? Wel ora nos ta confronta problemanan financiero, kisas nos lo tin mas mester di sabiduria practico cu nunca. Definitivamente anto, pidi pa esei den oracion! Yehova su Palabra ta sigura nos: “Ma si cualkier di boso falta sabiduria, lag’e pidi Dios, kende ta duna na tur hende generosamente y sin reproche, y esaki lo wordo duna na dje.” (Santiago 1:5) Si, pidi Yehova sabiduria—esta e capasidad di haci bon uzo di conocemento, comprondemento y discernimento—pa nos por tuma decisionnan sabi y scohe loke ta corecto. Nos amoroso Tata celestial ta sigura nos cu lo e scucha e tipo di oracionnan ei. Semper e ta dispuesto pa dirigi berea of paso di esnan cu ta confia den dje cu henter nan curason.—Salmo 65:2; Proverbionan 3:5, 6.

5, 6. (a) Dicon nos por acudi na e Palabra di Dios pa haya yudansa pa trata cu presionnan economico? (b) Kico nos lo por haci pa mengua nos ansiedad ora nos perde trabou?

5 Acudi na e Palabra di Dios pa haya guia ta un otro manera pa demostra cu nos ta confia den Yehova. Su recordatorionan sabi cu nos ta haya den Bijbel ta “masha sigur”, es decir, digno di confiansa. (Salmo 93:5) Aunke Bijbel a ser completa mas cu 1.900 aña pasa, e buki inspira ei ta contene conseho confiabel y comprondemento penetrante cu por yuda nos trata miho cu presionnan economico. Considera algun ehempel di Bijbel su sabiduria.

6 Rei sabi Salomon a bisa hopi tempo pasa: “Soño di e homber trahado ta dushi, sea cu e ta come poco of hopi. Ma bariga-yen di e homber rico no ta lag’e drumi.” (Eclesiastes 5:12) Pa nos drecha, limpia, mantene y proteha nos pocesionnan material ta exigi tempo y placa. Pesei ora nos perde trabou, kisas nos por probecha di e ocasion pa reexamina nos estilo di bida y purba distingui entre loke nos realmente tin mester y loke no ta necesario. Kisas ta sabi pa nos haci algun cambio pa asina mengua nos ansiedad. Por ehempel, nos lo por simplifica nos bida, podise door di bai biba den un cas mas chikito of door di elimina pocesionnan material innecesario?—Mateo 6:22, NW.

7, 8. (a) Con Hesus a mustra cu e sa cu hende imperfecto tin e tendencia di ta demasiado precupa cu cos material? (Wak tambe e nota na pia di pagina.) (b) Ki conseho sabi Hesus a duna tocante con pa evita di precupa indebidamente?

7 Den e Sermon Riba Sero, Hesus a conseha: “No precupa boso mes pa boso bida, kico boso lo come of kico boso lo bebe; tampoco pa boso curpa, kico boso lo bisti.” * (Mateo 6:25) Hesus tawata sa cu di naturalesa hende imperfecto ta precupa pa haya nan necesidadnan basico. Pero con nos por stop di “precupa” tocante e cosnan ei? Hesus a bisa: “Busca prome e reino di Dios.” Sin importa ki problema nos ta confronta den bida, nos mester sigui pone e adoracion di Yehova na prome luga. Si nos haci esei, tur nos necesidadnan diario “lo wordo añadi” na nos door di nos Tata celestial. Di un manera  of otro lo e provee loke nos tin mester.—Mateo 6:33.

8 Hesus a duna mas conseho. El a bisa: “No precupa boso mes pa e dia di mañan; pasobra e dia di mañan lo percura pa su mes. Cada dia tin suficiente problema di su mes.” (Mateo 6:34) No ta sabi pa nos ta demasiado precupa cu kico lo por pasa mañan. Un experto di Bijbel a remarca: “Masha poco bes futuro ta resulta mes malo cu nos a teme cu lo e bira.” Si humildemente nos haci caso di e conseho di Bijbel, esta, pa consentra riba loke ta mas importante y biba un dia a la bes, esei por yuda nos evita di precupa indebidamente.—1 Pedro 5:6, 7.

9. Ora nos ta confronta angustia financiero, ki yudansa nos por haya den e publicacionnan di “e esclabo fiel y prudente”?

9 Un otro manera pa demostra nos confiansa den Yehova ora nos ta confronta angustia financiero, ta door di busca yudansa den e publicacionnan di “e esclabo fiel y prudente.” (Mateo 24:45) Tempo tempo e revista Spierta! a publica articulonan cu tawatin conseho- y sugerencianan practico pa trata cu retonan economico. E articulo “Kico Bo Por Haci si Bo Perde Trabou?” di e Spierta! (na Spaño) di 8 di augustus 1991, a duna ocho punto practico cu a yuda hopi hende keda financieramente y emocionalmente stabil ora nan a confronta un periodo di desempleo. * Claro cu e tipo di guia ei mester ser balansa cu un punto di bista corecto di e berdadero importancia di placa. Anto e articulo “Algo Mas Importante Cu Placa” a trata esaki den e mesun edicion ei di e revista.—Eclesiastes 7:12.

