Ken Ta e Miho Lider pa Nos Tempo?

Na 1940 tawatin un crisis di liderato den Parlamento Britanico. David Lloyd George di 77 aña di edad, kende a guia Gran Bretania na victoria den e Prome Guera Mundial, tawata scucha e debate, y e por a evalua na un manera skerpi e trabou di funcionarionan halto debi cu e mes tawatin hopi aña den politica. Den un discurso cu el a duna den e Camara di Comunnan dia 8 di mei, el a declara: “E nacion ta prepara pa tur sacrificio basta cu e tin liderato, basta cu Gobierno mustra bon cla kico ta su metanan y basta cu e nacion ta sigur cu su lidernan ta haciendo nan best.”

EPALABRANAN di Lloyd George ta mustra bon cla cu pueblo ta spera di nan lidernan cu nan ta competente y cu nan ta haci esfuerso sinsero pa purba mehora cosnan. Un colaborado di campaña electoral a splic’e den e forma aki: “Ora pueblo vota pa un presidente, nan ta basha nan voto riba un candidato den kende su man nan ta confia nan bida, nan futuro y nan yiunan.” Pa salvaguardia e confiansa ei, e tin un tarea enorme su dilanti. Dicon?

Wel, nos mundo ta carga cu problema cu ta parce imposibel pa soluciona. Por ehempel, cua lider a demostra di ta dje sabi y poderoso ei cu e por caba cu crimen y guera? Ken entre e lidernan djawe tin e recursonan y compasion pa percura alimento, awa limpi y cuido medico pa tur hende? Ken tin e conocemento y determinacion pa proteha y drecha e medioambiente? Ken ta suficientemente competente y poderoso pa garantisa cu henter humanidad lo disfruta di un bida largo y felis?

Hende No Tin e Capasidad

Nos no por nenga cu algun lider a logra cierto exito. Pero, di mas tanto tempo cu nan por sirbi ta un par di decada—y despues ken ta sigui nan? Un di e lidernan di mas competente cu a yega di biba, Rei Salomon di Israel di antiguedad, a medita riba e pregunta aki, anto el a yega na e siguiente conclusion: “Mi tawata odia tur e fruta di mi trabou cu mi a traha p’e bou di solo, pasobra mi mester lag’e p’e hende cu lo bin despues di mi. Y ken sa si e lo ta un hende sabi of un hende bobo. Toch  e lo tin control riba tur fruta di mi trabou cu mi a traha p’e door di actua cu sabiduria bou di solo. Esaki tambe ta banidad.”—Eclesiastes 2:18, 19.

Salomon no tawata sa si su susesor lo a sigui cu su bon trabou of daña tur cos. Pa Salomon, e ciclo di gobernantenan cu ta sigui otro tawata “banidad.” Un otro traduccion di Bijbel ta yama e proceso aki algo “absurdo.”

Tin biaha, cambio forsoso di gobernantenan sa bai acompaña cu uzo di violencia. Lidernan capas a ser mata ora nan tawata den pleno funcion. Abraham Lincoln, un expresidente di Merca altamente respeta, a yega di bisa un auditorio: “Mi a ser scohi pa ocupa un puesto importante pa un periodo cortico, y awor, den boso bista, mi a ricibi un poder cu pronto lo pasa pa historia.” En berdad su periodo como mandatario tawata cortico. Apesar di tur loke el a logra y su deseo pa haci mas pa hende, Presidente Lincoln a goberna su pais pa apenas cuater aña. Na cuminsamento di su di dos periodo di gobernacion, un homber cu kier a mira un cambio di liderato a asesin’e.

Ni e miho lidernan humano no por garantisa nan mes futuro. Acaso bo por confia nan anto pa garantisa esun di bo? Bijbel ta bisa: “No confia den prinsnan, den yiu di hende, den kende no tin salbacion. Su spirito ta sali, e ta bolbe na tera; e mes dia ei su pensamentonan ta perece.” Den e traduccion di Byington e ultimo parti di versiculo 4 ta bisa: “Riba e dia ei su bon boluntad ta caba na nada.”—Salmo 146:3, 4.

Kisas e conseho pa no confia den lidernan humano ta duro pa acepta. Pero Bijbel no ta bisa cu hende hamas lo por haya un lider cu ta bon y stabil. Isaias 32:1 ta bisa: “Mira, un rei lo reina cu husticia.” Yehova Dios, Creador di hende, a prepara “un rei”, un Lider, cu pronto lo tuma control completo di asuntonan di tera. Ken e ta? Profecia di Bijbel ta bisa ken e ta.

