Persigui Pero Felis

“Felis boso ta ora hende ta reprocha boso y ta persigui boso y cu mentira ta papia tur sorto di cos malo contra boso pa mi causa.”—MATEO 5:11.

1. Kico Hesus a sigura su siguidonan relaciona cu felicidad y persecucion?

ORA cu pa prome bes Hesus a manda su apostelnan bai predica e Reino, el a spierta nan cu nan lo a haya oposicion. El a bisa nan: “Tur hende lo odia boso pa causa di mi nomber.” (Mateo 10:5-18, 22) Sinembargo, mas prome den su Sermon Riba Sero, el a sigura su apostelnan y otro hende cu e oposicion ei no necesariamente lo a pone nan perde e felicidad profundo cu nan a sinti. De echo, Hesus asta a conecta felicidad cu ser persigui como cristian! Con persecucion por haci hende felis?

Sufri pa Causa di Husticia

2. Segun Hesus y apostel Pedro, ki ora sufrimento ta haci nos felis?

² E di ocho motibo pa felicidad cu Hesus a declara ta: “Felis ta esnan cu a ser persigui pa  causa di husticia, ya cu e reino di shelo ta pertenece na nan.” (Mateo 5:10) Sufrimento riba su mes no ta algo digno di merito. Apostel Pedro a skirbi: “Ki merito boso ta haya si, ora boso peca y wordo trata severamente, boso soporta esaki cu pasenshi? Ma si ora boso haci loke ta corecto y cu pasenshi boso sufri pa e motibo ei, esaki ta haya aprobacion serca Dios.” El a bisa mas aleu: “No laga ningun di boso sufri como matado, of ladron of malechor, of un cu ta mete den asunto di otro; ma si un hende ta sufri como cristian, no lag’e sinti berguensa, ma den e nomber ei lag’e glorifica Dios.” (1 Pedro 2:20; 4:15, 16) Segun e palabranan di Hesus, sufrimento ta haci nos felis ora nos ta soport’e pa causa di husticia.

3. (a) Kico ta nifica ser persigui pa causa di husticia? (b) Ki efecto persecucion tawatin riba e prome cristiannan?

³ Un hende ta desplega berdadero husticia door di cumpli cu Dios su boluntad y obedece su mandamentonan. Pesei sufri pa causa di husticia ta nifica sufri pasobra bo ta resisti e presion pa viola Dios su normanan of rekisitonan. E lidernan Hudiu a persigui e apostelnan pasobra esakinan a nenga di stop di predica den nomber di Hesus. (Echonan 4:18-20; 5:27-29, 40) Acaso esaki a caba cu nan goso of a stop nan predicacion? Al contrario! “Nan a bai for di presencia di e Consilio, regocihando [of, alegrando] cu nan a wordo considera digno pa sufri berguensa pa su nomber. Y tur dia, den tempel y di cas pa cas, nan tawata sigui siña hende y predica Hesus como e Cristo.” (Echonan 5:41, 42) E persecucion aki a duna nan goso y a rebiba nan celo den e trabou di predica. Mas despues, e Romanonan a persigui e prome cristiannan pasobra nan a nenga di participa den adoracion di emperado.

4. Menciona algun motibo pakico hende ta persigui cristiannan.

⁴ Den tempo moderno, hende ta persigui Testigonan di Yehova pasobra nan ta nenga di stop di predica “e evangelio aki di e reino.” (Mateo 24:14) Bijbel ta manda pa reuni hunto, pesei ora prohibi nan reunionnan cristian, nan ta prefera di sufri cu stop di asisti. (Hebreonan 10:24, 25) Tambe hende a persigui nan pa motibo di nan neutralidad cristian of pasobra nan ta nenga di haci mal uzo di sanger. (Huan 17:14; Echonan 15:28, 29) Apesar di tur esei, e posicion aki cu e pueblo di Dios ta tuma na fabor di husticia ta duna nan un pas mental profundo y hopi felicidad.—1 Pedro 3:14.

Reprocha pa Causa di Cristo

5. Pa ki motibo basico hende ta persigui e pueblo di Yehova awe?

⁵ E di nuebe motibo pa felicidad cu Hesus a considera den su Sermon Riba Sero tambe ta trata cu e topico di persecucion. El a bisa: “Felis boso ta ora hende ta reprocha boso y ta persigui boso y cu mentira ta papia tur sorto di cos malo contra boso pa mi causa.” (Mateo 5:11) E motibo basico pakico hende ta persigui e pueblo di Yehova ta pasobra nan no ta parti di e sistema di cosnan malbado aki. Hesus a bisa su disipelnan: “Si boso tawata di mundo, mundo lo a stima loke ta di dje; ma pasobra boso no ta di mundo, ma ami a scohe boso for di den mundo, pesei mundo ta odia boso.” (Huan 15:19) Mescos tambe apostel Pedro a declara: “Den tur esaki nan ta keda sorprendi cu boso no ta core hunto cu nan den e mesun dilubio di libertinahe, y nan ta calumnia boso.”—1 Pedro 4:4.

