1. Dicon Hesus a “yena cu goso y spirito santo”? (Wak e prome plachi.)

HESUS a “yena cu goso y spirito santo.” Purba di imagina bo esey. Kisas e tabatin un smile grandi riba su cara y su wowonan tabata briya di alegria. Dicon e tabata asina contento? Poco prome, el a manda 70 discipel bay predica e bon noticia di e Reino di Dios, y e tabata ansioso pa sa si nan a logra cumpli cu e encargo ya cu tabatin hopi hende poderoso cu tabata opone e trabou ey. E enemigonan aki tabata, entre otro, e escriba- y fariseonan, kendenan tabata hende sabi y bon siña. Nan a purba di laga e pueblo mira Hesus como un simpel carpinte y su discipelnan como “hende gewoon cu no tabatin mucho educacion.” (Echo. 4:13; Mar. 6:3) Pero a pesar di tur esey, e discipelnan a bin bek masha contento mes pasobra nan a logra predica a pesar di oposicion. Ni nan enemigonan ni e demoñonan no por a stop nan. Ta kico a duna nan e goso y curashi ey?—Lesa Lucas 10:1, 17-21.

2. (a) Dicon Hesus a yama su discipelnan “mucha chikito”? (b) Kico a yuda e discipelnan compronde berdadnan biblico importante?

² Tuma nota cu Hesus a bisa Jehova: “Mi ta alaba bo publicamente, Tata, Señor di cielo y Tera, pasobra bo a sconde e  cosnan aki for di hende sabi y intelectual y a revela nan na mucha chikito. Si, o Tata, pasobra esaki ta di acuerdo cu bo boluntad.” (Mat. 11:25, 26) Dicon Hesus a yama su discipelnan “mucha chikito”? Pasobra e discipelnan tabata humilde y dispuesto pa siña mescos cu mucha. Nan no tabata manera e intelectualnan di e tempo ey cu tabata kere cu nan ta masha sabi. Ademas, Hesus a siña su discipelnan pa no ser orguyoso. (Mat. 18:1-4) Con e humildad di e discipelnan a beneficia nan? Wel, Jehova a uza su spirito santo pa yuda nan compronde berdadnan biblico importante. Y kico di e lidernan religioso hudiu? Debi na nan orguyo, nan a laga Satanas influencia nan y nan no por a compronde e berdadnan ey.

3. Kico nos lo analisa den e articulo aki?

³ Bo ta compronde awor dicon Hesus tabata asina contento? El a gusta e manera di siña di su Tata. Jehova tabata revela berdadnan biblico profundo na tur persona humilde, sin importa nan nivel di educacion of capacidad intelectual. Jehova a cambia? Con nos por sa si ainda e ta gusta siña hende na e manera simpel y cla aki? Wel, den e articulo aki nos lo bay mira con Jehova ta laga hende humilde awe conoce berdadnan biblico profundo.

4. Dicon nos por bisa cu e edicion simplifica di E Toren di Vigilancia ta un regalo?

⁴ Ultimo añanan, e organisacion di Jehova a pone mas enfasis riba e importancia di siña hende berdadnan biblico na un manera mas simpel y cla. Laga nos trata tres ehempel. Prome ehempel: E organisacion ta publica un edicion simplifica di E Toren di Vigilancia. * E edicion aki ta un regalo pa personanan cu tin problema cu lesamento of cu no ta compronde un idioma mucho bon. Cabesnan di famia ta contento cu e edicion aki pasobra awor nan yiunan ta compronde e informacion valioso cu ta sali den E Toren di Vigilancia mas mihor. Hopi ruman a manda carta di gradicimento pa e Cuerpo Gobernante. Por ehempel, un ruman muher a skirbi cu antes e tabatin miedo di duna comentario durante e Estudio di Toren di Vigilancia. Pero awor no mas. Tur cos a cambia despues cu el a cuminsa uza e edicion na idioma simpel. El a conta: “Awor mi ta duna varios comentario, y mi miedo a kita. Mi ta gradici Jehova, y mi ta gradici boso.”

5. Menciona algun beneficio di e edicion revisa di e New World Translation of the Holy Scriptures.

⁵ E di dos ehempel ta e edicion revisa di e New World Translation of the Holy Scriptures cu a keda presenta na e reunion anual di 5 di october 2013. * Den e edicion nobo aki, hopi texto biblico tin menos palabra, pero nan nificacion a keda mescos of hasta a bira mas cla. Por ehempel, Job 10:1 tabatin 27 palabra y awor e tin 19; Proverbionan 8:6 tin 13 palabra na luga di 20. Tur dos versiculo ta mas cla awor. Un ruman homber ungi cu tin hopi aña ta sirbi Jehova fielmente a bisa: “M’a caba di lesa e buki di Job den e edicion nobo, y mi ta sinti comosifuera cu ta te awor mi a comprond’e.” Hopi ruman mas a bisa mescos.