 Uno Cu di Berdad Ta Cualifica pa Dirigi

Dos mil aña pasa, un angel a bisa un mosa Hudiu cu yama Maria: “Lo bo consebi den bo matris y duna lus na un yiu homber, y lo bo yam’e Hesus. E lo ta grandi y lo wordo yama Yiu di e Haltisimo; y Señor Dios lo dun’e e trono di su tata David; y e lo reina riba e cas di Yacob pa semper, y su reino lo no tin fin.” (Lucas 1:31-33) Si, Hesus di Nazaret ta e Rei profetisa den Bijbel.

Hopi bes obranan di arte religioso ta pinta Hesus como un baby of cu un aparencia debil y malnutri of como un hende cu a priva su mes di tur goso den bida y kende, sin ningun resistencia, ta acepta tur loke otronan haci cu ne. E imagennan aki no ta inspira confiansa den dje como Gobernante. Sinembargo, e berdadero Hesucristo di Bijbel a crece bira un homber maduro, yen di vigor, entusiasmo y iniciativa. Y e tawata posee otro caracteristica cu a hacie un lider hopi competente. (Lucas 2:52) Aki ta sigui algun aspecto di su personalidad sobresaliente.

Hesus a mantene integridad perfecto. Su conducta tawata asina honesto y recto cu el a reta su enemigonan publicamente pa presenta un acusacion valido contra dje. Nan no tawata por. (Huan 8:46) Su siñansanan liber di hipocresia a logra combence hopi hende sinsero pa bira su siguido.—Huan 7:46; 8:28-30; 12:19.

Hesus tawata completamente dedica na Dios. E tawata asina determina pa caba cu e trabou cu Dios a dun’e, cu ningun oponente—ni humano ni demoniaco—no por a strob’e. Atakenan violento no a spant’e. (Lucas 4:28-30) E no a laga cansancio y hamber desanim’e. (Huan 4:5-16, 31-34) Y maske su amigonan a bandon’e, hamas el a desvia for di su meta.—Mateo 26:55, 56; Huan 18:3-9.

Hesus tawatin interes profundo den hende. El a percura cuminda pa hende cu tawatin hamber. (Huan 6:10, 11) El a consola hende deprimi. (Lucas 7:11-15) El a cura hende ciego, sordo y enfermo. (Mateo 12:22; Lucas 8:43-48; Huan 9:1-6) El a stimula su apostelnan cu tawata trahadonan diligente. (Huan, capitulo 13-17) El a resulta di ta “e bon wardado” cu a cuida su carnenan.—Huan 10:11-14.

Hesus tawata dispuesto pa traha. El a laba pia di e apostelnan pa e por a siña nan un les importante. (Huan 13:4-15) Su mes pia a yena cu stof segun cu e tawata predica e bon nobo riba e camindanan di tera di Israel. (Lucas 8:1) Asta ora el a plania pa sosega na “un luga solitario”, el a atende e multitud cu a bin busc’e pa haya mas instruccion. (Marco 6:30-34) Asina el a pone un ehempel pa tur cristian di kico kiermen ser diligente.—1 Huan 2:6.

Hesus a termina su asignacion y a bandona tera. Como recompensa pa su fieldad, Yehova Dios a dun’e un reino y inmortalidad den shelo. Bijbel ta bisa di Hesus resusita: “Cristo, siendo lanta for di e mortonan, lo no muri nunca mas.” (Romanonan 6:9) Bo por tin sigur cu e ta e miho Lider pa humanidad. Unabes Cristo Hesus tuma mando completo riba tera, lo no tin necesidad mas pa duna ningun otro hende poder pa fungi como lider, y nunca mas lo tin cu trece cambio den liderato. Nunca lo e ser kita for di su puesto durante su periodo di gobernacion, y ningun susesor incapas lo bin elimina of daña loke el a logra. Pero kico spesificamente lo e haci pa beneficia humanidad?