6. (a) Dicon hende ta reprocha y persigui e resto y nan compañeronan? (b) E reproche ei ta mengua nos felicidad?

⁶ Nos a mira caba cu e prome cristiannan a ser persigui pasobra nan a nenga di stop di predica den nomber di Hesus. Cristo a encarga su siguidonan: “Boso lo ta mi testigonan . . . te na e parti mas aleha di mundo.” (Echonan 1:8) Cu celo e resto fiel di Cristo su rumannan  ungi a cumpli cu e encargo ei, cu yudansa di nan compañeronan leal di e “multitud grandi.” (Revelacion 7:9) Consecuentemente, Satanas ta haci guera ‘cu e resto di su desendientenan [e desendientenan di e “mohe”, e parti celestial di Dios su organisacion], kendenan ta warda e mandamentonan di Dios y tin e trabou di duna testimonio di Hesucristo.’ (Revelacion 12:9, 17) Como Testigo di Yehova, nos ta duna testimonio di Hesus, kende ta e Rei cu ta reina awor den e gobernacion di Reino. E Reino aki lo destrui gobiernonan humano cu ta para den caminda di Dios su husto mundo nobo. (Daniel 2:44; 2 Pedro 3:13) Pa motibo di nos dunamento di testimonio, hende ta reprocha nos y persigui nos, pero nos ta felis di por sufri pa e nomber di Cristo.—1 Pedro 4:14.

7, 8. Ki mentiranan opositornan a papia contra e prome cristiannan?

⁷ Hesus a declara cu su siguidonan mester considera nan mes felis asta ora hende “cu mentira ta papia tur sorto di cos malo” contra nan pa su causa. (Mateo 5:11) Esaki sigur tawata e caso cu e prome cristiannan. Ora cu apostel Pablo tawata sera na Roma, rond di aña 59 pa 61 di nos era, e lidernan Hudiu a bisa di e cristiannan: “Encuanto e secta aki, nos sa cu e ta wordo contradeci tur caminda.” (Echonan 28:22) Nan a acusa Pablo cu Silas di “a pone mundo aribabou”, y cu nan a “actua contrario na e decretonan di Cesar.”—Echonan 17:6, 7.

⁸ Historiado K. S. Latourette a skirbi tocante cristiannan den tempo di e Imperio Romano y el a declara: “Tawatin diferente tipo di acusacion [contra nan]. Como cu nan a nenga di participa den ceremonianan pagano, hende a duna cristiannan e beinam ateo. Como cu nan a abstene di participa den mayoria actividad den comunidad—e fiestanan pagano, e dibirticionnan publico . . .—hende a haci cherche di nan y yama nan odiado di e rasa humano. . . . Hende tawata bisa cu cristiannan di ambos sexo tawata topa otro anochi . . . y cu nan tawata tene relacion sexual cu diferente partner pa loco. . . . E echo cu nan a celebra [e Conmemoracion di e morto di Cristo] solamente den presencia di creyentenan a causa e rumor cu cristiannan regularmente tawata sacrifica un baby y bebe su sanger y come su carni.” Ademas, como cu e prome cristiannan a nenga di participa den adoracion di emperado, hende a acusa nan di ta enemigo di Estado.

9. Con e cristiannan di prome siglo a reacciona riba e acusacionnan falso cu hende a lansa contra nan, y con e situacion ta awe?

⁹ E acusacionnan falso ei no a kita e prome cristiannan di cumpli cu nan encargo di predica e bon nobo di Reino. Na aña 60 pa 61 di nos era, Pablo por a bisa tocante e bon nobo cu “den henter mundo tambe e ta duna fruta y ta sigui crece constantemente” y cu el a ser “proclama den henter creacion bou di shelo.” (Colosensenan 1:5, 6, 23) Ta mescos ta pasa awe. Hende ta acusa Testigonan di Yehova falsamente, mescos cu nan a haci cu e cristiannan di prome siglo. Apesar di esei, e trabou di predica e mensahe di Reino ta bai dilanti awe y ta haci esnan cu ta participa den dje hopi felis.

Felis di Ta Ser Persigui Mescos Cu e Profetanan

10, 11. (a) Con Hesus a termina su consideracion di e di nuebe motibo pa felicidad? (b) Dicon hende a persigui e profetanan? Duna algun ehempel.

