E volumen XX di e obra Jewish Antiquities di Flavio Josefo, un historiador Hudiu di prome siglo, a papia di e morto di “Santiago, ruman homber di Hesus kende nan tabata yama tambe e Cristo.” Hopi experto di Bijbel ta opina cu ta Josefo mes a skirbi esaki. Den e mesun obra aki tin un otro parti cu ta papia di Hesus, pero den esey si algun experto ta duda cu ta Josefo mes a skirbie. E parti ey ta conoci como Testimonium Flavianum y ta bisa:

‘Tabatin un hende sabi cu yama Hesus, esey ta si nos tin mag di yam’e hende, mirando e obranan maraviyoso cu el a efectua. Hopi hende tabata gusta tende loke e tabata siña nan. El a convence hopi Hudiu y hende di e nacionnan pa siguie. E tabata [e] Cristo. Ora Pilato, instiga pa e hombernan prominente di nos pueblo, a laga crucific’e, esnan cu tabata stim’e no a bandon’e. Pasobra despues di tres dia, el a aparece na nan, precies manera e profetanan di Dios a profetisa. Nan a profetisa hopi otro cos maraviyoso tocante Hesus. E nomber cristian ta deriva for di su nomber.’—Josephus—The Complete Works, traduci pa William Whiston.

Desde cabamento di siglo 16, tin un disputa entre un grupo di hende cu ta duda cu ta Josefo mes a skirbi e parti aki y e grupo cu si ta kere esey. Serge Bardet, un historiador Frances y experto den literatura clasico, a haci hopi esfuerso pa soluciona e problema complica aki cu a traves di e ultimo cuater siglonan a bira pio. Serge a publica e resultado di su investigacion den un buki cu el a yama Le Testimonium Flavianum—Examen historique considérations historiographiques (E Testimonio di Flavio—Un Investigacion Historico cu Evidencia).

Josefo no tabata un cristian. E tabata un Hudiu kende a skirbi tocante historia di e Hudiunan. Pesey, gran parti di e controversia tabata draai rond di e echo cu si Josefo lo por a bisa cu Hesus ta “e Cristo.” Pero, e analisis di Bardet ta mustra cu uzo di e titulo “e Cristo” ta cuadra cu e reglanan di gramatica di e idioma Griego cu ta permiti hende uza e articulo defini “e” dilanti di nomber di hende. Y como cu Josefo a skirbi su obra na Griego y e tempo ey tabata un tempo di transicion di hudaismo pa cristianismo, no ta nada straño cu Josefo lo por a uza e expresion “e Cristo.” Bardet a sigui bisa cu e echo cu Josefo a yama Hesus “e Cristo” ta un detaye importante cu comentaristanan di Bijbel en general a pasa por halto.

Acaso ta un otro escritor cu a imita Josefo su estilo di skirbi a agrega e texto ey añanan despues? Wel, despues di a investiga e texto di Josefo y otro evidencianan historico, Bardet a yega na e conclusion cu pa un hende imita Josefo ta casi un milager mester sosode pasobra su estilo ta unico.

Dicon expertonan ta duda anto cu ta Josefo a skirbi e texto ey? Bardet a identifica e raiz di e problema: Tin mas experto cu ta duda den e autenticidad di e Testimonium—contrario na mayoria di otro texto di antiguedad—djis pasobra hopi di nan no kier kere cu Hesus ta e Cristo y no pasobra nan a haci un analisis logico di e texto; un analisis asina lo a mustra cu ta Josefo a skirbie.

Nos tin cu warda pa mira si e analisis di Bardet lo cambia opinion di algun experto tocante e Testimonium Flavianum. Nos sa cu el a convence Pierre Geoltrain, kende tabata un specialista renombra riba tereno di hudaismo helenistico y cristianismo di antiguedad. Pa hopi tempo e tabata kere cu ta un otro hende a agrega e Testimonium na Flavio su obra. E tabata hasta haci cherche di esnan cu tabata kere cu ta Josefo mes a skirbie. Pero el a cambia di opinion y a bisa cu ta Bardet su analisis a pon’e cambia. Geoltrain a bisa cu awor si ‘niun hende no por tribi di bisa cu no ta Josefo a skirbi e texto ey.’

Testigonan di Jehova tin mas motibo ainda pa ta convenci cu Hesus ta e Cristo; nan tin prueba biblico.—2 Tim. 3:16.