Loke e Lider Nobo Aki Lo Haci

Salmo 72 ta duna nos algun detaye profetico di e manera cu e Rei perfecto y inmortal aki lo goberna. Den versiculo 7 y 8 nos ta lesa: “Den su dianan laga e husto florece, y laga tin abundancia di pas te ora cu no tin luna mas. Lag’e goberna tambe di lama pa lama, y for di Riu Eufrates te na e finnan di tera.” Bou di su gobernacion beneficioso, habitantenan di tera lo disfruta di siguridad eterno sin interupcion. Lo e destrui tur arma existente y lo e  elimina for di hende su curason asta e deseo pa haci guera. E personalidad di e hendenan cu awe ta ataca otro manera leon feros of cu ta actua manera beer brabo contra nan prohimo lo cambia completamente. (Isaias 11:1-9) Pas lo ta abundante.

Salmo 72 ta bisa mas aleu den versiculo 12 pa 14: “E lo libra esun den necesidad ora cu e sclama pa yudansa, esun afligi tambe y esun cu no tin ningun hende pa yud’e. E lo tin compasion di e pober y di esun den necesidad, y e lo salba bida di esnan den necesidad. E lo rescata nan bida for di opresion y violencia; y nan sanger lo ta precioso den su bista.” Hende pober, esnan den necesidad y esnan afligi lo bira parti di un solo famia humano felis, uni bou di e liderato di e Rei Hesucristo. Nan bida lo ta caracterisa pa goso, y no pa dolor y desesperacion.—Isaias 35:10.

Versiculo 16 ta priminti: “Lo tin abundancia di maishi den e tera, riba cabes di e seronan [“lo tin sobreabundancia”, NW].” Awe miyones di hende riba tera ta bai drumi tur dia cu hamber. Hopi bes politica y golosidad ta stroba hende di yega na un reparticion husto di suficiente cuminda, di manera cu multitud di hende, specialmente mucha, ta muri di desnutricion. Bou di e mando di Hesucristo, e problema aki lo disparce. Tera lo ta bendiciona cu bon cosecha di cuminda delicioso. Humanidad completo lo ta bon alimenta.

Lo bo kier disfruta di e bendicionnan aki di bon liderato? Si ta asina, nos ta anima bo pa siña mas tocante e Lider cu pronto lo eherce control completo riba henter e tera. Gustosamente, Testigonan di Yehova lo yuda bo haci esei. Lo bo no keda desapunta, pasobra Yehova Dios mes ta bisa di su Yiu: “Pa loke ta ami, mi a establece mi rei riba Sion, mi sero santo.”—Salmo 2:6.

[Cuadro na pagina 5]

DIRIPIENTE FOR DI PODER

Por lo general, si un gobernante ta percura pa su ciudadanonan tin un grado rasonabel di pas y un condicion di bida basta sigur, e por conta cu nan respet y sosten. Di otro banda, si pa un of otro motibo pueblo perde confiansa den dje, e por perde su puesto hopi lihe. Aki ta sigui algun ehempel di situacionnan cu a pone gobernantenan poderoso perde nan poder diripiente.

Mal condicion di bida. Na cabamento di siglo 18, hopi ciudadano Frances a haya nan obliga ta hiba un bida di paga hopi belasting y haya poco cuminda. E situacion aki tawata un di e factornan cu a contribui na e Revolucion Frances, cu na aña 1793 a causa morto di Rei Louis XVI na guiyotina.

Guera. Prome Guera Mundial a pone fin na e gobernacion di algun di e emperadonan di mas poderoso den historia. Por ehempel, na 1917 un scarsedad di cuminda causa pa un guera na St. Petersburg, Rusia, a bin culmina den e Revolucion di Februari. E rebelion aki a tumba Tsar Nicolas II for di su trono y a habri caminda pa e regimen comunista. Na november 1918, Alemania tawata kier pas, pero e aliadonan no kier a stop di bringa te ora a bini un cambio di gobierno. Como resultado, e Emperado Aleman Wilhelm II a ser forsa pa bai den exilio na Hulanda.

Anhelo pa un otro sistema di gobernacion. Na 1989 e Cortina di Hero a cai. Na momento cu pueblo di paisnan comunista a cuminsa rechasa comunismo, gobiernonan cu tawata mustra solido a basha den otro. Y esei a habri caminda pa otro formanan di gobernacion.

[Plachinan na pagina 7]

Hesus a alimenta hende cu hamber, a cura esnan enfermo y a pone un bon ehempel pa tur cristian

[Reconocemento pa Potret na pagina 4]

Lloyd George: Potret ta di Kurt Hutton/Picture Post/Getty Images