Ora Problema cu Salu Ta Causa Angustia

10. Con e ehempel di Rei David ta mustra cu ta realistico pa confia den Yehova ora nos ta sufri di un malesa grave?

10 Ta realistico pa confia den Yehova ora nos ta sufri di un malesa grave? Claro cu si! Yehova ta sinti pa esnan enfermo den su pueblo. Mas cu esei, e ta dispuesto pa yuda. Tuma por ehempel Rei David. E mes kisas lo tawata gravemente malo ora cu el a skirbi tocante e manera cu Dios ta trata cu un persona recto cu ta enfermo. El a bisa: “SEÑOR lo sosten’e riba su cama di malesa; den su enfermedad abo ta restaur’e hacie salu.” (Salmo 41:1, 3, 7, 8) David su confiansa den Dios a keda firme, y finalmente e Rei a recupera di su malesa. Pero con nos por desplega confiansa den Dios ora problema cu salu ta angustia nos?

11. Kico nos por pidi nos Tata celestial ora nos ta sufri di un malesa?

 11 Un manera cu nos por demostra nos confiansa den Yehova ora nos ta sufri di un malesa ta door di roga Yehova den oracion pa yuda nos persevera. Kisas nos por pidie yuda nos uza “sabiduria sano” di manera cu nos por busca e grado di salu cu nos circunstancia realisticamente ta permiti. (Proverbionan 3:21) Tambe nos por pidie yuda nos desplega pasenshi y perseverancia pa trata cu e malesa. Mas cu tur cos, nos lo kier pidi Yehova sostene nos, duna nos e forsa pa maske kico cu pasa, nos sigui fiel na dje y no perde nos balansa. (Filipensenan 4:13, NW) Keda fiel na Dios ta asta mas importante cu conserva nos bida actual. Si nos keda fiel, e Gran Dunador di Recompensa lo duna nos bida y salu perfecto pa eternidad.—Hebreonan 11:6.

12. Ki principionan biblico por yuda nos tuma decisionnan sabi relaciona cu tratamento medico?

12 Nos confiansa den Yehova ta motiva nos tambe pa acudi na su Palabra, Bijbel, pa haya guia practico. E principionan cu nos ta haya den e Scritura por yuda nos tuma decisionnan sabi relaciona cu tratamento medico. Por ehempel, sabiendo cu Bijbel ta condena “bruheria”, nos lo evita cualkier sistema di diagnostica malesa of cualkier tratamento medico cu tin di aber cu spiritismo. (Galationan 5:19-21; Deuteronomio 18:10-12) Un otro ehempel di Bijbel su sabiduria confiabel ta lo siguiente: “E hende simpel ta kere tur cos, ma e homber prudente ta wak bon unda e ta bai.” (Proverbionan 14:15) Pues, ora nos ta pensa pa tuma un tratamento medico, ta sabi di nos parti pa busca informacion confiabel en bes di djis “kere tur cos. ” Tal manera di pensa “huicioso” por yuda nos evalua nos opcionnan cuidadosamente y tuma un decision bon pensa y basa riba conocemento.—Tito 2:12.

13, 14. (a) Ki articulonan informativo tocante temanan di salu a sali publica den e revistanan Toren di Vigilancia y Spierta!? (Wak e cuadro na pagina 17.) (b) Ki conseho tocante con pa trata cu malesanan cronico a sali den e Spierta! (na Spaño) di 22 di januari 2001?

13 Tambe nos por demostra nos confiansa den Yehova door di haci investigacion den e publicacionnan di e esclabo fiel. E revistanan Toren di Vigilancia y Spierta! a yega di publica articulonan informativo riba un variedad amplio di malesa- y problemanan medico spesifico. * Tin biaha, e revistanan aki a presenta articulonan den cua personanan ta conta con nan tawatin exito den trata cu varios trastorno, malesa cronico y incapasidad. Fuera di esei, tin articulonan cu a duna sugerencianan biblico y tambe conseho practico cu ta mustra con pa biba cu problemanan cronico di salu.