6. Kico bo ta pensa di e splicacion nobo cu nos tin awor di Mateo 24:45 pa 47?

⁶ Di tres ehempel ta relaciona cu e comprondemento  mas cla cu nos tin awor di algun texto di Bijbel. Por ehempel, den E Toren di Vigilancia di 15 di juli 2013, nos a haya un splicacion nobo di ken ta “e esclavo fiel y prudente.” (Mat. 24:45-47) E articulo ey a bisa cu e esclavo fiel ta e Cuerpo Gobernante, y e “sirbidornan di cas” ta tur cu ta ricibi e cuminda spiritual, sea cu nan ta ungi of “otro carne.” (Juan 10:16) Ta un placer pa nos haya sa e berdadnan ey, y gustosamente nos ta siña nan na otro hende. Den ki maneranan mas Jehova a mustra cu e gusta siña hende na un manera simpel y cla?

7, 8. Menciona algun ehempel di relatonan di Bijbel cu a representa algo mas importante den futuro.

⁷ Si bo tin hopi aña ta sirbi Jehova, kisas bo a ripara cu pocopoco a bin un cambio den e manera cu nos publicacionnan ta splica algun relato di Bijbel. Con asina? Antes nos publicacionnan tabatin custumber di bisa cu un of otro relato tabata un drama profetico, es decir, cu nan a representa algo mas importante den futuro. Nan tabata yama e personahe, suceso of obheto un “tipo”, y e cumplimento profetico (of loke el a representa) tabata e “antitipo.” Tin un base pa splica algun relato biblico di e manera aki? Si. Por ehempel, Hesus a papia di “e señal di profeta Jonas.” (Lesa Mateo 12:39, 40.) Hesus a splica cu e tres dianan cu Jonas a pasa den bariga di e pisca—cu casi a bira e graf di Jonas si Jehova no a interveni—a representa e tres dianan cu e lo a pasa den graf.

⁸ Den Bijbel tin mas relato cu a representa algo mas importante den futuro, y apostel Pablo a splica varios di nan. Por ehempel, el a bisa cu e relacion di Abraham cu Agar a representa e relacion cu tabatin entre Jehova cu e nacion di Israel. Y e relacion di Abraham cu Sara a representa e relacion entre Jehova cu e parti celestial di e organisacion di Dios. (Gal. 4:22-26) Asina tambe, e tabernakel, e tempel, e Dia di Expiacion, e sumo sacerdote y otro aspectonan di e Ley di Moises tabata “un sombra di e cosnan bon cu lo a bin.” (Heb. 9:23-25; 10:1) Ta hopi interesante pa studia e relatonan aki y loke nan ta representa, ya cu esaki ta fortalece nos fe. Pero, esey kiermen cu tur personahe, suceso y obheto describi den Bijbel ta representa un persona of algo?

9. Con nos tabata splica e relato biblico di Nabot?

⁹ Antes, nos publicacionnan hopi biaha tabata splica cu cada persona, suceso y obheto den algun relato tabata representa un persona of algo. Tuma, por ehempel, e relato di Nabot. E Reina malbado Jezabel a laga mata Nabot pa asina Acab, casa di e Reina, por a keda cu Nabot su cunucu di wendruif. (1 Rey. 21:1-16) Na 1932, nos publicacionnan a splica cu e relato ey tabatin un nificacion profetico. Acab cu Jezabel a representa Satanas cu su organisacion, Nabot a representa Hesus; y e morto di Nabot a representa e morto di Hesus. Pero decadanan despues, na 1961, e buki “Let Your Name Be Sanctified” a splica cu Nabot a representa e unginan, y Jezabel tabata cristiandad. Pues, e persecucion di Nabot na man di Jezabel a representa e persecucion di e unginan durante e ultimo dianan. Pa hopi aña, e tipo di splicacionnan aki a fortalece e fe di e pueblo di Dios. Dicon awor nos no ta splica e cosnan ey asina mas?

10. (a) Den ki manera e esclavo fiel a demostra awor di ta mas prudente ora di splica cierto relato di Bijbel? (b) Riba kico nos publicacionnan ta concentra mas awe?

 ¹⁰ No ta sorprende nos cu a traves di añanan Jehova a yuda “e esclavo fiel y prudente” bira mas prudente. Den ki manera? Awor e esclavo fiel ta bisa cu un relato di Bijbel ta un drama profetico, of ta representa algo mas importante, solamente ora Bijbel ta indica esey. Ademas, algun di e splicacionnan di antes—manera ken cada personahe a representa y dicon—tabata dificil pa compronde, pa corda y pa pone na practica. Pero mas importante ainda, como cu tabata trata di busca tur posibel nificacion profetico di e relatonan, e lesnan practico mes di e relato a bay perdi of no tabata mucho comprendibel. Pues, awe nos publicacionnan ta concentra mas riba e lesnan simpel y practico relaciona cu fe, perseverancia, devocion na Dios y otro cualidadnan valioso cu nos por siña for di e relatonan biblico ey. *

11. (a) Con nos ta compronde e relato di Nabot awe, y con su ehempel ta yuda nos? (b) Dicon den ultimo añanan nos publicacionnan casi no ta busca e nificacion profetico mas di relatonan di Bijbel? (Wak e “Pregunta di Lector” den e revista aki.)