¹⁰ Hesus a termina su consideracion di e di nuebe motibo pa felicidad cu e palabranan: “Alegra . . . , pasobra di e manera ei nan a persigui e profetanan prome cu boso.” (Mateo 5:12) E profetanan cu Yehova a manda pa spierta Israel infiel no a ricibi bon trato y hopi bes a haya persecucion. (Yeremias 7:25, 26) Apostel Pablo a confirma e echo aki,  skirbiendo: “Kico mas lo mi bisa? Pasobra lo mi no tin basta tempo pa mi conta di . . . e profetanan, kendenan pa medio di fe . . . a pasa den prueba di bofon y sota di carbachi, si, tambe cadena y prizon.”—Hebreonan 11:32-38.

¹¹ Durante reinado di e rei malbado Acab y su casa, Jezabel, nan a mata hopi profeta di Yehova cu spada. (1 Reinan 18:4, 13; 19:10) Opositornan a pone profeta Yeremias den sepa y despues a bent’e den un rembak yen di lodo. (Yeremias 20:1, 2; 38:6) Profeta Daniel a ser benta den cueba di leon. (Daniel 6:16, 17) Tur e profetanan precristian aki a haya persecucion pasobra nan a defende Yehova su adoracion puro. E lidernan religioso Hudiu a persigui hopi profeta. Hesus a yama e escriba- y Farizeonan “yiunan di esnan cu a mata e profetanan.”—Mateo 23:31.

12. Dicon ta un honor pa nos como Testigo di Yehova ser persigui mescos cu e profetanan di pasado?

¹² Awe, hende hopi bes ta persigui nos como Testigo di Yehova pasobra nos ta predica e bon nobo di Reino cu celo. Nos enemigonan ta acusa nos di ‘ta comberti hende na un manera agresivo’, pero nos sa cu adoradonan fiel di Yehova di pasado a confronta critica similar. (Yeremias 11:21; 20:8, 11) Pa nos, ta un honor di por sufri pa e mesun motibo cu e profetanan fiel di pasado a sufri. Disipel Santiago a skirbi: “Rumannan, tuma e profetanan cu a papia den e nomber di Señor como un ehempel di sufrimento y di pasenshi. Mira, nos ta considera como bendiciona esnan cu a persevera.”—Santiago 5:10, 11.

Motibonan Profundo pa Ser Felis

13. (a) Dicon persecucion no ta desanima nos? (b) Kico ta yuda nos para firme, y kico esaki ta proba?

¹³ Persecucion no ta desanima nos. Al contrario, e pensamento cu nos ta canando den paso di e profetanan, di e prome cristiannan y asta di Cristo Hesus, ta un consuelo pa nos. (1 Pedro 2:21) Nos ta saca profundo satisfaccion for di e Scritura, manera for di e siguiente palabranan di apostel Pedro: “Stimanan, no sea sorprendi pa motibo di e candela di prueba cu tin meimei di boso, cu ta bin riba boso pa boso wordo proba, como si fuera ta algo straño ta pasa cu boso; si boso wordo reprocha pa e nomber di Cristo, boso ta bendiciona, pasobra e spirito di gloria y di Dios ta riba boso.” (1 Pedro 4:12, 14) Nos sa di experencia cu e unico motibo pakico nos por para firme bou di persecucion ta pasobra Yehova su spirito ta riba nos y ta fortalece nos. E sosten di spirito santo ta proba cu Yehova su bendicion ta riba nos, y esaki ta duna nos gran felicidad.—Salmo 5:12; Filipensenan 1:27-29.

14. Ki motibonan nos tin pa alegra cu nos ta ser persigui pa causa di husticia?

¹⁴ Un otro motibo pakico oposicion y persecucion  pa causa di husticia ta haci nos felis ta pasobra esei ta proba cu nos ta bibando como cristiannan berdadero cu debocion na Dios. Apostel Pablo a skirbi: “Tur hende cu ta desea di hiba un bida santo [“di debocion na Dios”, NW] den Cristo Hesus lo wordo persigui.” (2 Timoteo 3:12) Nos ta sumamente felis ora nos pensa cu door di mantene nos integridad bou di prueba nos ta percura un contesta mas riba Satanas su desafio di cu tur Yehova su criaturanan ta sirbi Yehova pa motibo di interes egoista. (Job 1:9-11; 2:3, 4) Nos ta masha contento cu nos tambe por duna un aporte—pa chikito cu e por ta—na vindica Yehova su husto soberania.—Proverbionan 27:11.

Bula di Goso pa e Recompensa

15, 16. (a) Ki motibo Hesus a duna pa nos “alegra y bula di goso”? (b) Ki recompensa tin warda den shelo pa cristiannan ungi, y ki recompensa nan compañeronan, e “otro carnenan”, tambe lo ricibi?