14 Por ehempel, e Spierta! (na Spaño) di 22 di januari 2001 tawatin e serie “Consuelo pa Esnan Enfermo.” E articulonan aki a presenta principionan biblico util y tambe informacion personal obteni for di entrevista cu personanan  cu ta bon na haltura, ya cu nan a biba cu malesa debilitante pa hopi aña. E articulo “Con pa Biba cu Bo Malesa cu Dignidad” a duna e siguiente conseho: Siña tur loke bo por tocante bo malesa. (Proverbionan 24:5) Fiha metanan practico, incluso metanan pa yuda otro hende, pero sea conciente cu kisas bo no por alcansa e mesun metanan cu otro hende. (Echonan 20:35; Galationan 6:4) No isola bo mes di otro hende. (Proverbionan 18:1) Laga cu ora hende bishita bo, esei ta un experencia agradabel pa nan. (Proverbionan 17:22) Mas cu tur cos, mantene un amistad sera cu Yehova y cu e congregacion. (Nahum 1:7; Romanonan 1:11, 12) Nos no ta gradicido pa e guia confiabel cu Yehova ta provee mediante su organisacion?

Ora un Debilidad Carnal Ta Persisti

15. Con apostel Pablo a logra sali gana den su lucha contra e debilidadnan di e carni imperfecto, y ki garantia nos por tin?

15 “No tin nada bon ta biba den mi, esta, den mi carni”, apostel Pablo a skirbi. (Romanonan 7:18) Pablo tawata sa di su propio experencia con dificil ta pa lucha contra e deseonan y debilidadnan di e carni imperfecto. Sinembargo, Pablo tawatin confiansa tambe cu lo e por a sali gana. (1 Corintionan 9:26, 27) Con? Door di confia completamente den Yehova. Ta pesei Pablo por a bisa: “Hende miserabel cu mi ta! Ken lo libra mi di e curpa di morto aki? Mi ta duna gradicimento na Dios door di Hesucristo, nos Señor!” (Romanonan 7:24, 25) Ke tal di nos? Nos tambe tin un lucha contra debilidadnan carnal. Segun cu nos ta lucha pa trata cu e debilidadnan ei, ta facil pa nos perde confiansa y bira combenci cu nunca nos lo logra. Pero Yehova lo yuda nos si nos, mescos cu Pablo, realmente ta depende riba dje y no riba nos mes forsa.

16. Ora un debilidad carnal ta persisti, kico nos tin cu pidi den oracion, y kico nos mester haci si nos sufri un recaida?

16 Ora un debilidad carnal ta persisti, nos por demostra nos confiansa den Yehova door di suplic’e den oracion. Nos tin cu pidi Yehova, si, asta rog’e, pa duna nos e yudansa di su spirito santo. (Lucas 11:9-13) Nos por pidi spesificamente pa dominio propio, cu ta parti di  Dios su fruta di spirito. (Galationan 5:22, 23) Kico nos tin cu haci si nos sufri un recaida? Un cos ta sigur, nos no mester entrega. Laga nos nunca cansa di haci oracion humildemente na nos Dios misericordioso, pidiendo su pordon y yudansa. Yehova nunca lo no rechasa un curason cu ta “repenti y kibra” door di e peso di un mal consenshi. (Salmo 51:17) Si nos suplic’e cu un curason sinsero y repenti, Yehova lo yuda nos resisti tentacion.—Filipensenan 4:6, 7.

17. (a) Dicon ta bon pa reflexiona riba loke Yehova ta pensa di e debilidad spesifico cu nos ta luchando contra dje? (b) Cua ta e textonan cu nos por siña for di cabes si nos ta luchando pa stop di rabia lihe? pa controla nos lenga? pa resisti entretenimento of recreo cu no ta sano?

17 Tambe nos por demostra nos confiansa den Yehova door di busca yudansa den su Palabra. Uzando un concordancia biblico of e Index di Publicacionnan Watch Tower, nos por busca contesta riba e pregunta: ‘Kico Yehova ta pensa di e debilidad spesifico aki cu mi ta luchando contra dje?’ Door di reflexiona riba loke Yehova ta pensa di e asunto por fortalece nos deseo pa agrad’e. Di e manera ei nos por cuminsa sinti manera e ta sinti, y odia loke e ta odia. (Salmo 97:10) Tin persona a ripara cu loke ta yuda nan ta di siña for di cabes e textonan biblico cu ta aplica na e debilidad spesifico cu nan ta luchando contra dje. Nos ta luchando pa stop di rabia lihe? Anto nos por purba siña textonan manera Proverbionan 14:17 y Efesionan 4:31 for di cabes. Nos tin problema pa controla nos lenga? Kisas nos por memorisa textonan manera Proverbionan 12:18 y Efesionan 4:29. Nos ta inclina den direccion di entretenimento of recreo cu no ta sano? Kisas nos por purba corda versiculonan manera Efesionan 5:3 y Colosensenan 3:5.