¹¹ Pues, con nos ta compronde e relato di Nabot awe? E tin lesnan hopi mas simpel y cla. E homber husto ey no a muri pasobra e tabata representa Hesus of e unginan, sino pasobra e tabata un homber cu a mantene su integridad na Dios. El a obedece e Ley di Jehova a pesar cu un gobernante poderoso a persiguie. (Num. 36:7; 1 Rey. 21:3) E ta un bon ehempel pa tur sirbidor di Dios awe, ya cu cualkier un di nos por haya nos cu persecucion pa e mesun motibonan. (Lesa 2 Timoteo 3:12.) E historia ey ta fortalece nos fe, y e tin un les cu tur cristian por compronde, corda y pone na practica.

12. (a) Kico nos no mester conclui en conexion cu e relatonan di Bijbel? (b) Dicon nos por compronde hasta cosnan profundo di Bijbel? (Wak e nota.)

¹² Pero nos no mester conclui for di esaki cu e relatonan di Bijbel tin solamente lesnan practico y niun otro nificacion mas.  Maske nos publicacionnan no ta concentra dje tanto ey mas riba e modelo profetico di un relato di Bijbel, nan ta siña nos si cu cierto aspecto di un relato por ser compara cu algo of cu un persona. Por ehempel, Nabot a keda fiel te na morto, y esey ta laga nos corda riba e fieldad di Cristo y e unginan. Pero tambe e ta corda nos di e integridad di hopi ruman di e grupo di “otro carne” cu a keda fiel te na nan morto. Un comparacion simpel y cla asina ta un caracteristica di e manera cu Jehova ta siña nos. *

13. Menciona algun ilustracion di Hesus cu awor tin un splicacion mas simpel y cla.

¹³ Hesucristo tabata e mihor Maestro cu a yega di biba, y e tabata gusta uza ilustracion, of comparacion, pa siña hende. (Mat. 13:34) Ilustracionnan ta hopi efectivo pasobra nan ta splica ideanan complica na un manera simpel cu ta yega na e curason, ya cu nan ta crea un imagen mental cu ta stimula pensamento. A traves di añanan, nos publicacionnan a splica e ilustracionnan di Hesus na un manera mas simpel y cla. Por ehempel, E Toren di Vigilansia di 1 di juli 2008 a duna nos un splicacion mas cla di e ilustracionnan di Hesus tocante e zuurdeeg, e simia di mosterd y e reda. Awor nos ta compronde cu e ilustracionnan aki ta referi na e Reino di Dios y e exito cu esaki tabatin yudando masha hopi hende rechasa e mundo malbado aki y bira discipel di Cristo.

14. (a) Con nos tabata splica e ilustracion di e bon Samaritano? (b) Con nos ta compronde e ilustracion ey awor?

¹⁴ Pero kico di e relatonan hopi detaya, of parabolanan, cu Hesus a conta? Claro cu algun di e relatonan aki ta simbolico of profetico; otronan ta siña nos lesnan practico. Pero con nos por sa cua ta simbolico y cua ta practico? Jehova a yuda nos y gradualmente e contesta a bira mas y mas cla. Por ehempel, pensa riba e manera cu nos tabata splica Hesus su ilustracion di e bon Samaritano. (Luc. 10:30-37) Na 1924, e revista The Watch Tower a splica cu e Samaritano a representa Hesus; e caminda cu tabata baha for di Jerusalem bay Jerico a representa con bida di hende a bay atras desde e rebelion den Eden; e ladronnan riba caminda a representa empresanan grandi y comerciantenan golos; y e sacerdote cu e levita a simbolisa cristiandad. Pero awe, nos publicacionnan ta uza e ilustracion ey pa corda tur cristian cu nos no mester haci distincion di persona. Nos mester yuda tur hende den necesidad, specialmente pa nan por siña conoce e berdad tocante Jehova. Abo no ta contento cu Jehova ta haci e berdad mas cla pa nos?

15. Kico nos lo considera den e siguiente articulo?

¹⁵ Den e siguiente articulo nos lo analisa un otro ilustracion di Hesus, esun di e dies birgennan. (Mat. 25:1-13) Con Hesus tabata kier pa su siguidornan den e ultimo dianan compronde e ilustracion potente ey? Acaso cada persona, obheto of suceso den e ilustracion tabatin un nificacion simbolico of a representa un persona of algo mas importante den futuro? Of mas bien Hesus tabata kier pa nos saca algun les practico cu lo a yuda nos durante e ultimo dianan? Laga nos wak.