María Isabel ta un publicador hoben y yen di entusiasmo cu ta biba den e stad San Bernardo, na Chile, Sur America. E cu su famia ta di e pueblo indjan Mapuche. Cu hopi entusiasmo, henter e famia a apoya e esfuersonan pa forma un congregacion nobo na e idioma Mapuche, cu ta ser yama tambe Mapudungun.

Den nan congregacion a ser anuncia cu lo bay tene e Memorial, of Conmemoracion di e morto di Cristo na idioma Mapudungun y cu lo tin 2.000 invitacion na e idioma ey pa parti. Esaki a pone María Isabel pensa. Kico e lo por haci pa yuda parti e invitacionnan? El a corda riba algun experencia di otro hobennan Testigo di Jehova cu tabatin exito ora nan a predica na nan compañero- y maestronan di scol. El a papia cu su mayornan tocante e asunto, y hunto nan a dicidi cu María Isabel lo bay pensa riba un plan pa parti e invitacionnan na scol. Ki plan el a bin cu ne?

Prome, María Isabel a pidi e directiva di scol permiso pa plak un invitacion na entrada di scol. Nan a bay di acuerdo cu su peticion y a elogi’e pa su iniciativa. Un mainta na scol, ora cu nan tabata controla si tur mucha ta presente, e cabes di scol hasta a menciona e invitacion via speaker. Figura bo!

Despues, María Isabel a pidi pa bishita tur klas. Despues cu el a haya permiso cerca e maestro, e tabata puntra den cada klas si tabatin mucha cu ta Mapuche. El a bisa: “M’a pensa cu kisas lo tin 10 pa 15 mucha cu ta Mapuche den henter e scol; luga tabatin hopi mas! Mi a parti un total di 150 invitacion!”

Un señora cu a mira e poster di e invitacion na entrada di scol a puntra ta cu ken e tin cu papia tocante e evenemento. Imagina con sorprendi el a keda ora nan a mand’e bay papia cu un mucha muher di 10 aña! María Isabel a bisa cu un smile: “El a spera un persona mas grandi.” El a duna e señora un invitacion y un splicacion cortico y a pidie su adres, ya asina e cu su mayornan por a bishita e señora y cont’e mas tocante e Reino di Dios. E 20 publicadornan cu ta sirbi den e teritorio di idioma Mapudungun a keda masha contento di mira e señora y tambe 26 persona interesa mas di e pueblo Mapuche presente na Memorial. Awor e grupo ey ta un congregacion progresivo!

Acaso bo tambe lo por tuma e mesun tipo di iniciativa ey? No ta importa cuanto aña bo tin; bo por invita bo compañeronan di scol of bo coleganan di trabou na Memorial of na un discurso publico of un congreso di districto. Bo kier haya algun idea con bo por tin exito cu un proyecto asina? Wel, bo por busca experencianan cu a sali den nos publicacionnan. Ademas, pidi Jehova duna bo su spirito santo pa yuda bo haya e curashi pa papia ­tocante dje. (Luc. 11:13) Si bo haci asina, bo tambe lo por haya e grato sorpresa y keda hopi anima ora bo mira cu bon planeamento ta duna bon resultado.