Graduadonan di Galad Ta Bai na e Cosecha cu Celo!

“E COSECHA ta masha grandi, ma trahado ta poco. Pesei, pidi e Señor di cosecha pa manda trahado na su cosecha.” (Mateo 9:37, 38) E palabranan ei tawatin un nificacion special pa e graduadonan di e di 116 klas di e Scol Biblico di Galad di Watchtower mientras nan tawata prepara pa bai nan asignacion como misionero.

Riba diasabra, 13 di maart 2004, tawatin 6.684 persona presente na e Centro Educacional di Watchtower na Patterson, New York, y na diferente otro luga caminda por a mira e programa di graduacion via television. E programa tawata specialmente pa duna e klas algun conseho y animacion prome cu nan bai. Pero nos tur por haci uzo di e conseho cu nan a haya segun cu nos ta traha celosamente den e cosecha spiritual.

E palabranan di apertura di Theodore Jaracz, un miembro di e Cuerpo Gobernante y un graduado di e di shete klas di Galad, a hala atencion na e palabranan di Hesus: “Bai y haci tur e nacionnan disipel.” (Mateo 28:19, 20) Esta apropiado esei tawata, ya cu e graduadonan ta bai sirbi na 20 pais! El a recorda e studiantenan cu e instruccion for di e Palabra di Dios a ekipa nan completamente pa nan por ta trahadonan celoso den e cosecha spiritual sumamente importante.—Mateo 5:16.

Con pa Ser Cosechadonan Productivo

E prome orado di e programa tawata Robert Wallen, kende pa hopi aña ta masha liga cu Scol di Galad. El a papia riba e tema: “E Bunitesa di Compasion.” El a bisa e studiantenan: “Compasion ta e idioma cu asta e sordonan por tende y e ciegonan por mira.” Hesus tawata sumamente conciente di e afliccion di otro hende y tawata busca manera pa alivia esei. (Mateo 9:36) E studiantenan lo haya hopi oportunidad pa haci esei, por ehempel, den e trabou di predica, den congregacion, den cas di misionero y den nan mes matrimonio. E orado a duna e graduadonan e siguiente conseho: “Desplega e bunitesa di compasion den bo bida segun cu bo ta sirbi otro hende. Bon comportacion ta indespensabel pa e bida den cas di misionero. Pues, sea determina pa bisti bo mes cu compasion.”—Colosensenan 3:12.

Despues Gerrit Lösch, un miembro di Cuerpo Gobernante y un graduado di e di 41 klas di Galad, a papia riba e topico: “Proclamadonan di Salbacion.” (Isaias 52:7) Pa hende por scapa ora e sistema di cosnan aki wordo destrui, primeramente nan mester haya conocemento exacto di e Palabra di Dios, haci un declaracion publico di nan fe y batisa. (Romanonan 10:10; 2 Timoteo 3:15; 1 Pedro 3:21)  Sinembargo, e motibo principal pa proclama salbacion no ta pa hende wordo salba sino pa trece alabansa pa Dios. Pesei Ruman Lösch a anima e prospectivo misioneronan: “Hiba e mensahe di Reino den henter e tera, y sea proclamadonan celoso di salbacion, tur pa e alabansa di Yehova.”—Romanonan 10:18.

“Cuanto Bo Ta Briya?” tawata e pregunta cu un instructor di Galad, Lawrence Bowen a haci. El a referi na Hesus su palabranan na Mateo 6:22 y a anima e graduadonan pa mantene nan wowo simpel pa asina nan por “refleha iluminacion spiritual cu ta glorifica Yehova y ta beneficia prohimo.” For di comienso di su ministerio, Hesus a pone un ehempel perfecto den e aspecto aki door di keda enfoca riba hacimento di Dios su boluntad. Loke a yuda Hesus wanta ora Satanas a pon’e na prueba den desierto tawata meditacion riba e cosnan maraviyoso cu su Tata a siñ’e den shelo. (Mateo 3:16; 4:1-11) Tempo cu Hesus tawata cumpliendo cu loke Dios a mand’e haci, el a demostra un confiansa total den Yehova. Di igual manera, pa e misioneronan por logra trata cu e desafionan cu tin nan dilanti, nan mester sigui cu e bon custumber di studia Bijbel y depende completamente riba Yehova.