¹⁵ Hesus a duna un motibo mas pa keda contento cu hende ta calumnia nos y persigui nos mescos cu e profetanan di pasado. Un poco prome cu Hesus termina su consideracion di e di nuebe motibo di felicidad, el a declara: “Alegra y bula di goso, ya cu boso recompensa ta grandi den shelo.” (Mateo 5:12) Apostel Pablo a skirbi: “Pago di pica ta morto, ma e don di gracia di Dios ta bida eterno den Cristo Hesus, nos Señor.” (Romanonan 6:23) Si, e ‘gran recompensa’ ta bida, y esei no ta un pago cu nos ta merece. E ta un don of regalo. Hesus a bisa cu e recompensa ta “den shelo” pasobra e ta bin di Yehova.

¹⁶ E unginan ta ricibi “e corona di bida” cu den nan caso ta bida inmortal hunto cu Cristo den shelo. (Santiago 1:12, 17) E “otro carnenan”, kendenan tin e speransa di biba riba tera, ta anhela pa haya bida eterno den un paradijs riba tera. (Huan 10:16; Revelacion 21:3-5) Pa ambos grupo, e “recompensa” no ta algo cu nan ta merece. Tanto e unginan como e “otro carnenan” ta ricibi nan recompensa debi na Yehova su “gracia  na abundancia”, cu a motiva apostel Pablo pa bisa: “Gradici Dios pa su regalo cu no por describi cu palabra.”—2 Corintionan 9:14, 15, BPK.

17. Dicon nos por ta felis y asta “bula di goso”, na moda di papia, ora hende ta persigui nos?

¹⁷ Apostel Pablo a skirbi na e cristiannan, di cua algun a ser persigui cruelmente pa Emperado Nero: “Nos ta regociha tambe den nos tribulacionnan, sabiendo cu tribulacion ta produci perseverancia; y perseverancia, caracter [“un condicion aproba”, NW]; y caracter, speransa; y speransa no ta desapunta.” Tambe el a bisa: ‘Regociha den speransa, persevera den tribulacion.’ (Romanonan 5:3-5; 12:12) Sea cu nos speransa ta pa biba den shelo of riba tera, e recompensa pa nos fieldad bou di prueba ta hopi mas grandi cu cualkier cos cu nos merece. E goso cu nos tin debi na e perspectiva di por biba pa semper pa sirbi y alaba nos amoroso Tata, Yehova, bou di nos Rei Hesucristo, ta un goso sin limite. Na moda di papia nos ta “bula di goso.”

18. Kico nos por spera di e nacionnan segun cu e fin ta yega mas serca, y kico Yehova lo haci?

¹⁸ Den algun pais, nan a persigui Testigonan di Yehova y te ainda ta persigui nan. Den Hesus su profecia tocante e fin di e sistema aki, el a spierta cristiannan berdadero: “Tur nacion lo odia boso pa causa di mi nomber.” (Mateo 24:9) Segun cu nos ta yega mas serca di e fin, Satanas lo pone e nacionnan manifesta nan odio contra Yehova su pueblo. (Ezekiel 38:10-12, 14-16) Esaki lo ta un señal cu a yega tempo pa Yehova actua. “Lo mi engrandece mi mes, santifica mi mes y haci mi mes conoci den bista di hopi nacion; y nan lo sa cu ami ta [Yehova].” (Ezekiel 38:23) Pues Yehova lo santifica su gran nomber y libra su pueblo for di persecucion. Pesei, felis “ta un hende cu ta persevera den prueba.”—Santiago 1:12.

19. Kico nos mester haci mientras cu nos ta warda riba e gran ‘dia di Yehova’?

¹⁹ Segun cu e gran ‘dia ei di Yehova’ ta yegando mas y mas serca, laga nos alegra cu nos ta ser “considera digno pa sufri berguensa” pa e nomber di Hesus. (2 Pedro 3:10-13; Echonan 5:41) Mescos cu e prome cristiannan, laga nos “sigui siña hende y predica” tocante e bon nobo di Cristo y tocante su gobernacion di Reino mientras cu nos ta warda riba nos recompensa den Yehova su husto mundo nobo.—Echonan 5:42; Santiago 5:11.

Como Repaso

• Kico ta nifica sufri pa causa di husticia?

• Ki efecto persecucion tawatin riba e prome cristiannan?

• Dicon nos por bisa cu Testigonan di Yehova ta ser persigui mescos cu e profetanan di pasado?

• Dicon nos por “alegra y bula di goso” ora nos ta ser persigui?

[Preguntanan di Estudio]

[Plachinan na pagina 16, 17]

“Felis boso ta ora hende ta reprocha boso y ta persigui boso”

[Reconocemento]

Grupo den prizon: Chicago Herald-American