18. Dicon nos no mester laga berguensa stroba nos di pidi e ancianonan yudansa pa vence nos debilidad?

18 Un manera mas pa demostra nos confiansa den Yehova ta door di busca yudansa di e ancianonan den congregacion cu ta nombra pa spirito. (Echonan 20:28) Al fin y al cabo, e ‘donnan den hende’ aki ta un percuracion cu Yehova a haci mediante Cristo pa proteha y cuida su carnenan. (Efesionan 4:7, 8, 11-14) Ta berdad cu no ta facil pa pidi yudansa ora bo ta lucha contra un debilidad. Talbes nos tin berguensa, y ta teme cu e ancianonan lo tin menos respet pa nos. Al contrario, e hombernan spiritualmente madura aki indudablemente lo respeta nos pasobra nos tawatin e curashi di  pidi yudansa. Ademas, e ancianonan ta purba refleha e cualidadnan di Yehova ora nan ta trata cu e tou. Nan conseho y instruccion practico y bondadoso saca for di e Palabra di Dios, podise ta net loke nos tin mester pa fortalece nos determinacion lo suficiente pa vence nos debilidad.—Santiago 5:14-16.

19. (a) Den ki manera Satanas ta purba uza e banidad di bida den e mundo aki? (b) Kico confiansa ta encera, y kico mester ta nos determinacion firme?

19 No lubida nunca cu Satanas sa cu ta un poco tempo mas so a ked’e. (Revelacion 12:12) E kier uza e banidad di bida den e mundo aki pa desanima nos y pa pone nos entrega. Laga nos tin pleno confiansa den loke ta wordo expresa na Romanonan 8:35-39: “Ken lo separa nos for di e amor di Cristo? Tribulacion, angustia, persecucion, hamber, sunu, peliger of spada? . . . Ma den tur e cosnan aki nos ta mas cu vencedo door di esun cu a stima nos. Pasobra mi ta combenci cu ni morto, ni bida, ni angelnan, ni principadonan [gobiernonan], ni cosnan presente, ni cosnan futuro, ni podernan, ni haltura, ni profundidad, ni ningun otro cos crea, lo por separa nos for di e amor di Dios cu ta den Cristo Hesus nos Señor.” Ki un tremendo declaracion di confiansa den Yehova! Sinembargo, tal confiansa ta mas cu un sintimento. Mas bien e ta un confiansa cu ta encera e decisionnan bon pensa cu nos ta tuma den nos bida diario. Pesei anto, laga nos ta firmemente determina pa confia completamente den Yehova den tempo di angustia.

[Nota]

Bo Ta Corda?

• Ora nos ta confronta problemanan economico, con nos por demostra cu nos ta confia den Yehova?

• Con nos por demostra confiansa den Dios ora problemanan di salu ta angustia nos?

• Ora un debilidad carnal ta persisti, con nos por demostra cu nos realmente ta depende riba Yehova?

[Preguntanan di Estudio]

[Cuadro na pagina 17]

Bo Ta Corda e Articulonan Aki?

Ora nos ta sinti nos mes angustia debi na problemanan di salu, ta un animacion pa lesa tocante otro hende cu tawatin exito den trata cu trastorno medico, malesa cronico of incapasidad. At’aki algun articulo cu a sali publica den e revistanan Toren di Vigilancia y Spierta!

“Con Mi A Trata cu Mi Debilidadnan” a consentra riba con pa trata cu pensamento negativo y depresion.—E Toren di Vigilancia (na Spaño), 1 di mei 1990.

“Ni Sikiera un Pulmon di Hero No Por A Stop E di Predica.”—Spierta! (na Spaño), 22 di januari 1993.

“Un Bala A Cambia Mi Bida” a enfoca riba con pa trata cu paralisis.—Spierta! (na Spaño), 22 di october 1995.

“Bo No Sa Con Bo Bida Lo Ta Mañan” a considera con pa trata cu trastorno di beis bipolar of psicosis maniaco depresivo.—E Toren di Vigilancia, 1 di december 2000.

“Loida Su Salida for di Silencio” a enfoca riba con pa trata cu paralisis celebral.—Spierta!, 8 di mei 2000.

“Mi Lucha cu Endometriose.”—Spierta!, 8 di augustus 2000 (na Spaño, 22 di juli 2000).

“Aunke Sordo y Ciego, Toch Mi A Haya Siguridad.”—Spierta!, 8 di mei 2001 (na Spaño, 22 di april 2001).

“Mi A Gana e Bataya Contra Depresion Posparto.”—Spierta! (na Spaño), 22 di juli 2002.

[Plachi na pagina 15]

Ora nos perde trabou, kisas ta sabi pa nos reexamina nos estilo di bida

[Plachi na pagina 16]

E relato di Loida ta mustra con confiansa den Yehova ta yuda un hende persevera. (Wak e cuadro na pagina 17)

[Plachi na pagina 18]

Nos no mester tin berguensa di pidi yudansa pa vence nos debilidadnan