Mark Noumair, un instructor di Galad y un graduado di e di 77 klas di Galad, a termina e serie di discursonan aki, papiando riba e tema:  “Mira, Nos Ta den Bo Man.” (Hosue 9:25) El a anima e studiantenan pa imita e actitud di e Gabaonitanan di antiguedad. Maske Gabaon tawata “un stad grandi, . . . y tur su hombernan tawata poderoso”, e Gabaonitanan no a exigi prominencia ni a spera pa cos bai na nan manera. (Hosue 10:2) Di buena gana nan a sirbi como “kapdo di palo y cargado di awa” bou di direccion di e Levitanan na fabor di adoracion di Yehova. (Hosue 9:27) Den un sentido, e graduadonan a bisa e Hosue Mayor, Hesucristo, “Mira, nos ta den bo man.” Awor, cu nan ta bai cuminsa cu nan asignacion nobo, nan mester ta dispuesto pa acepta cualkier trabou cu Hosue Mayor duna nan.

Experencianan y Entrevista

Wallace Liverance, kende ta un graduado di e di 61 klas di Galad y un di e instructornan, a considera e tema “Splica e Scritura a Fondo” cu un grupo di studiante. Nan a conta experencianan y a duna demostracion di experencianan di bida real cu nan a disfruta di dje den sirbishi di veld durante transcurso di e scol. Tawata bisto cu nan studio intensivo di e Scritura durante e cinco lunanan di entrenamento a touch nan curason y a motiva nan pa comparti loke nan a siña cu otro hende. (Lucas 24:32) Durante e curso di cinco luna, un studiante tawatin e oportunidad pa comparti loke el a siña cu su ruman carnal. Esaki a anima su ruman pa busca e congregacion cu ta keda mas serca di dje y cuminsa haya su propio studio di Bijbel. Actualmente e ta un publicado cu no ta batisa.

Despues di e experencianan aki, Richard Ashe y John Gibbard a entrevista algun fiel sirbido di Yehova di hopi tempo, entre otro superintendentenan biahero cu tawata hayando entrenamento special na e Centro Educacional di Watchtower. Nan tawata graduadonan di klasnan anterior di e Scol di Galad. Un di nan ta corda cu Ruman Knorr a bisa durante e curso: “Na Galad boso lo siña masha hopi. Pero si boso cabes susha, esei kiermen cu nos a faya. Nos kier pa boso haya un bon curason.” E rumannan biahero a conseha e klas pa nan mustra interes den hende, pa trata otro hende manera Cristo a haci y acepta humildemente cualkier asignacion cu nan haya. Si e misioneronan nobo aplica e conseho aki, sin duda nan lo ta productivo den nan asignacionnan.

Bai na e Cosecha cu Celo!

E auditorio a haya un oportunidad pa tende Stephen Lett, un otro miembro di Cuerpo Gobernante. El a duna e discurso principal di e programa, titula “Bai na e Cosecha cu Celo!” (Mateo 9:38) E temporada di un cosecha literal ta masha cortico. Durante e periodo ei e trahadonan mester traha duro. Ya cu bida di hende ta na peliger, no ta mas importante ainda pa traha duro den e gran cosecha spiritual durante e conclusion di e sistema di cosnan aki? (Mateo 13:39) Ruman Lett a anima e graduadonan pa “no flakia den diligencia” ma pa nan “sea ferviente den spirito” y ‘sirbi Señor’ den e cosecha aki cu nunca mas lo no wordo ripiti. (Romanonan 12:11) E orado a cita Hesus su palabranan: “Hisa boso cara wak y mira e cunucunan, pasobra nan ta blanco pa wordo cosecha.” (Huan 4:35) El a urgi e graduadonan pa mustra celo pa e trabou di cosecha door di echt haci esfuerso pa busca hende na e ora y caminda cu nan por ser haya y door di probecha di tur oportunidad pa duna testimonio informal. Door di ta alerta pa crea oportunidad lo bira mas facil pa duna un testimonio eficas. Yehova ta un Dios celoso, y ta spera cu nos tur ta imit’e y traha duro den e cosecha spiritual.—2 Reinan 19:31; Huan 5:17.

Na final di e programa, e presidente, Ruman Jaracz, a menciona cua tawata e diferente sucursalnan cu a manda saludo y a entrega e diplomanan na e studiantenan. Un di e graduadonan a lesa un carta cu e klas a skirbi pa expresa nan aprecio profundo pa e entrenamento cu nan a ricibi. Ta mas cu claro, cu e programa di graduacion di e di 116 klas a motiva tur esnan presente pa ta mas determina pa bai na e cosecha cu celo.

[Cuadro na pagina 25]

ESTADISTICANAN DI E KLAS

Cantidad di pais representa: 6

Cantidad di pais na cua a asigna nan: 20

Cantidad di studiante: 46

Edad promedio: 34,2

Promedio di aña den e berdad: 17,2

Promedio di aña den sirbishi di tempo completo: 13,9

[Plachi na pagina 26]

E di 116 Klas di Graduadonan di e Scol Biblico di Galad di Watchtower

Den e lista akibou, e reinan ta numera di dilanti bai patras, y e nombernan ta bai di robes pa drechi den cada rei.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.